Onde wɛ mbetawɔka dia Jehowa monga etenyi kayɛ k’okitɔ?
Onde wɛ mbetawɔka dia Jehowa monga etenyi kayɛ k’okitɔ?
“Ntundu nyutayangi diulelu la ololo wa [Nzambi], ku diango so tshe diayuyala dianyu.”—MAT. 6:33.
1, 2. a) Alembetshiya “Isariyele wa [Nzambi]” watɛkɛtama lo Ngalatiya 6:16? b) “Waoho dikumi l’ahende wa Isariyele” watɛkɛtama lo Mateu 19:28 nembetshiyaka waa na?
ETENA kadiayɛ lokombo Isariyɛlɛ lo Bible, dui diakɔna diakoyɛ lo yimba? Onde wɛ fɔnyaka dikambo dia Jakɔbɔ y’ɔna Isaka lakawayɔlɛka Isariyɛlɛ kana wɛ fɔnyaka dikambo dia tokanula tande, mbuta ate wodja w’Isariyɛlɛ w’edjedja? Ko kayotota dikambo di’Isariyɛlɛ wa lo nyuma? Etena katɛkɛtawɔ dikambo di’Isariyɛlɛ lo yoho ya didjidji, tshɛkɛta shɔ nembetshiyaka mbala efula “Isariyele wa [Nzambi],” mbuta ate anto 144 000 wakakitama nyuma k’ekila dia vɔ tonga nkumi ya dikanga ndo ɛlɔmbɛdi l’olongo. (Ngal. 6:16; Eny. 7:4; 21:12) Koko, tɔsɛdingole woho watɛkɛtama waoho 12 wa Isariyɛlɛ lo Mateu 19:28 lo yoho ya lânde.
2 Yeso akate ate: “Lu lushi layuyala andja w’uyuyu, lam’ayudjase On’a untu lu kiti ka diulelu ka lutumbu landi, ndu nyu nyayudjase lu kiti ya diulelu dikumi la hyendi, nyayulumbuya w[aoho dikumi l’ahende] wa Isariyele.” Lo divɛsa nɛ, “waoho dikumi l’ahende wa Isariyele” wekɔ anto wayolomboyama oma le ambeki waki Yeso w’akitami ndo vɔ wekɔ l’elongamelo ka nkondja lɔsɛnɔ la pondjo lo Paradiso ka la nkɛtɛ. Vɔ wayokondja wahɔ oma lo olimu w’ɔlɔmbɛdi w’anto 144 000.
3, 4. Naa ɛnyɛlɔ k’ɔlɔlɔ kakatotshikɛ Akristo w’akitami wa kɔlamelo?
3 L’ɛnyɛlɔ k’ɛlɔmbɛdi ndo ase Lɛwi wa lo nshi y’edjedja, akitami ɛlɔ kɛnɛ mbɔsaka olimu awɔ oko diɛsɛ dia lânde. (Wal. 18:20) Akitami hawokongɛ dia nongola bɛtshi dimɔtshi dia nkɛtɛ oko okitɔ la nkɛtɛ. Lo dihole dia nsala ngasɔ, vɔ wekɔ lo kongɛ dia tonga nkumi ya dikanga ndo ɛlɔmbɛdi kâmɛ la Yeso Kristo l’olongo. Vɔ wayototetemala kambɛ Jehowa olimu ɔsɔ oko wɛnyamidiɔ l’ɛtɛkɛta wadiaso lo Enyelo 4:10, 11 watɛkɛta dikambo dia dihole diele l’akitami l’olongo.—Ezek. 44:28.
