“Peñaníkena pehupyty hag̃uáicha pe prémio”

“Peñaníkena pehupyty hag̃uáicha pe prémio.” (1 COR. 9:24, BNP)

1, 2. a) Mbaʼe ehémplopa oiporu Pablo omokyreʼỹ hag̃ua umi kristiáno evréope? b) Mbaʼépa heʼi Pablo opavave kristiánope?

PABLO ohai peteĩ kuatiañeʼẽ umi kristiáno evréope oipotágui haʼekuéra oñehaʼã meme oikove hag̃ua opa ára g̃uarã. Upearã oiporu peteĩ ehémplo. Oñeʼẽ peteĩ karrérare ha heʼi chupekuéra noĩriha haʼeño, oĩha ‘ijerére heta tapicha ojeroviaitevaʼekue’ ha og̃uahẽmava huʼãme. Imanduʼávo hikuái mbaʼeichaitépa iñeʼẽrendu ha ojerovia umi tapicha yma guare, ikyreʼỹvéta ha ndohejareimoʼãi pe karréra.

² Pe artíkulo ohasávape jahechákuri oĩ hague ‘heta tapicha ojeroviaitevaʼekue’. Haʼekuéra ningo ojerovia rupi oaguanta ha omohuʼã porã pe karréra, upéicha ohechauka ñande avei ikatuha jahupyty heta mbaʼe jajerovia añetéramo Ñandejárare. Mbaʼéichapa ikatu jajapo upéva? Ñahenduvaʼerã apóstol Pablo heʼivaʼekue umi kristiáno evréope: ‘Jaipeʼa ñandejehegui opa mbaʼe ipohýiva, ha avei pe pekádo ñanemoñuhãséva, ha ñañani kaneʼõʼỹre pe karréra oñemoĩva ñane renonderãme’ (Heb. 12:1, ÑÑB).

3. Mbaʼépa omboʼesevaʼekue Pablo oñeʼẽrõ guare umi griégo ohaʼãvare karréra?

 ³ Pe lívro El mundo clásico: la epopeya de Grecia y Roma ñanepytyvõ ñantende hag̃ua mbaʼépa heʼise ‘jaipeʼa ñandejehegui opa mbaʼe ipohýiva’. Peteĩ hendápe ko lívro heʼi: “Umi griégo oñentrena ha ohaʼã pe karréra opívo.” * Umi oñaníva oipeʼapaite ijao odiparáta jave, ani hag̃ua mbaʼeve ostorva chupekuéra. Koʼág̃a rupi ikatu ñapensa notĩriha hikuái, péro koʼã tapicha ojapovaʼekue upéicha oñani porãve hag̃ua ha oganaségui pe prémio. Upéicharõ, mbaʼépa omboʼesevaʼekue Pablo ko ehémplo rupive? Haʼe ohechauka tekotevẽha jaipeʼapaite ñandejehegui oimeraẽ mbaʼe ikatúva ñandestorva jahupyty hag̃ua pe jeikove opaʼỹva. Upe tiémpope ko konsého tuicha oipytyvõ umi kristiánope, ha koʼág̃a ideprovécho avei ñandéve. Péro, mbaʼépa ikatu ñandejoko ani hag̃ua ñag̃uahẽ huʼãme?

‘Jaipeʼa ñandejehegui opa mbaʼe ipohýiva’

4. Mbaʼépa omotenondevaʼekue umi hénte Noé tiémpope?

⁴ Mbaʼépa umi ‘mbaʼe ipohýiva’ Pablo heʼivaʼekue jaipeʼavaʼerãha ñandejehegui? Umíva hína opa mbaʼe ikatúva ñanderesarea ha ñanemokangy ko karrérape. Mbaʼéicha rupípa ikatu oiko upéva ñanderehe? Jahechamína mbaʼépa Jesús heʼivaʼekue: ‘Noé tiémpope oiko haguéicha, upéichata avei pe Yvypóra Raʼy árape’ (Luc. 17:26, NM). Oñeʼẽpa Jesús koʼápe Ñandejára Ára Guasu rehe? Nahániri. Haʼe heʼínte umi hénte koʼag̃agua ojoguataha umi oikovaʼekuépe Noé tiémpope (elee Mateo 24:37-39). Haʼekuéra ndoikuaaseivaʼekue mbaʼeve Ñandejáragui, ha koʼýte ndojaposéi haʼe oipotáva. Mbaʼérepa? Omotenonde rupi tembiʼu, vevída ha ñemenda. Jesús heʼi haguéicha, ‘haʼekuéra nopenái mbaʼevére’.

