‘Dumalagan Kamo Tanganing Magkamit Kaiyan’

‘Dumalagan kamo [“sa paagi na,” NW] kamo magkamit kaiyan.’—1 COR. 9:24.

1, 2. (a) Ano an ginamit ni Pablo tanganing dagkahon an Hebreong mga Kristiano? (b) Ano an isinasadol na gibohon kan mga lingkod nin Dios?

SA SURAT ni Pablo sa mga Hebreo, naggamit sia nin mapuersang ilustrasyon tanganing dagkahon an mga kapwa Kristiano. Ipinagirumdom nia sa sainda na dai sinda nagsosolo sa pagdalagan sa paorumbasan para sa buhay. Nakapalibot sa sainda an “[dakulang] pagñanoron nin magña saksi,” na mapanggana nang nakatapos sa paorumbasan. An malinaw na pagsaisip sa maimbod na mga gibo asin kaigotan kan naenot na mga paradalagan na ini nakadagka sa Hebreong mga Kristiano na magpadagos asin dai magpondo sa pagdalagan sa paorumbasan.

² Sa sinundan na artikulo, pinag-olayan niato an nagin pamumuhay nin nagkapira na kabilang sa “pagñanoron nin magña saksi.” Ipinaheling ninda gabos na an dai nagluluyang pagtubod nakatabang sa sainda na magdanay na maimbod sa Dios, na garo baga sinda padagos na nagdadalagan pasiring sa katapusan kan paorumbasan. Makakanood kita nin leksion sa kapangganahan ninda. Arog kan sinambit sa artikulong iyan, ini an sadol ni Pablo sa mga kapwa lingkod, kaiba na kita: “Pabayaan [“haleon,” NW] ta man an gabos na kagabatan, asin an kasalan na masayon na makakabit [“madaling nakakasabod,” NW] sato, asin dumalagan kita sa pakatios [“na may pakatagal,” NW] dian sa paorombasan na nasa atubang ta.”—Heb. 12:1.

3. Ano an punto kan hatol ni Pablo dapit sa mga paradalagan sa mga kawat kan mga Griego?

³ Mapadapit sa paorumbasan na daralaganan,  saro sa popular na pang-atletang mga kawat kaidtong panahon, an librong Backgrounds of Early Christianity nagsasabi na “an mga Griego nag-eehersisyo asin nagbabali o nag-eentra sa kompetisyon na biyong nakahuba.” * Sa siring na mga kamugtakan, hinuhuba kan mga paradalagan an ano man na dai kaipuhan na pagabat o pasan na puedeng makapaluway sa sainda. Minsan ngani dai kita oyon sa saindang bakong mabini asin bakong angay na paagi, siring kaiyan an pagdalagan ninda na an solamenteng katuyohan iyo na magkamit kan premyo. An punto ni Pablo iyo na tanganing magkamit kan premyo sa paorumbasan para sa buhay, mahalagang marhay na haleon kan mga paradalagan an ano man na kaolangan. Madonong na hatol ini para sa mga Kristiano kan panahon na idto, asin iyo man para sa sato ngonyan. Anong mga pagabat o pasan an puedeng makaolang sa sato sa pagkamit kan premyo sa paorumbasan para sa buhay?

‘Haleon an Gabos na Kagabatan’

