“Yufala i Resis Blong Kasem Praes”

“Yufala i mas mekem olsem we yufala i resis blong kasem praes blong yufala.”—1 KOR. 9:24.

1, 2. (a) ?Pol i yusum wanem blong leftemap tingting blong ol Hibru Kristin? (b) ?Pol i talem se yumi mas mekem wanem?

LONG leta we aposol Pol i raetem long ol Hibru Kristin, hem i yusum wan pijatok long saed blong wan resis, blong leftemap tingting blong olgeta. Hem i mekem olgeta oli tingbaot se i no olgeta nomo we oli stap resis. Plante man blong Jehova bifo, oli kasem en blong resis ya finis. Pol i talem se ol man ya blong Jehova, oli olsem ‘ol witnes we oli plante we plante,’ oli stap raonabaot long olgeta. Sipos ol Hibru Kristin oli tingbaot ol samting we olgeta ya oli mekem blong soemaot bilif blong olgeta mo we oli traehad bigwan, bambae tingting blong ol Hibru Kristin i strong blong oli finisim resis blong olgeta.

² Long las stadi, yumi tokbaot eksampol blong sam long ol “witnes” ya bifo. Strong bilif i givhan long olgeta blong mekem wok blong God go kasem en blong laef blong olgeta. Oli resis gogo oli finisim resis blong olgeta. Yumi save finisim resis blong yumi tu. ?Yumi mas mekem wanem? Pol i talem se: “Yumi mas lego ol samting we oli stap blokem yumi, mo ol sin we oli stap holemtaet yumi, nao yumi mas mekem tingting blong yumi i strong, blong yumi resis long rod ya we i stap long fes blong yumi.”—Hib. 12:1.

3. ?Yumi save lanem wanem long toktok blong Pol long saed blong ol man Gris we oli resis?

³ ?From wanem Pol i talem se yumi mas “lego ol samting we oli stap blokem yumi”? Wan buk (Backgrounds of Early Christianity) we i tokbaot ol Kristin long taem blong Pol, i eksplenem olsem wanem ol man blong resis long taem ya oli ron. Buk ya i talem  se “ol man Gris oli neked taem oli tren mo oli resis.” * Tede yumi harem se i no stret blong mekem olsem. Be ol man blong resis bifo, oli karemaot ol klos blong olgeta from we oli no wantem se wan samting i blokem olgeta blong winim praes. Taswe taem Pol i talem long ol Hibru Kristin se oli mas “lego ol samting we oli stap blokem” olgeta, hem i min se oli no mas letem eni samting i blokem olgeta blong kasem praes ya blong laef we i no save finis. Hemia wan nambawan advaes blong ol Hibru Kristin oli folem, mo i nambawan advaes blong yumi tu yumi folem. ?Wanem ol samting we oli save blokem yumi blong yumi no finisim resis ya blong laef?

“Yumi Mas Lego Ol Samting We Oli Stap Blokem Yumi”

4. ?Ol man long taem blong Noa oli stap mekem wanem?

⁴ Pol i talem se “yumi mas lego ol samting we oli stap blokem yumi.” Hemia i minim eni samting we i save mekem se yumi no moa tingting fulwan long resis blong yumi, mo yumi no moa traehad blong finisim resis blong yumi. ?Wanem sam samting we oli save blokem yumi long resis ya? Jisas i givhan long yumi blong save ansa. Hem i tokbaot taem blong Noa. Hemia wan man blong bilif we Pol tu i tokbaot. Jisas i talem se: “Long taem ya we mi, mi Pikinini blong Man mi kamtru, bambae i olsem taem blong Noa bifo.” (Luk 17:26) I tru se wol ya bambae i lus olsem wol long taem blong Noa. Be Jisas i stap tokbaot se laef blong ol man naoia bambae i olsem laef blong ol man long taem blong Noa. (Ridim Matiu 24:37-39.) Bighaf blong ol man long taem blong Noa oli no wantem lanem samting long saed blong God, mo oli no wantem mekem ol samting we God i glad long hem. ?Oli stap mekem wanem? Oli stap kakae, dring, mo mekem mared. Ol samting ya oli no rong. Be oli ting se ol samting ya oli moa impoten long wanem we God i talem. Jisas i talem se olgeta “oli no wantem lesin” (NW) long God.