5. Mbaʼépa ñanepytyvõta ñamohuʼã hag̃ua pe karréra?

⁵ Ñande avei heta ñane rembiapo Noé ha hogayguakuéraicha. Pór ehémplo ñañehaʼãvaʼerã jahupyty ñane remikotevẽ ha ñamantene ñane família. Koʼã mbaʼe oipeʼa ñandehegui heta tiémpo ha ñanemokaneʼõ, hiʼarive ijetuʼuvéntema ñandesogue mbaʼéramo. Avei jaservívo Jehovápe jajapovaʼerã ambue mbaʼe iñimportánteva: tekotevẽ ñasẽ japredika, ñañembosakoʼi rreunionrã, jaha Salónpe, jastudia ñaneaño ha ñane família ndive ñamombarete hag̃ua ñande jerovia. Noé avei heta hembiapo vaʼekue, péro ojapo opa mbaʼe Ñandejára “heʼi hagueichaite chupe” (Gén. 6:22, ÑÑB). Ñande avei ñamohuʼãséramo pe karréra tekotevẽ ñambovevyive umi mbaʼe ipohýiva ha ikatúva ñandejoko.

6, 7. Mbaʼe konséhopa omeʼẽvaʼekue Jesús?

⁶ Mbaʼépa Pablo omboʼese heʼívo ‘jaipeʼa ñandejehegui opa mbaʼe ipohýiva’? Haʼe ndeʼíri ñamboykepaitevaʼerãha ñande rresponsavilida. Jesús ñanemokyreʼỹ  avei jahecha hag̃ua hendaitépe opa mbaʼe: ‘Ni mbaʼevéicharõ ani pejepyʼapy ha peje: “Mbaʼe piko roʼumíta?”, térã “mbaʼépa romboyʼúta?”, térã “mbaʼépa romondéta?”. Koʼã mbaʼe rapykuéri ningo oiko tarovaite umi hénte oĩva ko múndope. Péro pende Ru yvagapegua oikuaa voi peẽ peikotevẽha koʼã mbaʼe’ (Mat. 6:31, 32, NM). Mbaʼépa ñanemboʼe ko téysto? Umi mbaʼe ñaikotevẽva jepe ikatuha ipohýi ñandéve peteĩ itáicha, nañamoĩriramo hendápe porã.

⁷ Jesús heʼívo ‘pende Ru yvagapegua oikuaa voi peẽ peikotevẽha koʼã mbaʼe’, ohechauka Jehová okumplitaha katuete heʼivaʼekue ha ñanepytyvõtaha jahupyty hag̃ua ñane remikotevẽ. Péro upéva ndeʼiséi haʼe omeʼẽtaha ñandéve ‘koʼã mbaʼe’ ñandegustaháichante. Cristo heʼi ‘koʼã mbaʼe rapykuéri oiko tarovaiteha umi hénte oĩva ko múndope’, ha ñande ndovaléi jaiko péicha. Mbaʼérepa? Haʼe ombohovái: ‘Peñatendékena pendejehe ani hag̃ua pendepyʼahatã ha peiko pekaru rasa, térã pemokõ rasa. Ha ani avei peiko pejepyʼapyeterei pene remikotevẽre. Cháke peimoʼãʼỹve jave oúne pende ári upe ára peteĩ lásoicha’ (Luc. 21:34, 35, NM).