4. Sa ano sibot-sibot an mga tawo kan panahon ni Noe?

⁴ An hatol ni Pablo iyo na ‘haleon an gabos na kagabatan.’ Kaiba dian an gabos na puedeng makaolang sa sato sa pagtao kan satong bilog na atension asin pinakamakakaya sa paorumbasan niato. Ano an nagkapira sa siring na mga pagabat? Kun dapit ki Noe—saro sa mga halimbawa na sinambit ni Pablo—magigirumdoman niato an sinabi ni Jesus: “Siring sa pangyari kan magña aldao ni Noe, siring an mangyayari man sa magña aldao kan Aki nin tauo.” (Luc. 17:26) An pangenot na pinanonongdan ni Jesus bako an dapit sa maabot na paglaglag na dai pang kaagid; an pinanonongdan nia iyo an pamumuhay nin mga tawo. (Basahon an Mateo 24:37-39.) An kadaklan sa mga tawo kan panahon ni Noe dai nagpaheling nin interes sa Dios, asin lalo nang dai sinda naghingoang paogmahon sia. Ano an nakalingling sa sainda? Bako man pambihirang mga bagay. Pagkakan, pag-inom, asin pag-agom—normal na mga aspekto nin buhay. Sinabi ni Jesus na an tunay na problema iyo na “dai sinda nakaisi [“nagmangno,” NW].”

5. Ano an makakatabang sa sato na mapangganang matapos an paorumbasan?

⁵ Arog ni Noe asin kan pamilya nia, dakol kitang gibohon sa aroaldaw. Kaipuhan tang maghanap-buhay asin asikasohon an sadiri saka an pamilya niato. Nagkakaipo iyan nin dakulang kabtang kan satong panahon, kosog, asin materyal na rogaring. Nangorogna sa mga panahon na masakit an pagbuhay, madali sanang mahadit manongod sa mga pangangaipo sa buhay. Bilang nagdusay na mga Kristiano, igwa man kita nin mahahalagang teokratikong paninimbagan. Kita nakikikabtang sa ministeryo, nag-aandam para sa mga pagtiripon asin nag-aatender dian, saka pinapagdadanay tang makosog an espirituwalidad paagi sa personal na pag-adal patin pampamilyang pagsamba. Sa ibong kan gabos na kaipuhan gibohon ni Noe sa paglilingkod sa Dios, “siring [“nanggad,” NW] an guinibo” nia. (Gen. 6:22) Daing duwa-duwa na tangani kitang makadalagan sagkod sa katapusan kan Kristianong paorumbasan, mahalagang marhay na, sagkod sa mapupuede, papagdanayon niato na kadikit sana an pagabat saka dai magpasan nin ano man na dai kaipuhan.

6, 7. Anong hatol ni Jesus an maninigo tang isaisip?

⁶ Ano an boot sabihon ni Pablo kan sabihon nia na haleon “an gabos na kagabatan”? Siempre, dai man niato puedeng biyong butasan an  gabos na paninimbagan niato. Mapadapit digdi, girumdomon an sinabi ni Jesus: “Dai kamo mahadit, na magsabi, Ano an samong kakakanon? o, Ano an samong iinomon? o, Ano an samong gugubigñon? Huli ta an gabos na bagay na ini hinahanap nin magña Gentil; huli ta naaaraman kan saindong Amang lagñitnon, na kinakaipuhan nindo [ining] gabos na bagay.” (Mat. 6:31, 32) Ipinaparisa digdi ni Jesus na dawa an sinasabing normal na mga bagay, arog baga nin kakanon asin gubing, puedeng magin pagabat o singkogan kun dai pinapagdadanay sa tamang lugar.

⁷ Isentro an atension sa sinabi ni Jesus na: “Naaaraman kan saindong Amang lagñitnon, na kinakaipuhan nindo [ining] gabos na bagay.” Ipinaparisa kaini na gigibohon kan satong Ama, si Jehova, an kabtang nia sa pag-asikaso kan mga pangangaipo niato. Siempre, an “gabos na bagay” na ini tibaad laen sa personal na hilig o gusto niato. Pero, sinasabihan kita na dai mahadit manongod sa mga ‘bagay na hinahanap nin mga Gentil.’ Taano? Kan huri, sinadol ni Jesus an mga naghihinanyog sa saiya: “Magigñat kamo sa saindo man sana, tagñaning an saindong magña puso dai magñanaan nin magña kapasloan asin kaburatan, asin nin magña paghadit sa buhay na ini, asin an aldao na iyan dumatong sa saindo siring sa sarong siod.”—Luc. 21:34, 35.

