¿K-ilik wa Jéeoba bey k-herenciaeʼ?
¿K-ilik wa Jéeoba bey k-herenciaeʼ?
«Maʼ u xuʼulul a kaxtikeʼex táanil u Reino Dios yéetel u justicia, tuláakal túun le uláakʼ baʼaloʼobaʼ yaan xan u tsʼaʼabalteʼex.» (MAT. 6:33, NM)
1, 2. 1) Jeʼex u yaʼalik Gálatas 6:16 teʼ Biblia Traducción del Nuevo Mundooʼ, ¿tiʼ máaxoʼob ku yaʼalaʼal «u Israel Dios»? 2) ¿Máaxoʼob le «u doce [chʼiʼibaloʼob] Israel» ku yaʼalik Mateo 19:28?
¿BAʼAX ku taal t-tuukul le ken k-xok teʼ Biblia le kʼaabaʼ Israeloʼ? Maʼ xaaneʼ k-tuukul tiʼ le kʼaabaʼ tsʼaʼab tiʼ Jacob, juntúul tiʼ u paalal Isaak, bey xan u kʼaabaʼ le kaaj tuʼux kajlaj u paalaloʼ. Baʼaleʼ ichil le Bibliaoʼ yaan uláakʼ bix u meyaj le kʼaabaʼoʼ. U suukileʼ ku yaʼalik «u Israel Dios» ken tʼaanak tiʼ le 144,000 sukuʼunoʼob yéeyaʼanoʼob tumen Jéeoba yéetel u kiliʼich muukʼ utiaʼal u beetik u reyiloʼob yéetel u j-kʼiiniloʼob teʼ kaʼanoʼ (Gál. 6:16, NM; Apo. 7:4; 21:12). Baʼaleʼ teʼ Mateo 19:28 ku meyaj yaanal bix le tʼaan utiaʼal u chʼaʼchiʼitik «u doce [chʼiʼibaloʼob] Israel». Koʼoneʼex maas xakʼaltik lelaʼ.
2 Jesuseʼ tu yaʼalaj: «Tiʼ le kʼiin ken túumbenchajak tuláakal baʼaleʼ le ken kulak u Paal Máak tu nojbeʼen jalaʼach kʼáancheʼeʼ, teʼex xan ta tsaypachteneʼexeʼ yaan a kutaleʼex tiʼ doce jalaʼach kʼáancheʼob utiaʼal a pʼis óoltikeʼex u doce [chʼiʼibaloʼob] Israel». ¿Máaxoʼob le «u doce [chʼiʼibaloʼob] Israel» ku yaʼalik le tekstoaʼ? Letiʼe máaxoʼob táan u páaʼtik u pʼáatloʼob kuxtal utiaʼal minaʼan u xuul way Luʼum teʼ Paraíso kun pʼis óoltbiloʼob tumen le disipuloʼob yéeyaʼanoʼob tumen Jesusoʼ. Letiʼobeʼ yaan u kʼamkoʼob u yutsil le meyaj ken u beet le 144,000 j-kʼiinoʼoboʼ.
3, 4. ¿Baʼax maʼalob k-kanik tiʼ le sukuʼunoʼob yéeyaʼanoʼob utiaʼal u binoʼob kaʼanoʼ?
3 Jeʼex tu beetil le levitaʼob yéetel le j-kʼiinoʼob úuchjeakiloʼ, le sukuʼunoʼob yéeyaʼanoʼoboʼ jach jatsʼuts u yilkoʼob le páajtalil yaantiʼob u meyajtikoʼob Jéeobaoʼ (Núm. 18:20). Maʼ táan u páaʼtkoʼob u tsʼaʼabaltiʼob junxéetʼ luʼum utiaʼal u kajtaloʼobiʼ. Baʼaxeʼ táan u páaʼtkoʼob u kʼuchul u kʼiinil u beetik u reyiloʼob yéetel u j-kʼiiniloʼob tu tséel Jesucristo teʼ kaʼan, le tuʼux kun seguer u meyajtikoʼob Dios, jeʼex u yaʼalik Apocalipsis 4:10 yéetel 11 (Eze. 44:28).
