Xana U Endla Yehovha A Va Xiavelo Xa Wena?
Xana U Endla Yehovha A Va Xiavelo Xa Wena?
“Hambetani mi lava mfumo ni ku lulama ka yena ku sungula, xisweswo swilo leswin’wana hinkwaswo mi ta engeteleriwa swona.”—MAT. 6:33.
1, 2. (a) “Israyele wa Xikwembu” loyi a boxiweke eka Vagalatiya 6:16 u kombetela eka vamani? (b) Eka Matewu 19:28, “tinyimba ta Israyele ta 12” ti fanekisela vamani?
LOKO u hlaya vito leri nge Israyele eBibeleni, i yini leswi taka emiehleketweni ya wena? Xana u ehleketa hi Yakobe, n’wana wa Isaka, loyi endzhaku ka nkarhi a thyiweke vito leri nge Israyele? Kumbe xana u ehleketa hi vatukulu vakwe, ku nga tiko ra khale ra Israyele? Bibele yi tlhela yi vulavula hi Israyele wa moya, kumbe “Israyele wa Xikwembu,” ku nga lava 144 000 lava totiweke hi moya lowo kwetsima leswaku va ta va tihosi ni vaprista etilweni. (Gal. 6:16; Nhlav. 7:4; 21:12) Kambe vito leri nge Israyele ri tlhela ri tirhisiwa hi ndlela yin’wana yo hlawuleka eka Matewu 19:28.
2 Yesu u te: “Eku tumbuluxeni hi vuntshwa, loko N’wana wa munhu a tshama ehansi exiluvelweni xakwe lexi vangamaka, na n’wina lava mi ndzi landzeleke mi ta tshama eswiluvelweni swa 12, mi avanyisa tinyimba ta Israyele ta 12.” Eka ndzimana leyi, “tinyimba ta Israyele ta 12” hi lava nga ta avanyisiwa hi vadyondzisiwa lava totiweke va Yesu, va tlhela va kuma vutomi lebyi nga heriki emisaveni leyi nga Paradeyisi. Va ta vuyeriwa entirhweni wa vaprista lava 144 000.
3, 4. Hi xihi xikombiso lexinene lexi vatotiwa lavo tshembeka va xi vekaka?
3 Ku fana ni vaprista ni Valevhi va khale, vatotiwa namuntlha va teka ntirho wa vona wu ri wa nkoka swinene. (Tinhl. 18:20) Vatotiwa a va swi langutelanga ku nyikiwa ndhawu yo karhi laha misaveni tanihi ndzhaka ya vona. Ematshan’weni ya sweswo, va swi langutele hi mahlo-ngati ku va tihosi ni vaprista swin’we na Yesu Kreste etilweni. Va ta hambeta va tirhela Yehovha exiavelweni xexo, hi ku ya hi leswi Nhlavutelo 4:10, 11 yi swi vulaka malunghana ni vatotiwa exikhundlheni xa vona xa le tilweni.—Ezek. 44:28.
4 Loko vatotiwa va ha ri laha misaveni, va hanya hi ndlela leyi kombisaka leswaku Yehovha i xiavelo xa vona. Va wu teka wu ri wa nkoka swinene ntirho lowu va wu endlelaka Xikwembu. Va kombisa ripfumelo eka gandzelo ra nkutsulo ra Kreste naswona va n’wi landzela nkarhi hinkwawo, xisweswo va ‘tiyisekisa ku vitaniwa ni ku hlawuriwa ka vona.’ (2 Pet. 1:10) Swiyimo ni vuswikoti bya vona a swi fani kambe a va tiyimeleli ha swona leswaku va endlela Xikwembu ntirho lowu nga nyawuriki. Ku hambana ni sweswo, va endla hinkwaswo leswi va nga swi kotaka leswaku va rhangisa ntirho wolowo evuton’wini bya vona. Nakambe va va vekela xikombiso lexinene hinkwavo lava nga ni ntshembo wo hanya emisaveni leyi nga paradeyisi.
