O Kasi Hẽ Oku Ecelela Okuti Yehova O Kala Onepa Yove?
O Kasi Hẽ Oku Ecelela Okuti Yehova O Kala Onepa Yove?
“Tete [sandiliyi] usoma waye kuenda esunga liaye, kuenje ovina evi viosi viu vokiyiwi.”—MAT. 6:33.
1, 2. (a) Onduko “Isareli ya Suku” ya tukuiwa kelivulu lia Va Galatia 6:16, yi tiamisiwila ku velie? (b) “Ekũi liapata kapata avali a Isareli,” a tukuiwa kelivulu lia Mateo 19:28, a tiamisiwile ku velie?
ECI o tanga Vembimbiliya onduko Isareli, nye o sima? O sima hẽ okuti, Yakoba omõla wa Isake, una wa tukuiwa hati, Isareli? Ale o sima okuti ocitumbulukila caye cina ceya oku linga ofeka yo Isareli? Oco hẽ nye ci popiwa catiamẽla ko Isareli yespiritu? Olonjanja vimue, onduko Isareli vupopi wocindekaise, yi tiamisiwila ko “Isareli ya Suku.” Etendelo liaco, li soka 144.000 komanu va wavekiwa lespiritu sandu, oco va linge olosoma kilu, kuenda ovitunda. (Va Gal. 6:16; Esit. 7:4; 21:12) Pole, apata 12 a Isareli a tukuiwa kelivulu lia Mateo 19:28, a kuetevo elomboloko likuavo.
2 Yesu wa popia hati: “Eci Mõlomanu a tumãla komangu yulamba waye, ene wa ñuami vu tumãla kolomangu ekũi la vivali oku tetuluila ekũi liapata kapata avali a Isareli.” Vocinimbu eci, ondaka “ekũi liapata kapata avali a Isareli,” yi lomboloka omanu vana va ka kala Voluali luokaliye palo posi, okuti, va ka vialiwa lolombuavekua via Yesu. Omanu vaco, va ka kuatisiwa lupange wovitunda vi soka 144.000.
3, 4. Ongangu yipi yiwa olombuavekua via siata oku lekisa?
3 Koloneke vilo, olombuavekua vi kasi oku linga upange ndowu wa enda oku lingiwa lovitunda kuenda va Lewi. (Ate. 18:20) Olombuavekua ka vi lavoka oku tambula ocitumãlo, ndaño onepa yimue kulo kilu lieve. Momo, vi lavoka oku kala olosoma kuenda ovitunda kilu kumue la Yesu Kristu. Olombuavekua viaco, vi ka amamako oku vumba Yehova, ndomo ca lekisiwa kelivulu Liesituluilo 4:10, 11, kuna ku tukula ocikele vi ka tambula kilu.—Esek. 44:28.
4 Osimbu olombuavekua vi kasi palo posi, via ambata omuenyo umue u lekisa okuti, Yehova o kasi ndonepa yavo. Via velisapo esumũlũho lioku vumba Suku. Kuenje, vi lekisa ekolelo kocisembi ca Kristu, kuenda via amamako oku u kuama, osimbu ‘vi talamẽla oku kovongiwa loku nõliwa kuavo.’ (2 Pet. 1:10) Olombuavekua via litepa kekalo liomuenyo wavo kuenda koku loñoloha. Pole, ka vi lisandela esunga lioku linga lika ovina vimue kupange wa Suku omo liekalo liomuenyo wavo. Momo via siata oku likolisilako oku pitisa kovaso upange wa Suku, poku linga ovina viosi va tẽla. Vana va kuete elavoko lioku kala voluali luokaliye palo posi, va siatavo oku lekisa ongangu yiwa.
5. Nye a Akristão vosi va sukila oku linga oco Yehova a kale ndonepa yavo, kuenda momo lie ka ca lelukilile oku ci linga?
