Po o Fai Ieova ma Ou Tofi?

“Ia faaauau pea ona outou saʻili muamua le malo ma le amiotonu a le Atua, ona faaopoopoina ai lea o nei mea uma iā te outou.”—MATA. 6:33.

1, 2. (a) O ai e faatatau iai le “Isaraelu a le Atua” lea e taʻua i le Kalatia 6:16? (e) I le Mataio 19:28, o ai o loo faatatau iai “ituaiga e sefulu lua o Isaraelu”?

PE AFAI e tau lau faitau i le igoa Isaraelu i le Tusi Paia, o le ā e oso aʻe i lou mafaufau? Pe e te mafaufau i le atalii o Isaako o Iakopo, o lē sa suia lona igoa iā Isaraelu? Pe e te mafaufau i ē na tupuga mai iā te ia, le nuu o Isaraelu? Ae faapefea le Isaraelu faaleagaga? Pe a taʻua Isaraelu i se uiga faafaatusa, e masani ona faatatau atu i le “Isaraelu a le Atua,” le 144,000, o ē ua faauuina i le agaga paia e avea ma tupu ma ositaulaga i le lagi. (Kala. 6:16; Faaa. 7:4; 21:12) Ae seʻi mātau mai le faatatauga faapitoa i ituaiga e sefulu lua o Isaraelu, lea e maua i le Mataio 19:28.

² Na fetalai Iesu: “Pe a tiʻetiʻe le Atalii o le tagata i lona nofoālii mamalu i le taimi e toe faafouina ai mea uma, tou te tiʻetiʻe ai foʻi o outou o ē na mulimuli mai iā te aʻu i nofoālii e sefulu lua, ma faamasino atu i ituaiga e sefulu lua o Isaraelu.” I le fuaiupu lenei, o “ituaiga e sefulu lua o Isaraelu,” o i latou ia o le a faamasinoina e soo faauuina o Iesu, ma o le a latou mauaina le ola e faavavau i le lalolagi Parataiso. O le a latou maua aogā mai le auaunaga faaositaulaga a le 144,000.

3, 4. O ā faaaʻoaʻoga lelei ua faataatitia e le ʻaufaauuina faamaoni?

 ³ E pei o ositaulaga ma le ʻau sa Levī i aso anamua, e manatu ē ua faauuina i la latou auaunaga o se faaeaga. (Nu. 18:20) E lē faatalitalia e le ʻaufaauuina o le a latou maua se laueleele po o se nofoaga e fai ma o latou tofi. Nai lo lea, e latou te tulimataʻi atu e avea ma tupu ma ositaulaga faatasi ma Iesu Keriso i le lagi. O le a faaauau ona latou auauna iā Ieova i lenā tofiga, e pei ona faaalia mai i le Faaaliga 4:10, 11, lea e faatatau atu i ē ua faauuina i lo latou tulaga i le lagi.—Eseki. 44:28.

⁴ A o soifua i le lalolagi ē ua faauuina, e faamaonia mai i le auala e latou te ola ai, o loo fai Ieova ma o latou tofi. E sili ona tāua iā i latou la latou auaunaga i le Atua. E latou te faaalia le faatuatua i le taulaga togiola a Keriso ma mulimuli pea iā te ia, ma ua ʻfaamautinoa ai le valaauina ma le filifilia o i latou.’ (2 Pete. 1:10) E eseese uma o latou tulaga ma agavaa. Peitaʻi, e lē avea le gata mai o mea e latou te mafaia, e fai ma faamolemolega e faaitiitia ai lo latou sao i le auaunaga i le Atua. Nai lo lea, e latou te matuā faamuamua le auaunaga i le Atua, ma faia mea uma e latou te mafaia. Ma ua latou faataatia se faaaʻoaʻoga lelei mo i latou uma o loo naunau e ola i le lalolagi parataiso.