4 Etena kekewɔ la nkɛtɛ, akitami wekɔ lo nsɛna lo yoho yɛnya dia Jehowa ekɔ etenyi kawɔ k’okitɔ. Diɛsɛ diawɔ dia lânde dia kambɛ Nzambi mbele dui dioleki ohomba le wɔ. Vɔ wekɔ la mbetawɔ l’olambo wa tshungo waki Kristo ndo wekɔ lo ntetemala mboyela ndo lo nsala ngasɔ vɔ ‘wekɔ lo ntetemala nshikimala lo leeta lawɔ ndo l’ɔsɔnamelo awɔ.’ (2 Pet. 1:10) Akambo ndo akoka wele la wɔ ntshikitana l’onto ndo l’onto. Koko, vɔ hawokambe l’elelo ɛsɔ dia mbisha tɛkɛ nɛndɛ lo nsala paka awui yema tshitshɛ tsho l’olimu waki Nzambi. Lo wedi okina, vɔ mbetshaka olimu waki Nzambi lo dihole dia ntondo lo nsala kɛnɛ tshɛ kakokawɔ nsala. Ndo vɔ wekɔ ɛnyɛlɔ k’ɔlɔlɔ le wanɛ wele l’elongamelo ka ndjɔsɛna lo Paradiso ka la nkɛtɛ.
5. Woho akɔna wakoka Akristo lo tshɛ kawɔ mɛnya dia Jehowa mbele etenyi kawɔ k’okitɔ, ndo lande na kakoka dui sɔ monga tshondo y’okakatanu?
5 Oyadi tekɔ l’elongamelo ka ntshɔ otsha l’olongo kana ka nsɛna la nkɛtɛ, sho pombaka ‘ndjasɛka ndo mɛmba otamba aso w’asui ndo ntetemala ndjela Kristo.’ (Mat. 16:24) Miliyɔ y’anto wele l’elongamelo ka ndjɔsɛna lo Paradiso ka la nkɛtɛ wekɔ lo ntɛmɔla Nzambi ndo wekɔ lo ndjela Kristo lo yoho shɔ. Vɔ hawokombola nsala paka awui yema tshitshɛ tsho l’olimu waki Nzambi etena keyawɔ dia vɔ kokaka ndekanya kɛnɛ kasalawɔ. Anto efula waketɛ nsɛnɔ yawɔ ɛsɛlɛngɛ dia nkoma ambatshi mboka. Akina salaka la wolo dia nkamba oko ambatshi mboka l’edja ka ngɔndɔ mɔtshi ɔnɔnyi tshɛ. Akina kânga mbahawakoke monga ambatshi mboka, ndjashaka efula l’olimu w’esambishelo. Anto asɔ wekɔ oko Mariya lakashinola Yeso malashi ndo Yeso akate lo dikambo diande ate: “Ndi ambuntshela dikambu di’ololo. . . . Ndi akatshi uku akandeyi ntsha.” (Mako 14:6-8) Kema dui dia wɔdu dia nsala kɛnɛ tshɛ kakokaso nsala l’olimu waki Nzambi nɛ dia tekɔ lo nsɛna l’andja walɔmbwama oma le Satana. Koko, sho mbidjaka welo ndo ndjaɛkɛka le Jehowa. Tɔsɛdingole woho wasalaso dui sɔ l’awui amɔtshi anɛi shikaa.
Ntondo totayangi Diolelo diaki Nzambi
6. a) Ngande wɛnya anto lo tshɛ kawɔ dia paka lɔsɛnɔ lɔnɛ mbele etenyi kawɔ k’okitɔ? b) Bonde kele ndeka dimɛna sho mɛna akambo oko wakɛnaka Davidi?
