‘Arpagitsi ajugaasup pisassaa pissarsiariniarlugu!’

“Arpagitsi pissarsiariniarlugu!” — 1 KORINTHIMIUT 9:24.

1, 2. (a) Paulusi kristumiut hebræeriusut nakussatsinniarlugit sua? (b) Guutimut kiffaasut qanoq oqaaqqissaarneqarpat?

APUSTILI PAULUSI kristumiut hebræeriusut nakussatsinniarlugit arpanneq pillugu assersuusiorpoq. Eqqaasippai inuunermut arpannerminni kisimiinngitsut. Itsaq ‘nalunaajaasut amerlasuut’ apuuffissaminnullusooq apuutereerput. Kristumiut hebræeriusut ‘nalunaajaasut’ taakkua uppernikkut suliaat sapinngisartillu tamaat iliuusii eqqaamajuarunikkit apuuffissamut apuunnissaminnik aalajangiusimannissapput.

² Allaaserisap matuma siuliani ‘nalunaajaasut amerlasuut’ taakkua ilaasa maligassiaat sammivavut. Taakkua Guutimut upperluarnertik inuunertik naallugu taassuminnga ilumoorfiginnittuarnissamut, arpaqataajuarnissamut, iluaqutigaat. Taakkua pisimanerattut uaguttaaq qanoq ililluta apuuffissamut apuussinnaavugut? Paulusi ima allappoq: “Nanertuisitsinnit tamanit ajortimillu uagutsinnik tigumminninniartumit [uagutsinnut nermutiasumit, NV] peerniarta, angusassamullu siunitsinniittumut arpannitsinni tamatumani nikallujuilluta.” — Hebræerit 12:1.

3. Paulusip grækerit timersorlutik unammiuaarneranni arpaliuttartut pillugit allagai sumik ilinniarfigisinnaavavut?

³ Paulusip suna pivaa allakkami ‘nanertuisitsinnit tamanit piissasugut’? Paulusip nalaani timersorluni unammiuaarnerni arpaliuttartut pillugit atuakkami Backgrounds of Early Christianity-mi allassimavoq “grækerit atisaqaratik  sungiusartarlutillu unammisartut”. * Ullumikkut taamatut arpattoqartuuppat immaqa ippigineqassagaluarpoq. Taamanikkulli arpaliuttartut atisaqaratik arpattarput ajugaasup pisassaata pinissaanut akornuteqarusunnginnamik. Taamaammat Paulusip una pivaa kristumiut hebræeriusut ajugaasup pisassaata, inuunerup naassaanngitsup, pissarsiarinissaanut inuunerminni akornutaasinnaasut suugaluartulluunniit piissagaat. Tamanna taamanikkut kristumiunut siunnersuutaavoq pitsaasoq, aamma uagutsinnut siunnersuutaalluarpoq. Uagut inuunitsinni ‘nanertuisutut’ ittut suut apuuffissatsinnut apuunnissamut akornutigisinnaavavut?

‘Nanertuisitsinnit tamanit peerniarta’

4. Noap nalaani inuit suut ulapputigaat?

⁴ Paulusi siunnersuivoq ‘nanertuisitsinnit tamanit piissasugut’. Nanertuisut tassaapput arpannitsinnik pingaarnerpaatitsilluinnarniarnitsinnut apuuffissamullu apuunniarluta sapinngisarput tamaat iliuuseqarniarnitsinnut akornutaasinnaasut suulluunniit. Taakkua ilaat suuppat? Noap nalaani pissutsit eqqartorlugit Jiisusi ima nassuiaavoq: “Soorlumi Noap ulluini ittoq, taamatuttaaq Inuup Ernerata ullussaani ikkumaarpoq.” (Lukasi 17:26) Jiisusip piuneerussinissarsuaq pingaarnerpaatillugu eqqartunngilaa; inuit inooriaasiat sammineruaa. (Atuakkit Matthæusi 24:37-39). Noap nalaani inuit amerlanersaat Guuti pillugu ilinniarusunngillat, aamma taassuma iluarisaanik inooriaaseqarusunngillat. Suut ulapputigaat? Inuunermi nalinginnaasunik suliaqarput — nerillutillu imerlutillu aappanittarput. Tamakku Guutip tusarliussaanik tusarnaarnissaminngarnit pingaarnerutippaat. Qanoq pisoqalernera ‘paasinngitsoorpaat’.