5. Vakreste hinkwavo va nga swi kota njhani ku teka Yehovha tanihi xiavelo xa vona naswona ha yini sweswo swi nga ha va tikelaka?
5 Ku nga khathariseki leswaku hi ni ntshembo wo hanya etilweni kumbe emisaveni, hi fanele hi ‘titshika kutani hi rhwala mhandzi ya hina ya nxaniso ivi hi landzela Kreste nkarhi hinkwawo.’ (Mat. 16:24) Vanhu va timiliyoni lava va swi languteleke hi mahlo-ngati ku hanya emisaveni leyi nga Paradeyisi, va gandzela Xikwembu ni ku landzela Kreste hi ndlela yoleyo. A va swi tsakeli ku endla leswitsongo kasi va swi xiya leswaku va nga swi kota ku endla leswi engetelekeke. Vo tala va susumeteleke ku hanya vutomi byo olova naswona va ve maphayona. Van’wana va phayona tin’hweti to karhi lembe ni lembe. Hambiswiritano, van’wanyana lava tsandzekaka ku phayona va tirha hi matimba ensin’wini. Vanhu volavo va fana na Mariya loyi a toteke Yesu mafurha yo nun’hwela. Yesu u te: “U ndzi endlele xiendlo lexinene. . . . U endle leswi a swi kotaka.” (Mar. 14:6-8) A swi nge hi oloveli ku endla hinkwaswo leswi hi nga swi kotaka hikuva hi hanya emisaveni leyi lawuriwaka hi Sathana. Kambe hi fanele hi tikarhata swinene naswona hi tshemba Yehovha. A hi kambisiseni ndlela leyi hi nga swi endlaka ha yona sweswo etimhakeni ta mune.
Ku Lava Mfumo Wa Xikwembu Ku Sungula
6. (a) Vanhu hi ku angarhela va swi kombisa njhani leswaku xiavelo xa vona xi le vuton’wini lebyi ntsena? (b) Ha yini swi antswa ku tekelela Davhida?
6 Yesu u dyondzise valandzeri vakwe leswaku va lava Mfumo ku sungula ni ku lulama ka Xikwembu. Hi ntolovelo vanhu va rhangisa swilaveko swa vona vini ku fana ni “vanhu va mafambiselo ya swilo ya sweswi, lava xiavelo xa vona xi nga le vuton’wini lebyi.” (Hlaya Pisalema 17:1, 13-15.) Leswi va nga riki na mhaka ni Muvumbi wa vona, vo tala va vona va tikarhatela ku hanya vutomi bya vulovolovo, ku va ni ndyangu ni ku siyela vana va vona ndzhaka. Xiavelo xa vona xi le vuton’wini lebyi ntsena. Kambe Davhida a a tikarhatela ku tiendlela “vito lerinene” eka Yehovha. Endzhaku ka nkarhi, n’wana wakwe Solomoni u khutaze vanhu hinkwavo leswaku va endla tano. (Ekl. 7:1, nhlamuselo ya le hansi ya NW) Ku fana na Asafa, Davhida a a swi tiva leswaku swa antswa ku va munghana wa Yehovha ku tlula ku rhangisa swilaveko swakwe evuton’wini. A a swi tsakela ku famba na yena. Namuntlha, Vakreste vo tala va kombise leswaku ntirho lowu va wu endlelaka Yehovha i wa nkoka swinene ku tlula ntirho wa vona wa ku tihanyisa.