8. Taano ta ngonyan an nangorognang panahon na ‘haleon an gabos na kagabatan’?

⁸ An sagkodan nasa eroenotan na sana. Kaherakherak nanggad kita kun papagabatan niato an satong sadiri nin dai kaipuhan na pasan na makakaolang sa sato mantang haranihon na kita sa katapusan! Kun siring, talagang madonong an hatol ni Pablo: “An kabanalan [“diosnon na debosyon,” NW] na may kaogmahan [“pagigin naninigoan sa sadiri,” NW] sarong dakulang pakinabang.” (1 Tim. 6:6) An pagsapuso niato kan mga tataramon ni Pablo mas magpapagin sierto kan satong paglaom na magkamit kan premyo.

‘An Kasalan na Madaling Nakakasabod Sato’

9, 10. (a) Sa ano nanonongod an pananaram na ‘an kasalan na madaling nakakasabod sato’? (b) Paano kita puedeng masabod, sabi ngani?

⁹ Apuera sa “gabos na kagabatan,” sinambit ni Pablo an paghale sa ‘kasalan na madaling nakakasabod sato.’ Posibleng ano iyan? Sa Biblia, sarong beses asin sa bersikulo sanang ini naglataw an Griegong termino na trinadusir na ‘madaling nakakasabod.’ An iskolar na si Albert Barnes nagsabi: “Kun paanong an paradalagan mag-iingat na dai maggubing nin makakapurupot sa mga tabay nia asin makakaolang sa pagdalagan nia, maninigo na iyo man an sarong Kristiano, na nangorognang dapat haleon an gabos na bagay na arog kaini.” Paano an sarong Kristiano puedeng masabod, sabi ngani, na makakapaluya sa pagtubod nia?

¹⁰ Dai man biglang nawawara an pagtubod nin sarong Kristiano. Tibaad mangyari iyan nin luway-luway, o dai ngani risa. Sa enot na kabtang kan surat ni Pablo, nagpatanid sia manongod sa peligro na “makabulag” [“ikaanod,” NW] asin ‘magkaigwa nin maraot na puso na dai nin pagtubod.’ (Heb. 2:1; 3:12) Kun an mga tabay nin paradalagan masabod sa saiyang gubing, posible nanggad na matumba sia. Dakula nanggad an posibilidad na masabod an paradalagan kun babaliwalaon nia an peligro nin pagsulot nin partikular na gubing para sa pagdalagan. Ano an puedeng dahelan kan pagbaliwala niang iyan? Tibaad kadaihan nin pag-iingat, sobrang kompiansa, o sarong disturbo. Anong leksion an manonodan niato sa hatol ni Pablo?

11. Ano an puedeng magin dahelan nin pagkawara kan satong pagtubod?

¹¹ Maninigo tang tandaan na an pagkawara nin pagtubod resulta kan ginigibo niato sa pag-agi nin panahon. Mapadapit sa ‘kasalan na madaling nakakasabod sato,’ an saro pang iskolar nagsabi na an “kasalan an pinakadepisil na kalaban, huli sa kamugtakan niato, sato mismong sadiri, asin mga kaibanan niato.” An boot niang sabihon iyo na an satong palibot, personal na mga kaluyahan, asin mga kaibaiba puede gabos na magkaigwa nin makosog na impluwensia sa sato. Puede iyan na magin dahelan nin pagluya o pagkawara pa ngani kan satong pagtubod.—Mat. 13:3-9.