5. Arpannitsinni apuuffissamut apuunnissamut suna iluaqutigissavarput?

⁵ Noap taassumalu ilaqutaasa pisimanerattut uaguttaaq ullut tamaasa ulapputissarpassuaqartarpugut. Aningaasarsiorumalluta sulisariaqarpugut, aamma imminut isumagisariaqarpugut ilaquttavullu isumagisariaqarlugit. Tamakku piffissartornartupilussuullutillu nukippassuarnik atuinarsinnaapput. Aningaasatigut ajornartorsiuteqarutta inuunermi pisariaqartitatta qanoq pissarsiarinissaat isumakuluutigilersinnaavarput. Aamma kristumiutut tunniulluinnarsimagatta pingaarutilinnik allanik akisussaaffeqarpugut. Oqaluussisarpugut, ataatsimiinnernut piareersartarpugut ataatsimiigiartarlutalu, aamma ilaquttavut Biibilimik atuaqqissaaqatigisarpavut namminerlu atuaqqissaartarluta. Noa Guutimut kiffartornermi suliassarpassuaqaraluarluni “Guutip peqqusineratorluinnaq iliorpoq”. (1 Mosesi 6:22) Pingaaruteqartupilussuuvoq arpannitsinni apuuffissamut apuunnissatsinnut akornutaalersinnaasunik sunilluunniit nanertuuteqannginnissarput.

6, 7. Jiisusip oqaasii suut eqqaamajuartariaqarpavut?

⁶ Paulusip suna pivaa allakkami ‘nanertuisitsinnit tamanit’ piissasugut? Una pinngilaa akisussaaffivut tamaviisa akisussaaffigiunnaarniassagivut. Eqqarsaatigikkilli Jiisusip inuunermi pisariaqartitat pillugit oqaasii uku: “Isumakuluuteqassanngilasi ima aperalusi: Suna nerissavarput? Suna imissavarput imaluunniit suna atissavarput? Tamakku tamaasa Guutimik nalusut ujartarpaat, ataatassilu qilammiittup nalunngilaa tamakku tamaasa pisariaqartikkisi.” (Matthæusi 6:31, 32) Jiisusip paasitikkusuppaatigut inuunermi pisariaqartitaagaluilluunniit, soorlu nerisassat  atisallu, nanertuisutut naakkiuffissatulluunniit ilersinnaasut taakku inuunitsinni pingaarnerpaatikkutsigit.

⁷ Jiisusip oqaasii uku eqqaamajuakkit: “[Ataatassi] qilammiittup nalunngilaa tamakku tamaasa pisariaqartikkisi.” Tamatumannga erserpoq Ataatatta, Jehovap, pisariaqartitavut isumagiumaarai. Soorunami oqaatsini “tamakku tamaasa”-mi pineqanngillat uagut nammineq perusutavut kissaatigisavullu. Tassa peqquneqarpugut ‘Guutimik nalusut ujartagaannik’ isumakuluutiginneqqunata. Pisariaqartitanik isumakuluutiginninneq sooq taama navianartigaa? Jiisusi ima oqarpoq: “Mianersoritsi uummatisi malussarlersitaaqqunagit aalakoornermit [nerrersuallaarnermit, NV] imerajunnermillu inuunerullu matuma piinik isumakuluutinit, pakasarteqqunasi ullup taassuma tassanngaannaq tikiunneranit nigartuutitut illuni.” — Lukasi 21:34, 35.

8. Sooq ‘nanertuisitsinnit tamanit peernissatsinnut’ massakkut piffissaalluarpa?

⁸ Apuuffissarput takusinnaavarpullusooq. Taamaattumik apuuffissamut apuunnissatsinnut sunilluunniit akornuteqarusunngilagut. ‘Nanertuisitsinnit tamanit peertariaqarpugut’ pigisavullu naammagisariaqarlutigit. Taamaattumik Paulusip oqaasii uku tamatumunnga tunngatillugu naleqqulluarput: ‘Guutimik mianerinninneq naammagittarnermik ilaqartoq iluanaarnarpoq.’ (1 Timotheusi 6:6) Paulusip oqaasii pigiliukkutsigit arpannerput ajornannginnerutilissavarput naggataatigullu ajugaasup pisassaa pissallutigu.