7. Makwerhu un’wana u katekisiwe njhani hileswi a a lava Mfumo ku sungula?
7 Ehleketa hi Jean-Claude wa le Riphabliki ra Afrika Xikarhi. I nkulu tlhelo tata wa vana vanharhu. Etikweni rero, swa tika ku kuma ntirho naswona vanhu vo tala va nga endla xin’wana ni xin’wana leswaku va nga lahlekeriwi hi ntirho wa vona. Siku rin’wana, mininjhere wakwe u n’wi byele leswaku a nghena entirhweni nivusiku, a sungula hi 6:30 nimadyambu vhiki hinkwaro. Jean-Claude u hlamusele mininjhere wakwe leswaku u fanele a khathalela swilaveko swa nyama swa ndyangu wakwe a tlhela a wu pfuna wu va ni vuxaka lebyinene ni Xikwembu. U tlhele a vula leswaku u ni vutihlamuleri byo pfuna vandlha. Kambe mininjhere wakwe u te: “Loko u ve ni njombo yo kuma ntirho, u fanele u rivala hi swilo leswin’wana hinkwaswo, ku katsa ni nsati, vana ni swiphiqo swa wena. U fanele u hanyela ntirho wa wena ntsena. Hlawula loko u lava vukhongeri bya wena kumbe ntirho.” Loko a ku ri wena a wu ta va u endle yini? Jean-Claude a a swi tiva leswaku loko o lahlekeriwa hi ntirho, Xikwembu a xi ta n’wi khathalela. A a ta hambeta a endla leswi engetelekeke entirhweni wa Xikwembu naswona xona a xi ta n’wi pfuna ku khathalela swilaveko swa ndyangu wakwe. Xisweswo, u ye eminhlanganweni leyi landzeleke ya le xikarhi ka vhiki. Endzhaku ka minhlangano u tilunghiselele ku ya entirhweni hambileswi a a nga swi tivi loko a ta hlongoriwa entirhweni. Hi nkarhi wolowo u beriwe riqingho a byeriwa leswaku mininjhere wakwe u hlongoriwile kambe yena a nga hlongoriwanga.
8, 9. Hi nga va tekelela njhani vaprista ni Valevhi hi ku teka Yehovha tanihi xiavelo xa hina?
8 Van’wana lava va tshameke va lava ku lahlekeriwa hi ntirho wa vona va nga ha va va tivutisile va ku, ‘Ndzi ta byi hetisisa njhani vutihlamuleri byo wundla ndyangu wa mina?’ (1 Tim. 5:8) Ku nga khathariseki leswaku u tshame u langutana ni xiyimo xexo kumbe e-e, a swi kanakanisi leswaku wa swi tiva leswaku a wu nge heli matimba loko Xikwembu xi ri xiavelo xa wena naswona u rhangisa ntirho wa xona evuton’wini bya wena. Loko Yesu a byele vadyondzisiwa vakwe leswaku va hambeta va lava mfumo ku sungula u va tiyisekise a ku: “Swilo leswin’wana hinkwaswo”—swo kota swakudya, swakunwa kumbe swiambalo—“mi ta engeteleriwa swona.”—Mat. 6:33.
9 Ehleketa hi Valevhi, lava nga yi kumangiki ndhawu leyi nga ndzhaka ya vona. Leswi vugandzeri lebyi tengeke a byi ri nchumu wa nkoka swinene eka vona, a va fanele va tshemba Yehovha leswaku u ta khathalela swilaveko swa vona swa nyama hikuva u va byele a ku: “Mina ndzi xiavelo xa [n’wina].” (Tinhl. 18:20) Hambileswi hi nga tirhiki etempeleni ya xiviri ku fana ni vaprista ni Valevhi, hi nga va tekelela, hi tshemba leswaku Yehovha u ta hi khathalela. Tanihi leswi makumu ma yaka ma tshinela swinene, i swa nkoka swinene ku tshemba leswaku Xikwembu xi ta hi khathalela.—Nhlav. 13:17.
Ku Lava Ku Lulama Ka Xikwembu Ku Sungula
10, 11. Van’wana va swi kombise njhani leswaku va tshemba Yehovha loko swi ta entirhweni wa vona wa ku tihanyisa? Nyika xikombiso.