12. Anong mga pagirumdom an maninigo tang isapuso tanganing dai mawara an pagtubod niato?

¹² Sa nakaaging mga taon, parate kitang pinapagirumdom kan grupong maimbod asin mapagmansay na oripon na mag-ingat sa mga dinadalan  o hineheling asin hinihinanyog niato, an boot sabihon, sa mga bagay na dian isinesentro niato an satong puso saka isip. Pinapatanidan kita dapit sa peligro na garo baga makasabod sa pagmamaigot na magkaigwa nin dakol na kuarta asin rogaring. Tibaad malingling kita sa kinang asin gayon kan kinaban nin pag-aling-aling o sa daing katapusan na pagluwas nin bagong mga gadyet. Sala nanggad an pag-isip na an siring na hatol sobra kaestrikto o aplikado sana sa iba, mantang kita garo baga dai apektado kan mga peligrong iyan. Tuso asin mapandaya an mga bagay na nakakasabod na ilinalaag kan kinaban ni Satanas sa dalan niato. Huli sa kadaihan nin pag-iingat, sobrang kompiansa, asin mga disturbo, napahamak an nagkapira, asin an siring na mga bagay puedeng makaapektar sa pagkamit niato kan premyong buhay.—1 Juan 2:15-17.

13. Paano niato mapoprotehiran an sadiri sa nakakaraot na mga impluwensia?

¹³ Sa aroaldaw, puede kitang maimpluwensiahan nin mga tawo na nagpapalakop kan mga pasohan, pamantayan, asin kaisipan kan kinaban. (Basahon an Efeso 2:1, 2.) Minsan siring, nakadepende nanggad sa sato an magigin epekto sa sato kan mga impluwensiang ini—kun ano an reaksion niato dian. Nakakagadan an “doros” na sinambit ni Pablo. Kita dapat na danay na nagbabantay tanganing dai mapuot, o magpiot an daghan, na huli kaini dai matapos an paorumbasan. Ano an makakatabang sa sato na magdanay sa paorumbasan? An halimbawa ni Jesus bilang an perpekto asin pangenot na paradalagan. (Heb. 12:2) Iyo man an halimbawa ni Pablo, huling ibinilang nia an saiyang sadiri na kaiba sa mga paradalagan sa Kristianong paorumbasan asin dinagka nia an saiyang mga kapagtubod na arogon sia.—1 Cor. 11:1; Fil. 3:14.

‘Magkakamit Kamo’ Kaiyan—Paano?

14. Ano an nagin pagmansay ni Pablo sa personal na pagpartisipar nia sa paorumbasan?

¹⁴ Ano an nagin pagmansay ni Pablo sa personal na pagpartisipar nia sa paorumbasan? Sa ultimo niang pakikipag-olay sa kamagurangan na hale sa Efeso, sia nagsabi: “Dai ko ibinibilang na mahalaga sa sako an sakong buhay, tagñaning matapus ko an pagdalagan asin an paglingkod na sakong inako sa Kagurangnan na si Jesus.” (Gui. 20:24) Andam siang isakripisyo an gabos, pati an  buhay nia, tanganing matapos an paorumbasan. Para ki Pablo, mawawaran nin saysay an gabos na paghihingoa asin pagmamaigot nia may koneksion sa maogmang bareta kun minsan paano dai nia matapos an paorumbasan. Pero, dai sia nag-isip na nakakasegurado na sia na matatapos nia an paorumbasan. (Basahon an Filipos 3:12, 13.) Kan madali na siang magadan saka sana sia nakapagsabi na may kompiansa: “Ako nakipaglaban kan marahay na pakilaban, natapus ko an sakong pakiombasan, naigñatan ko an pagtubod.”—2 Tim. 4:7.

15. Anong pamparigon sa boot an itinao ni Pablo sa mga kapwa paradalagan sa paorumbasan?

¹⁵ Apuera kaiyan, makosog an pagmawot ni Pablo na maheling an mga kapwa Kristiano na matapos an paorumbasan asin dai magpondo sa dalan. Halimbawa, dinagka nia an mga Kristiano sa Filipos na magmaigot para sa kaligtasan ninda. Kaipuhan nindang magdanay na “nagpapahayag kan tataramon nin buhay” o marigon na mangapot dian. Sia nagsabi pa: “Tagñaning ako magkaigua nin ipagmuraway sa aldao ni Cristo, na ako dai nagdalagan nin basang ni nagpagal nin basang.” (Fil. 2:16) Kaagid kaiyan, dinagka nia an mga Kristiano sa Corinto: ‘Dumalagan kamo [“sa paagi na,” NW] kamo magkamit kan premyo.’—1 Cor. 9:24.

