Kate Eok Ettõr bwe Kwõn Bõk Wiin Eo
Kate Eok Ettõr bwe Kwõn Bõk Wiin Eo
“Komin kate kom [ettõr], bwe komin bõk win eo.”—1 KORINT 9:24, UBS.
1, 2. (1) Ta waanjoñak eo Paul ear kõjerbale ñan rõjañ ri Hibru ro? (2) Ta eo Paul ear ba bwe jej aikuj kõm̦m̦ane?
RIJJELÕK PAUL ear kõjerbale waanjoñak eo kõn juon iãekwõj ñan rõjañ ri Hibru ro. Ke ear jeje ñan er, ear ba bwe rej ãinwõt ri ettõr ro ilo iãekwõj eo ak rar jab make iaaer ilo iãekwõj eo. Elõñ ri karejar ro an Jeova ilo iien ko etto im em̦õj aer kajem̦l̦o̦ke iãekwõj eo. Paul ear ba bwe joñan an rein lõñ rej ãinwõt juon “kõdo̦ el̦ap” im rej kaapool̦e er. El̦aññe ri Hibru ro rar keememej wõt tõmak eo an rein kab jerbal ko aer, men in emaroñ jipañ er ñan kajem̦l̦o̦k iãekwõj eo.
2 Ilo katak eo l̦o̦k, jaar etale waanjoñak ko an jet iaan ri karejar ro an Jeova jãn etto. Kõnke ear kajoor tõmak eo aer, rar maroñ tiljek wõt ñan Anij m̦ae iien eo rar mej. Rar ettõr wõt ilo iãekwõj eo ñan jem̦l̦o̦kin. Ewi wãween bwe jen maroñ kajem̦l̦o̦ke iãekwõj eo ãinwõt kar rein? Paul ear ba: “Jen jolok menin kabañ otemjej kab jerawiwi eo ej drebij kij, im jen kijenmij im ettõr ilo iaekwoj eo ej bed imad.”—Hibru 12:1, UBS.
3. Ta eo Kũrjin ro remaroñ katak jãn naan ko an Paul kõn ri ettõr ro jem̦aan?
3 Etke Paul ear ba jen “jolok menin kabañ otemjej”? Juon bok im ej kõmel̦el̦e kõn mour eo an Kũrjin ro ilo raan ko an Paul, ej kwal̦o̦k ekõjkan an ri ettõr ro jem̦aan kõn iãekwõj. Ej ba: “Ri Grik ro rekõn m̦añke im ettõr.” Ãinwõt juon men ekabwiloklok mej. Bõtab, unin an ri ettõr ro jab nuknuk im ettõr ej kõnke rar jab kõn̦aan bwe jabdewõt men en kapañ aer ettõr bwe ren wiin. Innem, ke Paul ear jiroñ ri Hibru ro ñan “jolok menin kabañ otemjej,” ear ba bwe ren jol̦o̦k jabdewõt men jãn mour ko aer me emaroñ kapañ ak kabõjrak aer bõk mour indeeo. Ear juon naan in kakapilõk ekanooj em̦m̦an ñan ri Hibru ro im el̦ap an em̦m̦an ñan kõj ilo raan kein. Ta ko ilo mour ko ad im remaroñ “menin kabañ” ñan kõj im kõm̦m̦an bwe en pen ad iãekwõj ñan jem̦l̦o̦kin?
“Jolok Menin Kabañ Otemjej”