10 Yesu u tlhele a khutaza vadyondzisiwa vakwe leswaku va ‘hambeta va lava ku lulama ka Xikwembu ku sungula.’ (Mat. 6:33) Leswi swi vula ku rhangisa milawu ya Yehovha ya leswinene ni leswo biha ku tlula mikhuva ya vanhu. (Hlaya Esaya 55:8, 9.) Vanhu van’wana a va byala fole kumbe va xavisa fole, va letela vanhu ku lwa enyimpini kumbe ku endla swibamu ni ku swi xavisa. Kambe endzhaku ko dyondza ntiyiso, vo tala va vona va hlawule ku tshika mintirho yoleyo kutani va fanelekela ku khuvuriwa.—Esa. 2:4; 2 Kor. 7:1; Gal. 5:14.
11 Un’wana wa vona i Andrew. Loko yena ni nsati wakwe va dyondze hi Yehovha, va hlawule ku n’wi tirhela. Andrew a a wu rhandza ngopfu ntirho wakwe kambe u wu tshikile. Ha yini? Hikuva khampani leyi a a tirha eka yona a yi katseka etinyimpini kutani yena a a tiyimisele ku lava ku lulama ka Xikwembu ku sungula. Loko Andrew a tshika ntirho wolowo, a a ri ni vana vambirhi ni mali leyi a a ta yi tirhisa ku ringana tin’hweti ti nga ri tingani ntsena. Hi ku ya hi langutelo ra vanhu, a swi ta va swi tikombe onge a a nga ri na ‘ndzhaka.’ U tshembe Xikwembu kutani a lava ntirho. Sweswi loko yena ni ndyangu wakwe va ehleketa hi nkarhi wolowo, va nga vula hi ku tiyiseka leswaku voko ra Yehovha a ri komanga. (Esa. 59:1) Andrew ni nsati wakwe va ve maphayona hileswi va oloviseke vutomi bya vona. U ri: “Minkarhi yin’wana a hi vilela hi mali, ndhawu yo tshama, rihanyo ra hina ni leswi a hi dyuhala. Kambe minkarhi hinkwayo Yehovha u hi seketerile. . . . Hi nga vula hi ku tiyiseka leswaku ku tirhela Yehovha i swa risima swinene naswona swa vuyerisa ku tlula ntirho wihi ni wihi lowu munhu a nga wu endlaka.” *—Ekl. 12:13.
12. Hi yihi mfanelo leyi lavekaka leswaku hi kota ku lava ku lulama ka Xikwembu ku sungula? Nyika swikombiso swa le ndhawini ya ka n’wina.
12 Yesu u byele vadyondzisiwa vakwe a ku: “Loko mi ri ni ripfumelo leri ringanaka ni ndzoho ya sinapi, mi ta byela ntshava leyi mi ku, ‘Suka laha u ya lahaya,’ kutani yi ta suka, naswona ku hava lexi nga ta mi tsandza.” (Mat. 17:20) Xana a wu ta swi kota ku rhangisa milawu ya Xikwembu evuton’wini bya wena hambiloko sweswo swi ta ku vangela swiphiqo? Loko u nga tiyiseki leswaku a wu ta swi kota, vulavula ni vanhu van’wana evandlheni ra ka n’wina u twa leswaku va swi kotise ku yini. A swi kanakanisi leswaku mintokoto ya vona ya ndlela leyi Yehovha a va pfuneke ha yona yi ta tiyisa ripfumelo ra wena.
Ku Tlangela Malunghiselelo Ya Yehovha Ya Moya
13. Loko hi tirha hi matimba entirhweni wa Yehovha, i yini leswi hi nga swi langutelaka malunghana ni malunghiselelo ya moya?