8. Mbaʼérepa koʼág̃a iñimportantevéntema jaipeʼa ñandejehegui opa mbaʼe pohýi?

⁸ Ñamohuʼãmbotaitéma ningo ko karréra ha nahiʼãiete japyta tapére jagueraha rupi umi mbaʼe ipohýiva. Ñanearandúramo jajapóta Pablo heʼivaʼekue: ‘Tuicha mbaʼe umi oñemomirĩvape g̃uarã pe jerovia añetegua ha ovyʼa umi mbaʼe oguerekóva rehe’ (1 Tim. 6:6, ÑÑB). Jajapóramo ko téysto heʼíva, ndahasymoʼãi ñagana hag̃ua pe prémio.

‘Jaipeʼa ñandejehegui [...] pe pekádo ñanemoñuhãséva’

9, 10. a) Mbaʼépa hína ‘pe pekádo ñanemoñuhãséva’? b) Mbaʼépa ikatu oiko ñande jerovia rehe?

⁹ Jahechaháicha tekotevẽ ñamboyke opa ‘mbaʼe pohýi’ ikatúva ñandestorva. Pablo heʼi avei jaipeʼavaʼerãha ñandejehegui ‘pe pekádo ñanemoñuhãséva’. Ko ñeʼẽ jatopa peteĩ hendápente la Bíbliape. Peteĩ karai arandu hérava Albert Barnes heʼi ko versíkulore: “Umi ohaʼãva karréra ndoiporuivaʼerã ao ikatúva ojeliapa hetymáre ha ojoko chupe oñani jave. Upéicha avei opavave kristiáno oipeʼavaʼerã ijehegui opa mbaʼe ostorvátava chupe ohupyty hag̃ua pe prémio”. Mbaʼe mbaʼépa ikatu ñandejoko ha omokangy ñande jerovia?

¹⁰ Peteĩ kristiáno ningo ndahaʼéi ikoʼẽntemava ndojeroviavéi. Upéva ikatu oiko hese saʼi saʼípe ha oimoʼãʼỹre. Pablo heʼi ñañangarekovaʼerãha “ani hag̃ua ñasẽ pe tapégui” ha mbeguekatúpe ‘ndajajeroviavéi ha jajapo ivaíva’ (Heb. 2:1; 3:12, BNP). Mbaʼépa oikóta pe oñanívare ijao ojeliáramo hetymáre? Ikatuhína hoʼa. Mbaʼérepa oĩ ndoipeʼáiva umi ao ostorvátava chupe oñani jave? Noñatendéigui, ojeroviaiterei rupi ijehe térã ojesarekógui ambue mbaʼére. Jahechamína upéicharõ mbaʼépa ñanemboʼe Pablo.

11. Mbaʼéicha rupípa oĩ ndojeroviavéiva?

¹¹ Heta oĩ ndojapovéiva oikóvo hendápe porã Jehová heʼíva, ha upéicha rupi ou ndojeroviavéi. Peteĩ karai ohesaʼỹijóva la Biblia heʼi ‘pe pekádo ñanemoñuhãséva’ ikatuha ipuʼaka ñanderehe. Umi mbaʼe jahasáva térã jaipotáva, ỹrõ ñane irũnguéra ikatu omokangy térã ohundi voi ñande jerovia (Mat. 13:3-9).

12. Mbaʼépa jajapovaʼerã ani hag̃ua ikangy ñande jerovia?

¹² Heta tiémporema tembiguái jeroviaha ha iñarandúva heʼi tekotevẽha ñañatende mbaʼépa jahecha ha ñahendu. Umíva ikatu oike ñande pyʼapýpe ha ojapouka ñandéve ivaíva. Avei heʼi ikatuha ñasẽ tape porãgui jaikóramo pláta ha vyʼarã rapykuéri ha jaipotáramo umi aparáto térã ambue mbaʼe  osẽ pyahu pyahuvéva. Mbaʼéichapa jahecha koʼã konsého? Haʼetépa ñandéve ipohyietereímava, térãpa jaʼe iporãha ótrope g̃uarãnte ha ñande nañaikotevẽiha voi? Naiporãi ningo ñapensa upéicha. Umi ñuhã Satanás omoĩva hasyeterei jehechakuaa hag̃ua ha hetápema oity. Aníkena arakaʼeve jajeroviaiterei ñandejehe, nañañatendéi térã jajesareko ambue mbaʼére, cháke ikatu ndajahupytýi pe prémio (1 Juan 2:15-17).