5. ?Wanem i save givhan long yumi blong ron kasem en blong resis ya?

⁵ Olsem Noa mo famle blong hem, yumi gat plante samting blong mekem evri dei. Yumi mas wok blong kasem mane mo yumi mas lukaot long yumi wan mo famle blong yumi. Yumi yusum plante taem mo paoa blong yumi blong mekem ol samting ya. Mo sipos yumi trabol long saed blong mane, maet yumi wari se bambae yumi kasem ol samting we yumi nidim olsem wanem. Yumi givim laef blong yumi i go long Jehova, taswe yumi gat sam narafala wok bakegen we yumi mas mekem. Yumi joen long wok blong prij, yumi rerem ol miting mo yumi go long ol miting, yumi mekem famle wosip mo yumi stadi yumi wan. Noa tu i gat plante samting blong mekem blong wosipim God, be hem i “mekem olgeta samting ya olsem we God i talem.” (Jen. 6:22) Sipos yumi wantem mekem olgeta samting we Jehova i talem blong finisim resis blong yumi, yumi no mas letem eni samting i blokem yumi blong ron kasem en blong resis ya.

6, 7. ?Wanem advaes blong Jisas we yumi mas tingbaot?

⁶ ?Toktok ya blong Pol se “yumi mas lego ol samting we oli stap blokem yumi” i minim wanem? I no min se yumi mas lego olgeta wok blong yumi, i gat sam samting we yumi mas mekem. Be yu traem tingbaot wanem we Jisas i talem long saed blong ol samting we yumi nidim long laef. Hem i se: “I nogud yufala i stap tingting tumas se, ‘?Bambae mifala i kakae wanem?’ no ‘?Bambae mifala i dring wanem?’ no ‘?Bambae mifala i kasem klos blong mifala olsem wanem?’ Ol hiten man, oltaem oli stap tingting tumas from ol samting olsem. Be Papa blong yufala long heven, hem i save we yufala i mas gat olgeta samting ya.” (Mat. 6:31, 32) Jisas i givhan long yumi blong kasem save se ol samting we yumi nidim, olsem kakae mo klos, oli save blokem yumi blong resis sipos yumi tingting tumas long olgeta.

⁷ Yu traem tingbaot ol tok blong Jisas se: “Papa blong yufala long heven, hem i save we yufala i mas gat olgeta samting ya.” Ol tok ya oli soemaot se Papa blong yumi, Jehova, bambae i givim ol samting we yumi nidim. I tru, “olgeta samting ya,” i no min se yumi gat olgeta samting we yumi wantem. Be Jisas i talem se yumi no mas tingting tumas long ol samting we yumi nidim. Hemia ol samting we “ol hiten man, oltaem oli stap tingting tumas from.” ?From wanem i nogud blong yumi mekem olsem? Jisas i talem se: “Yufala i mas lukaot gud. Yufala i no mas westem taem blong yufala long fasin ya we yufala i stap ronem lafet, mo yufala i stap drong, mo yufala i stap tingting tumas long laef blong wol ya. I nogud Dei ya blong mi i kam kasem yufala wantaem nomo, we yufala i no tingbaot nating, olsem we yufala i fas long wan trap.”—Luk 21:34, 35.

8. ?From wanem i stret taem naoia blong “lego ol samting we oli stap blokem yumi”?

 ⁸ En blong resis ya i klosap nomo. Taswe yumi no wantem letem eni samting i blokem yumi blong finisim resis ya. Hemia nao from wanem “yumi mas lego ol samting we oli stap blokem yumi.” Yumi mas glad blong gat samting we yumi nidim. Aposol Pol i givim advaes ya se: “Fasin ya blong bilif . . . i wan rod blong man i kasem plante samting, be i rod blong man ya nomo we i save harem gud long wanem samting we hem i gat.” (1 Tim. 6:6) Sipos yumi folem ol tok blong Pol, bambae i moa isi blong yumi gohed long resis blong yumi mo yumi kasem praes.