4 Baʼaleʼ ¿bix jeʼel u yeʼeskoʼob ku yilkoʼob Jéeoba bey u herenciaʼob le láayliʼ tiaʼanoʼob way Luʼumeʼ? Yéetel le bix kuxlikoʼoboʼ ku yeʼeskoʼobeʼ maas kʼaʼanaʼan u yilkoʼob u meyajtikoʼob Dios. Tsʼoʼoleʼ ku tsʼáaik u fejoʼob tiʼ u kuxtal Cristo tu kʼuboʼ yéetel ku beetkoʼob baʼax ku yaʼalik. Beyoʼ ku yeʼeskoʼob nojoch baʼal u yilkoʼob úuchik u tʼaʼanloʼob yéetel úuchik u yéeyaʼaloʼob (2 Ped. 1:10). Cada juntúul tiʼobeʼ yaan baʼax ku muʼyajtik, baʼaleʼ maʼatech u yaʼalikoʼob wa maʼ tu páajtal u seguer u tsʼáaik u yóol u meyajtoʼob Dios. Baʼaxeʼ ku yilik u beetkoʼob tuláakal le ku páajtal utiaʼal u meyajtikoʼob Dios. Beyoʼ ku yeʼeskoʼob bix unaj u beetaʼal tumen le máaxoʼob táan u páaʼtik u pʼáatloʼob kuxtal way Luʼumeʼ.
5. ¿Baʼax unaj k-beetik utiaʼal k-kʼamik Jéeoba bey k-herenciaeʼ, yéetel baʼaxten yaan kʼiineʼ maʼ chéen chʼaʼabil u beetaʼaliʼ?
5 Tuláakal le máaxoʼob meyajtik Dios, kex táan u páaʼtik u binoʼob kuxtal teʼ kaʼan, wa táan u páaʼtik u pʼáatloʼob kuxtal way Luʼumeʼ, unaj u beetkoʼob le baʼax tu yaʼalaj Jesusaʼ: «Wa yaan máax u kʼáat taal tin paacheʼ, u pʼektuba yéetel u chʼaʼ u cheʼil u muʼyaj ka taalak mantatsʼ tin paach» (Mat. 16:24, NM). Le u millonesil máaxoʼob adorartik Dios yéetel tsaypachtik Cristo taak u kuxtaloʼob teʼ Paraísooʼ, bey xan u tuukuloʼoboʼ. Letiʼobeʼ maʼatech u kiʼimaktal u yóoloʼob ka u beetoʼob chéen junpʼíit, baʼaxeʼ ku beetkoʼob tuláakal le ku páajtal utiaʼal u meyajtikoʼob Dios. Yaʼab tiʼ letiʼobeʼ ku yilik u kuxtaloʼob chéen yéetel junpʼíit baʼal utiaʼal u beetik u precursor regulariloʼob. Yanoʼob xaneʼ ku beetik u precursor auxiliaril jejeláas mesoʼob. Yéetel yanoʼobeʼ kex maʼ tu páajtal u beetik u precursoriloʼobeʼ, ku beetkoʼob tuláakal le ku páajtal utiaʼal u kʼaʼaytajoʼob. Jeʼex tu beetil María le ka tu wekaj kiʼibok aceite tu yook Jesuseʼ. ¿Baʼax tu yaʼalaj yoʼolal le baʼax tu beetaj Maríaoʼ? «Le baʼax tsʼoʼok u beetiktenaʼ junpʼéel maʼalob baʼal. [...] Le koʼolelaʼ tu beetaj le baʼax [páajchajeʼ].» (Mar. 14:6-8.) U jaajileʼ, yaan kʼiineʼ maʼ yaʼab jeʼel u páajtal k-beetik utiaʼal k-meyajtik Jéeobaeʼ, tumen kuxaʼanoʼon tu kʼasaʼan yóokʼol kaab Satanás. Kex beyoʼ k-tsʼáaik k-óol k-meyajte yéetel k-kʼubik k-óol tiʼ Jéeoba, k-Taata yaan teʼ kaʼanoʼ. Koʼoneʼex ilik kanpʼéel bix jeʼel u páajtal k-beetkeʼ.