13 Loko u wu teka wu ri wa nkoka ntirho lowu u wu endlelaka Yehovha, u nga tiyiseka leswaku u ta khathalela swilaveko swa wena swa nyama ni swa moya hilaha a endleke hakona eka Valevhi. Ehleketa hi Davhida. Hambileswi a a tumbele ebakweni, a a tshemba leswaku Xikwembu xi ta n’wi khathalela. Na hina hi nga xi tshemba hambiloko swi tikomba onge ku hava loyi a nga hi pfunaka. Tsundzuka leswaku loko Asafa a ye “evukwetsimelweni lebyikulu bya Xikwembu,” u kote ku twisisa leswi a swi n’wi karhata. (Ps. 73:17) Hilaha ku fanaka, hi fanele hi tshemba Yehovha leswaku u ta hi nyika leswi hi swi lavaka leswaku hi tshama hi ri ni vuxaka lebyinene na yena. Leswi swi ta kombisa leswaku ha wu tlangela ntirho lowu hi n’wi endlelaka wona ku nga khathariseki leswaku swiyimo swa hina swi njhani. Xisweswo hi ta endla Yehovha a va xiavelo xa hina.
14, 15. Hi fanele hi endla yini loko ku cinciwa ndlela leyi hi ma twisisaka ha yona matsalwa yo karhi naswona ha yini?
14 Xana wa n’wi tshemba Yehovha loko a hi pfuna leswaku hi twisisa “swilo leswi enteke swa Xikwembu” leswi nga eBibeleni? (1 Kor. 2:10-13) Muapostola Petro u hi vekele xikombiso lexinene emhakeni yoleyo. Yesu u byele vayingiseri Vakwe a ku: “Loko mi nga dyi nyama ya N’wana wa munhu mi tlhela mi nwa ngati yakwe, a mi na vutomi.” Leswi vadyondzisiwa vo tala a va ehleketa leswaku Yesu a a vulavula hi nyama ni ngati ya xiviri, va te: “Mhaka leyi yi tsema nhlana; i mani la nga yi yingisaka?” Kutani “va [tlhelele] eka swilo swa le ndzhaku.” Kambe Petro u te: “Hosi, xana hi ta ya eka mani? Hi wena u nga ni marito ya vutomi lebyi nga heriki.”—Yoh. 6:53, 60, 66, 68.
15 Petro a a nga swi twisisi hi ku helela leswi Yesu a a vula swona malunghana ni ku dya nyama ni ku nwa ngati Yakwe. Kambe a a pfumela leswaku Yehovha a a tirhisa Yesu leswaku a pfuna vanhu va twisisa ntiyiso. Loko ku cinciwa ndlela leyi hi ma twisisaka ha yona Matsalwa yo karhi, xana u ringeta ku twisisa swivangelo leswi endleke leswaku ma cinciwa? (Swiv. 4:18) Vaberiya va lembe-xidzana ro sungula va amukele rito “hi mapfundza lamakulu ya mianakanyo, va kambisisa Matsalwa hi vukheta siku ni siku.” (Mint. 17:11) Loko u tekelela xikombiso xa vona, u ta swi tlangela swinene leswi Yehovha a nga xiavelo xa wena.
Ku Teka eHosini Ntsena
16. Hi ku ya hi 1 Vakorinto 7:39, Xikwembu xi nga va xiavelo xa hina hi ndlela yihi?
16 Ndlela yin’wana leyi Vakreste va faneleke va tshama va ehleketa hi swikongomelo swa Xikwembu ha yona i ku yingisa xileriso xa le Bibeleni xa leswaku va teka “eHosini ntsena.” (1 Kor. 7:39) Vo tala va hlawule ku nga ngheneli vukati ematshan’weni yo tlula xileriso lexi. Xikwembu xa va khathalela swinene vanhu volavo. Davhida u endle yini loko a titwe a ri ni xivundza a vona onge ku hava munhu loyi a nga n’wi pfunaka? U te: “Ndzi hambete ndzi phofula mhaka leyi ndzi karhataka emahlweni ka [Xikwembu]; ndzi ye emahlweni ndzi [xi] byela hi maxangu ya mina, loko moya wa mina wu tsana endzeni ka mina.” (Ps. 142:1-3) Swi nga ha endleka muprofeta Yeremiya, loyi a tirheleke Xikwembu hi ku tshembeka ku ringana malembe yo tala a nga tekanga, u tshame a titwa tano. U nga ha dyondza hi xikombiso xakwe eka ndzima 8 ya buku leyi nge Xikwembu Xi Vulavula Na Hina Hi Ku Tirhisa Yeremiya.