4. Ta eo armej ro ilo raan ko an Noa rar m̦ad kake?
4 Paul ear ba bwe jen “jolok menin kabañ otemjej.” Men in ej kitibuj jabdewõt men remaroñ kam̦ad kõj im kabõjrak kõj jãn ad kate im kajem̦l̦o̦k iãekwõj eo. Ta jet iaan men kein? Jijej ear kwal̦o̦k jet iaaer. Ear kwal̦o̦k kõn raan ko an Noa, eo im ej juon iaan waanjoñak ko Paul ear kõnono kake. Jijej ear ba: “Im ãinwõt ilo raan ko an Noa, enaaj ãindein barãinwõt ilo raan ko an Nejin armej.” (Luk 17:26) Em̦ool men in kõnke m̦õttan jidik naaj ko̦kkure jukjuk im pãd in ãinwõt kar ilo raan ko an Noa. Bõtab, Jijej ear ba bwe mour ilo raan kein enaaj ãinl̦o̦k wõt mour eo an armej ro m̦okta jãn an kar ibwijleplep eo itok. (Riit Matu 24:37-39, UBS.) Enañin aolep armej ro ilo raan ko an Noa rar m̦akoko in jel̦a kõn Anij. Im rar jab kõn̦aan kabuñbũruon. Ak ta eo armej rein rar m̦ad kaki? Rar m̦õñã im idaak im pãlele. Ejjab nana men kein. Bõtab el̦apl̦o̦k aer kar kaorõke men kein jãn aer roñjake naan eo an Jeova.
5. Ta eo emaroñ jipañ kõj ñan kajem̦l̦o̦ke iãekwõj eo?
5 Ãinwõt kar Noa im baam̦le eo an, el̦ap ad poub aolep raan. Jej aikuj jerbal bwe jen maroñ kõke aikuj ko ad im an eo pãleed kab ajri ro nejid. Men in emaroñ kamaat iien ko ad im bõk kajoor eo ad. Jet iien jemaroñ inepata kõn an jabwe jããn ñan kõke aikuj ko ad. El̦aññe em̦õj ad ajel̦o̦k mour ko ad ñan Jeova, ebar wõr men ko jej aikuj kõm̦m̦ani. Jej aikuj kwal̦o̦k naan im kapojak ñan aolep kweilo̦k, katak Baibõl̦ ippãd make im bareinwõt ippãn eo pãleed kab ajri ro nejid. Noa ear bar poub ak ear kõm̦m̦ani men ko otemjej Jeova ear jiroñ e bwe en kõm̦m̦ani. (Jenesis 6:22) Jej l̦oor ke joñak eo an Noa? Ak jej ke baj kõm̦m̦ane wõt enañin aolep men ko Jeova ej ba? El̦aññe jekõn̦aan kõm̦m̦ani aolep men ko Jeova ej kajjitõk bwe jen kõm̦m̦ani im kajem̦l̦o̦ke iãekwõj eo, elukkuun aorõk bwe jen jol̦o̦k aolep men ko renaaj kõm̦m̦an bwe en pen ad iãekwõj ñan jem̦l̦o̦kin.
6, 7. Ta eo Jijej ear ba im jej aikuj keememeje iien otemjej?
6 Ta mel̦el̦ein naan ko an Paul ke ear ba jen “jolok menin kabañ otemjej”? Eokwe, ear jab ba bwe jen jol̦o̦k aolep jerbal ko ad kõnke jet iaaer rekanooj aorõk ñan kõke aikuj ko ad. Ak jen keememej naan ko an Jijej ke ear kõnono kõn aikuj ko ad. Ear ba: “Innãm kom̦win jab inepata bũruemi im ba, ‘Ta je naaj m̦õñã?’ Ak ‘ta je naaj idaak?’ Ak ‘ta eo jenaaj kõn̦ake?’ Bwe ro ri aelõñ ko rej pukot men kein otemjej; bwe Jememwõj i lañ E jel̦ã ami aikuj men kein otemjej.” (Matu 6:31, 32) Jijej ear ba bwe men ko jej aikuji ãinwõt m̦õñã im nuknuk, remaroñ bareinwõt menin kapañ kõj el̦aññe ej l̦e jãn joñan ad inepata kaki. Men kein remaroñ kabõjrak kõj jãn ad ettõr ilo iãekwõj eo.