U kaxtik máak táanil u Reino Dios
6. 1) ¿Baʼaxten jeʼel u páajtal u yaʼalaʼaleʼ u herencia le máaxoʼob maʼatech u meyajtikoʼob Diosoʼ chéen letiʼe baʼaxoʼob ku yilaʼaloʼob bejlaʼaʼ? 2) ¿Baʼaxten maas maʼalob ka k-beet jeʼex tu beetil Davideʼ?
6 Jesuseʼ tu yaʼaleʼ u disipuloʼobeʼ unaj u kaxtikoʼob táanil u Reino Dios bey xan u justicia. Le máakoʼob teʼ «yóokʼol kaabaʼ» maʼ bey u beetkoʼobiʼ, «tumen le yóokʼol kaabaʼ letiʼ le baʼax u tiaʼaloʼo[boʼ]» (xokaʼak Salmo 17:1, 13-15). Lelaʼ ku yeʼesikeʼ letiʼobeʼ mix baʼal uláakʼ ku páaʼtkoʼob, chéen le baʼax ku tsʼáaik le yóokʼol kaabaʼ. ¿Baʼaxten? Tumen maʼ tu kʼaʼajaltiʼob le Máax beetmiloʼoboʼ yéetel chéen chʼiikloʼob tu paach ayikʼaliloʼob, u yantal u paalaloʼob yéetel u náajaltikoʼob le bukaʼaj taakʼin ku páajtal utiaʼal u pʼatoʼob tiʼ u paalaloʼobeʼ. Baʼaleʼ toʼoneʼ k-kʼáat k-beet jeʼex tu beetil Davideʼ. Utiaʼal letiʼeʼ maas kʼaʼanaʼan ka yanak junpʼéel maʼalob kʼaabaʼ tiʼ tu táan Dios, jeʼex aʼalaʼabik tumen Salomón, u hijoeʼ (Ecl. 7:1). Jeʼex Asafeʼ, Davideʼ tu yileʼ mix baʼal uláakʼ maas taasik kiʼimak óolal tiʼ u biskuba máak yéetel Jéeoba. Lelaʼ bey u beetik yaʼab sukuʼunoʼob bejlaʼeʼ, le oʼolal ku tsʼáaikoʼob táanil u meyajtikoʼob Dios tiʼ uláakʼ baʼaloʼob, tak tiʼ le meyaj ku beetkoʼoboʼ.
7. ¿Baʼax utsil tu kʼamaj juntúul sukuʼun úuchik u tsʼáaik táanil le Reinooʼ?
7 Koʼoneʼex ilik baʼax tu beetaj Jean-Claude, ku meyaj bey ancianoileʼ yéetel yaan óoxtúul u paalal, kajaʼanoʼob República Centroafricana. Junpʼéel kʼiineʼ aʼalaʼabtiʼ tumen le máax nuʼuktik le meyaj tuʼux yaan kaʼachoʼ yaan u kʼeʼexel u yorail u meyaj, aʼalaʼabtiʼeʼ yaan u meyaj tu siete kʼiinil le semanaoʼ yéetel yaan u yokol desde las seis y media áakʼab. Tsʼoʼoleʼ teʼ tuʼux kajaʼanoʼ maʼ jach yaan meyajiʼ, le oʼolal le máakoʼoboʼ ku beetkoʼob tuláakal le páajtal utiaʼal maʼ u luʼsaʼal meyajtiʼob. ¿Baʼax túun tu beetaj Jean-Claude? Tu tsolaj tiʼ le máax nuʼuktik le meyajoʼ, letiʼeʼ maʼ chéen ku náajal utiaʼal u tsʼáaik baʼaxoʼob kʼaʼabéet ichil u yotochiʼ, baʼaxeʼ ku yilik xan u múuchʼ meyajtik Dios yéetel u familia yéetel yaan uláakʼ meyajoʼob ku beetik teʼ múuchʼulil tuʼux ku binoʼoboʼ. Le máak túunoʼ tu yaʼalajtiʼ: «U maʼalobileʼ yaantech meyaj. Le oʼolal maas maʼalob