6 Yeso akatɛ ambeki ande dia nyanga ntondo Diolelo la losembwe la Nzambi. Anto wa l’andja ɔnɛ mbetshaka wahɔ awɔ lo dihole dia ntondo oko “antu wa kete nye. Vo weko la etenyi kawo lu lumu lone.” (Adia Osambu 17:1, 13-15.) Lam’ele vɔ hawodje Otungi awɔ yimba, efula ka l’atei awɔ ndjashaka dia monga la lɔsɛnɔ la dimɛna, nkenga nkumbo ndo tshikɛ anawɔ sango. Etenyi kawɔ k’okitɔ kekɔ paka lo nsɛnɔ yawɔ. Lo wedi okina, Davidi akaleke mbidja yimba lo ndjatongɛ “lukumu l’ololo” la ntondo ka Jehowa ndo kɛsɔ mbakayɔlɔmbaka ɔnande anto tshɛ dia vɔ ntsha. (Und. 7:1) L’ɛnyɛlɔ k’Asafu, Davidi aketsha lɔngɛnyi laki lam’asande la Jehowa la ntondo ka wahɔ ande. Nde akangɛnangɛnaka nkɛndakɛnda kâmɛ la Nzambi. Lo nshi yaso nyɛ, Akristo efula mbetshaka awui wa lo nyuma la ntondo k’elimu awɔ wa l’emunyi.
7. Naa ɛtshɔkɔ wakakondja ɔnangɛso ɔmɔtshi lo mbetsha Diolelo lo dihole dia ntondo?
7 Tɔsɛdingole ɛnyɛlɔ k’ɔnangɛso Jean-Claude ladjasɛ lo République centrafricaine. Nde ekɔ ekumanyi ka l’etshumanelo kele l’ana asato. Ekɔ dui dia wolo dia nkondja olimu lo wodja ɔsɔ ndo anto efula salaka kɛnɛ tshɛ kakokawɔ nsala l’oyango wa nama elimu awɔ. Lushi lɔmɔtshi, owandji w’olimu akatɛ Jean-Claude dia ntatɛ nkamba olimu l’otsho ntatɛ l’eshidi 6:30 wa dikɔlɔ, nshi esambele lo lomingu. Jean-Claude akôlembetshiya ɔnɛ lâdiko dia nsukɛ nkumbo kami l’emunyi, dimi pombaka mbidja yimba dia lonyuma lawɔ. Nde akawotɛ nto dia nde ekɔ l’ɔkɛndɛ wa nkimanyiya etshumanelo. Owandji w’olimu akôkadimola ate: “Naka wɛ mɛtɛ ekɔ l’ohomba w’olimu, wɛ pombaka mbohɛ akambo tshɛ, mbidja ndo wadɛyɛ, anayɛ ndo ekakatanu wele la yɛ. Wɛ pombaka ndjasha tshɛ l’olimu, koko aha lo dikambo dikina. Sɔna ɛngɔ kɛmɔtshi lam’asa ɔtɛmwɛlɔ ayɛ kana olimu.” Otondonga wɛ mbaki Jean-Claude, kakɔna kotoyosala? Lo mɛtɛ, Jean-Claude akeyaka dia naka nde nshisha olimu ande, Nzambi ayokotsha ehomba ande. Nde ayonga l’akambo efula wa nsala l’olimu waki Nzambi ndo Jehowa ayokotsha ehomba wa l’emunyi wa nkumbo kande. Ɔnkɔnɛ, nde akatshu lo losanganya la l’atei wa lomingu. L’ɔkɔngɔ diko, nde akayalɔngɔsɔla dia ntshɔ otsha l’olimu, aha la mbeya dia kana nde ayokondja olimu ɔmɔtshi. Ɔtɛkɛta kele edja, wakawelɛ lo telefɔnɛ ndo wakawotɛ di’owandji w’olimu ambotshanyema ndo nde pombaka ntshɔ totetemala nkamba olimu ande.
8, 9. Lo woho akɔna wakokaso mbokoya ɛnyɛlɔ k’ɛlɔmbɛdi ndo ase Lɛwi lo mbɔsa Jehowa oko etenyi kaso k’okitɔ?