5. E mafai faapefea ona fai Ieova ma tofi o Kerisiano uma, ma aiseā e ono avea ai o se luʻi le faia faapea?

⁵ E tusa pe tatou te faamoemoe mo le lagi po o le lalolagi, e tatau ona ʻfaafitia i tatou lava ma amo lo tatou laau e faapuapuagatia ai, ma mulimuli atu pea iā Keriso.’ (Mata. 16:24) E faitau miliona ē o loo tulimataʻi atu e ola i le Parataiso i le lalolagi, o loo tapuaʻi i le Atua ma faaaʻoaʻo iā Keriso i lenā auala. E lē faamalieina i latou i le faia na o sina sao itiiti, pe afai e latou te iloa e sili atu mea e mafai ona latou faia. Ua uunaʻia le toʻatele e faafaigofie o latou olaga ma avea ma paeonia. O isi ua mafai ona paeonia mo na o ni nai masina o tausaga taʻitasi. O isi e lē o mafai ona paeonia, ae ua latou faia mea uma e latou te mafaia i le auaunaga i le faiva. Ua pei i latou o Maria, o lē sa faaalia le agaga tuutoina e ala i lona liligiina o le suāuu manogi i le ao o Iesu. Na fetalai Iesu: “O se gaoioiga lelei lea ua ia faia iā te aʻu . . . Ua ia faia le mea na te mafaia.” (Mareko 14:6-8) Atonu e lē faigofie ona tatou faia mea uma e tatou te mafaia, ona o loo tatou ola i se lalolagi o loo pulea e Satani. Ae e tatou te matuā finafinau ma tuu atu lo tatou faatuatuaga iā Ieova. Mātau le auala e tatou te faia ai faapea i vala patino nei e fā.

Saʻili Muamua le Malo o le Atua

6. (a) Ua faaalia faapefea e tagata lautele, ua na o le olaga lenei ua fai ma o latou tofi? (e) Aiseā e sili atu ai ona aogā le vaaiga lea sa iā Tavita?

⁶ Sa aʻoaʻoina e Iesu ona soo ia muaʻi saʻili le Malo ma le amiotonu a le Atua. E muaʻi saʻili e tagata o le lalolagi o latou lava manaʻoga, i le avea ai ma “tagata o lenei faiga o mea a le lalolagi, o ē ua iai so latou tofi i lenei olaga.” (Faitau le Salamo 17:1, 13-15.) E aunoa ma le amanaʻiaina o Lē na faia i latou, e toʻatele ua latou saʻilia se olaga toʻafimālie, tausia aʻe se aiga, ma tuua ni alagāʻoa mo a latou fanau. Ua na o le olaga lenei ua fai ma o latou tofi. Peitaʻi, sa naunau Tavita e fai se “igoa lelei” ma Ieova, e pei ona mulimuli ane fautuaina e lona atalii o Solomona tagata uma ia faia faapea. (Fai. 7:1) E pei lava o Asafo, na iloa e Tavita o le avea o Ieova ma ana Uō, e sili mamao atu i lo le faamuamua o ona lava manaʻoga o le olaga. Sa olioli o ia e savavali ma le Atua. I o tatou aso, e toʻatele Kerisiano ua latou faamuamua galuega faaleagaga nai lo o galuega totogi.

7. O le ā le faamanuiaga na maua e se uso ona o le faamuamua o le Malo?

⁷ Seʻi manatu foʻi iā Jean-Claude, mai le Malo o Aferika Tutotonu. O ia o se toeaina ua faaipoipo ma e toʻatolu le la fanau. I lenā atunuu, e faigatā tele ona maua se galuega totogi, ma o le toʻatele o tagata e latou te faia so o se mea ina ia tumau ai i a latou galuega. I se tasi aso, na faapea atu ai le pule iā Jean-Claude e amata ona galue i le sifi pō—e amata i le 6:30 i le afiafi i aso e fitu o le vaiaso. Na faamatala atu e Jean-Claude, e faaopoopo atu i le tausia o lona aiga i le itu faaletino, e ao foʻi ona ia tausia lo latou lelei faaleagaga.  Na ia taʻua foʻi e iai lana matafaioi ia fesoasoani i le faapotopotoga. O le ā le tali a le pule? “Afai ua faamanuiaina oe i le mauaina o se galuega, e tatau la ona e faagalo isi mea uma, e aofia ai lou toʻalua, lau fanau ma ou faafitauli. E tatau ona tuutoina lou olaga i lau galuega—na o lau galuega lava. Filifili la oe: o lau lotu po o lau galuega.” Ana faapea o oe, o le ā lau mea e fai? Na iloa e Jean-Claude, afai e leiloa lana galuega, o le a tausia o ia e le Atua. O le a tele pea mea e na te faia i le auaunaga i le Atua, ma o le a fesoasoani Ieova e tausia manaʻoga faaletino o lona aiga. O lea la, sa auai o ia i le sauniga e sosoo ai i le ogatotonu o le vaiaso. Ina ua uma le sauniga, na sauni o ia e alu i le galuega, ma sa lē mautinoa pe o le a tumau pea lana galuega. Ae i le taimi lava lenā, na tatagi mai ai le telefoni. Ua faateʻa le pule o le galuega, ae na tumau pea le galuega a lo tatou uso.

8, 9. E faapefea ona tatou faataʻitaʻi i le ʻauositaulaga ma le ʻau sa Levī, e ala i le fai o Ieova ma o tatou tofi?