ka a pʼat juntséelil a watan, a paalal yéetel uláakʼ chiʼichnakiloʼob. Baʼax unaj a beetkeʼ a tsʼáaik a wóol meyaj. Teech kan chʼaʼtuklik: wa ka seguer ta religión, wa ka pʼáatal meyaj». Wa tiʼ toʼon ka aʼalaʼak beyoʼ, ¿baʼax jeʼel k-beetkeʼ? Jean-Claudeeʼ u yojel wa ku luʼsaʼal meyajtiʼeʼ maʼ kun pʼatbil tumen Jéeoba. Le oʼolal tu chʼaʼtuklaj u seguer u tsʼáaik u yóol u meyajt Dios, tumen u yojel yaan u yáantaʼal utiaʼal u tsʼáaik baʼaxoʼob kʼaʼabéet ichil u yotoch. Ka kʼuch u kʼiinil le muchʼtáambaloʼ, bin jeʼex suukileʼ, ka tsʼoʼokeʼ joʼopʼ u líiʼskuba utiaʼal u bin meyaj, maʼ u yojel wa ken kʼuchkeʼ yaan u yaʼalaʼal minaʼan meyajtiʼ. Chéen ka tu yuʼubaj u juum u teléfono ka aʼalaʼabtiʼ: tsʼoʼok u luʼsaʼal meyaj tiʼ le máax nuʼuktik le tuʼux ka meyajoʼ. Bey túunoʼ maʼ luʼsaʼab meyaj tiʼ le sukuʼunoʼ.
8, 9. ¿Bix jeʼel k-eʼesik k-ilik Jéeoba bey k-herencia, jeʼex tu beetil le j-kʼiinoʼob yéetel le levitaʼoboʼ?
8 Yaʼab sukuʼunoʼobeʼ ku tuklikoʼob: «Wa ka luʼsaʼakten meyajeʼ, ¿bix jeʼel in tsʼáaik baʼax kʼaʼabéet ichil in wotocheʼ?» (1 Tim. 5:8). Kex wa tsʼoʼok u yúuchultoʼon bey wa maʼoʼ, k-ojel Jéeobaeʼ maʼ ken u pʼat le máaxoʼob kʼamik bey u herenciaeʼ bey xan le máaxoʼob ku yilkoʼob jatsʼuts le páajtalil yaantiʼob utiaʼal u meyajtikoʼoboʼ. Maʼ xaaneʼ tak toʼoneʼ tsʼoʼok k-ilik jach jaaj le baʼax tu yaʼalaj Jesusaʼ: «Maʼ u xuʼulul a kaxtikeʼex táanil u Reino Dios [...], tuláakal túun le uláakʼ baʼaloʼobaʼ [jeʼex le janal yéetel le nookʼoʼ] yaan xan u tsʼaʼabalteʼex» (Mat. 6:33, NM).
9 Tuukulnakoʼon tu kaʼatéen tiʼ u chiʼibal Leví. Letiʼobeʼ maʼ tu kʼamoʼob mix junxéetʼ luʼumiʼ. Baʼaleʼ tumen tu kʼububa u meyajt Dioseʼ, kanáantaʼab tumen Jéeoba, le máax aʼaltiʼoʼ: «Teneʼ a tiaʼalen yéetel a [herenciaen]» (Núm. 18:20). Kex toʼon maʼ tiʼ k-meyaj tiʼ junpʼéel temploeʼ, jach maʼalob ka tuukulnakoʼon jeʼex le j-kʼiinoʼob yéetel le levitaʼoboʼ yéetel ka k-jach creert Dioseʼ yaan u tsʼáaik baʼaxoʼob kʼaʼabéettoʼon. Jeʼex u bin u náatsʼal le xuʼulsajiloʼ, bey unaj u bin k-maas eʼesik fe tiʼ Diosoʼ (Apo. 13:17).
U kaxtik máak táanil u justicia Dios
10, 11. ¿Bix tsʼoʼok u yeʼesik jujuntúul sukuʼunoʼob jach ku kʼubik u yóoloʼob tiʼ Jéeoba ken pʼáatak minaʼan meyajtiʼob? Aʼal junpʼéel baʼax uchaʼan.