5 Ci kale okuti tu kuete elavoko lioku enda kilu, ale lioku kala palo posi, tu sukila oku kuata ocituwa coku ‘lieca olumue, loku tikula uti wetu poku kuama Kristu.’ (Mat. 16:24) Omanu valua va kuete elavoko lioku kala Voluali luokaliye palo posi, va kasi ale oku fendela Suku, kuenda va kuãi Kristu. Omanu vaco, ka va lisandela esunga lioku linga lika ovina vimue, osimbu okuti, va pondola oku linga upange walua. Valua pokati kavo, va siata oku leluisa omuenyo, poku litumbika kupange wakundi votembo yosi. Vamue va siata oku kala akundi va sokamo vokuenda kuolosãi vimue vunyamo. Pole, vakuavo ndaño okuti ka va pondola oku kala akundi votembo yosi, va siata oku likolisilako kupange woku kunda. Omanu vaco, va sokisiwa la Maria, una wa waveka ulela Yesu. Kuenje, Yesu wa popia hati: “Wa ndingila upange uwa. . . . Wa linga eci a tẽla.” (Mar. 14:6-8) Oku linga ovina tu tẽla, ka ca lelukile, momo tu kasi voluali lua vialiwa la Satana. Omo liaco, tu sukila oku likolisilako oku ci linga, kuenda oku kolela ku Yehova. Tu kũlĩhĩsi ovina vikuãla vi tu kuatisa oku ci linga.
Tete Sandiliya Usoma wa Suku
6. (a) Nye omanu valua va siata oku linga ci lekisa okuti va tiamisila lika utima kovina viomuenyo? (b) Momo lie oku setukula ongangu ya Daviti ci kuetele esilivilo?
6 Yesu wa sapuila olondonge viaye oco vi sandiliye tete Usoma kuenda esunga lia Suku. Omanu vamue voluali lulo, va siata oku pitisa lika kovaso olonjongole viavo, momo ‘va velisapo lika oku salala kuomuenyo wavo.’ (Tanga Osamo 17:1, 13-15.) Omanu valua ka va kapeleko Ululiki wavo, kuenda va yongola lika oku ambata omuenyo umue uwa, oku cita omãla, loku va pongiyila ocipiñalo. Va tenda ovina viaco ndonepa yomuenyo wavo. Pole, Daviti wa kuatele ovisimĩlo via litepa, momo wa yonguile oku kuata “onduko yiwa” kovaso a Yehova. Noke, omõlaye Salomone wa tu vetiyavo oku ci linga. (Uku. 7:1) Ndeci Asafe a linga, Daviti wa limbukile okuti, ocina ca velapo komuenyo waye, oku kuata ukamba la Yehova, kuenje wa yuvula oku pitisa kovaso olonjongole viaye. Eye, wa sanjukilile oku endaenda la Suku. Koloneke vilo, Akristão valua va velisapo ovina viespiritu, okuti ka va sakalala calua lupange wavo woku sanda eteku.
7. Asumũlũho api manji umue a tambula omo lioku pitisa kovaso Usoma wa Suku?
7 Kũlĩhĩsa ulandu wa manji Jean-Claude, o kasi Kofeka yo Republika Centro Afrikana. Eye ohueli, haeye ukulu wekongelo, kuenda o kuete omãla vatatu. Omo okuti vofeka yaco ka ca lelukile oku sanga upange, omanu valua va siata oku linga ovopange avo muẽle, oco va kuatise epata liavo. Eteke limue, usongui wupange manji Jean-Claude a kala oku talavaya, wa sapela laye oco a fetike oku talavaya oku upisa kowola yepandu kekumbi toke vokati kuteke, vokuenda kuosemana yosi. Manji Jean-Claude, wo sapuila hati, ndaño o sukila oku talavaya oco a kuatise epata liaye, ocina ca velapo kokuaye, oku kuatisa epata konepa yespiritu. Eye wa popiavo hati, o sukila oku tẽlisa ocikele caye vekongelo. Cime caye wo tambulula ndati? Eye wo tambulula hati: “Oco o kuate esumũlũho kupange ulo, o sukila oku ivalako ovina viosi, oku kongelamo ukãi wove, omãla kuenda ovitangi vikuavo. O sukilavo oku litumbika lika kupange wove, loku yuvula oku sokolola ovina vikuavo. Kaliye nõla eci o yongola oku linga, nda upange, ale etavo liove.” Oco hẽ nda ocitangi eci ca pitile love, nda wa linga nye? Manji Jean-Claude wa kũlĩhĩle okuti, nda wa siapo upange waco, Suku u kuatisa. Eye wa kũlĩhĩle okuti, nda wa linga ovina vialua kupange Wusoma, Yehova Suku o kuatisa epata liaye. Noke, wa endele kohongele. Eci a tiuka, wa yonguile oku enda kupange, pole, ka kũlĩhĩle nda o ka tambuiwa vali. Vepuluvi liaco, vo vilikiya votelefone. Ndaño okuti cime caye wo tundisile kupange waco, pole, manji yetu wa tiukilile kupange waco.