⁸ O nisi na oo i le tulaga e foliga mai o le a lē tumau a latou galuega, atonu ua taumānatu, ʻO le a faapefea nei la ona faatino loʻu tiute o le tausia o loʻu aiga i le itu faaletino?’ (1 Timo. 5:8) E tusa po ua e fesagaʻi ma se luʻi faapea pe leai, ae atonu ua e iloa mai i mea ua tutupu i lou olaga, e lē taitai ona e faanoanoa pe afai e fai Ieova ma ou tofi, ma matuā faatāua lou faaeaga o le auauna atu iā te ia. Ina ua fetalai atu Iesu i ona soo ia faaauau ona saʻili muamua le malo, sa ia faamautinoa atu iā i latou: “O nei mea uma”—e pei o meaʻai, meainu, ma lavalava—o le a “faaopoopoina . . . iā te outou.”—Mata. 6:33

⁹ Seʻi manatu i le ʻau sa Levī, o ē e leʻi maua so latou tofi o le laueleele. Ona sa avea le tapuaʻiga mamā ma o latou taulaʻiga autū, na tatau ai ona latou faalagolago atu iā Ieova e tausia i latou, o lē na fetalai mai iā i latou: “E fai aʻu ma au vaega.” (Nu. 18:20) E ui e tatou te lē o auauna i se malumalu faaletino e pei ona faia e ositaulaga ma le ʻau sa Levī, ae e mafai ona tatou faataʻitaʻi i le agaga sa iā i latou, o le mautinoa lea e tausia e Ieova i tatou. A o tulata atu i le iʻuga, e tatou te faatalitalia o le a atili ona faigatā le olaga mo i tatou, o ē o loo tumau ona lē avea ma vaega o le lalolagi a Satani. O lea ua atili ai ona matuā tāua ona tatou faatuatuaina le Atua e na te tausia i tatou.—Faaa. 13:17.

Saʻili Muamua le Amiotonu a le Atua

10, 11. Ua faapefea i nisi ona faatuatuaina Ieova e tusa ai ma galuega totogi? Aumai se faaaʻoaʻoga.

¹⁰ Sa uunaʻia foʻi e Iesu ona soo ia ʻfaaauau pea ona saʻili muamua le amiotonu a le Atua.’ (Mata. 6:33) O lona uiga, ia faamuamua tapulaa a Ieova i mea e saʻo ma mea e sesē, nai lo o manatu o tagata. (Faitau le Isaia 55:8, 9.) Atonu o loo e manatua le taimi ua mavae, sa aafia le tele o nisi tagata i le totōina po o le faatau atu o le tapaa, aʻoaʻoina o isi i faigātaua, po o le gaosia ma faatau atu o auupega mo taua. Ae ina ua latou maua le poto o le upu moni, na filifili le toʻatele e suia a latou galuega, ma agavaa ai e papatiso.—Isa. 2:4; 2 Kori. 7:1; Kala. 5:14.

¹¹ O Andrew o se faaaʻoaʻga o lenei mea. Ina ua la aʻoaʻoina ma lona toʻalua mea e uiga iā Ieova, na la filifili loa e auauana iā te ia. Sa lelei tele Andrew i lana galuega, ae na ia tuua lea galuega. Aiseā? Auā sa faigaluega i se faalapotopotoga e aafia i mataupu tau taua, ae na manaʻo o ia e faamuamua le amiotonu a le Atua. Ina ua tuua e Andrew lana galuega, ua toʻalua lana fanau, lē toe iai ni tupe maua, ae e pau tupe na iā te ia, o tupe e ola ai mo na o ni nai masina. I le vaaiga faaletagata, e foliga mai ua leai sona ʻtofi.’ Sa ia saʻili mo se galuega ma faatuatua atu i le Atua. Pe a toe tōmanatu i tua, ua mautinoa e ia ma lona aiga, e lē puupuu le aao o Ieova. (Isa. 59:1) E ala i le faafaigofie o o latou  olaga, na mafai ai e Andrew ma lona toʻalua ona maua le faaeaga o le auai i le faiva faataimi atoa. Fai mai a ia, “Na iai lava taimi na matou popole ai i mea tau tupe, fale e nonofo ai, soifua mālōlōina ma le faasolo ina matutua. Ae e fesoasoani mai pea Ieova iā i matou . . . E mafai ona matou faapea atu ma le mautinoa, o le auauna iā Ieova, e lē fesiligia o le olaga sili lea ma tauia e saʻilia e tagata.” *—Fai. 12:13.