10 Jesús xaneʼ tu yaʼalaj tiʼ u disipuloʼob ka u kaxtoʼob táanil u justicia Dios (Mat. 6:33). Le oʼolal ken k-il wa maʼalob bey xan wa maʼ maʼalob junpʼéel wa baʼaxeʼ, k-ilik k-nuʼuktikba yéetel le baʼax ku yaʼalik Jéeobaoʼ, maʼ yéetel le baʼax ku yaʼalik chéen wíinikoʼ (xokaʼak Isaías 55:8, 9). Tuukulnakoʼon tiʼ baʼaxoʼob ku beetik yaʼab máaxoʼob táanil tiʼ u xokikoʼob le Bibliaoʼ. Yaneʼ táanil tiʼ u káajal u xokik le Bibliaoʼ, ku pakʼikoʼob wa ku konkoʼob kʼúuts, ku beetkoʼob u nuʼukul baʼateʼel wa ku konkoʼob, wa ku kaʼanskoʼob baʼateʼel le soldadoʼoboʼ. Baʼaleʼ ka tu kʼaj óoltoʼob u jaajil yoʼolal Dioseʼ, yaʼabeʼ tu kʼexoʼob tuʼux ku meyajoʼob utiaʼal ka páajchajak u yokjaʼob (Isa. 2:4; 2 Cor. 7:1; Gal. 5:14).
11 Juntúul tiʼ le máaxoʼob beet beyoʼ Andrew, letiʼ yéetel u yataneʼ káaj u xokikoʼob le Bibliaoʼ ka tu chʼaʼtuklaj u meyajtikoʼob Dios. Kex jach uts tu yich le meyaj ku beetik kaʼachoʼ, tu pʼataj. ¿Baʼaxten? Tumen tu tsʼáaj cuenta ku bin tu contra le baʼax ku yaʼalik Diosoʼ yéetel tumen u kʼáat u kaxt táanil u justicia Dios. Le bukaʼaj taakʼin yaan kaʼach tiʼ le ka pʼáat minaʼan meyajtiʼoʼ chéen utiaʼal u tsʼáaik baʼax kʼaʼabéet tiʼ u mejen paalal ichil wa jaypʼéel mes. Jeʼel u páajtal u yaʼalaʼaleʼ, bey yanil jeʼex le levitaʼob minaʼan u luʼumoʼoboʼ. Baʼaleʼ tu kʼubaj u yóol tiʼ Jéeobaeʼ ka jóokʼ u kaxt uláakʼ meyaj. ¿Bix tsʼoʼok u bin tiʼ letiʼ yéetel tiʼ u familia? Tsʼoʼok u yilkoʼobeʼ «u páajtalil Yuumtsi[leʼ]» minaʼan u xuul (Isa. 59:1). Tsʼoʼoleʼ tumen kiʼimak u yóoloʼob chéen yéetel junpʼíit baʼaleʼ, Andrew yéetel u yataneʼ tsʼoʼok u páajtal u beetik u precursoriloʼob. Letiʼeʼ ku yaʼalik: «Tsʼoʼok k-máansik talamiloʼob yaan yil yéetel taakʼin, k-otoch, kʼojaʼanil bey xan yoʼolal k-jaʼabil. Baʼaleʼ Jéeobaeʼ mantatsʼ ku yáantkoʼon. [...] Ken tuukulnakoʼon tiʼ tuláakal le baʼaxoʼob tsʼoʼok k-ilkoʼ, k-tsʼáaik cuentaeʼ minaʼan uláakʼ meyaj maas maʼalob u boʼolil jeʼex u meyajtaʼal Jéeobaeʼ» (Ecl. 12:13). *
12. ¿Baʼax modosil jeʼel u yáantkoʼon k-kaxt táanil u justicia Dioseʼ? Tsikbalt junpʼéel baʼax uchaʼan teʼ tuʼux kajaʼanechoʼ.