8 Anto amɔtshi wakakome lo mɛna di’olimu awɔ waya lo wâle wakakoke ndjambola ɔnɛ: ‘Ngande wayomokotsha ehomba w’ase nkumbo kami?’ (1 Tim. 5:8) Oyadi wɛ akahomana l’okakatanu wa ngasɔ kana bu, ondo wɛ ekɔ l’eshikikelo oma lo kɛnɛ kakakokomɛ dia wɛ hanyangaki pondjo naka Nzambi monga etenyi kayɛ k’okitɔ ndo naka wɛ mbɔsa diɛsɛ dia mbokambɛ diele la yɛ la nɛmɔ di’efula. Etena kakatɛ Yeso ambeki ande dia nyanga ntondo Diolelo, nde akâshikikɛ ate: “Diango so tshe”—ɛnyɛlɔ oko mbo ya ndɛ, ashi wa nnɔ kana ahɔndɔ wa ndɔta—“diayuyala dianyu.”—Mat. 6:33.
9 Tɔshi ɛnyɛlɔ ka dioho di’ase Lɛwi diaki konongola ɛtshi ka nkɛtɛ. Lam’ele vɔ waketshaka ɔtɛmwɛlɔ wa pudipudi lo dihole dia ntondo, vɔ wakahombaka mendɛ le Jehowa dia nde nkotsha ehomba awɔ nɛ dia nde akawatɛ ate: “Dimi keli uhiku aye.” (Wal. 18:20) Kânga mbele sho hatokambe olimu lo tɛmpɛlɔ ka mɛtɛ mɛtɛ ɛlɔ kɛnɛ oko wakakambaka ɛlɔmbɛdi ndo ase Lɛwi, sho kokaka mbokoya yimba yaki la wɔ lo monga l’eshikikelo k’ɔnɛ Jehowa ayokotsha ehomba aso. Lam’ele tamboleka nsukana l’ekomelo ka dikongɛ nɛ di’akambo, sho pombaka ndeka ndjaɛkɛ lo dikoka diaki Nzambi dia nkotsha ehomba aso.—Eny. 13:17.
Ntondo totayangi losembwe laki Nzambi
10, 11. Ngande wakayaɛkɛ anto amɔtshi le Jehowa lo kɛnɛ kendana l’olimu awɔ? Sha ɛnyɛlɔ.
10 Yeso akakeketsha ambeki ande dia vɔ ‘ntetemala nyanga ntondo losembwe laki Nzambi.’ (Mat. 6:33) Dui sɔ nembetshiyaka mbetsha atɔndɔ waki Jehowa wendana la kɛnɛ kele ɔlɔlɔ ndo kɛnɛ kele kɔlɔ la ntondo k’ɛlɛmbɛ w’anto. (Adia Isaya 55:8, 9.) Wɛ kokaka mbohɔ dia lo nshi yakete, anto efula wakonɛka mfɔka kana ndjisondja, waketshaka anto awui w’ata kana wakasalaka ekoma kana wakâsondjaka. L’ɔkɔngɔ wa mbeya akambo wa mɛtɛ, efula kawɔ wakatshikitanya elimu awɔ ndo wakakotsha kɛnɛ kalɔmbama dia nongola batismu.—Is. 2:4; 2 Kor. 7:1; Ngal. 5:14.
11 Tɔshi ɛnyɛlɔ kaki Andrew. Etena kakaweke akambo wendana la Jehowa nde la wadɛnde, vɔ wakɔshi yɛdikɔ ya mbokambɛ. Andrew akalangaka olimu ande efula, koko nde akôtshike. Lande na? Nɛ dia nde akakambaka l’okongamelo ɔmɔtshi wa pɔlitikɛ ndo akɔshi yɛdikɔ ya mbetsha losembwe laki Nzambi lo dihole dia ntondo. Etena kakandatshike olimu ɔsɔ, nde aki l’ana ahende, vɔ kombosha difuto ndo nde komonga la falanga efula yakandakoke ndjasɛnya l’edja ka ngɔndɔ mɔtshi. Otondɛna akambo oko onto, tshike nde otɔfɔnya dia nde kema la ‘etenyi k’okitɔ.’ Nde akayange olimu, ele l’eshikikelo ɔnɛ Nzambi ayowokimanyiya dia nde mbotana. Etena kohɔnde nshi shɔ, nde la nkumbo kande shikikɛka dia Jehowa akâkimanyiya. (Is. 59:1) Lo mbetɛ lɔsɛnɔ lawɔ ɔsɛlɛngɛ, Andrew nde la wadɛnde wakayongaka la diɛsɛ dia nkamba olimu wa lo tena tshɛ. Nde mbutaka ɔnɛ: “Lo tena dimɔtshi, takongaka l’okiyanu l’ɔtɛ wakiso komonga la falanga, la luudu la mbidjasɛ, wakiso la hemɔ ndo wakatatatshundaka. Koko, Jehowa aki la so tena tshɛ. . . . Sho kokaka mbuta l’eshikikelo tshɛ ɔnɛ aha la tâmu kambɛ Jehowa ekɔ dui dioleki dimɛna diakoka anto nsala.” *—Und. 12:13.