‘Sin We i Stap Holemtaet Yumi’

9, 10. (a) ?‘Sin we i stap holemtaet yumi,’ i minim wanem? (b) ?Wanem i save mekem se wan Kristin i no moa bilif?

⁹ Pol i tokbaot wan narafala samting we yumi mas lego. Hem i talem se yumi mas lego ‘sin we i stap holemtaet yumi.’ Grik tok we oli tanem i kam “holemtaet” i stap wan taem nomo long Baebol, hemia long vas ya. Wan man blong stadi long ol tok blong Baebol, nem blong hem Albert Barnes, i talem se man blong resis i mas lukaot gud blong i no putum ol klos we oli save fas raon long leg blong hem, nao oli mekem i had blong hem i ron gud. Mo hem i talem se wan Kristin i mas lukaot se samting ya i no hapen long hem. Hem i no mas letem wan samting i holemtaet hem, hemia i min se hem i no letem bilif blong hem i kam slak mo i no moa bilif. ?Wanem i save mekem se bilif blong wan Kristin i kam slak?

¹⁰ Bilif blong wan Kristin i no lus wantaem nomo. Maet samting ya i hapen sloslo, mo hem i no luksave we bilif blong hem i stap kam slak. Long stat blong leta we Pol i raetem long ol Hibru Kristin, Pol i talem se oli mas lukaot we oli no “lusum rod” blong olgeta mo ‘tingting blong olgeta i kam fulap long ol fasin nogud, nao oli no save bilif long God.’ (Hib. 2:1; 3:12) Sipos klos blong man blong resis i fas raon long leg blong hem, ating bambae hem i foldaon. Taswe hem i mas tingbaot se sipos hem i no jusum klos we i stret blong ron, hem i save foldaon. ?Wanem i save mekem se man blong resis i no tingbaot samting ya? Taem wan man i givim advaes long hem, maet hem i no wantem save mo i no lesin. Maet hem i flas tumas, hem i ting se hem i strong mo hem i no save foldaon. Maet hem i stap tingting long narafala samting nao i no luk we klos blong hem i no stret. ?Yumi save lanem wanem long advaes blong Pol?

11. ?Wanem i save mekem se yumi no moa bilif?

¹¹ Yumi mas tingbaot se bilif blong wan Kristin i save lus from sam samting we hem i jusum blong mekem. Wan narafala man blong stadi long ol tok blong Baebol i tokbaot ‘sin we i stap holemtaet yumi.’ Hem i talem se ol samting we oli hapen long laef blong yumi, ol man we yumi kampani wetem olgeta, mo ol samting nogud we yumi wantem, oli save gat bigfala paoa long yumi. Ol samting ya oli save mekem bilif blong yumi i kam slak mo oli save mekem se yumi no moa bilif.—Mat. 13:3-9.

12. ?Wanem ol woning we yumi mas obei long olgeta sipos yumi no wantem se bilif blong yumi i lus?

¹² Plante taem slef we i stret mo waes i talem se yumi mas jusum gud ol samting we yumi lukluk mo ol samting we yumi lesin long hem, from we ol samting ya oli save gat paoa long tingting blong yumi mo long wanem we yumi wantem. Slef we i stret mo waes i talem tu se yumi mas lukaot blong no wantem kasem plante mane mo plante samting. Sipos yumi laekem tumas ol pleplei no oltaem yumi wantem kasem ol niu samting we man i wokem, maet bambae yumi yusum taem blong yumi long ol samting ya. Ale bambae yumi no moa gat taem blong mekem ol samting we oli moa impoten. I nogud yumi sakemaot ol woning ya from we yumi ting se oli strong tumas blong folem. Yumi no mas ting se ol narafala nomo oli mas lesin long ol woning ya, mo yumi no nid blong lesin from we bilif blong yumi i strong finis. Setan i yusum tingting blong ol man blong wol ya mo ol samting we oli wantem,  blong pulum yumi blong no lesin long ol woning ya. Hem i no wantem se yumi finisim resis blong yumi. Samfala oli no moa bilif from we oli no wantem save, oli flas tumas, no oli tingting tumas long ol samting blong wol. Sipos samting ya i hapen long yumi, maet bambae yumi no kasem praes blong laef we i no save finis.—1 Jon 2:15-17.

