¿Liʼakxilhaw Jehová la akgtum tamaskiwin?

«Xapulana kaputsatit wantu xlimapakgsin Dios, chu wa xtalakaskin, wa nchu xlipaks yuma ntu amakgapitsin, paks nakataliwakaniyan [o nakamaxkikanatit].» (MAT. 6:33)

1, 2. 1) ¿Tiku kilhchanima tachuwin «xʼIsrael Dios» nema wi kʼGálatas 6:16? 2) ¿Tiku litaxtukgo «kgalhkutiy familias xalak Israel» nema lichuwinan Mateo 19:28?

¿TUKU lakapastakaw akxni likgalhtawakgayaw kBiblia tachuwin Israel? Max nalakapastakaw pi chuna lilakgapaska Jacob chatum xkgawasa Isaac chu xkamanan tiku litaxtukgolh akgtum kachikin. Pero kBiblia na maklakaskin uma tukuwani akxni wi tuku kilhchanima. Akxni lichuwinan «xʼIsrael Dios» kilhchanima 144,000 nema Jehová kalilaksaknit xʼespíritu santo xlakata mapakgsinanin chu sacerdotes nawankgo kʼakgapun (Gál. 6:16; Apo. 7:4; 21:12). Pero kMateo 19:28, Traducción del Nuevo Mundo uma tachuwin tanu la limaklakaskin akxni lichuwinan «kgalhkutiy familias xalak Israel». Kaʼakxilhwi tuku wamputun uma texto.

² Jesús wa: «Kxasasti kakilhtamaku akxni xKgawasa chixku natawila kxpumapakgsin, wixin tiku kistalaninitantit na natawilayatit kʼakgkutuy laktawilh niku nakamapakgsiyatit kgalhkutiy familias xalak Israel». Kʼuma versículo ¿tiku kilhchanima «kgalhkutiy familias xalak Israel»? Wa tiku nakaliʼakxilhkan komo tlan nalatamakgo xliputum kilhtamaku kParaíso. Putum nalitamakgtayakgo tuku natlawakgo 144,000 sacerdotes.

3, 4. ¿La kinkawilinikgoyan akgtum lu tlan liʼakxilhtit tiku kalaksakkanit nema naʼankgo kʼakgapun?

³ Tiku kalaksakkanit naʼankgo kʼakgapun ni lakpuwankgo pi Jehová wi tuku nakamaxki unu kKatiyatni. Xtachuna la levitas chu sacerdotes xala makgasa, kstalaninanin Cristo akgtum talakgalhaman akxilhkgo akxni skujnikgo Dios (Núm. 18:20). Chu lu xlakaskinka liʼakxilhkgo uma taskujut nema chuntiya natlawakgo chuna la wan Apocalipsis 4:10, 11, akxni natamapakgsinankgo Jesucristo chu sacerdotes nawankgo kʼakgapun chu lu lakaskinkgo kachalha ama kilhtamaku (Eze. 44:28).

⁴ Xlakata lamakgolhku unu Katiyatni ¿la limasiyakgo pi Jehová wa tuku kamaskiwikanit? Chuna la linkgo xlatamatkan limasiyakgo pi skujnikan Dios ni anan atanu tuku tlakg xlakaskinka. Kanajlanikgo xtamakamastan Jesucristo chu kgalhakgaxmatkgo xlimapakgsin. Chu chuna “malaktanksakgo pi xlikana kalaksakkanit”  (2 Ped. 1:10). Xlikana pi makgapitsi la uku linkgoya kata chu nialh xtachuna skujnikgo la makgasa pero ni lakpuwankgo nialh naskujnikgo Jehová. Wata lu lhuwa skujnikgo. ¡Lu tlan liʼakxilhtit kawilinikgo wantiku putum kilhtamaku nalatamakgo kKatiyatni!

5. ¿Tuku kilitlawatkan xlakata Jehová nalitaxtu akgtum tamaskiwin kkilatamatkan, chu tuku xlakata min kilhtamaku lu tuwa?