12 Jesuseʼ tu yaʼalaj tiʼ u disipuloʼob: «Wa yaan a woksaj óolaleʼex kexiʼ bey junpʼéel u neekʼ mostazaeʼ, jeʼel a waʼalikeʼex tiʼ le puʼukaʼ: Luʼsaba teʼelaʼ[,] xeen táanxel tuʼux; le puʼukoʼ yaan u lukʼul. Tuláakal baʼal jeʼel u páajtal a beetkeʼex wa yaan a woksaj óolaleʼex[eʼ]» (Mat. 17:20). Yoʼolal le baʼax ku yaʼalik le tekstoaʼ, maʼalob ka k-tukle: «¿Yaan wa u seguer in kaxtik táanil u justicia Dios kex ka in aktáant wa baʼax talamil?». Wa maʼ k-jach ojel wa jeʼel u páajtal k-beetkeʼ, maʼalob ka k-kʼáat tiʼ uláakʼ sukuʼunoʼob bix tsʼoʼok u yáantaʼaloʼob tumen Jéeoba. Le baʼax ken u yaʼaloʼoboʼ jach jeʼel u muʼukʼaʼankúuntik k-fejeʼ.
Unaj k-tsʼáaik u nib óolalil tiʼ Dios yoʼolal le kaʼansaj ku tsʼáaiktoʼonoʼ
13. ¿Baʼax unaj u jach creertik le máaxoʼob ku tsʼáaik u yóol u meyajtoʼob Jéeobaoʼ?
13 Le máaxoʼob jach nojoch baʼal u yilik u meyajtikoʼob Jéeobaoʼ, unaj u jach creertikoʼob yaan u kanáantaʼaloʼob mantatsʼ, jeʼex úuchik u kanáantaʼal le levitaʼoboʼ. Letiʼeʼ maʼ chéen ken u tsʼáa baʼaxoʼob kʼaʼabéettiʼobiʼ, baʼaxeʼ yaan u kanáantik maʼ u náachtaloʼob tiʼ letiʼ. Jeʼex David, tak le tiaʼan tu maas taamil le sajkaboʼ, tu jach creertaj yaan u yáantaʼal tumen Jéeoba. Toʼon xaneʼ láayliʼ bey unaj k-kʼubik k-óol tiʼ Dios ken k-il bey minaʼan u xuul le talamil k-aktáantikoʼ. Yéetel kʼaʼajaktoʼon le baʼax tu beetaj Asafoʼ: letiʼeʼ páajchaj u yilik yaanal bix le talamil ku aktáantik kaʼach le ka ook «ichil u yotoch [Diosoʼ]» (Sal. 73:17). Toʼon xaneʼ jeʼel u muʼukʼaʼantal k-óol wa k-natsʼikba tiʼ Jéeobaeʼ. Beyoʼ yaan k-eʼesikeʼ, kex jeʼel baʼaxak ka úuchkeʼ, jach nojoch baʼal k-ilik k-adorartik yéetel k-kʼamik bey k-herenciaeʼ.
14, 15. ¿Baʼax unaj k-beetik ken maas tsolaʼak junpʼéel baʼax tsʼoʼok u yáax kaʼansaʼal, yéetel baʼaxten?
14 Yaan kʼiineʼ ku tsoʼololtoʼon jujunpʼéel tiʼ «u jach taʼakbil baʼaloʼob Jajal Dios» (1 Cor. 2:10-13). ¿Bix k-uʼuyikba ken maas tsoʼolok jujunpʼéel baʼax ku kaʼansik le Bibliaoʼ? Unaj k-beetik jeʼex tu beetil apóstol Pedroeʼ. Juntéenjeakeʼ Jesuseʼ tu yaʼalaj tiʼ le máakoʼoboʼ: «Wa maʼ ta jaantkeʼex u wíinklil u Paal Máak yéetel ka wukʼikeʼex u kʼiʼikʼeleʼ, minaʼan kuxtal tiʼ teʼex». Yaan tiʼ le máakoʼoboʼ tu tukloʼob jach unaj u jaantkoʼob yéetel u yukʼikoʼob u kʼiʼikʼel, le oʼolal tu yaʼaloʼob: «Le baʼax ku yaʼalikaʼ jach talam u kʼaʼamal. ¿Máax jeʼel u páajtal u yuʼubikeʼ?». Bey túunoʼ, «tu [xulaj] u máanoʼob tu yéetel». Baʼaleʼ Pedroeʼ tu yaʼalaj tiʼ Jesús: «Yuumtsil, ¿tiʼ máax jeʼel u páajtal k-bineʼ? A tʼaanoʼobeʼ u tʼaaniloʼob kuxtal minaʼan u xuul» (Juan 6:53, 60, 66, 68).