7 Jen jab mel̦o̦kl̦o̦k naan kein an Jijej. Ear ba: “Jememwõj i lañ E jel̦ã ami aikuj men kein otemjej.” Naan kein rej kwal̦o̦k bwe Jemed ilañ, Jeova, enaaj kõke aikuj ko ad. Alikkar bwe ejjab mel̦el̦ein bwe enaaj kõke aolep men ko jekõn̦aan. Ak Jijej ear ba jen jab inepata kõn men ko jej aikuji. Etke? Kõnke jen jab ãinwõt ri aelõñ ko me rej “pukot men kein otemjej.” Etke ekauwõtata ñe etarjen joñan ad inepata kõn aikuj ko ad? Jijej ear ba: “Komin kejbarok kom! Komin jab kamad kom kin ien mõñã ko rellab im drennin kadrek ko rekajur, im kin inebata ko an mour in, ñe Ran eo eab walokwõj ilo jidrimkij. Kinke enaj itok einwõt aujid.”—Luk 21:34, 35, UBS.
8. Etke jej aikuj “jolok menin kapañ otemjej” kiiõ?
8 M̦õttan jidik jetõpar jem̦l̦o̦kin iãekwõj eo. Joñan ad lukkuun epaak ej ãinwõt ñe jej loe kakõl̦l̦e eo kõn jem̦l̦o̦kin. Eñin unin jej aikuj jol̦o̦k menin kapañ otemjej bwe en jab pen ad kajem̦l̦o̦ke iãekwõj eo. Jej aikuj jokwane wõt kõn men ko ewõr ippãd. Eñin kar naan in kakapilõk eo an Paul ke ear ba bwe jen jokwane wõt im kabuñ ñan Jeova kõn aolepen bũruod. (1 Timote 6:6) Innem, el̦aññe jej kate kõj l̦oor naan kein an Paul, enaaj pidodol̦o̦k ad ettõr ilo iãekwõj eo im bõk mour indeeo.
“Jerawiwi eo Ej Drebij Kij”
9, 10. (1) Ta “jerawiwi eo me ej drebij kij”? (2) Ta eo emaroñ wal̦o̦k ñan tõmak eo an juon Kũrjin?
9 Paul ear kwal̦o̦k bar juon me jej aikuj jol̦o̦ke. Ear ba bwe jej aikuj jol̦o̦ke “jerawiwi eo ej drebij kij.” Ta in? Ej ñe ejako ad tõmak. Naan in Grik eo me ej ukote naan in “drebij kij” ej wal̦o̦k juon wõt alen ilo Baibõl̦, ilo eoon in wõt. Ekkar ñan Albert Barnes, juon eo etijem̦l̦o̦k ilo Baibõl̦ eo, ej ba bwe ri iãekwõj ro etto rekõn wutik aolep nuknuk ko aer im ettõr. Unin ej kõnke nuknuk ko renaaj kapañ er ilo aer ettõr ilo iãekwõj eo. Im ear ba bwe ilo ejja wãween in wõt, juon Kũrjin ejjab aikuj kõtl̦o̦k bwe jabdewõt men en kam̦õjn̦o̦iki tõmak eo an. Ta eo emaroñ kõm̦m̦an bwe juon Kũrjin en jako an tõmak?
10 Juon Kũrjin ejjab kajju jako an tõmak ilo jidimkij. Bõlen jidik kõn jidik men in emaroñ wal̦o̦k. Im armej eo emaroñ jab kile ke ej jino m̦õjn̦o̦l̦o̦k tõmak eo an. M̦oktal̦o̦k, rijjelõk Paul ear jejel̦o̦k ñan ri Hibru ro im kakkõl er kõn kauwõtata in. Ear ba ren kõjparok bwe ren jab “jebwãbwe” jãn tõmak im ren jab kaddek juon “bõro e nana im jab tõmak.” (Hibru 2:1, UBS; 3:12) El̦aññe nuknuk ko an juon ri ettõr rej l̦orak ilo neen, innem ekkã an tipjek. Eñin unin juon ri ettõr ej aikuj lale bwe ñe ebõd an kããlõte nuknuk eo ej kõn̦ake im ettõr kake enaaj tipjek. Ta eo emaroñ kõm̦m̦an bwe juon ri ettõr en kõjekdo̦o̦ne men in ekauwõtata? Bõlen ejjab kea im ejjab lukkuun roñjake ñe juon ej lel̦o̦k naan in ñan kakkõl e. Bõlen el̦ap an lõke e make, im ej ba bwe ekajoor im eban buñ jãn tõmak. Ak bõlen ej m̦ad ak poub kõn an l̦õmn̦ak kõn men ko jet. Ta eo jemaroñ katak jãn naan in rõjañ kein an Paul?