17. Makwerhu un’wana wa xisati u swi kotisa ku yini ku langutana ni xivundza lexi a pfaka a va na xona?
17 Makwerhu un’wana wa xisati wa le United States, u te: “A ndzi nga tiyimiselanga ku tshama ndzi nga tengiwanga. Ndzi nga swi tsakela ku tekiwa loko ndzo kuma munhu loyi a fanelekaka. Mana wa mina loyi a nga riki Mbhoni u ringetile ku ndzi khorwisa leswaku ndzi tekana ni munhu wihi ni wihi loyi a ndzi gangisaka. Kambe ndzi n’wi vutisile loko a ta swi tsakela leswaku ndzi n’wi sola loko vukati bya mina byo tshuka byi famba ximatsi. Hi ku famba ka nkarhi, u xiye leswaku ndzi tirha kahle, ndza swi kota ku tikhathalela naswona ndzi tsakile. Kutani u tshike ku ndzi sindzisa ku nghenela vukati.” Minkarhi yin’wana makwerhu loyi u va na xona xivundza. U te: “Ndzi ringeta ku veka ntshembo wa mina eka Yehovha. A nga si tshama a ndzi tshika.” I yini leswi n’wi pfuneke leswaku a tshemba Yehovha? U ri: “Xikhongelo xi ndzi pfuna leswaku ndzi teka Xikwembu xi ri munhu wa xiviri nileswaku xi na mina. La nge Henhla-henhla wa ndzi yingisa, kutani ha yini ndzi nga fanelanga ndzi tivona ndzi ri wa nkoka naswona ndzi tsaka?” Leswi a tivaka leswaku “ku nyika swi tisa ntsako lowukulu ku tlula ku amukela,” u ri: “Ndzi tikarhatela ku pfuna vanhu van’wana handle ko langutela leswaku va ndzi hakela. Swa ndzi tsakisa loko ndzi tivutisa ndzi ku, ‘Ndzi nga n’wi pfuna njhani munhu loyi?’” (Mint. 20:35) Hakunene makwerhu loyi u teka Yehovha tanihi xiavelo xakwe naswona wa tsaka leswi a n’wi tirhelaka.
18. Yehovha a nga va xiavelo xa wena hi ndlela yihi?
18 Ku nga khathariseki swiyimo leswi u langutanaka na swona, u nga swi kota ku teka Xikwembu tanihi xiavelo xa wena. Loko u endla tano, u ta va un’wana wa vanhu va xona lava tsakeke. (2 Kor. 6:16, 17) Sweswo swi ta endla leswaku Yehovha a va xiavelo xa wena ku fana ni malandza man’wana yakwe ya khale. (Hlaya Deteronoma 32:9, 10.) Ku fana ni Vaisrayele lava Xikwembu xi veke xiavelo xa vona exikarhi ka matiko, na wena xi nga va xiavelo xa wena xi tlhela xi ku khathalela.—Ps. 17:8.
[Nhlamuselo ya le hansi]
^ par. 11 Hlaya Xalamuka! ya November 2009, matluka 12-14.
U Nga Hlamula Njhani?
U nga swi endlisa ku yini leswaku Yehovha a va xiavelo xa wena
• hi ku lava Mfumo wa Xikwembu ni ku lulama ka xona ku sungula?
• hi ku tlangela malunghiselelo yakwe?
• hi ku yingisa xileriso xakwe xo teka eHosini ntsena?
[Swivutiso Swa Dyondzo]
[Marito lama tshahiweke exihlokweni lama nga eka tluka 13]
Yehovha u va xiavelo xa hina loko hi rhangisa ntirho wakwe evuton’wini bya hina
[Xifaniso lexi nga eka tluka 15]
Xikombiso xa Yeremiya xa khutaza