13. ?Yumi mas mekem wanem blong yumi no gat tingting olsem ol man long wol?

¹³ Evri dei, ol man long wol blong Setan oli traem pulum yumi blong gat tingting olsem olgeta. Oli wantem se yumi tinghae long ol samting we oli ting se i impoten. Mo oli wantem se yumi mekem ol samting we olgeta oli mekem. (Ridim Efesas 2:1, 2. *) Be yumi mas jusum sipos bambae yumi letem olgeta oli pulum yumi blong gat tingting olsem olgeta, no nogat. Pol i talem se tingting blong ol man long wol i olsem “win” we i stap raonabaot long yumi. Be win ya i posen. Sem mak olsem we yumi no wantem pulum posen win, yumi no mas letem tingting blong ol man long wol i spolem tingting blong yumi. ?Wanem i save givhan long yumi blong gohed long resis blong yumi? Eksampol blong Jisas i nambawan blong givhan long yumi. Hem i ron kasem en blong resis mo yumi save folem fasin blong hem. (Hib. 12:2) Yumi save folem eksampol blong aposol Pol tu. Hem i ron long resis ya, mo hem i talem long ol Kristin brata blong hem se oli mas folem fasin blong hem.—1 Kor. 11:1; Fil. 3:14.

Samting We Yu Save Mekem Blong “Kasem Praes”

14. ?Pol i gat wanem tingting long resis ya?

¹⁴ ?Pol i gat wanem tingting long resis ya? ?Hem i luk se i impoten blong finisim resis ya? Long Efesas, taem Pol i toktok laswan long ol elda, hem i talem se: “Mi mi luk finis, we laef blong mi i olsem nating nomo long mi. Mi no moa tingbaot laef blong mi, mi wantem kasem en blong rod blong mi. Mi wantem finisim wok ya we Jisas, Masta blong yumi i givim long mi blong mi mekem.” (Wok 20:24) Pol i rere blong lego evri samting we hem i gat mo laef blong hem tu, blong i kasem en blong resis ya. Hem i wok strong blong talemaot gud nius. Be hem i talem se sipos hem i no finisim resis ya, hem i traehad blong nating nomo. Hem i save se hem i mas gohed blong wok strong kasem en blong resis ya. Hem i no  gat tingting ya se hem i kasem praes finis. Nogat. (Ridim Filipae 3:12, 13.) Klosap long taem we hem i ded, hem i save talem se: “Long laef blong mi we mi mi bilif strong long Kraes, i olsem we mi mi stap resis strong long wan resis, mo naoia mi mi kamtru finis long en blong hem, mo mi mi stap holemstrong yet fasin blong bilif.”—2 Tim. 4:7.

15. ?Pol i talem long olgeta we oli stap ron wetem hem se oli mas mekem wanem?

¹⁵ Pol i wantem tumas se ol Kristin brata blong hem oli finisim resis ya tu. Hem i talem long ol Kristin long Filipae blong wok had blong sevem laef blong olgeta. Hem i mekem olgeta oli tingbaot se oli mas “holemtaet tok blong laef.” Mo hem i talem from wanem hem i wantem olgeta blong mekem olsem, i se: “Blong bambae mi mi save glad we mi glad from yufala, long dei blong Kraes. Olsem nao, mi mi no resis blong nating nomo, mo mi mi no wok had blong nating nomo.” (Fil. 2:16, NW) Hem i talem long ol Kristin long Korin tu se oli mas gohed long resis ya. Hem i se: “Yufala i mas mekem olsem we yufala i resis blong kasem praes blong yufala.”—1 Kor. 9:24.

16. ?From wanem yumi mas tingbaot se praes blong resis blong yumi hem i tru?

