Sena Mulamuzumizya Jehova Kuti Abe Caabilo Canu?
Sena Mulamuzumizya Jehova Kuti Abe Caabilo Canu?
“Amuzumanane kusaanguna kuyandaula Bwami abululami bwakwe, eelyo zyintu zimbi zyoonse eezyi ziyooyungizyigwa kulindinywe.”—MT. 6:33.
1, 2. (a) “Ba Isilayeli ba Leza” ibaambidwe mulugwalo lwa Bagalatiya 6:16 baiminina bani? (b) Mulugwalo lwa Matayo 19:28, ino mbaani baimininwa “[a]misyobo iili kkumi aibili ya Isilayeli”?
NOMUBALA zyina lyakuti Israyeli mu Bbaibbele, ino ncinzi ciboola mumizeezo yanu? Sena inga muyeeya Jakobo mwana wa Izaka iwakapedwe zyina limbi lyakuti Israyeli? Naa muyeeya luzubo lwakwe, bana Israyeli bansiku? Ino mbuti kujatikizya Israyeli wakumuuya? Nokwaambwa kuti Israyeli, kanji-kanji mumaambilambali caamba “iba Isilayeli ba Leza,” iba 144,000, ibananikidwe amuuya uusalala kuti bakabe bami abapaizi kujulu. (Gal. 6:16; Ciy. 7:4; 21:12) Pele atulange-lange caambidwe mulugwalo lwa Matayo 19:28 caalubazu kujatikizya misyobo ya Israyeli iili kkumi aibili.
2 Jesu wakaamba kuti: “Mukulengulula, iciindi Mwana wamuntu aakukkala acuuno cakwe cabwami cabulemu, nywebo nomwatobela ndime anywebo muyookkala azyuuno zyabwami zili kkumi azibili, akubeteka misyobo iili kkumi aibili ya Isilayeli.” Mukapango aaka, “misyobo iili kkumi aibili ya Isilayeli” mbabaabo ibalangila kutambula buumi butamani mu Paradaiso anyika ibayoobetekwa abasiciiya ba Jesu bananike. Bayoogwasyigwa amilimo yabupaizi yaba 144,000.
3, 4. Ino ncikozyanyo nzi cibotu bananike basyomeka ncobatondezya?
3 Mbubwenya mbuli bapaizi aba Levi bakaindi, bananike mazuba aano babona mulimo wabo kuti ncoolwe ncobapedwe. (My. 18:20) Bananike tabeelede kulangilwa kuti bapegwe cibeela naa busena anyika kuti cibe caabilo cabo. Muciindi caboobo, balangila kuti bakabe bami abapaizi kujulu antoomwe a Jesu Kristo. Bayoozumanana kubelekela Jehova mulimo ooyo, kweelana ancotubala mulugwalo lwa Ciyubunuzyo 4:10, 11 kujatikizya bananike mumulimo wabo wakujulu.—Ezk. 44:28.
4 Nobacili anyika, bananike balapona munzila iipa bumboni kuti Jehova ncaabilo cabo. Coolwe ncobajisi cakubelekela Leza bacibona kuti cilayandika kapati kulimbabo. Balijisi lusyomo mucituuzyo cacinunuzyo ca Kristo akuzumanana kumutobela kutegwa ‘basinizye bwiite alimwi akusalwa kwabo.’ (2 Pe. 1:10) Bukkale bwabo alimwi azyintu nzyobakonzya kucita ziliindene. Pele nokuba boobo, tabayandauli twaambo twakulitamizya kutegwa babeleke buyo asyoonto mumulimo wa Leza. Muciindi caboobo babikkila kapati maano kumulimo wa Leza akubeleka canguzu. Alimwi balapa cikozyanyo cibotu kuli baabo bajisi bulangizi bwakupona muparadaiso anyika.