16. Taano ta maninigo kitang magkonsentrar nanggad sa pasohan, o premyo?

¹⁶ Sa halawig na paorumbasan, arog baga nin maraton, sa kapinonan dai naheheling an sagkodan kaiyan. Pero, sa bilog na paorumbasan, an paradalagan danay na nakakonsentrar sa sagkodan. Nagigin orog an pagkonsentrar na iyan kun aram nia na harani na an pasohan. Maninigo na iyo man sa paorumbasan niato. An pasohan, o premyo, kaipuhan na magin tunay para sa sato. Makakatabang iyan sa sato na makamtan an premyo.

17. Paano kalabot an pagtubod sa pagdadanay na nakakonsentrar sa premyo?

¹⁷ “An pagtubod iyo an katunayan kan magña bagay na pinaglalaom, an tanda kan magña bagay na dai nahihiling,” an isinurat ni Pablo. (Heb. 11:1) Si Abraham asin Sara andam na bayaan an komportableng pamumuhay asin magin “magña parapakihimanua asin magña parabaklay sa kinaban.” Ano an nakatabang sa sainda? ‘Natanaw ninda sa harayo’ an kaotoban kan mga panuga nin Dios. Hinaboan ni Moises an “kaogmahan nin kasalan sa kadikit na panahon” asin an “kayamanan kan Egipto.” Paano sia nagkaigwa nin pagtubod asin kosog na magibo iyan? Sia “nagtanao kan katimbang na balos.” (Heb. 11:8-13, 24-26) Natural sana na ponan ni Pablo an paglaladawan sa lambang saro kan mga tawong ini paagi sa pananaram na “huli sa pagtubod.” An pagtubod nakatabang sa sainda na dai pagparaisipon an mga pagbalo asin kasakitan sa presente kundi masabotan kun ano an ginigibo nin Dios para sa sainda saka an gigibohon pa nia.

18. Tanganing mahale ‘an kasalan na madaling nakakasabod sato,’ anong positibong mga lakdang an puede tang gibohon?

¹⁸ Paagi sa paghorophorop sa mga lalaki asin babae na may pagtubod na nasambitan sa Hebreo kapitulo 11 saka pag-arog sa halimbawa ninda, makakapatalubo kita nin pagtubod asin mahahale niato ‘an kasalan na madaling nakakasabod sato.’ (Heb. 12:1) Siring man, puedeng “magpamaromangno kita na magpasaradolsadol sa pagkamoot asin sa magña marahay na guibo” paagi sa pakipagtipon sa mga tawong nagpapatalubo nin kaparehong pagtubod.—Heb. 10:24.

19. Ano an saboot nindo manongod sa danay na pagkonsentrar sa premyo?

¹⁹ Harani na kita sa katapusan kan paorumbasan niato. Garo man sana naheheling na niato an sagkodan. Paagi sa pagtubod asin tabang ni Jehova, kaya man niatong ‘haleon an gabos na kagabatan asin kasalan na madaling nakakasabod sato.’ Iyo, makakadalagan kita sa paagi na puede tang makamit an premyo—an mga bendisyon na ipinanuga kan satong Dios asin Ama, si Jehova.

[Nota sa Ibaba]

Nagigirumdoman daw Nindo?

• Ano an kalabot sa paghale kan “gabos na kagabatan”?

• Ano an puedeng magin dahelan nin pagkawara kan pagtubod nin sarong Kristiano?

• Taano ta dapat kitang magdanay na nakakonsentrar sa premyo?

[Mga Hapot Para sa Pag-adal]

[Ritrato sa pahina 23]

Ano ‘an kasalan na madaling nakakasabod sato,’ asin paano iyan puedeng garo baga makasabod sa sato?