12. Dionga diakɔna diahombaso monga la diɔ dia mbetsha atɔndɔ waki Nzambi lo dihole dia ntondo? Sha ɛnyɛlɔ kɛmɔtshi ka l’etshumanelo kanyu.
12 Yeso akatɛ ambeki ande ate: “Naka nyu la mbetawo uku lotongo la lohodia, nyu nyayutela ukungu one nyati: Umo uma laku, utshu lene, ku vo wayumo. Nduku dikambu diayunyuheka lama ntsha.” (Mat. 17:20) Onde wɛ ayonga l’akoka wa mbetsha atɔndɔ waki Nzambi lo dihole dia ntondo naka dikambo sɔ kokaka kokonya l’ekakatanu? Naka wɛ kema l’eshikikelo dia kana wɛ koka nsala dui sɔ, kete wɛ kokaka nkɛtshanya dui diakɔ l’anto akina wa l’etshumanelo. Aha la tâmu, wɛ ayokeketshama lo nyuma etena kayowokotɛ akambo wahomana la wɔ.
Tonge la lowando lo diangɔ dia lo nyuma diatosha Jehowa
13. Etena kayashaso l’olimu wa Jehowa, ahomba tosha mbo ya ndɛ ya lo nyuma?
13 Naka wɛ mbɔsaka diɛsɛ diele la yɛ dia kambɛ Jehowa la nɛmɔ, kete wɛ kokaka ndjashikikɛ dia nde ayokotsha ehomba ayɛ wa l’emunyi ndo wa lo nyuma oko wakandakotsha ehomba wa dioho di’ase Lɛwi. Tɔshi ɛnyɛlɔ kaki Davidi. Etena kakinde lo wooko wa dive, nde akendɛ le Nzambi dia mbokotshɛ ehomba ande. Sho lawɔ kokaka ndjaɛkɛ le Jehowa oyadi etena kɛnaso dia ndoko onto lakoka tokimanyiya. Tohɔ di’etena kakɔtɔ Asafu “lu luudu la [Nzambi],” nde akeye kɛnɛ kakôkiyanyaka. (Osam. 73:17) Woho akɔ wâmɛ mbele, sho pombaka mendɛ le Nzambi lele Kiɔkɔ ya mbo ya ndɛ yaso ya lo nyuma. Lo nsala ngasɔ mbayotɛnya lowando lo diɛsɛ diele la so dia kambɛ Nzambi oyadi l’akambo akɔna watanemaso. Lo yoho shɔ mbayotɔsa Jehowa oko etenyi kaso k’okitɔ.
14, 15. Kakɔna kahombaso nsala etena katongamwɛwɔ osase lo avɛsa amɔtshi, ndo lande na?
