Yu e meki Yehovah de yu gudu?

„Tan suku fosi a Kownukondre nanga Gado en retidu, dan unu o kisi ala den tra sani tu.”​—MAT. 6:33.

1, 2. (a) Suma na a „Israel fu Gado” di Galasiasma 6:16 e taki fu en? (b) Suma na „den twarfu lo fu Israel” di Mateyus 19:28 e taki fu den?

TE YU e leisi a nen Israel na ini Bijbel, san na a fosi sani di yu e prakseri? Yu e prakseri Isak en fosi manpikin Yakob di ben kisi a nen Israel? Noso yu e prakseri den bakapikin fu en di tron a pipel Israel fu owruten? Noso yu e prakseri „na Israel fu Gado”? Te Bijbel e taki fu „na Israel fu Gado”, dan dati abi fu du nanga den 144.000 sma di salfu nanga santa yeye fu tron kownu nanga priester na ini hemel (Gal. 6:16; Openb. 7:4; 21:12). Ma wan tra fasi de tu fa Bijbel e gebroiki a wortu Israel. Wi kan leisi fu dati na Mateyus 19:28.

² Yesus taki: „Te sani meki kon nyun baka èn a Manpikin fu libisma sidon na tapu en gran kownusturu, dan unu di waka na mi baka o sidon tu na tapu twarfu kownusturu fu krutu den twarfu lo fu Israel.” Na ini a vers disi „den twarfu lo fu Israel” na den sma di den salfu disipel fu Yesus o krutu. Na den o kisi têgo libi na ini wan paradijs na grontapu. Den 144.000 sma o de leki krutuman nanga priester gi den.

3, 4. Sortu moi eksempre den salfuwan e gi wi?

 ³ Neleki den priester nanga den tra Leifisma fu owruten, den salfuwan na ini a ten disi e si a wroko di den e du leki wan grani (Num. 18:20). Den salfuwan no e fruwakti fu kisi wan pisi gron noso wan presi na grontapu leki gudu. Na presi fu dati, Openbaring 4:10, 11 e sori taki den o tan wroko gi Yehovah na hemel, pe den o de kownu nanga priester makandra nanga Yesus Krestes.​—Esek. 44:28.

⁴ Na grontapu den salfuwan e libi na wan fasi di e sori taki Yehovah na a gudu fu den. A grani fu dini Gado na a moro prenspari sani gi den. Den e bribi na ini Krestes en lusu-paiman èn den e waka na en baka doronomo. Na so den e ’du ala muiti fu tan de sma di Gado kari èn di a teki’ (2 Petr. 1:10). Den abi difrenti koni èn den de na ini difrenti situwâsi. Son sani den no man du, ma toku dati no e meki den du pikinso nomo na ini a diniwroko fu Gado. Na presi fu dati den e du ala san den man, fu di a diniwroko fu Gado na a moro prenspari sani gi den. Den de wan bun eksempre gi den wan di abi a howpu fu libi na ini wan paradijs na grontapu.

5. Fa ala Kresten kan abi Yehovah leki gudu èn fu san ede dati kan de wan muilek sani?

⁵ Awinsi wi abi a howpu fu libi na hemel noso na grontapu, wi ’no musu teri wisrefi moro, ma wi musu teki wi pinapostu èn wi musu tan waka na Krestes baka’ (Mat. 16:24). Milyunmilyun sma di abi a howpu fu libi na ini wan paradijs na grontapu e anbegi Gado èn den e waka na Krestes baka na a fasi dati. Den no e du pikinso nomo efu den sabi taki den kan du moro. Furu fu den bosroiti fu abi soso den sani di de fanowdu trutru na ini a libi, so taki den kan tron pionier. Trawan e du muiti fu pionier wan tu mun ibri yari. Yu abi trawan tu di no man pionier, ma den e du ala san den man na ini a preikiwroko. Den de leki Maria di ben kanti switismeri oli na tapu na ede fu Yesus. Yesus taki: „A du wan bun sani gi mi. . . . Na uma disi du san a ben man du” (Mark. 14:6-8). Wi e libi na ini wan grontapu di Satan e tiri, sobun a kan muilek fu du ala san wi man na ini a diniwroko fu Gado. Ma toku wi e du ala san wi man èn wi e frutrow tapu Yehovah. Meki wi luku fo fasi fa wi kan du dati.

Suku fosi Gado Kownukondre

6. (a) Fa furu sma e sori taki a gudu fu den na soso san den man kisi na ini a libi disi? (b) Fu san ede a moro bun fu abi a denki fu David?