⁵ Putum kstalaninanin Cristo tiku xatalaksakni o ni xatalaksakni xlimakgantaxtitkan uma tuku Jesús wa: «Komo wi tiku kistalaniputun, xakstu kalakgmakganka chu katiyalh xkiwi chu ankgalhin kakistalanilh» (Mat. 16:24). Chuna tlawakgo lhuwa millones kstalaninanin Cristo tiku kakninanikgo Dios chu latamaputunkgo kParaíso. Chu ni kaj tsinu skujnikgo wata lhuwa skujnikgo Dios. Chalhuwa lakkaxwilikgo ni lhuwa tuku nakgalhikgo kxlatamatkan chu precursor regular wankgo. Amakgapitsin precursores auxiliares wankgo akglhuwa papaʼ. Chu amakgapitsin maski nila precursores wankgo, na lu lhuwa skujnikgo Jehová. Xtachuna litaxtukgo la María tiku akmawakalh xamuksun aceite Jesús. ¿Tuku wa Jesús xlakata uma tuku tlawalh? «Xampi tlan tu kintlawaninit. [...] Wa [tlawalh] lantlata xla makaʼakchalh.» (Mar. 14:6-8.) Xlikana pi uma kakilhtamaku nema akgchipanit Satanás tlawa pi lu tuwa namakgkatsiyaw naskujniyaw Jehová. Pero tlan chuntiya naskujnaniyaw chu nalipawanaw kinTlatkan xalak akgapun. Kaʼakxilhwi pulaktati la tlan chuna natlawayaw.

Pulana kawiliw xTamapakgsin Dios

6. 1) ¿Tuku xlakata wanaw pi latamanin xalak kakilhtamaku kajwatiya kgalhikgo tuku anan la uku? 2) ¿Tuku xlakata nachuna natlawayaw la David?

⁶ Jesús kamasiyanilh xtamakgalhtawakgen pi pulana xwilikgolh xTamapakgsin Dios chu xtalakaskin. ¡Ni xtachuna «lakchixkuwin xalak uma kakilhtamaku» xlakata kajwatiya kgalhikgo tuku anan «kʼuma latamat»! (Kalikgalhtawakga Salmo 17:1, 13-15.) Ni lakapastakkgo xMalakatsukinakan, wata kaj lilakgaputsakgo tlakg nakgalhikgo tumin, nakgalhikgo akgtum familia chu lhuwa tumin nakamakgxtakgnikgo xkamanankan. Kaj watiya uma kgalhikgo kxlatamatkan. Pero akinin nachuna tlawaputunaw la David. Tuku tlakg xlakaskinka akxilhli wa xkgalhilh «akgtum tlan tukuwani» kxlakatin Jehová, nachuna la wa alistalh Salomón (Ecl. 7:1, nota). Xtachuna la Asaf chu David liwana akxilhkgolh pi ni anan tuku tlakg xlakaskinka chu lu tlan limakgkatsikan akxni tlan talalinkan Jehová kkilatamatkan. Lhuwa kstalaninanin Cristo nachuna lakpuwankgo. Wa xlakata pulana wilikgo tuku xla Dios nixawa xtaskujutkan.

7. ¿Tukuya tasikulunalin makglhtinalh chatum tala xlakata pulana wililh xTamapakgsin Dios?