11. Ta eo emaroñ kõm̦m̦an bwe en jako tõmak eo ad?
11 Jej aikuj keememej bwe ñe juon Kũrjin ej luuji tõmak eo an ej itok wõt jãn pepe ko ej kõm̦m̦ani. Bar juon eo etijemlok kõn Baibõl̦ eo ej bar kõmel̦el̦e kõn “jerawiwi eo ej debij kij.” Ej ba bwe wãween ko jej iioni, armej ro jej aetõl ad ippãer, im kõn̦aan ko rejakkar, remaroñ lukkuun anjo̦ iood. Men kein remaroñ kam̦õjn̦o̦ik tõmak eo ad ak kõm̦m̦an bwe en jako ad tõmak.—Matu 13:3-9.
12. El̦aññe jejjab kõn̦aan buñ jãn tõmak, ta naan in kakkõl ko jej aikuj pokaki?
12 Ri karejar eo etiljek im mãlõtlõt ekkã an kakkõl kõj ñan etale men ko jej alwõji im roñjaki. Etke? Kõnke men kein rej jelõt wãween ad l̦õmn̦ak im kõn̦aan ko ad. Ej bareinwõt kakkõl kõj kõn kauwõtata eo ñan arõk m̦ani im em̦m̦weiukuk. El̦aññe jej yokwe menin kam̦õn̦õn̦õ ko an lal̦ in ak kõn̦aan wiaiki men ko rekããltata, jemaroñ m̦ad kõn men kein. Im remaroñ kadikl̦o̦k ad iien ñan kõm̦m̦ani men ko raorõkl̦o̦k. Emaroñ juon men ekauwõtata ñan kõjekdo̦o̦n naan in kakkõl kein im l̦õmn̦ak bwe el̦ap an pen ñan l̦oori. Innem jen jab l̦õmn̦ak bwe ekajoor tõmak eo ad im ba bwe naan kein rej ñan ro jet im rejjab jerbal ñan kõj. Setan ej kõjerbal l̦õmn̦ak im kõn̦aan ko an lal̦ in ñan kõm̦m̦an bwe jen kõjekdo̦o̦n naan in kakkõl ko. Ejjab kõn̦aan bwe jen kam̦õje iãekwõj eo. Jet rar buñ jãn tõmak kõnke rejjab kea im kõjparok, rej lõke er make, ak m̦ad kõn men ko an lal̦ in. El̦aññe men in ej wal̦o̦k ñan kõj, jepãd ilo kauwõtata im jemaroñ luuji mour indeeo.—1 Jon 2:15-17.
13. Ta eo jej aikuj kõm̦m̦ane bwe jen jab bõk l̦õmn̦ak ko an armej in lal̦ in?
13 Raan otemjej armej ro ilo lal̦ eo an Setan rej kajjioñ in kõm̦m̦an bwe jen bõk l̦õmn̦ak ko aer. Rekõn̦aan bwe jen kaorõk men ko rej bar kaorõki. Im rekõn̦aan bwe jen kõm̦m̦ani ejja men ko wõt rej kõm̦m̦ani. (Epesõs 2:1, 2) Bõtab, kããlõt eo epãd ippãd. Jemaroñ kããlõt ñan kõtl̦o̦k bwe l̦õmn̦ak ko an lal̦ in ren anjo̦ iood. Paul ear ba bwe l̦õmn̦ak ko an lal̦ in ej ãinwõt mejatoto eo ej kaapool̦e kõj. Ak l̦õmn̦ak rot in ej ãinwõt mejatoto eo ebaijin. Innem ãinwõt ad ban menonoiki mejatoto eo ebaijin, jeban kõtl̦o̦k bwe l̦õmn̦ak ko an armej in lal̦ in ren anjo̦ ioon l̦õmn̦ak ko ad. Ta eo enaaj jipañ kõj bwe jen ettõr wõt ilo iãekwõj eo? Waanjoñak eo an Jijej emaroñ jipañ kõj. Ej joñak eo em̦m̦antata kõn an kar ettõr wõt ñan jem̦l̦o̦kin iãekwõj eo. Kõn men in jemaroñ anõke. (Hibru 12:2) Bareinwõt joñak eo an rijjelõk Paul emaroñ jipañ kõj. Ear kajem̦l̦o̦ke iãekwõj eo. Im ear rõjañ ro jein im jatin ilo tõmak bwe ren anõke joñak eo an.—1 Korint 11:1; Pilippai 3:14, UBS.