‘Ajorti uagutsinnut nermutiasoq’

9, 10. (a) Oqariartaaseq ‘ajorti uagutsinnut nermutiasoq’ sumut tunngassuteqarpa? (b) Qanoq nermuffigitissinnaavugut?

⁹ Paulusip peertariaqakkatsinnik allamik eqqaasaqarpoq. Allappoq ‘ajortimit uagutsinnut nermutiasumit’ piissasugut. Oqariartaaseq grækerisooq matumani ‘uagutsinnut nermutiasoq’-mik nutserneqarsimasoq Biibilimi ataasiaannarluni, versimi tamatumani, atorneqarsimavoq. Biibilimik ilisimatooq, Albert Barnes, allappoq taamanikkut arpaliuttartoq niuminut nermussinnaasunik arpannerminilu akornutigisinnaasaminik atisaqarnaveersaartartoq. Aamma allappoq taamatuttaaq kristumiu arpannermini sunilluunniit akornuteqarnaveersaartariaqartoq. Kristumiu nermuffigitinnaveersaartariaqarpoq, tassa uppernikkut sanngiillinaveersaartariaqarpoq imaluunniit allaat upperunnaarnaveersaartariaqarpoq. Kristumiu qanoq ililluni upperunnaarsinnaagami?

¹⁰ Kristumiu upperunnaariasaarneq ajorpoq. Allaat malunnanngitsumik upperunnaariartuaartoqarsinnaavoq. Kristumiunut hebræeriusunut allakkami aallaqqaataatungaani Paulusip taakku tamanna pillugu mianersoqquai qimagukkiartoqqunagit aamma ajortumik uppinngitsumillu uummateqaleqqunagit. (Hebræerit 2:1; 3:12) Atisat arpaliuttartup niuinut nermuppata arpaliuttartoq orlussaaq. Arpaliuttartoq arpannermi atisarineqartussanik atisaqarusunngikkuni atisaminit nermuffigiteriaannaanerussaaq. Arpaliuttartup mianersunnginneranut suut pissutaasinnaappat? Immaqa soqutigisaqanngitsuuvoq, tassa mianersoqquneqarnerminik eqqumaffiginninneq ajorpoq. Immaqa imminut tatigivallaarpoq, tassa nukittusorigami orlusinnaasorinngilaq. Immaqaluunniit allamut saasaateqarpoq, tassa allarpassuarnik eqqarsaateqarpoq. Paulusip mianersoqqussutai sumik ilinniarfigisinnaavavut?

11. Suut upperunnaassutigisinnaavavut?

¹¹ Eqqaamasariaqarparput kristumiup upperunnaarnera taassuma aalajangigaanik pissuteqartartoq. ‘Ajortimut uagutsinnut nermutiasumut’ tunngatillugu Biibilimik ilisimatooq alla nassuiaavoq pissutsit atukkavut, inuit peqatigisartakkavut kissaatigisapiluvullu uagutsinnut sunniuteqangaarsinnaasut. Tamakku uppernitsinnik sanngiillisitsisinnaapput allaallu uagutsinnik upperunnaarsitsisinnaallutik. — Matthæusi 13:3-9.

12. Upperunnaarumanngikkutta mianersoqqussutit suut eqqumaffigisariaqarpavut?

¹² Inussiap aalajaallunilu silatuup eqqaasikkajuppaatigut isiginnaakkatsinnik tusarnaakkatsinnillu mianersuutiginnittaqqulluta taakku eqqarsartaatsitsinnut kissaatigisatsinnullu sunniuteqartarmata. Aamma aningaasanik pigisanillu noqqaassutiginninneq pillugu mianersoqqusarpaatigut. Silarsuarmi matumani aliikkutassanik nuannarinninnerput atortorissaarutinullu elektroniskiusunut nutaalianut tunngatillugu  malinnaarusunnerput allamut saasaatigisinnaavavut. Mianersoqqussutit taakku ingasagalugit tusaarusunngikkaani navianartorsiortoqalersinnaavoq. Aamma eqqarsassanngilagut uppernikkut nukittugatta mianersoqqussutit taakku uagutsinnut naatsorsuussaanngitsut. Saatanip silarsuarmi eqqarsartaaserineqartut pilerigineqartullu atorlugit mianersoqqussutinik sumiginnaasinniartarpaatigut. Apuuffissamut apuunnissarput kissaatiginngilaa. Inuit ilaat upperunnaarsimapput soqutigisaarussimagamik, imminut tatigivallaalersimagamik imaluunniit silarsuarmiittut allamut saasaatigisimagamikkit. Uagut taamaaligutta inuunermik akissarsiassap pinissaa neriuutigiunnaaratarsinnaavarput. — 1 Johannesi 2:15-17.