15 U jaajileʼ le apostoloʼ maʼ tu jach naʼataj xan le baʼax tu yaʼalaj Jesús le ka tu yaʼalaj ka jaantaʼak u bakʼel yéetel ka ukʼaʼak u kʼiʼikʼeloʼ. Baʼaleʼ leloʼ maʼ tu beetaj u jach chiʼichnaktaliʼ, tumen u yojel yaan u yáantaʼal u naʼat tumen Dios. ¿Kux túun toʼon? ¿Baʼax k-beetik ken jel tsolaʼak junpʼéel baʼax yáax kaʼansaʼan? ¿K-ilik wa k-naʼatik baʼax oʼolal kʼexaʼab jeʼex u yaʼalik le Bibliaoʼ? (Pro. 4:18.) Unaj k-beetik jeʼex u kajnáaliloʼob Berea teʼ yáax siglooʼ, letiʼobeʼ «tu kʼamoʼob le maʼalob péektsiloʼ yéetel kiʼimak óolal, táan u kaxtikoʼob sáamsamal tiʼ le kiliʼich Tsʼíiboʼoboʼ» (Hch. 17:11). Wa k-beetik jeʼex tu beetiloʼoboʼ, yaan k-maas ilik jatsʼuts le páajtalil yaantoʼon utiaʼal k-meyajtik Diosoʼ yéetel yaan k-kʼamik bey k-herenciaeʼ.
U tsʼoʼokol u beel máak chéen yéetel máax meyajtik Dios
16. ¿Bix jeʼel k-beetik le baʼax ku yaʼalik 1 Corintoiloʼob 7:39 utiaʼal k-kʼamik Jéeoba bey k-herenciaeʼ?
16 Yaan sukuʼunoʼob yéetel kiikoʼob xaneʼ ku yilik u beetkoʼob le baʼax ku yaʼalik Dios utiaʼal u tsʼoʼokol u beeloʼob chéen yéetel máax meyajtik Dios, kex pʼáatak maʼ u tsʼoʼokol u beeloʼob (1 Cor. 7:39). Letiʼobeʼ unaj u creertikoʼobeʼ jach yaabiltaʼanoʼob yéetel yaan u kanáantaʼaloʼob tumen Jéeoba. Tsʼoʼoleʼ ken u yuʼububaʼob jach tu juunaloʼob wa ken lúubuk u yóoloʼobeʼ unaj u natsʼkubaʼob tiʼ letiʼ yéetel u yaʼalikoʼob baʼax chiʼichnakkúuntikoʼob, jeʼex tu beetil Davideʼ: «Ta táan kin tsʼáaik in muʼyaj; ta táan kin tsʼáaik ojéeltbil in yaj óolal le ken in wuʼuy u naʼatʼal in tseem» (Sal. 142:1-3). Maʼ xaaneʼ Jeremíaseʼ tu yuʼububa xan beyoʼ, tumen minaʼan u núup utiaʼal u múul meyajtik Jéeoba ichil yaʼab jaʼaboʼob. Le bix úuchik u meyajtik Diosoʼ ku maas tsoʼolol teʼ capítulo 8 tiʼ le libro Dios nos habla mediante Jeremías.
17. ¿Baʼax áantik juntúul kiik ken u yuʼububa chéen tu juunal?