Wãween bwe “Kom̦win Bõk” Wiin Eo
14. Ewi joñan an aorõk ippãn Paul bwe en kar kajem̦l̦o̦ke iãekwõj eo?
14 Ewi joñan an aorõk ippãn Paul bwe en kar kajem̦l̦o̦ke iãekwõj eo? Ilo naan ko an ãliktata ñan Kũrjin m̦aan ro ilo Epesõs, ear ba: “A ij l̦õmn̦ak aõ mour men in jekdo̦o̦n im jab aorõk ippa, bwe in kam̦õjl̦o̦k ial̦ eo aõ, im jerbal eo iar bõk jãn Irooj Jisõs.” (Jerbal 20:24) Innem Paul ear m̦õn̦õn̦õ in kaarmejjeteik men otemjej, ekoba mour eo an bwe en kajem̦l̦o̦ke iãekwõj eo. Paul ear kate joñan wõt an maroñ im kwal̦o̦k kõn nuuj eo em̦m̦an. Ak ear ba bwe aolepen kakkõt ko an renaaj kar ejjel̦o̦k tokjãer el̦aññe ear jab kajem̦l̦o̦ke iãekwõj eo. Ear jel̦ã bwe ear aikuj jab bõjrak an kate wõt ñan jem̦l̦o̦kin. Ear jab lõke e make im l̦õmn̦ak bwe em̦õj kadede an bõk wiin eo. (Riit Pilippai 3:12, 13, UBS.) Mekarta, m̦okta wõt jãn an kar mej, ear ba naan kein: “Iar tarin̦ae tarin̦ae em̦m̦an, iar kam̦õjl̦o̦k iãekwõj eo aõ, iar dãpij tõmak eo.”—2 Timote 4:7.
15. Ta eo Paul ear rõjañ ro jein im jatin ilo tõmak bwe ren kõm̦m̦ane?
15 Paul ear kõn̦aan bwe ro jein im jatin ilo tõmak ren kajem̦l̦o̦ke iãekwõj eo. Ear rõjañ Kũrjin ro ilo Pilippai bwe ren kamaat aer maroñ ñan bõk lo̦mo̦o̦r. Ear kakeememej er bwe ren “dãpije naan in mour.” Ear bareinwõt jiroñ er unin elukkuun aorõk men in ñan e. Ear ba: “Bwe en wõr aõ men in kõmmejãje m̦ae raan an Kraist, bwe iar jab ettõr kõn jekdo̦o̦n, ak jerbal kõn jekdo̦o̦n.” (Pilippai 2:16) Ear bar rõjañ Kũrjin ro ilo Korint bwe ren ettõr ñan jem̦l̦o̦kin im bõk tũb eo. Ear ba: “Komin kate kom [ettõr], bwe komin bõk win eo.”—1 Korint 9:24, UBS.
16. Etke jen watõk kawiinin eo ãinwõt juon men eo em̦ool im jemaroñ tõpare?
16 Juon ri ettõr eo ej ettõr ilo iãekwõj eo eaitok ejjab lo jem̦l̦o̦kin ijo renaaj bõjrak ie m̦ae iien etõpare. Bõtab, ej an̦to̦o̦nel̦o̦k jem̦l̦o̦kin im ejel̦ã bwe ej epaaktok. Im ñe ejel̦ã bwe epaaktok jem̦l̦o̦kin iãekwõj eo el̦apl̦o̦k an kakkõt bwe en tõprak. Ãindein iãekwõj in me Kũrjin ro rej ettõr ie. Kawiinin eo ej aikuj lukkuun juon men eo em̦ool im jemaroñ tõpare. Men in enaaj jipañ kõj ñan jek ilo bũruod ñan kajem̦l̦o̦ke iãekwõj eo bwe jen bõk wiin eo.