⁶ Yesus leri den bakaman fu en fu suku fosi a Kownukondre nanga Gado en retidu. Den sma fu grontapu e suku wini gi densrefi nomo. Bijbel e taki dati den ’sma fu a grontapu disi e prakseri soso san den kan kisi na ini a libi disi’. (Leisi Psalm 17:1, 13-15.) Furu fu den no e poti prakseri na a Mekiman fu den. Na presi fu dati den e du muiti fu abi wan switi libi, fu seti wan osofamiri èn fu libi wan gudu na baka gi den pikin fu den. A gudu fu den na soso san den man kisi na ini a libi disi. Ma David ben wani abi „wan bun nen” na Yehovah. Bakaten en manpikin gi sma deki-ati fu du dati tu (Preik. 7:1). Neleki Asaf, David ben frustan taki a moro prenspari sani na ini a libi na fu de Yehovah mati. A ben lobi fu waka nanga Gado. Na ini a ten disi furu Kresten sori taki a wroko di den e du gi Yehovah prenspari moro a grontapuwroko fu den.

7. Sortu blesi wan brada kisi fu di a suku a Kownukondre fosi?

⁷ Luku na ondrofenitori fu Jean-Claude fu a Republiek fu Centraal Afrika. A de wan owruman di trow èn di abi dri pikin. Na ini a kondre dati a muilek fu feni wroko èn furu sma o du iniwan sani soso fu man hori a wroko fu den. Wan dei a basi taigi Jean-Claude taki a ben musu bigin wroko 6.30 na neti, seibi dei wan wiki. Jean-Claude fruteri a basi taki a tru taki a musu sorgu en osofamiri, ma a prenspari tu fu yepi den fu anbegi Gado. A taigi en tu taki a ben abi frantwortu na ini a gemeente. A basi taigi en: „Yu musu breiti taki yu abi wan wroko. Sobun, yu musu frigiti ala tra sani. Yu  musu frigiti yu wefi, yu pikin, èn yu problema. A wroko musu de yu heri libi. Teki wan bosroiti nownow. San yu o teki: yu kerki noso yu wroko?” San yu ben o du? We, Jean-Claude ben sabi taki Gado ben o sorgu gi en efu a ben lasi en wroko. Awinsi a ben o lasi en wroko, toku a ben o man du furu na ini a diniwroko fu Gado, èn Yehovah ben o yepi en fu sorgu gi en osofamiri. Dati meki a go na a mindriwiki konmakandra èn baka dati a sreka ensrefi fu go na wroko aladi a no ben sabi efu a abi a wroko ete. Leti na a momenti dati wan sma bèl en. A yere taki a basi lasi en wroko, ma en ben abi en wroko ete.

8, 9. Fa wi kan abi Yehovah leki gudu, neleki den priester nanga den tra Leifisma?

⁸ Kande son sma di ben kan lasi den wroko, aksi densrefi: ’Efu mi lasi mi wroko, dan fa mi o man sorgu mi osofamiri?’ (1 Tim. 5:8) A kan taki so wan sani pasa nanga yu. Ma awinsi dati no de so, toku yu srefi sabi èn ondrofeni kande taki noiti Gado e drai baka gi den wan di abi en leki gudu èn di e poti a diniwroko fu en na a fosi presi na ini den libi. Di Yesus taigi den disipel fu en fu tan suku fosi a Kownukondre, a gi den a dyaranti disi: „Unu o kisi ala den tra sani tu.” Disi wani taki dati wi o kisi ala sani soleki nyanyan, dringi, nanga krosi.​—Mat. 6:33.

⁹ Prakseri den Leifisma di no kisi wan pisi gron leki famirigudu. Fu di den ben abi a wroko fu teki fesi gi a pipel na ini a tru anbegi, meki den ben musu abi a frutrow taki Yehovah ben o sorgu gi den. A ben taigi den: „Mi na a famirigudu fu unu” (Num. 18:20). Wi no e wroko na wan trutru tempel neleki den priester nanga den tra Leifisma, ma wi kan abi a srefi denki leki den te wi abi a frutrow taki Yehovah o sorgu gi wi. Fu di a kaba e kon moro krosibei, meki wi kan fruwakti taki a o kon moro muilek gi wi di e weigri fu teki „a marki” fu na ogri meti. Sobun, dei fu dei a e kon moro prenspari fu abi a frutrow taki Gado o sorgu gi wi.​—Openb. 13:17.

Suku fosi Gado en retidu

10, 11. Fa son sma sori taki den e frutrow tapu Gado di den ben musu suku wroko? Gi wan eksempre.

¹⁰ Yesus ben gi den disipel fu en a deki-ati tu fu ’tan suku fosi Gado en retidu’ (Mat. 6:33). Disi wani taki dati wi no e teki a denki fu libisma, ma wi e si Yehovah leki a sma di musu taki san bun èn san no bun. (Leisi Yesaya 55:8, 9.) Kande yu e memre taki fosi, wan tu sma ben e prani èn seri tabaka noso sani di abi tabaka na ini, trawan ben e leri sma fu feti leki srudati, noso den ben e meki èn seri ala sortu fetisani. Ma baka di den kon sabi a tru leri, furu fu den bosroiti fu du wan tra wroko, so taki den ben kan teki dopu.​—Yes. 2:4; 2 Kor. 7:1; Gal. 5:14.