8, 9. Tu pondola oku kuama ndati ongangu yovitunda kuenda va Lewi poku tenda Yehova ndonepa yetu?
8 Omanu vana okuti upange wavo u kasi kohele ndocitangi ca tukuiwa ndeti, citava okuti va li pula ndoco: ‘Ndi tẽlisa ndati ocikele cange coku tekula epata?’ (1 Tim. 5:8) Ci kale okuti wa liyakele locitangi ndeci ale sio, wa kũlĩha okuti nda wa tenda Suku ndonepa yove poku linga upange waye, lalimue eteke o ka yeva esumuo. Eci Yesu a sapuila olondonge viaye, hati: “Tete [sandiliyi] usoma,” wa va likuminya hati: “Ovina evi viosi,” ndeci: Okulia oku nyua, kuenda uwalo, “viu vokiyiwi.”—Mat. 6:33.
9 Sokolola va Lewi, vana ka va kuatele ocipiñalo cimue vofeka. Poku linga upange woku kuatisa kefendelo liocili, va kolelele okuti Yehova o va kuatisa, momo wa va sapuila hati: ‘Ndinepa yavo.’ (Ate. 18:20) Ndaño ka tu kasi oku linga upange ndowu ovitunda la va Lewi va enda oku linga vonembele, tu pondola oku kuama ongangu yavo yoku kolela okuti Yehova o tu ĩha ovina tu sukila. Omo liaco, osimbu esulilo ka lieyile, tu sukila oku vokiya ekolelo lietu ku Suku una wa siata oku tu ĩha ovina viosi tu sukila.—Esit. 13:17.
Sandiliya Tete Esunga Lia Suku
10, 11. Omanu vamue va siata oku lekisa ndati okuti va kolela Yehova poku nõla upange? Tukula ulandu umue.
10 Yesu wa vetiya olondonge viaye oku ‘sandiliya tete Usoma wa Suku lesunga liawo.’ (Mat. 6:33) Oku sandiliya esunga lia Suku, ci lomboloka oku kapako olonumbi via Yehova viatiamẽla kueci ciwa leci cĩvi okuti oku kuama olonumbi viomanu ci sule. (Tanga Isaya 55:8, 9.) Pamue ivaluka omanu vamue okuti, eci handi ka va lingile Akristão, va enda oku lima akaya loku a landisa. Vamue va enda oku pindisa vakuavo kusualali, ale oku panga ovota kuenda oku a landisa. Valua pokati kavo noke yoku lilongisa Embimbiliya, va linga apongoloko, kuenje, va papatisiwa.—Isa. 2:4; 2 Va Kor. 7:1; Va Gal. 5:14.
11 Kũlĩhĩsa ulandu wa pita la manji Andrew. Eye lukãi waye eci va fetika oku lilongisa Embimbiliya loku kũlĩha olonumbi via Yehova, va nõlapo oku u vumba. Ndaño manji Andrew wa solele calua upange waye, pole, wa liwekapo oku talavaya. Momo lie? Momo, wa kala oku talavaya kupange woku kuatisa kovoyaki, kuenje, wa nõlapo oku sandiliya tete esunga lia Suku. Eci manji Andrew a siapo upange waco, wa kuata omãla vavali, kuenda ka kuatele olombongo vioku landa ovina va sukila vokuenda kuolosãi vimue. Kovisimĩlo viomanu, ca kala ndu okuti ka kuatele ‘ocipiñalo.’ Omo liaco, manji Andrew, wa fetika oku sandiliya upange ukuavo loku kolela ku Suku. Cilo omuenyo wepata liaye, weca uvangi wokuti, Yehova ka va yandulukile. (Isa. 59:1) Omo okuti manji Andrew wa leluisa omuenyo waye, eye kumue lukãi waye, va litumbika kupange wakundi votembo yosi. Kuenje wa popia hati: “Tua yokokele calua omo liekambo liolombongo, lionjo, oku vela, kuenda ocitangi coku kuka. Pole, Yehova lalimue eteke a tu yandulukile. . . . Omo liaco, tu popia okuti, oku vumba Yehova olio esumũlũho lia velapo omunu a pondola oku kuata.” a—Uku. 12:13.