17. Ewi wãween tõmak emaroñ kõm̦m̦an bwe jinõkjej ak kawiinin eo en juon men eo em̦ool im jemaroñ tõpare?
17 Paul ear je: “A tõmak ej ãinwõt lõke kõn men ko jej kõjatdikdik kõj kaki, im reel bũruod kõn men ko je jab loi.” (Hibru 11:1) Ebream im Sera rar m̦õn̦õn̦õ in ilo̦k jãn ijo jikier em̦m̦an im mour ãinwõt “ruwamãejet im ri itoitak ioon lal̦.” Ewi wãween aer kar maroñ kõm̦m̦ane men in? Aolep men ko Anij ear kallim̦ur ñan er kaki rar lukkuun tõmaki bwe rem̦ool. Rar “loi jãn ettol̦o̦k.” Moses ear kõjekdo̦o̦n “m̦õn̦õn̦õ ko an jerawiwi me rej ñan jidik wõt iien” im “m̦weiuk otemjej ilo Ijipt.” Ekõjkan an kar wõr tõmak rot in ippãn im kajoor ñan kõm̦m̦ane men in? Ear “l̦õmn̦ak kõn jinõkjej eo.” (Hibru 11:8-13, 24-26) Paul ear ba bwe kajjojo iaan rein rar jerbal “kõn tõmak.” Ear kajoor tõmak eo aer. Kõn men in, jinõkjej ak kawiinin eo ear jab juon men bajjek ñan er. Rar jab kõtl̦o̦k bwe apañ ko reppen ren kõm̦m̦an aer mel̦o̦kl̦o̦ke jinõkjej eo. Rar jel̦ã bwe Anij ear jipañ er, im rar jel̦ã bwe kallim̦ur ko an kõn raan ko im̦aaer renaaj jejjet kitieer.
18. Ta eo jej aikuj kõm̦m̦ane bwe jen maroñ kajem̦l̦o̦ke iãekwõj eo?
18 Jemaroñ kõl̦mãnl̦o̦kjen̦ kõn m̦aan im kõrã ro retiljek ilo Hibru jebta 11, im jemaroñ anõke joñak ko aer. Men in emaroñ jipañ kakajoorl̦o̦k tõmak eo ad im jol̦o̦k “jerawiwi eo ej drebij kij.” (Hibru 12:1, UBS) Bareinwõt ilo ad kweilo̦k ippãn ro jeid im jatid me rej kajjioñ in kakajoor tõmak eo aer make, jemaroñ “rõjañ doon ñan yokwe im jerbal ko rem̦m̦an.”—Hibru 10:24.
19. Etke eaorõk bwe jen ettõr wõt ilo iãekwõj eo kiiõ kiiõ?
19 Jej epaakel̦o̦k jem̦l̦o̦kin iãekwõj in ad, im ej ãinwõt ñe jemaroñ loe ijo aolep ri ettõr rej bõjrak ie. Kõnke Jeova enaaj jipañ kõj im kõnke ekajoor tõmak eo ad, jemaroñ jol̦o̦k “menin kabañ otemjej kab jerawiwi eo ej drebij kij.” Jemaroñ ettõr wõt im bõk wiin eo me Jemed, Jeova ej kallim̦uri kõj kake.
Kwõj Keememej Ke?
• Ewi wãween jemaroñ jol̦o̦k “menin kabañ otemjej”?
• Ta eo emaroñ kõm̦m̦an bwe juon Kũrjin en jako an tõmak?
• Etke jinõkjej ak kawiinin eo ej aikuj juon men eo em̦ool im jemaroñ tõpare?
[Kajitõk ko ñan katak]
[Pija ilo peij 23]
Ta “jerawiwi eo ej drebij kij”? Ewi wãween men in emaroñ wal̦o̦k ñan kõj?