⁷ Kaʼakxilhwi tuku akgspulalh Jean-Claude, chatum kgolotsin tiku kgalhi kgalhtutu xkamanan chu lama kRepública Centroafricana. Akgtum kilhtamaku xpatrón wanilh pi xʼama lakgpalini horas la kskuja chu xʼama skuja akgtujun kilhtamaku xmatsukilh kamakgchaxan aitat kakgotununu. Kʼuma kachikin ni lu anan taskujut, wa xlakata lhuwa latamanin lu ni makgatsankgaputunkgo. ¿Tuku tlawalh Jean-Claude? Wanilh xpatrón pi ni kajwatiya xlakgchan nakamaxki tuku nawakgo xfamilia wata na kuentajnatlawa xtakanajlakan chu na nakuentajtlawa congregación. Uma tuku lakatanks wanilh xpatrón: «Kapaxtikatsini pi kgalhiya taskujut. Wix ni kalakapastakti mimpuskat, minkamanan chu mintaʼakglhuwit. Wix kaj kaskujti chu ni kakalakapastakti amakgapitsin. Wix kalaksakti: mintaskujut o mintakanajla». ¿Tuku xtitlawaw komo chuna xkinkawanikan? Jean-Claude liwana xkatsi pi maski xmakgatsankgalh xtaskujut, Jehová xʼama kakuentajtlawa. Wa xlakata laksakli chuntiya naskuja kcongregación, xlipawan pi Dios xʼama kuentajtlawa xfamilia. Chalh kilhtamaku akxni xʼama tawila tamakxtumit, Jean-Claude alh chuna la xlismaninit chu lichali takaxli xlakata naʼan skuja maski ni xkatsi komo xʼamaka makglhtikan xtaskujut. Tachuwinanka kteléfono chu wanika pi xtamakxtukanita xpatrón. ¡Kintalakan ni makgatsankgalh xtaskujut!

8, 9. ¿La tlan nachuna nalakapastakaw la sacerdotes chu levitas?

 ⁸ Lhuwa kstalaninanin Cristo tiku katsikgo pi max namakgatsankgakgo xtaskujutkan akstu katlawanikan uma takgalhskinin: «Komo nakmakgatsankga kintaskujut, ¿la nakkamaxki tuku maklakaskinkgo kifamilia?» (1 Tim. 5:8). Max chuna titaxtunitawa o nina, pero liwana katsiyaw pi Jehová nikxni kamakgxtakga tiku la akgtum tamaskiwin liʼakxilhkgo chu lu xlakaskinka akxilhkgo skujnikgo. Asta max akxilhnitawa tuku wan Jesús: «Xapulana kaputsatit wantu xlimapakgsin Dios, chu wa xtalakaskin, wa nchu xlipaks yuma ntu amakgapitsin, paks nakataliwakaniyan» (Mat. 6:33).

⁹ Kalakapastakparaw xfamilia Leví. Ni xkamaxkikanit xpukuxtukan. Pero watuku tlakg xlakaskinka xtlawakgo wa kskujnanikgo Dios, wa xlakata tlan xlipawankgo pi Jehová xʼama kakuentajtlawa xlakata xkawaninit: «Akit wa tuku nalakgchanan, chu wa tuku namaskiwikana kxlakgstipan xkamanan Israel» (Núm. 18:20). Maski akinin ni skujaw kʼakgtum templo, pero na tlan chuna nalakapastakaw la sacerdotes, levitas chu nalipawanaw pi Dios nakinkamaxkiyan tuku maklakaskinaw. Chuna la talakatsuwitilhama lisputni, tlakg talakaskin nalipawanaw Jehová (Apo. 13:17).

Pulana kaputsaw xtalakaskin Dios

10, 11. Xlakata taskujut, ¿la limasiyakgo makgapitsi pi lipawankgo Jehová? Kalichuwinanti akgtum liʼakxilhtit.

¹⁰ Jesús na kawanilh xtamakgalhtawakgen pi pulana xputsakgolh xtalakaskin Dios (Mat. 6:33). Wa xlakata, akxni wi tuku natlawayaw, nalaksakaw tuku wan Jehová chu ni wa tuku wankgo latamanin (kalikgalhtawakga Isaías 55:8, 9). Kawiliw akgtum liʼakxilhtit. Makgapitsi latamanin xchankgo o kstakgo lixkuli, o axkut, xtlawakgo o kstakgo tuku limakgninankan kguerra o xkamasiyanikgo amakgapitsin la tlawakan guerra. Pero akxni tsukukgolh likgalhtawakgakgo Biblia, lakgpalikgolh tuku xliskujkgo chu xlatamatkan xlakata tlan tamunukgolh (Isa. 2:4; 2 Cor. 7:1; Gál. 5:14).