13. Mbaʼépa jajapovaʼerã ani hag̃ua ñanerundi pe “yvytu” oĩva ko múndope?

¹³ Ára ha ára umi hénte ko mundopegua oipota ñapensa haʼekuéra opensaháicha (elee Efesios 2:1, 2). Péro ipuʼakátapa ñanderehe hikuái? Ñande ikatu jadesidi jahejátapa ojapouka ñandéve haʼekuéra oipotáva térãpa nahániri. Pablo ombojoja “yvytúre” umi hénte opensa lája, iñasãi rupi oparupiete. Ko “yvytu” ivaieterei ha ikatu ñanemomombyryete Ñandejáragui. Upévare ñañehaʼãmbaitevaʼerã jajehekýi ko múndogui ani hag̃ua ñanerundi ha nañamohuʼãi pe karréra. Mbaʼépa ñanepytyvõta ani hag̃ua japyta tape kuʼáre? Jajesareko meme vaʼerã Jesús ehémplore, pe omotenondéva ko karréra (Heb. 12:2). Avei Pablo omoĩ ehémplo iporãva oñanívo ko karréra, ha omokyreʼỹ iñermanokuérape ohaʼanga hag̃ua chupe (1 Cor. 11:1; Fili. 3:14).

Mbaʼéichapa jahupytýta pe prémio

14. Mbaʼéichapa Pablo ohechavaʼekue pe karréra?

¹⁴ Omombaʼépa Pablo pe karréra? Omohuʼã hag̃ua pe diskúrso ojapovaʼekue umi ansiáno Efesoyguápe, heʼi: ‘Namombaʼéi che rekove ha nañemyakateʼỹi hese, ikatúma guive añani ipahaite peve ha amohuʼã pe tembiapo Jesús omeʼẽvaʼekue chéve’ (Hech. 20:24, nóta). Jahechaháicha, chupe g̃uarã iñimportanteterei vaʼekue ogana upe karréra, ha hekove jepe omeʼẽta omohuʼã hag̃ua. Haʼe heta oñehaʼã pe marandu porã rehehápe ha heʼi vyroreietetaha opa mbaʼe ojapovaʼekue noganáiramo pe prémio. Péro arakaʼeve ndojeroviái ijehénte, ni  nopensái katuete oganataha (elee Filipenses 3:12, 13). Omano potaitépema heʼi: “Hekoitépe niko añorairõ, ipahaite peve añani, ha ndajeíri che jeroviágui” (2 Tim. 4:7).

15. Mbaʼéichapa omokyreʼỹ Pablo umi ermáno oñanívape hendive?

¹⁵ Pablo ndoipotaivaʼekue umi ermáno oheja rei pe karréra. Upévare heʼi umi Filiposguápe toñehaʼã meme ojesalva hag̃ua: “Peñemohatãkena pe marandúpe omeʼẽva jeikove. Upéicha, oúvo Cristo chepyʼaroryvaʼerã penderehe, aikuaágui nañanireíri ha nambaʼaporeíri hague” (Fili. 2:16). Ha peichaite avei ojepyʼapy kristianokuéra Corintoyguáre. Imanduʼávo pe prémiore heʼi: “Peñanikéna pehupyty hag̃uáicha” (1 Cor. 9:24).