5. Ino mbuti Jehova mbwakonzya kuba caabilo ca Banakristo boonse, alimwi nkaambo nzi eeco ncocikatazya?
5 Kufwumbwa naa tujisi bulangizi bwakujulu naa anyika, tweelede ‘kuliimya akunyamuna cisamu cesu cakupenzyezya akuzumanana kumutobela Kilisito.’ (Mt. 16:24) Ibanji ibalangila kuba mu Paradaiso anyika balamukomba Leza akumutobela Kristo munzila eeyo. Tabakkutili kucita buyo zyintu zisyoonto kuti babona kuti balakonzya kucita zinji. Banji baubya-ubya bukkale bwabo akuba bapainiya. Bamwi balacikonzya kubeleka kabali bapainiya kwamyezi iili mbwiibede amwaka. Bamwi nokuba kuti tabacikonzyi kucita bupainiya, balabeleka cabusungu mumulimo wamumuunda. Aaba bali mbuli Mariya wakalyaabide iwakatila mafwuta aanunkila aali Jesu. Wakaamba kuti: “Wandibelekela mulimo mubotu. . . . Wacita mbwakonzya.” (Mk. 14:6-8) Kucita zyoonse nzyotukonzya tacili cuuba-uba pe nkaambo tukkala munyika yeendelezyegwa a Saatani. Nokuba boobo, tulabeleka canguzu akumusyoma Jehova. Atubone mbotucita oobo munzila zyone.
Kusaanguna Kuyandaula Bwami bwa Leza
6. (a) Ino mbuti bantu banji mbobatondezya kuti caabilo cabo cili mubuumi bwamazuba aano? (b) Nkaambo nzi ncocigwasya kwiiya cikozyanyo ca Davida?
6 Jesu wakayiisya basikwiiya bakwe kuti kabasaanguna kuyandaula Bwami abululami bwa Leza. Bantu bamunyika bayanda kusaanguna kuyandaula lubono mbuli “bantu baansi bali acaabilo cabuumi obuno.” (Amubale Intembauzyo 17:1, 13-15.) Banji babikkila kapati maano kuba abuumi buli kabotu, kuba amukwasyi alimwi akusiila bana babo lukono muciindi cakubikkila maano ku Mulengi wabo. Caabilo cabo cili mubuumi bwamazuba aano. Mukwiimpana, Davida wakabikkila maano kuba “[a]zina ibotu” a Jehova kweelana ambwaakaamba mwanaakwe kuti boonse kabacita. (Muk. 7:1) Mbubwenya mbuli Asafu, Davida wakabona kuti kuba Mulongwe wa Jehova cakali kuyandika kapati kwiinda kuliyandawida zyintu nzyotuyanda mubuumi. Cakali kumukkomanisya kweenda a Leza. Mazuba aano, Banakristo banji babikka zyintu zyakumuuya kumbele aamilimo yakumubili.
7. Ino ncilongezyo nzi mukwesu umwi ncaakajana akaambo kakusaanguna kuyandaula Bwami?
7 Amuyeeye ba Jean-Claude bakkala mu Central African Republic. Mbaalu balikwete alimwi balijisi bana botatwe. Mucisi eeco, ikujana mulimo cilakatazya kapati alimwi bantu banji balacita cili coonse ncobaambilwa kucita kutegwa bazumanane kubeleka. Bumwi buzuba mupati wamulimo wakaambila ba Jean-Claude kuti batalike kubeleka masiku—kutalika aciindi ca 18:30, mazuba oonse ansondo. Ba Jean-Claude bakaamba kuti kuyungizya akugwasya mukwasyi wabo kumubili, bakeelede kubagwasya kumuuya. Alimwi bakaamba kuti bakalijisi mukuli wakugwasya mbungano. Ino mupati wamulimo wakaingula buti? “Kuti koyanda kuti uzumanane amulimo weelede kuziluba zyoonse kubikkilizya abakaintu bako, bana bako alimwi amapenzi aako. Weelede kubikkila buyo maano kumulimo. Kosala: cikombelo cako naa mulimo.” Nimwakali ndinywe ino nimwakacita buti? Ba Jean-Claude bakazyiba kuti, ikuti naa mulimo umane Leza uyakubalanganya. Mbubwenya buyo bakali kukonzya kucita milimo minji ya Leza alimwi Jehova wakali kuyoobagwasya kulanganya mukwasyi wabo kumubili. Aboobo bakajanika kumuswaangano waakati kansondo. Kabacilibambila kuunka kumulimo alimwi kabatazyi naa bayakuzumanana kubeleka bakatambula luwaile lwakuti mupati wamulimo watandwa mulimo, pele balo balazumanana amulimo wabo.
8, 9. Muunzila nzi motukonzya kwiiya bapaizi aba Levi kutegwa Jehova abe caabilo cesu?