¹¹ Tiku chuna tlawalh wa Andrew chu xpuskat, xchatiykan tsukukgolh kgalhtawakgakgo chu laksakkgolh naskujnikgo Dios. Maski lu xpaxuwa niku kskujma, liwana lakpuwa chu makgxtakli xtaskujut. ¿Tuku xlakata? Xlakata kxtaskujut xliskujkgo tuku tamaklakaskin kguerra chu Andrew xtlawaputun xtalakaskin Jehová. Akxni makgxtakgli uma taskujut, tumin nema xkgalhi kaj ni akglhuwa papaʼ xʼama akchani xlakata nakalimakgtakgalha xkamanan. Xtasiya lakomo nitu xkgalhi chuna la levitas, nema ni xkamaxkikanit tiyat. Pero Andrew lipawa Jehová chu putsapa atanu taskujut. ¿La titaxtumakgolh uma familia? Akxilhkgonit pi «xmakan Jehová» chuntiya kamakgtayanit (Isa. 59:1). Chu tuku tlakg tlan xlakata ni lhuwa tuku kgalhikgo, Andrew chu xpuskat tlan xliputum kilhtamaku skujnimakgolh Jehová. Uma tuku wankgo: «Min kilhtamaku klilakgaputsayaw xlakata ni anan tumin, niku naktawilayaw chu xlakata klinawa kata. Pero Jehová putum kilhtamaku kinkamakgtayanitan. [...] Akxni akit chu kimpuskat klilakapastakaw tuku ktlawaw kkilatamatkan klakpuwanaw pi ni anan atanu taskujut nema lu makgapaxuwanan chuna la akxni skujnikan Jehová» (Ecl. 12:13). *

12. ¿Tuku talakaskin xlakata chuntiya pulana nawiliyaw xtalakaskin Dios? Kalichuwinanti tiku chuna tlawalh anta niku lapat.

¹² Tlan komo akstu xkinkatlawanikan uma takgalhskinin: «¿Chuntiya pulana nakputsa xtalakaskin Dios maski nakkgalhi taʼakglhuwit?». Tlan chuna natlawayaw komo «nakgalhiyaw kintakanajlakan kaj xtachuna aktsu xatalhtsi  mostaza» chuna la wa Jesús. Xkitaxtulh la komo xwaniw «kgastin: Katakganu anta lantla wila, chu kapit tawilaya alakatanu, xlikana xla pi xtakganulh. Chu ni pala pulaktum [...] ni lay xtlawatit lapi xlikana xlipawantit Dios» (Mat. 17:20, Hua Xasasti Talaccaxlan, 1999). ¿Tuwa makgkatsiyaw nakanajlayaw uma tachuwin? Komo chuna, tlan xkakgalhskiw amakgapitsi natalan la kamakgtayanit Jehová. Chu wantuku nakinkawanikgoyan namatliwakglha kintakanajlakan.

Kapaxtikatsiniw tuku kinkalimasiyaniyan Dios

13. ¿Tuku tlan nalipawankgo tiku skujnanikgo Jehová?

¹³ Tiku akgtum lanka talakgalhaman liʼakxilhkgo xlakata skujnanimakgolh Jehová katsikgo pi nakakuentajtlawa chuna la levitas. Chu ni kajwatiya nakamaxki tuku maklakaskinkgo, na nakamaxki tuku nalitatliwakglha xtakanajlakan. Kalakapastakwi David: maski xwi klhuku, xkatsi pi Jehová chuntiya xmakgtayama. Akinin nachuna kalipawaw Jehová akxni nila lakkaxtlawayaw kintaʼakglhuwitkan. Na kalakapastakwi xliʼakxilhtit Asaf: nialh chuna akxilhli tuku xlilakgaputsama akxni «tanulh kxtemplo Dios» (Sal. 73:17). Na natatliwakglha kintakanajlakan komo naputsayaw xtamakgtay Jehová. Maski katuwa tuku natitaxtuyaw nalimasiyaniyaw pi xlakaskinka akxilhaw nakakninaniyaw chu liʼakxilhaw akgtum tamaskiwin.