12. O le ā le uiga e manaʻomia ina ia faamuamua ai tapulaa a le Atua? Ia taʻua ni faaaʻoaʻoga mai i lo outou vaipanoa.

¹² Na fetalai atu Iesu i ona soo: “Afai e pei lo outou faatuatua o le fatu o le sinapi, tou te fai atu i lenei mauga, ʻIa siitia oe i o,’ ona siitia ai lea, ma e leai se mea tou te lē mafaia.” (Mata. 17:20) Pe e mafai ona e faamuamua tapulaa a le Atua, pe afai o lenā mea e iʻu ai i ni tulaga faigatā? Afai e te lē mautinoa pe mafai ona e faia faapea, ia talanoa atu i isi o le faapotopotoga. E lē taumatea o le a faafouina faaleagaga oe pe a faalogo atu o faamatala mai mea na tutupu iā i latou.

Talisapaia Sauniuniga Faaleagaga a Ieova

13. Pe a tatou finafinau i le auaunaga iā Ieova, o le ā e tatou te faatalitalia e tusa ai ma sauniuniga faaleagaga?

¹³ Afai e tāua iā te oe lou faaeaga o le auauna iā Ieova, e te mautinoa la o le a ia tausia ou manaʻoga i le itu faaletino ma le faaleagaga, e pei lava ona ia saunia manaʻoga o le ʻau sa Levī. Seʻi manatu iā Tavita. E ui sa iai o ia i se ana, ae sa ia mautinoa o le a saunia e Ieova mea e na te manaʻomia. E mafai foʻi ona tatou faalagolago atu iā Ieova, e oo lava i taimi e lē manino mai ai le auala e tatou te sao ai. Ia manatua le taimi na ulu atu ai Asafo i le “afioaga paia o le Atua,” sa malamalama o ia i le mea sa avea ma ona atugaluga. (Sala. 73:17) I se tulaga talitutusa, e manaʻomia ona tatou liliu atu i le Atua, o le Puna o faamalosiauga faaleagaga. Ona faaalia ai lea e tatou te talisapaia lo tatou faaeaga o le auauna atu i le Atua, e tusa lava po le ā lo tatou tulaga. O le faia faapea, ua fai ai Ieova ma o tatou tofi.

14, 15. O le ā le auala e tatau ona tatou tali atu ai pe a aumai se faamalamalamaga atili e uiga i ni mau o le Tusi Paia, ma aiseā?

¹⁴ E faapefea ona e tali atu, pe a faasusulu mai e Ieova, o le Puna o le malamalama faaleagaga, se malamalamaga i “mea loloto a le Atua”? (1 Kori. 2:10-13) E tatou te maua se faaaʻoaʻoga lelei i le tali atu a le aposetolo o Peteru, ina ua fetalai Iesu i Lana ʻaufaalogologo: “Pe afai tou te lē aai i le tino o le Atalii o le tagata, ma inu i lona toto, e lē i totonu iā te outou le ola.” Ona o lo latou faatatauina faaletino o na upu, e toʻatele soo na faapea atu: “E mataʻutia nei upu; o ai se isi e fia faalogo i ai?” Na latou “toe foʻi . . . i mea na latou tuua.” Ae na faapea atu Peteru: “Le Alii e, o ai a matou ō i ai? Ua iā te oe upu o le ola e faavavau.”—Ioa. 6:53, 60, 66, 68.

¹⁵ E leʻi malamalama atoatoa Peteru i le uiga o upu a Iesu, e faatatau i le aai i Lona tino ma inu i Lona toto. Ae na faalagolago le aposetolo i le Atua mo le faamalamalamaga faaleagaga. Pe a faamalamalama atili mai se mataupu faaleagaga, pe e te taumafai e malamalama i māfuaaga faale-Tusi Paia ua faia ai lenā suiga? (Faata. 4:18) Sa talia e tagata Perea i le uluaʻi senituri le upu “ma le fiafia tele, ua latou matuā iloiloina Tusitusiga Paia.” (Galu. 17:11) O le faataʻitaʻi iā i latou, o le a atili ai ona e talisapaia lou faaeaga o le auauna iā Ieova, ma fai o ia ma ou tofi.