14 Kakɔna katoyosalaka etena katɔhɛtshaka Jehowa lele Kiɔkɔ y’osase wa lo nyuma osase ande lo kɛnɛ kendana la ‘akambo woshami etale waki Nzambi’ wele lo Bible? (1 Kor. 2:10-13) Kɛnɛ kakasale ɔpɔstɔlɔ Petero kekɔ ɛnyɛlɔ ka dimɛna etena kakatɛ Yeso ampokami ande ate: “Nyu hanyuyala la lumu la pundju l’etema anyu, naka hanyuli dimba dia On’a untu, ndu hanyonwe dikila diandi.” Lam’ele ambeki efula wakoke ɛtɛkɛta wa didjidji ɛsɔ lo yoho ya mɛtɛ mɛtɛ, vɔ wakate vɔate: “Diui so wulu. Eya dietawo na?” Ɔnkɔnɛ, vɔ “wakakalula ekongokongo.” Koko Petero akate ate: “Khumadiondjo, le na atshosu? We keli la aui wa lumu la pundju.”—Joa. 6:53, 60, 66, 68.
15 Petero koshihodia dimɛna dimɛna kɛnɛ kakalange mbuta Yeso lo kɛnɛ kendana la ndɛ demba diande ndo nnɔ dikila diande. Koko nde akayaɛkɛ le Nzambi dia pɛtshɛ anto osase wa lo nyuma. Etena kahɛta osase wa lo nyuma lo dikambo dimɔtshi, onde wɛ shihodiaka ɛkɔkɔ wa l’Afundelo wambowosala etshikitanu akɔ? (Tuk. 4:18) Ase Bɛrɔya wa lo ntambe ka ntondo waketawɔ ɔtɛkɛta waki Nzambi “l’uhetu: wakayangiayangia la lushi la lushi lu afundelu.” (Etsha 17:11) Naka sho ndjela ɛnyɛlɔ kawɔ, kete dui sɔ diayofudia lowando lele la so lo diɛsɛ dia kambɛ Jehowa ndo mbɔ̂sa oko etenyi kaso k’okitɔ.
Totshukanake paka lo Nkumadiɔndjɔ
16. Ngande wakoka Nzambi monga etenyi kaso k’okitɔ lo kɛnɛ kendana la didjango diele lo 1 Koreto 7:39?
16 Dui dikina diahomba Akristo nama sangwelo diaki Nzambi lo yimba mendanaka la woho wakambawɔ la dako dia lo Bible dialɔmba dia ntshukana “paka lu lulangu la Khumadiondjo.” (1 Kor. 7:39) Efula ka l’atei aso wakɔshi yɛdikɔ ya ntshikala enyemba lo dihole dia mɔnyɔla dako diaki Nzambi sɔ. Nzambi mbɔsaka anto wa ngasɔ oko anande. Kakɔna kakasale Davidi etena kakandayaoke opoko ndo kakinde oko aya bu l’onto lawokimanyiya? Nde akate ate: “Dimi latukitshaka ukiyanu ami la ntundu ka [Nzambi], latûsanyiaka pa kami. Lam’atolembiamaka utema ami, we atulimbitelaka mbuka kami.” (Osam. 142:1-3) Ondo ndo ɔprɔfɛta Jeremiya lakakambɛ Nzambi la kɔlamelo tshɛ l’edja k’ɛnɔnyi akumi oko onyemba mbakayaoke woho akɔ wâmɛ. Naka wɛ nangaka mbeka ɛnyɛlɔ kande, enda tshapita 8 ya dibuku Ɔtɛkɛta wa Nzambi le so lo tshimbo ya Jeremiya.