¹¹ Andrew na so wan sma. Di en nanga en wefi kon leri sabi Yehovah, den bosroiti fu dini en. Andrew ben lobi en wroko trutru, ma toku a libi en. Fu san ede? Fu di a ben wroko gi wan organisâsi di ben e horibaka gi feti èn a ben wani poti Gado en retidu na a fosi presi na ini en libi. Di Andrew libi en wroko, a ben abi tu pikin, a ben abi moni gi wan tu mun nomo èn a no ben abi wan tra fasi fu kisi moni. Te yu ben o luku a tori disi libisma fasi, a ben o gersi leki a no ben abi nowan ’famirigudu’, neleki den Leifisma. A go suku wan wroko nanga a frutrow taki Gado ben o yepi en. Te en nanga en osofamiri e prakseri baka fa sani waka, den e si krin taki na anu fu Yehovah no syatu tumusi fu yepi sma (Yes. 59:1). Fu di Andrew nanga en wefi bosroiti fu libi soso nanga den sani di den abi fanowdu trutru, meki den ben man pionier. Andrew taki: „Son leisi wi ben abi broko-ede, fu di wi ben abi moni problema, wi no  ben abi wan tanpresi, wi ben e siki èn wi e kon owru. Ma ala ten Yehovah ben de na wi sei. . . . Nanga a bradi kanti fu wi mofo wi kan taki dati a moro bun sani di wan sma kan du na fu dini Yehovah èn dati na a moro bigi grani di wan sma kan abi.” *​—Preik. 12:13.

12. San yu musu abi efu yu wani suku Gado en retidu fosi? Gi wan tu eksempre fu sma na ini a kondre fu yu.

¹² Yesus ben taigi den disipel fu en: „Efu a bribi fu unu pikin leki wan mosterd-siri, dan unu o man taigi a bergi disi: ’Opo fu dya go drape’, èn a bergi o opo ensrefi go drape. Noti sa de di unu no man du” (Mat. 17:20). Yu ben o suku Gado en retidu fosi, efu yu sabi taki dati o tyari problema kon gi yu? Efu yu e tweifri taki disi de so, dan taki nanga den tra Kresten na ini yu gemeente. A o tranga yu bribi te yu yere fa Yehovah yepi den.

Warderi den sani di Yehovah gi yu

13. Fu sortu sani yu kan de seiker efu yu e du muiti fu dini Yehovah?

¹³ Efu yu e si en leki wan grani fu dini Yehovah, dan yu kan de seiker taki a o sorgu gi yu neleki fa a ben sorgu gi den Leifisma èn a o yepi yu fu tan wan mati fu en. Prakseri David. A ben de na ini wan bergi-olo, ma toku a ben kan abi a frutrow taki Gado ben o sorgu gi en. Wi kan frutrow tapu Yehovah tu, srefi efu a gersi leki yepi no de. Memre taki di Asaf kon „na ini a gran santa presi fu Gado”, a kon frustan san ben gi en broko-ede (Ps. 73:17). Na so a de tu taki wi musu abi a frutrow taki Yehovah o gi wi san wi abi fanowdu fu man de wan mati fu en. Te wi abi a frutrow dati, wi e sori taki wi e si en leki wan grani fu dini Gado, awinsi na ini sortu situwâsi wi de. Na so wi e meki Yehovah de wi gudu.

14, 15. San wi musu du te wan kenki kon na a fasi fa wi e frustan wan sani di Bijbel e leri? Fu san ede wi musu du dati?

¹⁴ Te Yehovah e tyari „den dipi sani fu Gado” di de na ini Bijbel kon na krin gi wi, dan sortu krakti dati abi na yu tapu? (1 Kor. 2:10-13) A moi fu si fa Petrus ben e denki di Yesus taigi den arkiman: „Efu unu no e nyan a skin fu a Manpikin fu libisma èn unu no e dringi en brudu, dan unu no abi libi na ini unsrefi.” Furu disipel ben denki taki Yesus ben e taki fu en trutru skin nanga brudu. Dati meki den taki: „A sani di a taki e gi groskin. Suma kan tan arki den sani disi?” Dan den „gowe go du den sani di den ben e du fosi”. Ma Petrus taki: „Masra, na suma wi musu go? Yu abi wortu di e gi sma têgo libi.”​—Yoh. 6:53, 60, 66, 68.