12. Ocituwa cipi tu sukila oku kuata poku sandiliya esunga lia Suku? Tukula ovolandu amue a pita vocikanjo cene.
12 Yesu wa sapuila olondonge viaye hati: “Nda vu kasi lekolelo ndolumema lusalata, nda vu popia lomunda eyi hoti, ‘Kulo tundako, sondolokela oko,’ kuenje yi sondoloka. Ka kuli eci ka vu tẽla [oku linga.]” (Mat. 17:20) Anga hẽ o pondola oku amamako oku pokola kolonumbi via Suku, ndaño ceci o pita lovitangi? Nda o kuete atatahãi a tiamẽla kondaka eyi, vangula la vamanji vo vekongelo o kasi. Kuenje, ovolandu avo a pondola oku ku kuatisa loku pamisa ekolelo liove.
Tu Sanjukili Aliangiliyo a Yehova
13. Nda tua likolisilako oku vumba Yehova onima yipi tu ka tambula?
13 Nda wa velisapo esumũlũho liove lioku vumba Yehova, kolela okuti, eye o ku ĩha ovina viosi o sukila ketimba, kuenda kespiritu, ndeci a linga la va Lewi. Sokolola ulandu wa Daviti. Ndaño wa salamẽle veleva, wa kũlĩhĩle okuti Yehova u kuatisa. Etu tu pondolavo oku kolela ku Yehova eci tu limbuka okuti, lomue o tu kuatisa. Ivaluka okuti, eci Asafe a “iñila vonembele ya Suku,” wa limbuka ovina via kala oku u kokela ovitangi. (Osa. 73:17) Omo liaco, tu koleli ku Yehova Ono yeteku lietu kespiritu. Tu sanjukili esumũlũho lietu lioku vumba Suku, ndaño lovitangi. Nda tua ci linga, Yehova o kala ndonepa yetu.
14, 15. Eci ku lingiwa epongoloko kelomboluilo liocisonehua cimue, utima wove u kala ndati, kuenda momo lie?
14 Eci Yehova Ono yetu yocinyi cespiritu a situlula ‘ovina via longa’ vi sangiwa Vembimbiliya, utima wove u kala ndati? (1 Va Kor. 2:10-13) Upostolo Petulu, wa tu sila ongangu yiwa tu sukila oku kuama. Onjanja yimue, Yesu wa sapuila olonjeveleli viaye hati: “Nda ka vu li etimba lia Mõlomanu, loku nyua osonde yaye, ka vu kuete omuenyo vovitima viene.” Omo okuti olondonge vialua ka via kuatele elomboloko liolondaka evi, via popia viti: “Ondaka eyi ya kãla. Helie o tẽla oku yi yeva?” Kuenje, valua pokati kavo, va “tiukila konyima.” Pole, Petulu wa popia hati: “A Ñala, kulie tu enda? Ove, ove o kasi lolondaka viomuenyo ko pui.”—Yoa. 6:53, 60, 66, 68.
15 Ocili okuti, Petulu ka kuatele elomboloko lia suapo liolondaka Yesu a popia viatiamẽla koku lia etimba Liaye loku nyua osonde Yaye. Pole, Petulu wa kolelele ku Suku o ko kuatisa oku kuata elomboloko liovina viespiritu. Eci ku lingiwa epongoloko lielomboloko liondaka yimue Yembimbiliya, ove hẽ o likolisilako oku limbuka esunga lieci kua lingiwila epongoloko liaco? (Olosap. 4:18) Va Berea vo kocita catete, eci va yeva ondaka ya Suku ‘va lekisile ombili kuenda, oloneke viosi, va enda oku tanga Ovisonehua.’ (Ovil. 17:11) O sukilavo oku sanjukila esumũlũho liove lioku vumba Yehova loku u tenda ndonepa yove, ndeci va Berea va linga.