8 Bamwi ibakajanika mubukkale mulimo wabo mowakali kuyanda kumana ambweni bakalibuzya kuti, ‘Ino inga ndauzuzikizya buti mukuli wangu wakujana nzyobayandika bamukwasyi wangu?’ (1 Ti. 5:8) Kufwumbwa naa buyumuyumu buli boobo bwakamucitikila naa pe, kweelana acakamucitikila muli masimpe kuti Leza takamutyompyi kuti kali caabilo canu alimwi akuti katuukkomanina mulimo wakwe. Jesu naakaambila basikwiiya bakwe kusaanguna kuyandaula Bwami, wakabasyomezya kuti: “Zyintu zimbi zyoonse eezyi”—mbuli zyakulya, zyakunywa naa zyakusama—“ziyooyungizyigwa kulindinywe.”—Mt. 6:33.
9 Amuyeeye ba Levi ibatakapegwa lukono lwanyika. Mbokunga kukomba ncecintu ncobakali kuyandisya, bakali kusyoma Jehova kuti ulabapa zyakulya, nkaambo wakabaambide kuti: “Ndime caabilo cako.” (My. 18:20) Nokuba kuti tatubelekeli mutempele mbuli bapaizi aba Levi mbobakali kucita, tulakonzya kwiiya cikozyanyo cabo katujisi lusyomo lwakuti Jehova uyootupa nzyotuyandika. Lusyomo ndotujisi lwakuti Leza ulakonzya kutupa nzyotuyandika lulayuma kapati mbotuya kumamanino aamazuba.—Ciy. 13:17.
Kusaanguna Kuyandaula Bululami bwa Leza
10, 11. Ino mbuti bamwi mbobatondezya kuti basyoma Jehova nobasala mulimo? Amupe cikozyanyo.
10 Jesu alimwi wakaambila basikwiiya bakwe ‘kuzumanana kusaanguna kuyandaula bululami bwa Leza.’ (Mt. 6:33) Eeci caamba kulemeka zyeelelo zya Jehova zisumpukide kujatikizya ciluzi acitaluzi kwiinda zyeelelo zyabantu. (Amubale Isaya 55:8, 9.) Ambweni mulayeeya kuti kaindi bantu bamwi bakali kulima naa kusambala tombwe, kuyiisya bamwi munkondo, kupanga alimwi akusambala zilwanyo zya nkondo. Nobakaiya kasimpe, banji bakasala kucinca mulimo wabo kutegwa beelele kubbapatizyigwa.—Is. 2:4; 2 Ko. 7:1; Gal. 5:14.
11 Ba Andrew mbamwi babaabo bakacita oobo. Balo abakaintu baabo nobakaiya kujatikizya Jehova bakasala kumubelekela. Ba Andrew bakali kuuyanda mulimo wabo, pele bakauleka. Nkaambo nzi? Akaambo kakuti mbunga njobakali kubelekela yakali kutola lubazu mutwaambo twacisi alimwi bakalikanzide kusaanguna kuyandaula bululami bwa Leza. Ba Andrew nobakaleka mulimo bakajisi bana bobilo alimwi amali masyoonto aakubelesya buyo kwamyezi misyoonto. Kweelana ambubazibona zyintu bantu, cakali kulibonya mbuli kuti tiibakajisi ‘lukono.’ Bakasyoma Leza nobakali kuyandaula mulimo. Nobalanga cakacitika, balo abamukwasyi wabo balakonzya kusinizya kuti Jehova ulagwasya. (Is. 59:1) Kwiinda mukuubya-ubya bukkale bwabo, ba Andrew abakaintu babo bakaba acoolwe cakubeleka mulimo waciindi coonse. Bakaamba kuti: “Ziindi zimwi kubula mali, kubula ŋanda, kuciswa alimwi akucembaala zyakali kutupa kulibilika. Pele lyoonse Jehova wakali kutugwasya. . . . Mubwini kubelekela Jehova ncecintu ciinda kubota mubuumi.” *—Muk. 12:13.