¹⁵ Petrus no ben frustan krin san Yesus ben wani taki di a taki dati den musu nyan en skin èn dringi en brudu. Ma a ben bribi taki Yehovah ben o yepi en fu frustan a tru leri. Te wan kenki kon na a fasi fa wi e frustan wan sani di Bijbel e leri, dan yu e pruberi fu frustan fu san ede a kenki dati kon? (Odo 4:18) Den Bereyasma fu a fosi yarihondro ben teki a wortu „nanga den heri ati èn den ben e ondrosuku Gado Buku finifini ibri dei” (Tori. 17:11). Te yu du leki den, dan yu o kisi moro warderi gi a grani fu dini Yehovah èn fu abi en leki yu gudu.

Trow soso nanga wan sma di de wan bakaman fu Masra

16. Fa wi kan sori taki wi abi Gado leki wi gudu te a abi fu du nanga a rai na 1 Korentesma 7:39?

¹⁶ Wan tra fasi fa Kresten kan sori taki den e frutrow tapu Gado, na te den e gi yesi na a Bijbel rai fu trow „soso nanga wan sma di de wan bakaman fu Masra” (1 Kor. 7:39). Furu Kresten bosroiti fu no trow, fu di den no wani trangayesi Gado di e gi a rai disi. A e sorgu bun gi den sma di e teki a rai disi. San David du di a ben firi leki en wawan de èn leki nowan sma de fu yepi en? A taki: „Doronomo mi ben e fruteri [Gado] san ben e moro mi. Doronomo mi ben e fruteri en den nowtu fu mi di mi ben lasi-ati” (Ps. 142:1-3). A kan taki  a profeiti Yeremia ben abi den srefi sortu firi disi. Furu yari langa a ben e dini Gado fayafaya aladi a no ben trow. Yu kan leisi fu en na ini kapitel 8 fu a buku God spreekt tot ons via Jeremia (Gado e taki nanga wi nanga yepi fu Yeremia). *

17. San wan sisa e du te a e firi son leisi leki en wawan de?

¹⁷ Wan sisa na Amerkankondre taki: „Noiti mi bosroiti fu no trow. Mi sa trow te mi miti a yoisti sma. Mi mama di no de wan Kotoigi ben wani overtoigi mi taki mi kan trow nanga iniwan sma di wani mi. Dan mi aksi en efu a ben o wani tyari a frantwortu efu mi trowlibi no waka bun. Bakaten a si taki mi ben abi wan bun wroko, mi ben man sorgu misrefi èn mi ben de koloku. Ne a no dwengi mi moro fu trow.” Son tron a sisa disi e firi leki en wawan de. Ma a taki: „Dan mi e frutrow tapu Yehovah. Noiti a drai baka gi mi.” San yepi a sisa disi fu frutrow tapu Yehovah? „Begi e yepi mi fu frustan taki Gado na wan trutru sma èn taki noiti mi de mi wawan. Fa mi no kan firi taki mi prenspari efu a Moro Heiwan fu hemel nanga grontapu e arki mi? Fa mi no kan firi koloku dan?” A sisa disi de seiker taki „wan sma sa de moro koloku te a e gi sani, leki te a e kisi sani” èn dati meki a taki: „Mi e du muiti fu yepi trawan èn mi no e fruwakti taki den musu fu du wan sani gi mi tu. Te mi e prakseri nomo san mi kan du fu yepi wan sma, dan mi breiti kaba” (Tori. 20:35). Iya, Yehovah na a gudu fu en èn a breiti fu dini en.

18. Fa yu kan tron Yehovah en gudu?

¹⁸ Awinsi na ini sortu situwâsi yu de, yu kan meki Gado de a gudu fu yu. Te yu e du disi, dan yu o de wan fu den koloku anbegiman fu en (2 Kor. 6:16, 17). Disi kan meki taki yu tron Yehovah en gudu soleki fa son sma fu owruten ben de dati. (Leisi Deuteronomium 32:9, 10.) Fu ala den pipel na grontapu, na Israel Gado ben teki leki a gudu fu en. Na so a kan teki yu leki en gudu tu èn sorgu gi yu na wan lobi-ati fasi.​—Ps. 17:8.

[Futuwortu]

San yu ben sa piki?

Fu san ede yu kan taki dati Yehovah na a gudu fu yu

• te yu e suku fosi Gado Kownukondre nanga en retidu?

• te yu e sori warderi gi den sani di Yehovah gi yu?

• te yu e gi yesi na a komando di Gado gi taki wi musu trow soso nanga wan sma di de wan bakaman fu Masra?

[Aksi fu a tori disi]

[Prenspari pisi na tapu bladzijde 13]

Yehovah e tron a gudu fu wi te wi e poti a diniwroko fu en na a fosi presi na ini wi libi

[Prenki na tapu bladzijde 15]

Na eksempre fu Yeremia e gi wi deki-ati