16. Mbaʼérepa tekotevẽ jajesareko meme pe prémio jahupytýtavare ñamohuʼã rire pe karréra?

¹⁶ Peteĩ karréra ipukúvape, umi oñaníva ndohechái moõitépa oñemohuʼãta. Upéicharõ jepe, haʼekuéra opensa meme pe prémio rehe, koʼýte saʼíma ofaltáramo og̃uahẽ hag̃ua. Pe karréra ñande ñañaníva ojogua avei koʼãichagua karrérape. Upévare jajesarekovaʼerã pe prémio ijojahaʼỹvare, upéicharõmante ñañehaʼãmbaitéta jahupyty hag̃ua.

17. Mbaʼépa ojapo Jehová rembiguaikuéra ojerovia rupi?

¹⁷ Pablo ohechauka tekotevẽha jajerovia mbarete ikatu hag̃uáicha jajesareko meme pe prémiore. Haʼe heʼi: ‘Jerovia heʼise jaikuaa jahupytytaha katuete pe ñahaʼarõva, ha jaguerovia umi mbaʼe ndajahecháiramo jepe’ (Heb. 11:1, BNP). Ñanemanduʼamína Abrahán ha Sara rehe. Haʼekuéra oheja umi mbaʼeta orekovaʼekue Úrpe ha oho “oiko mbohupa ha tetã ambueguáramo” Canaánpe. Abrahán ha Sara ojerovia rupi “ohechavaʼekue mombyry guive” mbaʼéichapa oñekumpli Jehová promésa. Avei Moisés ‘oiko rangue sapyʼami vyʼapópe pekádo poguýpe’ ha ohasa porã “Egipto mbaʼerepy” reheve, ojerovia mbarete ha omboyke koʼã mbaʼe. Upéicha ohechauka ‘oikuaa porã hague Ñandejára omyengoviapataha chupe’ hembiapokue (Heb. 11:8-13, 24-26, ÑÑB). Pablo heʼi koʼã Ñandejára rembiguái iñeʼẽrendúvare ojapo hague opa mbaʼe “ojerovia rupi”. Haʼekuéra ndojesarekói umi mbaʼe ijetuʼúva ohasávare, upéva rangue ohechakuaa Jehová ojapóva hesehapekuéra ha mbaʼépa ojapóta amo gotyove.

18. Mbaʼépa ñanepytyvõta jajehekýi hag̃ua ‘pe pekádo ñanemoñuhãsévagui’?

¹⁸ Ñamombareteséramo ñande jerovia jajehekýi hag̃ua ‘pe pekádo ñanemoñuhãsévagui’, tekotevẽ ñahesaʼỹijo umi ehémplo porãite jajuhúva Hebreos kapítulo 11-pe, ha ñañehaʼãmbaite ñahaʼanga umi kuimbaʼe ha kuña iñeʼẽrenduetévape (Heb. 12:1). Avei ñañembyatyvaʼerã ñane ermanokuéra ndive “jajoayhuve hag̃ua ha hetave mbaʼe iporãva jajapo hag̃ua” (Heb. 10:24).

19. Mbaʼérepa ndajahejaivaʼerã pe karréra?

¹⁹ Ñamohuʼãmbotaitéma ko karréra ha jahupytyʼíntema pe prémio. Jehová ningo ñanepytyvõ, ha jajerovia rupi hese ikatu jajapo Pablo heʼivaʼekue: ‘Jaipeʼa ñandejehegui opa mbaʼe ipohýiva, ha avei pe pekádo ñanemoñuhãséva’. Upéicha, ikatúta ñañani jahupyty hag̃uáicha pe prémio oprometéva ñandéve ñande Ruete ñanderayhuetéva.

[Nóta]

Mbaʼépa ñaaprende?

• Mbaʼépa heʼise ‘jaipeʼa ñandejehegui opa mbaʼe ipohýiva’?

• Mbaʼéicha rupípa peteĩ kristiáno ikatu ndojeroviavéi?

• Mbaʼérepa jajesareko meme vaʼerã pe prémiore?

[Porandu ñahesaʼỹijóva]

[Nóta oĩva taʼanga ndive páhina 23]

Mbaʼépa hína ‘pe pekádo ñanemoñuhãséva’, ha mbaʼéichapa ikatu ñandejoko?