12. Ino mbube nzi buyandika kutegwa tuzumanane kutobela zyeelelo zya Leza? Amupe zikozyanyo zyakubusena nkomukkala.
12 Jesu wakaambila basikwiiya bakwe kuti: “Ikuti kamujisi lusyomo luli mbuli inseke yamusitada, muyooambila mulundu ooyu kuti, ‘Kozwa aawa uunke waalya,’ eelyo uyoozwa, alimwi taakwe ciyoomwaalila pe.” (Mt. 17:20) Sena inga mwazumanana kutobela zyeelelo zya Leza kuti kucita boobo kacikonzya kumuletela mapenzi? Kuti kamutacizyi cakucita, mulakonzya kubuzya bamwi mumbungano. Cakutadooneka muyookatalukwa kumuuya mwaakumvwa zyakuluula zyabo.
Kulumba Kuzyintu Zyakumuuya Nzyapa Jehova
13. Kuti twaubeleka cabusungu mulimo wa Jehova, ino ncinzi ncotukonzya kulangila kujatikizya zyintu zyakumuuya?
13 Kuti kamucikkomanina coolwe ncomujisi cakubelekela Jehova, mulakonzya kusyoma kuti uyakumupa nzyomuyandika kumubili akumuuya mbubwenya mbwaakabapa nzyobakali kuyandika ba Levi. Amuyeeye Davida. Nokuba kuti wakali mumpangala, wakali kusyoma Leza kuti ulamupa nzyaakali kuyandika. Andiswe tulakonzya kusyoma Jehova noliba leelyo nokuboneka kuti zyintu zilikatazyide kapati. Amuyeeye kuti Asafu ‘naakanjila mucikombelo ca Leza,’ wakatalika kuyeeya kabotu kujatikizya makani aakali kumupenzya. (Int. 73:17) Mbubwenya buyo, andiswe tweelede kulangila kuli Leza kutegwa atupe nzyotuyandika kumuuya. Aboobo, tulatondezya kuti tulalumba kucoolwe cakubelekela Leza ncotujisi nokuba kuti bukkale bwesu buliindene-indene. Kwiinda mukucita boobo, tuzumizya Jehova kuba caabilo cesu.
14, 15. Ino tweelede kulimvwa buti kuti kwaba kucinca mbotwaateelela magwalo amwi, alimwi nkaambo nzi?
14 Ino tucita buti kuti Jehova walo uutumunikila kumuuya watuyiisya kujatikizya “zyintu zisisidwe zya Leza” zijanika mu Bbaibbele? (1 Ko. 2:10-13) Tulijisi cikozyanyo cibotu citondezya ncaakacita mwaapostolo Petro ciindi Jesu naakaambila baswiilizi bakwe kuti: “Ccita kuti mwalya mubili wa Mwana wamuntu akunywa bulowa bwakwe, munyina buumi mulindinywe.” Nobakamvwa majwi aayo, baswiilizi banji bakaamba kuti: “Makani aaya ayumya mate; nguni uunga waaswiilila?” Bamane “bakapilukila kuzyintu zyamunyika nzyobakasiide.” Pele Petro wakaamba kuti: “Mwami, ino inga twaunka kuli ni? Yebo ujisi majwi aapa buumi butamani.”—Joh. 6:53, 60, 66, 68.
15 Petro tanaakali kuciteelelesya Jesu ncakaamba kujatikizya kulya nyama yakwe alimwi akunywa bulowa bwakwe. Pele mwaapostolo wakasyoma Leza kuti ulamuyubunwida zyintu zyakumuuya. Kuti kwaba kucinca mbotukateelela kasimpe kamu Bbaibbele mazuba aano, sena mulasola kumvwisya twaambo ncokwaba kucinca? (Tus. 4:18) Bantu baku Beleya bamumwaanda wamyaka wakusaanguna “bakaliyandide kapati mumyoyo kutambula jwi, kabavwuntauzya cakulomya mu Magwalo abuzuba.” (Mil. 17:11) Kwiiya cikozyanyo cabo kuyootugwasya kulumba coolwe cakubelekela Jehova alimwi akumubona kuti ncaabilo cesu.