14, 15. ¿Tuku kilitlawatkan akxni liwana maʼakgatekgsninankan tuku pulana ni liwana xtaʼakgatekgsa chu tuku xlakata?

¹⁴ Min kilhtamaku liwana kinkamaʼakgatekgsnikanan «wantu [...] [tuwa] xtalakapastakna Dios» (1 Cor. 2:10-13). ¿Tuku tlawayaw akxni Jehová tlakg kinkamaʼakgatekgsniyan xTachuwin? Kilitlawatkan la apóstol Pedro. Akgtum kilhtamaku Jesús kawanilh tiku xkatachuwinama: «Chu lapi wixin ni naliwayanatit kintiyatliwa, chu lapi ni nalikgotnanatit kinkgalhni, ni katikgalhitit yama xaxlikana latamat». Makgapitsi ni liwana akgatekgskgolh chu wankgolh: “Lu wa nitlan yuma ntachuwin; ¿ti ntlan nakgaxmata?”. Wa xlakata «titalakgaspittayakgolh». Pero kaʼakxilhwi tuku wa Pedro: «Tlati, ¿xati naklakganaw? Man wix nkgalhiya ntachuwin xla latamat wa ntu xaliʼankgalhin» (Juan 6:53, 60, 66, 68).

¹⁵ Xlikana pi, Pedro ni liwana akgatekgsli tuku xwamputun Jesús akxni wa pi xwakgolh xtiyatliwa chu xwakgolh xkgalhni. Pero uma ni litaʼakglhuwilh, xlakata xkatsi pi Dios xkamakgtayalh xlakata tlan xʼakgatekgskgolh tuku xaxlikana. ¿Chu akinin tuku tlawayaw? ¿Tuku tlawayaw akxni taxtu tuku pulana ni liwana xtaʼakgatekgsnit xalak Biblia? ¿Akgatekgsaw tuku xlakata lakgpalikanit? (Pro. 4:18.) Nachuna kilitlawatkan la tiku xlamakgolh kBerea xapulana siglo, akxni «xtapaxuwankan ntimakgamakglhtinankgolh xtachuwin Dios wata, chali chali xlakputsakgoy ntatsokgnun» (Hech. 17:11). Komo nachuna natlawayaw, tlakg xlakaskinka naʼakxilhaw naskujnaniyaw Dios chu akgtum tamaskiwin naliʼakxilhaw.

Natatamakgaxtokgaw tiku «kanajlaniy nkimPuchinakan»

16. ¿Tuku kilitlawatkan xlakata namakgantaxtiyaw tuku wan 1 Corintios 7:39 chu akgtum tamaskiwin nalitaxtu Jehová kimpalakatakan?

¹⁶ Makgapitsi kstalaninanin Cristo putum kilhtamaku kgalhakgaxmatkgolh, akxni makgantaxtikgolh xlimapakgsin Dios niku wan kajwatiya natatamakgaxtokgkgo tiku «kanajlaniy nkimPuchinakan», maski max nialh natamakgaxtokgkgo (1 Cor. 7:39). Putum xlikatsitkan pi Jehová nakakuentajtlawa chu ni katikamakgxtakgli. Akxni lu nalipuwankgo o nataxlajwaniputunkgo tlan natalakatsuwinikgo chu nawanikgo Jehová tuku lilakgaputsakgo, chuna la tlawalh David: «Naklitakgalhchiwinan tu kpatima nak ixlakatin, nakwani tu klilakgaputsamaj. Akxni kxtakgajnama [o kpatinama] y nikkatsi tu tlan naktlawaj» (Sal. 142:1-3). Palakachuwina Jeremías max nachuna xmakgkatsi, xlakata akglhuwa kata akstu xlichuwinan Dios xlakata ni xtamakgaxtokgnit. Lu tlan liʼakxilhtit nema kinkawilinin  talichuwinan kcapítulo 8 xla libro Dios nos habla mediante Jeremías.