13. Inuit silarsuarmiittut eqqarsartaasiattut eqqarsartaaseqalerumanata susariaqarpugut?

¹³ Inuit Saatanip silarsuaaniittut ullut tamaviisa immissut eqqarsalersinniartarpaatigut. Pingaartitaminnik pingaartitsilersikkusuppaatigut iliuuserisartakkaminnillu iliuuseqartalersikkusulluta. (Atuakkit Efesosimiut 2:1, 2). Namminerli aalajangersinnaavugut silarsuarmi eqqarsartaaserineqartumit sunnertikkusunnerluta. Silaannaq, inuit silarsuarmiittut eqqarsartaasiat, Paulusip eqqartugaa toqunartoqarpoq. Soorlu silaannarmik toqunartulimmik najuussuerusunnavianngitsugut, taamatuttaaq inuit silarsuarmiittut eqqarsartaasiat uagut eqqarsartaatsitsinnut sunniuteqartikkusunnavianngilarput. Arpaqataajuarnissamut suna iluaqutigisinnaavarput? Jiisusip maligassiaa. Taanna arpannermi siuttuuvorlusooq, taannalu ilaarsinnaavarput. (Hebræerit 12:2) Aamma apustili Paulusi maligassiuivoq. Taanna arpaqataavoq, qatanngutinilu kajumissaarpai maligassiaminik malinneqqullugit. — 1 Korinthimiut 11:1; Filippimiut 3:14.

Ajugaasup pisassaa qanoq ilillutit ‘pissarsiarisinnaaviuk’?

14. Paulusip apuuffissamut apuunnissani qanoq pingaartitsigaa?

¹⁴ Paulusip apuuffissamut apuunnissani qanoq pingaartitsigaa? Utoqqaanertat Efesosimiittut naggammik oqaloqatigigamigit ima oqarfigai: “[Uanga] nammineq inuunera pingaartinngilara naammagalugu naammassisinnaagukkit arpannera kiffartuullu Naalakkamit Jiisusimit pisara.” (Apustilit Suliaat 20:24) Tassa Paulusi sunilluunniit, allaat inuunerminik, annaasaqarumavoq arpannini  naammassiumallugu. Paulusi nutaarsiassaq nuannersoq oqaluussissutigiumallugu tamaviaarpoq. Allapporli apuuffissaminut apuutinngikkuni asuliinnaq tamaviaassalluni. Nalunngilaa arpannini naammassiumallugu ilungersortuartariaqarluni. Imminut ima tatigitiginngilaq eqqarsarluni ajugaasup pisassaa pereersimallugu. (Atuakkit Filippimiut 3:12, 13). Toqungajalerlunili ima oqarsinnaasimavoq: “Ajunngitsoq sorsuutigisimavara, arpaffissaq naavara upperneralu attatiinnarlugu.” — 2 Timotheusi 4:7.

15. Paulusip qatanngutini soqqullugit kajumissaarpai?

¹⁵ Paulusip qatanngutimi arpannerminnik naammassinninnissaat kissaatigaa. Assersuutigalugu kristumiut Filippimiittut kajumissaarpai annaanneqarnissartik pillugu tamaviaaqqullugit. Eqqaasippai ‘oqaatsimik inuuneqaataasumik aalajangiussisariaqartut’. Nangilluni allappoq taamaaliornissaat pingaaruteqartoq qiimmattaatigisinnaaniassagamiuk ‘asuliinnaq arpassimannginnini asuliinnarluunniit assoroorsimannginnini’. (Filippimiut 2:16) Aamma kristumiut Korinthimiittut ajugaasup pisassaanik piumallutik arpattuaqqullugit ima kajumissaarpai: “Arpagitsi pissarsiariniarlugu!” — 1 Korinthimiut 9:24.