17. Ngande wakakandola kadiyɛso kɛmɔtshi k’onyemba woho wakandayaokaka opoko lo tena dimɔtshi?
17 Kadiyɛso kɛmɔtshi ka l’États-Unis akate ate: “Dimi latɔsaka yɛdikɔ ya ntshikala onyemba. Layotshukama etena kayomohomana la pami kakoka la mi. Mama kami kele kema ombetawudi akahembe dia mbetawoyami dia dimi ntshukana la pami tshɛ kakoka mpomana la mi. Dimi lakawombola dia kana nde ayɛmba ɔkɛndɛ ami naka halotondoyisha diwala dia ngasɔ. L’edjedja ka wonya, nde akayɛna dia laya l’olimu wa shikaa wakakimanyiyaka dia nkotsha ehomba ami ndo wakambishaka ɔngɛnɔngɛnɔ. Nde akayotshika tshutshuyami dia tshukama.” Kadiyɛso kɛsɔ ndjaokaka opoko tena dimɔtshi. Nde akate ate: “Etena kayaokami opoko, dimi ndjaɛkɛka le Jehowa. Nde hasɛkaki pondjo.” Kakɔna kakakimanyiya kadiyɛso kɛsɔ dia ndjaɛkɛ le Jehowa? Nde mbutaka ate: “Dɔmbɛlɔ kimanyiyakami dia mbeya ɔnɛ Nzambi ekɔ Onto la mɛtɛ mɛtɛ ndo dimi hamongaki pondjo opoko. Lam’ele Nkum’Olongo pokamɛkami, shi dimi pombaka ndjaɔsa la nɛmɔ ndo monga l’ɔngɛnɔngɛnɔ?” Nde mbutaka ɔnɛ: “Lam’ele lekɔ l’eshikikelo ɔnɛ ‘mbisha, ambuleka nungula otshoko,’ dimi kambaka l’akoka ami dia nkimanyiya anto akina aha la nongamɛ dia vɔ mbishami ɛngɔ kɛmɔtshi. Etena katomoyambolaka ɔnɛ: ‘Kakɔna kayomosala dia nkimanyiya anto asɔ?,’ dimi tongaka l’ɔngɛnɔngɛnɔ wa l’etei k’otema.” (Etsha 20:35) Lo mɛtɛ, nde mbɔsaka Jehowa oko etenyi kande k’okitɔ ndo nde ekɔ la diɛsɛ dia mbokambɛ l’ɔngɛnɔngɛnɔ.
18. Ngande wakokayɛ mbɔsa Jehowa oko etenyi kayɛ k’okitɔ?
18 Oyadi woho akɔna w’akambo wayohomana la yɛ, wɛ kokaka mbetɛ Nzambi etenyi kayɛ k’okitɔ. Naka wɛ nsala ɔsɔku, kete wɛ ayonga ɔmɔtshi wa l’atei w’ekambi ande wele l’ɔngɛnɔngɛnɔ. (2 Kor. 6:16, 17) Etombelo wayonga la dui sɔ ele, Jehowa ayonga etenyi kayɛ k’okitɔ oko wakandonge etenyi k’okitɔ k’ekambi ande wa lo nshi y’edjedja. (Adia Euhwelu k’Elembe 32:9, 10.) Oko wakakome wodja w’Isariyɛlɛ etenyi k’okitɔ kaki Nzambi l’atei wa wedja ekina, nde kokaka kɔsɔna dia kôkaka ngandji ndo kotshaka ehomba ayɛ.—Osam. 17:8.
[Nɔte ka l’ɛse ka dikatshi]
^ od. 11 Enda Réveillez-vous ! wa Ngɔndɔ ka dikumi l’ɔtɔi 2009, lɛkɛ 12-14, lo Falase.
Ngande wayoyokadimola?
Ngande wakokayɛ mbetɛ Jehowa etenyi kayɛ k’okitɔ
• lo nyanga ntondo Diolelo diaki Nzambi ndo losembwe lande?
• lo mɛnya lowando lele la yɛ lo mbo ya ndɛ ya lo nyuma?
• lo nɛmiya didjango diaki Nzambi dia tshukana paka lo Nkumadiɔndjɔ?
[Ambola wa wekelo]
[Efundelo wa l’etei w’odingɔ wa lo lɛkɛ 13]
Dia mbɔsa Jehowa oko etenyi kaso k’okitɔ, sho pombaka mbetsha olimu ande lo dihole dia ntondo
[Osato wa lo lɛkɛ 15]
Ɛnyɛlɔ kaki Jeremiya tokeketshaka