17. ¿Tuku makgtaya chatum tala akxni lipuwan?

¹⁷ Chatum tala tsumat tiku lama kʼEstados Unidos wan tuku titaxtuma: «Ni wa para ni ktamakgaxtokgputun. Kaj kkgalhkgalhima tiku xlilat naktatamakgaxtokga. Kintse ni xtatayana Jehová, lu xkimaʼakgpuwantiniputun pi tunkun xaktatamakgxtokgli tiku xkiwanilh. Wa xlakata kkgalhskilh: “Komo kaj lakapala xaktatamakgaxtokgli chu nitlan xkitaxtulh, ¿wix nalakkaxtlawaya?”. Chuna la titaxtulh kilhtamaku, akxilhli pi akit xakkgalhi lu tlan taskujut, tlan akstu ktamakgtakgalha chu xakpaxuwa la xaklama. Wa xlakata nialhtu kiwanilh». ¿Tuku tlawa uma tala akxni lu lipuwan? Xla kinkawaniyan: «Kskini xtamakgtay Jehová. Nikxni kimakgxtakga». ¿Tuku makgtaya xlakata nalipawan Jehová? Wan: «Ktlawani oración. Akxni chuna ktlawa klakapastaka pi Dios xlikana lama chu putum kilhtamaku kimakgtaya. ¡Lu klipaxuwa xlakata tlan ktalalin Mapakgsina xliputum kakilhtamaku»! Lu liwana katsi pi «xaliwaka ntlan [...] nalilatapaya ntu natakinana, ni xawa ntu namakgamakglhtinana», wa xlakata wan: «Kkamakgtaya amakgapitsin pero ni klapuwan wi tuku nakimaxkikgo. Akxni klakpuwan: “¿Tuku tlan xaktlawalh xpalakata achatum?”, uma lu tlan klimakgkatsi» (Hech. 20:35). Xlikana pi uma tala lu xlakaskinka akxilha skujnani Jehová chu akgtum tamaskiwin liʼakxilha.

18. ¿Tuku natlawayaw xlakata Jehová akgtum tamaskiwin nakinkaʼakxilhan?

¹⁸ Maski katuwa tuku titaxtumaw, Jehová tlan nalitaxtu akgtum tamaskiwin kimpalakatakan. Chu chuna akgtum tasikulunalin namakgtapakgsiyaw kxkachikin (2 Cor. 6:16, 17). Chu tuku tlakg tlan, na namakglhtinanaw tasikulunalin nema makglhtinankgolh xlakskujnin xala makgasa: Jehová ni kaj akgtum tamaskiwin nalitaxtu, wata Jehová na akgtum tamaskiwin nakinkaʼakxilhan (kalikgalhtawakga Deuteronomio 32:9, 10). ¡Lu lipaxuwayaw pi xtachuna la kakuentajtlawalh israelitas, na nakinkakuentajtlawayan xlakata tapakgsiniyaw Jehová! (Sal. 17:8.)

[Notas nema wilakgo kpágina]

¿Tuku katsiniw?

Kawanti la liʼakxilhaw akgtum tamaskiwin Jehová akxni:

• Pulana wiliyaw xTamapakgsin Dios chu xtalakaskin

• Akxni paxtikatsiniyaw tuku kinkalimasiyaniyan

• Akxni kgalhakgaxmataw limapakgsin niku wan kajwatiya natatamakgaxtokgaw tiku «kanajlaniy nkimPuchinakan»

[Takgalhskinin]

[Epígrafe xla página 16]

Jehová akgtum tamaskiwin litaxtu akxni tlakg xlakaskinka akxilhaw naskujnaniyaw

[Epígrafe xla página 18]

Kinkamatliwakglhan xliʼakxilhtit Jeremías