¹⁶ Man we i ron long wan longfala resis, hem i save luk laen we i makem en blong resis, taem hem i kam klosap nomo long en. Nating se i olsem, hem i stap tingbaot en blong resis mo hem i save se i stap kam klosap moa long en. Mo taem hem i save se klosap hem i kasem en blong resis, tingting blong hem i strong moa blong i finisim resis ya. Yumi mas mekem sem mak long resis we yumi stap ron long hem. Yumi mas tingbaot se praes we yumi save kasem hem i tru. Samting ya bambae i givhan long yumi blong gat strong tingting blong finisim resis ya mo kasem praes blong yumi.

17. ?Long wanem rod bilif i save givhan long yumi blong yumi tingbaot se praes we yumi save kasem hem i tru?

¹⁷ Pol i raetem se: “Fasin ya we yumi bilif strong long God, hem i soemaot long yumi we olgeta samting ya we yumi stap putum tingting blong yumi i strong long hem, olgeta oli tru. Mo hem i soemaot long yumi we olgeta samting ya we yumi no save luk, be oli stap.” (Hib. 11:1) Ebraham mo Sera tufala i rere blong lego gudfala haos blong tufala mo blong go stap ‘olsem we oli strenja nomo long kantri ya we i no prapa ples blong olgeta.’ ?Wanem i givhan long tufala blong mekem samting ya? Tufala i tingbaot se ol samting we God i promes blong mekem oli tru. ‘Tufala i stap luk ol samting ya olsem we oli stap longwe yet long tufala, be tufala i glad tumas blong luk.’ Moses i no wantem blong i “stap hapi long fasin blong sin we i blong smoltaem nomo,” mo i no wantem “harem gud long ol gudfala samting blong laef long Ijip.” ?Wanem i givhan long hem blong gat bilif mo paoa blong mekem samting ya? “Oltaem hem i stap luk long pei we God bambae i givim long hem.” (Hib. 11:8-13, 24-26) Pol i talem se olgeta ya oli mekem ol samting ya from we oli “bilif.” Oli bilif strong, taswe oli tingbaot se praes we oli save kasem hem i tru. Nomata wanem trabol we oli kasem, oli no fogetem praes blong olgeta. Oli save se God i stap givhan long olgeta, mo oli save se ol promes blong hem bambae oli kamtru.

18. ?Yumi save mekem wanem blong lego ‘sin ya we i stap holemtaet yumi’?

¹⁸ Yumi save tingting dip long ol man mo woman blong bilif we Hibrus japta 11 i tokbaot, mo yumi save folem fasin blong olgeta. Samting ya i save mekem bilif blong yumi i strong mo yumi save lego ‘sin ya we i stap holemtaet yumi.’ (Hib. 12:1) Mo taem yumi go long ol miting, yumi joen wetem ol Kristin brata sista blong yumi we oli stap traehad blong mekem bilif blong olgeta tu i strong. Ale, yumi save “givgivhan long yumi blong mekem yumi strong blong lavem ol man, mo blong mekem ol gudfala fasin.”—Hib. 10:24.

19. ?From wanem yumi mas gohed long resis blong yumi?

¹⁹ Yumi stap klosap long en blong resis blong yumi, mo i olsem se yumi save luk laen ya we i makem en blong resis. From we Jehova i givhan long yumi mo yumi bilif long hem, yumi save ‘lego ol samting we oli blokem yumi mo sin we i stap holemtaet yumi.’ Yumi save gohed long resis blong yumi mo yumi save kasem praes ya we Papa blong yumi, Jehova, i promes blong givim long yumi.

[Ol futnot]

?Yu Yu Rimemba?

• ?Yumi mekem wanem blong lego “ol samting we oli stap blokem yumi”?

• ?Wanem i save mekem se wan Kristin i no moa bilif?

• ?From wanem yumi mas tingbaot se praes we yumi save kasem hem i tru?

[Kwestin]

[Tok blong pija long pej 26]

?‘Sin we i stap holemtaet yumi,’ i minim wanem? ?Mo samting ya i holemtaet yumi olsem wanem?