Faaipoipo Tau Lava o Lē ua i le Alii

16. E faapefea ona fai le Atua ma o tatou tofi e tusa ai o le faatonuga o loo i le 1 Korinito 7:39?

¹⁶ O se isi vala e manaʻomia i Kerisiano ona manatua ai pea le finagalo o le Atua, o le faatatauina lea o le taʻiala a le Tusi Paia, ia faaipoipo “tau lava o lē ua i le Alii.” (1 Kori. 7:39) E toʻatele ua latou filifili e tumau i le tulaga o le nofofua, nai lo le solia o lenei fautuaga a le Atua. E tausia ma le agalelei e Ieova i latou na. O le ā na faia e Tavita ina ua iā te ia le lagona tuua toʻatasi, ma foliga mai ua leai se fesoasoani mo ia? Na faapea mai o ia: ʻNa ou sasaa atu pea i luma  o le Atua oʻu popolega; Na ou taʻu atu pea foʻi i ona luma oʻu puapuaga, ina ua vaivai loʻu loto i totonu iā te aʻu.’ (Sala. 142:1-3) Atonu e faapena foʻi faalogona na oo i le perofeta o Ieremia, o lē sa auauna ma le faamaoni i le Atua mo le tele o tausaga, a o nofofua. Atonu e te fia suʻesuʻeina atili lana faaaʻoaʻoga e pei ona talanoaina i le mataupu e 8 o le tusi God’s Word for Us Through Jeremiah.

17. Ua faapefea ona feagai se tuafafine nofofua ma faalogona tuua toʻatasi e ono tulaʻi mai i nisi taimi?

¹⁷ Ua faapea mai se tasi tuafafine mai i Amerika: “Ou te leʻi faia se tautoga o le a ou nofofua pea. Ou te fia faaipoipo pe afai e maua se tagata e fetaui lelei mo aʻu. Sa taumafai loʻu tinā lē talitonu e faamalosia aʻu ia faaipoipo i so o se tasi. Ae na ou fesili atu i ai, pe e manaʻo e tuuaʻia o ia pe afai e iʻu ane e lē taulau la ma faaipoipoga. Mulimuli ane, na ia mātauina o loo lelei laʻu galuega, sa ou tausia aʻu lava ma sa ou fiafia foʻi. Ona ia lē toe faamalosia lea o aʻu e faaipoipo.” O nisi taimi e lagona ai e lenei tuafafine le tuua toʻatasi. Ua ia faapea mai: “O taimi na ou te taumafai ai e fai Ieova ma oʻu faatuatuaga. E lē taitai ona ia tuulafoaʻia aʻu.” O le ā ua fesoasoani iā te ia e faatuatua atu iā Ieova? Ua ia faapea mai: “E fesoasoani le tatalo iā te aʻu ou te lagona ai e moni le Atua ma e lē taitai ona ia tuulafoaʻiina aʻu. O loo faafofoga mai pea Lē e Silisili Ese, e faapefea la ona ou lē lagonaina le faamamaluina ma le olioli?” Ona ua ia mautinoa “e sili le fiafia e maua i le foaʻi atu i lo o le talia mai,” ua ia faapea mai ai: “Ou te taumafai lava e fesoasoani atu i isi, e aunoa ma le faatalitalia o se mea mai iā i latou. Pe a ou mafaufau e faapea, ʻO le ā e mafai ona ou faia e fesoasoani ai i lenei tagata?’ Ou te lagona le olioli.” (Galu. 20:35) Ioe, ua fai Ieova ma ona tofi, ma o loo olioli o ia i lona faaeaga o le auauna atu iā te Ia.

18. O le ā le uiga o le fai o oe ma tofi o Ieova?

¹⁸ Po o le ā lava le tulaga e oo iā te oe, e mafai ona fai le Atua ma ou tofi. O lou faia faapea, o le a aofia ai oe i ona tagata fiafia. (2 Kori. 6:16, 17) O le a iʻu ai ina fai oe ma vaega po o tofi o Ieova, e pei o nisi i taimi ua tuanaʻi. (Faitau le Teuteronome 32:9, 10.) E pei lava ona avea Isaraelu ma tofi o le Atua mai i nuu uma, e mafai foʻi ona faailogaina oe o se tagata o Ieova, ma e na te tausia ma le alofa oe.—Sala. 17:8.

[Faaopoopoga i lalo]

O le ā Lau Tali?

E mafai faapefea ona e fai Ieova ma ou tofi

• e ala i le saʻilia muamua o le Malo o le Atua ma lana amiotonu?

• e ala i le faaalia o le talisapaia mo meaʻai faaleagaga?

• e ala i le usitaʻia o le faatonuga a le Atua ia faaipoipo tau lava o lē ua i le Alii?

[Fesili mo le Suʻesuʻega]

[Faamatalaga faaopoopo i le itulau 13]

E fai Ieova ma o tatou tofi, pe afai e avea le auaunaga iā te ia ma taulaʻiga autū i o tatou olaga

[Ata i le itulau 15]

O se faalaeiauga le faaaʻoaʻoga a Ieremia