Oku Kueliwa Lika vu Ñala
16. Omunu wa kolela Yehova o tenda ndati ocihandeleko ci sangiwa kelivulu lia 1 Va Korindo 7:39?
16 Ocina cikuavo Akristão va sukila oku ivaluka catiamẽla kocipango ca Suku, oku pokola konumbi Yembimbiliya yoku ‘kueliwa lika vu Ñala.’ (1 Va Kor. 7:39) Vamanji vamue, va nõlapo oku likala oku kuela, oco ka va ka lueye onumbi yaco. Omo liaco, Suku o sanjukila calua vana va ci linga. Nye Daviti a linga eci a kala ndu okuti ka kuete omunu u kuatisa? Eye wa popia hati: “Njitila kovaso [a Suku] oku lisiõsiõla kuange. Ndu lomboluila ohali yange. Eci espiritu liange lia hongua ove wa kũlĩha onjila yange.” (Osa. 142:1-3) Uprofeto Yeremiya wa amamako oku vumba Suku lekolelo vokuenda kuanyamo alua, ndaño okuti ka kuelele. Citava okuti o lilongisa ongangu yaye ndomo ya tukuiwa kocipama 8 velivulu losapi hati: Jeremias e a Mensagem de Deus para Nós.
17. Nye manji umue ukãi a linga eci a limbuka okuti o kasi ulika?
17 Manji umue ukãi kofeka yo Estados Unidos wa popia hati: “Omo okuti nda kala ulika, nda kuata ovisimĩlo vioku kuela. Kuenje nda yonguile oku tava oku kueliwa la manji wosi wa ndi sungulukila. Ina yange, una okuti Hambangiko ya Yehova, wa enda oku ndi vetiya oku tava ulume wosi wa moleha. Kuenje, ndo pulisa nda eci ndi kuata ovitangi volohuela, eye o ka ndi kuatisa. Noke vokuenda kuotembo, ina yange wa limbuka okuti nda kala oku talavaya kupange umue wa ndi kuatisa oku sanga ovina ndi sukila kuenda nda sanjukile calua. Omo liaco, wa liwekapo oku ndi kisika oku kuela.” Ocili okuti, manji yaco wa enda oku yeva esumuo omo lioku kala ulika. Noke wa popia hati: “Nda fetika oku vokiya ekolelo liange ku Yehova, kuenda lalimue eteke a ndi yandulukile.” Nye ca kuatisa manji yaco oku kolela ku Yehova? Eye wa amisako hati: “Olohutililo via ndi kuatisa oku tenda Suku ndomunu umue o letiwe lovaso, kuenda lalimue eteke nda simĩle okuti ndi kasi ulika. Omo okuti, Yehova Suku Tõlo, o yevelela olohutililo viafendeli vaye, si pondola hẽ oku sanjuka poku limbuka okuti wa ndi kapako?” Poku limbuka okuti, ‘esanju lialua, li tunda koku eca, eli li tunda koku tambula li sule,’ wa popia hati: “Nda likolisilako oku kuatisa omanu okuti, si lavoka oku fetiwa cimue. Olonjanja vimue nda siata oku lipula ndoco: ‘Nye ndi sukila oku linga oco ndi kuatise omunu umue?’ Eci ca siata oku ndi nenela esanju lialua.” (Ovil. 20:35) Manji yaco, o tenda Yehova ndonepa yaye, kuenda wa sanjukila esumũlũho lioku u vumba.
18. Yehova o pondola oku kala ndati ndonepa yove?
18 Ndaño okuti olonjanja vimue wa siata oku liyaka lovitangi, o pondola oku tenda Suku ndonepa yove. Osimbu o kasi oku amamako oku ci linga, ci ku kuatisa oku kala pokati kafendeli vaye va kuete esanju. (2 Va Kor. 6:16, 17) Esanju liaco, li pondola oku ku vetiya oku tenda Yehova ndonepa yove, ndeci omanu vakuavo kosimbu va linga. (Tanga Esinumuĩlo 32:9, 10.) Ndeci Suku a nõla ofeka yo Isareli oco yi linge ocipiñalo caye, eye o pondolavo oku ku nõla oco o kale ndonepa yaye, osimbu a ku tata locisola.—Osa. 17:8.
[Etosi pombuelo yamẽla]
a Tanga o Despertai! ya Kuvala yo 2009, kamẽla 12-14.
O Tambulula Ndati?
O tenda ndati Yehova ndonepa yove
• poku sandiliya tete Usoma wa Suku lesunga liaye?
• poku eca olopandu omo lioku tekuiwa lokulia kuespiritu?
• poku pokola kocihandeleko ca Suku catiamẽla koku kueliwa lika vu Ñala?
[Apulilo Elilongiso]
[Etosi lia velapo 13]
Nda tu likolisilako oku pitisa kovaso upange Wusoma, Yehova o kala ndonepa yetu
[Elitalatu kemẽla 15]
Ongangu ya Yeremiya ya ndi vetiya calua