17 Juntúul kiik kajaʼan Estados Unidoseʼ, ku yaʼalik: «Maʼ tumen wa tsʼoʼok in tuklik maʼ kun tsʼoʼokol in beeliʼ. Baʼaxeʼ táan in páaʼtik u jóokʼol juntúul máax meyajtik xan Dios. In maama, maʼ x-Jaajkunajeʼ, joʼopʼ u sen aʼalikten ka tsʼoʼokok in beel yéetel jeʼel máaxak ka u tʼaneneʼ. Baʼaleʼ tin waʼalajtiʼ: “Wa ka tsʼoʼokok in beel yéetel le yáax máax kun tʼanken, baʼaleʼ wa maʼ kun binten utsileʼ, ¿yaan wa a waʼalik tiʼ teech yaan u culpail?”. Ka máan kʼiineʼ tu tsʼáaj cuenta yaanten junpʼéel maʼalob meyaj, in wojel in kanáantinba yéetel kiʼimak in wóol kex maʼ tsʼokaʼan in beeliʼ. Ka xuʼul u sen aʼalikten ka tsʼoʼokok in beel». ¿Baʼax ku beetik le kiik ken u yuʼububa chéen tu juunaloʼ? Letiʼeʼ ku yaʼalik: «Kin natsʼkinba tiʼ Jéeoba. Letiʼeʼ maʼatech u pʼatken». ¿Baʼax áantik u kʼub u yóol tiʼ Dios? Letiʼeʼ ku yaʼalik: «Le payalchiʼoʼ ku yáantken in kʼaʼajseʼ Dioseʼ jach tu jaajil yaan yéetel mantatsʼ tiaʼan tin wiknal utiaʼal u yáanteneʼ. ¿Bix kun pʼáatal maʼ u kiʼimaktal in wóol wa kin biskinba yéetel Jéeoba, u Reyil tuláakal baʼal?». Jeʼex túun k-ilkoʼ «yaan maas kiʼimak óolal u tsʼaʼabal wa baʼax tiʼ u kʼaʼamal wa baʼax», le oʼolal ku yaʼalik: «Kin wilik in wáantik u maasil yéetel maʼatech in páaʼtik u suʼutul ten u jeel le uts kin beetkoʼ. Cada ken in tukult: “Baʼax jeʼel u páajtal in beetik utiaʼal in wáantik wa máaxeʼ”, jach ku kiʼimaktal in wóol» (Hch. 20:35). Jeʼex túun k-ilkoʼ, le kiikaʼ jach jatsʼuts u yilik le páajtalil yaantiʼ utiaʼal u meyajtik Jéeobaoʼ yéetel u kʼamik bey u herenciaeʼ.
18. ¿Baʼax unaj k-beetik utiaʼal u yilkoʼon Jéeoba bey u herenciaeʼ?
18 Kex jeʼel bixak yaniloʼoneʼ jeʼel u páajtal k-kʼamik Jéeoba bey k-herenciaeʼ. Beyoʼ yaan u yantal u jatsʼuts páajtalil k-yantal ichil u kaajal (2 Cor. 6:16, 17). Tsʼoʼoleʼ yaan u yantaltoʼon le jatsʼuts páajtalil yanchaj tiʼ le máaxoʼob chúukpaj u yóol u meyajtoʼob Dios úuchjeakiloʼ: Maʼ chéen yaan k-kʼamik Jéeoba bey k-herenciaeʼ, baʼaxeʼ yaan xan u kʼamkoʼon bey u herenciaeʼ (xokaʼak Deuteronomio 32:9, 10). ¿Máasaʼ jach ku kiʼimaktal k-óol k-ojéeltik letiʼeʼ yaan u kanáantik cada juntúul tiʼ toʼon bey u herencia, jeʼex tu beetil yéetel u kaajil Israeleʼ? (Sal. 17:8.)
[Tsolajil]
^ xóot’ol 11 Ilaʼak le ¡Despertad! tiʼ noviembre tiʼ 2009, táan juʼun 12 tak 14.
¿Baʼax tsʼoʼok k-kanik?
Tsol bix jeʼel k-kʼamik Jéeoba bey k-herencia ken k-beet le óoxpʼéel baʼaloʼobaʼ:
• U kaxtik máak táanil u Reino yéetel u justicia Dios
• U kʼamik máak le baʼax u tsʼaamaj Dios utiaʼal u kaʼanskoʼonoʼ
• U tsʼoʼokol u beel máak chéen yéetel máax meyajtik Dios
[U kʼáatchiʼiloʼob le xookoʼ]
[Uláakʼ baʼax ku tsoʼolol teʼ táan juʼun 13]
Ken k-tsʼáa táanil ichil k-kuxtal k-meyajtik Jéeobaeʼ k-kʼamik bey k-herenciaeʼ
[Foto yaan teʼ táan juʼun 15]
Le baʼax tu beetaj Jeremíasoʼ ku líiʼsik k-óol