16. Sooq apuuffissaq, imaluunniit ajugaasup pisassaa, piviusutut isigisariaqarparput?

¹⁶ Sivisuumik arpannermi arpaliuttartup apuuffissaq aatsaat apuutingajaleraangami takusinnaasarpaa. Apuuffissarli eqqarsaatigiuartarpaa nalunerlu ajorlugu qanilliartuinnarlugu. Qanilliartuinnartillugulu apuunnissani suli aalajangiusimanerulertarpaa. Kristumiut arpannerat tamatumunnga assinguvoq. Apuuffissaq, imaluunniit ajugaasup pisassaa, piviusutut isigisariaqarparput. Tamanna apuunnissatsinnut, imaluunniit ajugaasup pisassaata pissarsiarinissaanut, iluaqutigissavarput.

17. Ajugaasup pisassaata piviusutut isiginissaanut upperneq qanoq iluaqutaassava?

¹⁷ Paulusi ima allappoq: “Upperneq tassaavoq neriugisamik tatiginnilluinnarneq, takunngisamik qularuteqannginneq.” (Hebræerit 11:1) Aaperaat Saralu angerlarsimaffimminnik ilorrisimaarnartumik qimatsinissaminnut ‘nunamilu takornartatut allamiutullu’ inuulernissaminnut piumassuseqarput. Qanoq ilillutik taamaaliorsinnaasimappat? Guutip imminnut neriorsuutigisimasai piviusutut isigaat. “Eqquunnissaat . . . ungasianit takusinnaasimavaat.” Mosesi ‘sivikitsuinnarmik ajortimi inuulluataarnissamik’ ‘Egyptenillu erlinnartuutaanik’ itigartitsivoq. Taamaaliornissaminut suna uppissuseqalissutigalugulu nukissaqalissutigaa? Akissarsinissani qilanaaralugu utaqqiuarnini. (Hebræerit 11:8-13, 24-26) Paulusi allappoq inuit taakku tamarmik immikkut “uppernikkut” iliuuseqartut. Upperluartuugamik ajugaasup pisassaa piviusutut isigiuarpaat. Aamma upperluartuugamik misilinneqarnerminnut ajornartorsiornerminnullu pissutaasunik paasinnipput. Nalunngilaat Guutimit ikiorneqarlutik aamma taassuma siunissaq pillugu neriorsuutai eqquukkumaartut.

18. ‘Ajorti uagutsinnut nermutiasoq’ peerumallugu susarsinnaavugut?

¹⁸ Angutit arnallu aalajaatsut Hebræerit kapitali 11-mi eqqaaneqartut eqqarsaatigeqqissaarnerisigut maligassiaannillu ilaarsinitsigut uppernerput ineriartortissinnaavarput ‘ajortilu uagutsinnut nermutiasoq’ peerlugu. (Hebræerit 12:1) Aamma ‘immitsinnut isumageqatigiilluta asaqatigiinnermut ajunngitsuliornermullu kajumissaaqatigiittarsinnaavugut’ inuit uppernerminnik ineriartortitsisut ataatsimiinnernut najuuteqatigisarnerisigut. — Hebræerit 10:24.

19. Massakkut arpaqataajuarnissaq sooq pingaaruteqarpa?

¹⁹ Apuuffissatsinnut apuutingajalerpugut, apuuffissarpullu takusinnaavarpullusooq. Upperluartuunitsigut Jehovallu ikiuineratigut ‘nanertuisitsinnit tamanit ajortimillu uagutsinnut nermutiasumit peersinnaavugut’. Arpaqataajuarsinnaavugut ajugaasullu pisassaa Ataatatta, Jehovap, uagutsinnut neriorsuutigisaa pissarsiaralugu.

[Quppernerup ataani ilanngussaq]

Eqqaamavigit?

• “Nanertuisitsinnit tamanit” qanoq ililluta peersinnaavugut?

• Kristumiup suut upperunnaassutigisinnaavai?

• Sooq ajugaasup pisassaa piviusutut isigisariaqarparput?

[Atuaqqissaarnermi apeqqutit]

[Assiliartaq 26-mi assiliartaq]

‘Ajorti uagutsinnut nermutiasoq’ suua, qanorlu ililluta tamatumannga nermuffigitissinnaavugut?