Kukwata naa Kukwatwa Buyo mu Mwami
16. Ino mbuti Leza mbwakonzya kuba caabilo cesu kweelana amalailile aali mulugwalo lwa 1 Bakolinto 7:39?
16 Aimwi mbazu Banakristo mobeelede kuyeeya makanze aa Leza muukutobela busolozi bwamu Bbaibbele bwa kukwata naa kukwatwa “buyo mu Mwami.” (1 Ko. 7:39) Banji basala kutakwata naa kutakwatwa muciindi cakusotoka lulayo lwa Leza oolu. Leza ulabalanganya aabo bacita boobo. Ino ncinzi Davida ncaakacita naakalimvwa kulendelelwa alimwi akubula lugwasyo? Wakaamba kuti: “Ndatula mapenzi aangu kubusyu bwakwe [Leza], ndaluula mafwabi aangu kulinguwe. Moyo wangu nuuwizuka.” (Int. 142:1-3) Ambweni mbwaakalimvwa oobo musinsimi Jeremiya iwakabelekela Leza cakusyomeka kwamyaka minji katakwete. Mulakonzya kwiiya cikozyanyo cakwe kweelana ambocipanduludwe mucibalo 8 cabbuku lyakuti God’s Word for Us Through Jeremiah.
17. Ino mbuti mucizyi umwi uutakwetwe mbwaliyumya akaambo kakulendelelwa ziindi zimwi?
17 Mucizyi umwi ku United States wakaamba kuti: “Taaku nindakakanzide kukkala kanditakwetwe. Ndililibambilide kukwatwa kuti ndajana muntu weelela. Bamaama batali basyomi bakasola kundizula kuti ndikakwatwe kufwumbwa muntu uukonzya kundiyanda. Ndakababuzya kuti naa bakali kuyanda kupegwa mulandu kuti cikwati cangu tiicazwiidilila. Mukuya kwaciindi bakabona kuti ndakalijisi mulimo uukkalikene, ndakali kulibamba alimwi ndakalikkomene. Bakaleka kundaambila makani aacikwati.” Ziindi zimwi mucizyi ooyu ulimvwa kulendelelwa. Amane waamba kuti: “Ndilasola kusyoma Jehova. Taaku nandisiya pe.” Ino ncinzi camugwasya kusyoma Jehova? “Mupailo ulandigwasya kuzyiba kuti Leza nkwali alimwi akuti taaku nendili ndelikke pe. Mupatikampatila mububumbo boonse ulandiswiilila, aboobo ndilimvwa kuti ndilalemekwa alimwi ndilikkomene.” Kasyoma kuti “kupa kulakkomanisya kapati kwiinda kutambula” waamba kuti: “Ndilasoleka kugwasya bamwi alimwi tandilangili kuti bandipe cintu cimwi. Nindiyeeya kuti, ‘Ino ncinzi ncindikonzya kucita kutegwa ndigwasye muntu ooyu?’ Ndilakkomana kapati.” (Mil. 20:35) Masimpe Jehova ncaabilo cakwe alimwi ulakkomana kumubelekela.
18. Ino mbuti mbomukonzya kuba caabilo ca Jehova?
18 Kufwumbwa bukkale momubede, mulakonzya kuzumizya Leza kuba caabilo canu. Kuti mwacita oobo muyooba akati kabantu bakwe bakkomene. (2 Ko. 6:16, 17) Eeci cilakonzya kupa kuti mube caabilo ca Jehova mbubwenya mbocakabede kubabelesi ba Leza bakaindi. (Amubale Deuteronomo 32:9, 10.) Mbubwenya Israyeli mbwaakali caabilo ca Leza aakati kamasi aambi, ulakonzya kumusala kuti mube bakwe alimwi akumulanganya caluyando.—Int. 17:8.
[Bupanduluzi buyungizidwe]
^ munc. 11 Amubone Sinsimuka! yamu January-March 2010, mapeeji 28-30.
Ino Inga Mwaingula Buti?
Ino mbuti mbomukonzya kuzumizya Jehova kuti abe caabilo canu
• kwiinda mukusaanguna kuyandaula Bwami bwa Leza abululami bwakwe?
• kwiinda mukutondezya kulumba kucakulya cakumuuya?
• kwiinda mukutobela mulawo wa Leza wakukwata naa kukwatwa buyo mu Mwami?
[Mibuzyo yaciiyo]
[Majwi aakwelelezya sikubala aali apeeji 13]
Jehova uba caabilo cesu kuti katubikkila kapati maano kumulimo wakwe
[Cifwanikiso icili apeeji 15]
Cikozyanyo ca Jeremiya cilatukulwaizya
