“Ombatik Kayo ta Pian Naawat Yo Itan”

“Ombatik kayo ta pian naawat yo itan.”​—1 COR. 9:24.

1, 2. (a) Antoy inusar nen Pablo diad impamaseseg tod saray Hebreon Kristiano? (b) Antoy imbaga nen Pablo a kaukolan tayon gawaen?

DIAD samay sulat nen apostol Pablo ed saray Hebreon Kristiano, sikatoy angusar na ilustrasyon pian napaseseg ira. Inkuan ton singa ra ombabatik ed sakey a lumba. Balet, impanonot tod sikara ya agda bukbukor ed sayan lumba parad bilay. Walay akapaliber ed sikaran “baleg a grupo na saray tasi” ya akasumpal lad sayan lumba. No nodnonoten na saray Hebreon Kristiano so pananisia tan impasyan sagpot na sarayan lingkor nensaman, napaseseg iran mantultuloy pian sumpalen so lumba.

² Diad imbeneg ya artikulo, inaral tayoy bilay na pigara ed saray kabiangan na “grupo na saray tasi.” Impatnag da so agnagiing a pananisia a tinmulong ed sikaran mansiansian matoor ed Dios, tan nanggunaetan dan nasabi so finish line. Panon tayo met a nasabi so finish line, a singa sikara? Oniay kuan nen Pablo: “Ekalen tayo met sirin so amin a pakabelatan tan say kasalanan a mainomay a makaamper ed sikatayo, tan anosan tayoy ombatik ed lumba a niiyan diad arapan tayo.”​—Heb. 12:1.

3. Antoy punto nen Pablo sanen tinukoy toy nipaakar ed saray Griegon bumabatik nensaman?

³ Akin et imbaga nen Pablo ya ‘ekalen tayoy amin a pakabelatan’? Oniay nabasad libron  Backgrounds of Early Christianity nipaakar ed paraan na pilulumba na saray bumabatik nensaman: “Saray Griego et mani-ensayo tan milulumba ya labos-lakseb.” * Lapud anggapoy akasulong ed sikara, anggapoy makapabelat a mamatayer ed pilulumba da. Nayarin parad sikatayo natan et mabanday iya, balet ta ontan so gagawaen da ta labay day manalo. Kanian sanen imbaga nen Pablo ed saray Kristiano ya ‘ekalen so amin a pakabelatan,’ idadanet ton kaukolan dan ekalen so antokaman a makaamper ed pangawat day premyo diad lumba parad bilay. Maabig iyan simbawad saray Kristiano nensaman, tan anggad sikatayo met natan. Antoran pakabelatan so nayarin mangamper ed sikatayon manalo ed lumba parad bilay?

‘Ekalen so Amin a Pakabelatan’

4. Antoy panaabalaan na saray totoo diad panaon nen Noe?

⁴ Imbaga nen Pablo ya kaukolan tayon ‘ekalen so amin a pakabelatan.’ Kaibad satan so amin a makaamper diad panggaway anggaay nayarian tayon sumpalen so lumba. Anto iratan? Natulongan itayo na samay imbaga nen Jesus nipaakar ed panaon nen Noe, sakey ed saramay inusar nen Pablo ya alimbawa. Oniay inkuan nen Jesus: “Singa agawa ed saray agew nen Noe, ontan met so nagawa ed saray agew na Anak na too.” (Luc. 17:26) Tua, sayan mundo natan et mangangga no panon ya angangga so mundo diad panaon nen Noe. Balet, say manunan ipapabitar dia nen Jesus et say paraan na panagbilay na totoo. (Basaen so Mateo 24:37-39.) Kaslakan ed saray kapanaonan nen Noe et ag-interesadod Dios tan agda labay so manbilay ed paraan a makapaliket ed Sikato. Antoy ginawa ra? Nan-aakan tan naniinum ira, angasawa tan akiasawa ra, a normal met labat iran bengatla. Inkuan nen Jesus a say talagan problema et “ag-ira nanimano.”

5. Antoy makatulong pian nasumpal tayoy lumba?

⁵ Singa si Noe tan say pamilya to, dakel so kimey tayod inagew-agew. Kaukolan tayoy mantrabaho, tan asikasoey sarili tan say pamilya tayo. Satan so manguupot ed amin la lawarin panaon, biskeg, tan kaykayarian tayo. Lapud mairap so bilay, nayarin pampapagaan tayo ray pankaukolan tayo. Tan bilang dedikadon Kristiano, wala ni ray arum ya importantin responsabilidad tayo. Manpupulong itayo, manpaparaan parad aral tan aatendian tayo iratan, tan walay eskedyul tayod personal a panagaral tan panagdayew na pamilya. Anggano dakel so nepeg a gawaen nen Noe diad panaglingkor tod Dios, “amin ya ingganggan na Dios ed sikato, ontan so ginawa to.” (Gen. 6:22) No labay tayon gawaen so amin a ganggan nen Jehova tan labay tayon nasumpal so lumba, importantin paliisan tayoy antokaman a pakabelatan.

6, 7. Anton simbawa nen Jesus so nepeg tayon nodnonoten?

⁶ Antoy labay ya ibaga nen Pablo sanen imbaga ton ‘ekalen so amin a pakabelatan’? Agto labay ya ibagan ekalen tayo so amin a responsabilidad ed bilay tayo ta arum ed saraya et kaukolan met a talaga. Nepeg tayon nonoten imay imbaga nen Jesus nipaakar ed saya: “Agkayon balot manpapaga ya ibaga yon, ‘Anto kasi kanen mi?’ odino, ‘Anto kasi inumen mi?’ odino, ‘Anto kasi isulong mi?’ Ta sarayan amin a  bengatla so panseseetan ya anapen na saray nasyon. Ta amta na Ama yo ed tawen a nakaukolan yo irayan amin.” (Mat. 6:31, 32) Ipapabitar na sayan imbaga nen Jesus ya anggan saray manunan pankaukolan ed bilay a singa say naakan tan kawes et nayarin makabelat odino makasbel ed sikatayo no agtayo manalwar.

⁷ Imanoen imay imbaga nen Jesus: “Amta na Ama yo ed tawen a nakaukolan yo irayan amin.” Ipapanengneng na saya ya iter nen Aman Jehova iray pankaukolan tayo. Siempre, say tutukoyen dia nen Jesus et saray manunan pankaukolan tayo, aliwan say amin ya labay tayo. Idadanet to sirin ya anggan saray pankaukolan tayo et agtayo pampapagaan. Ta no andi, singa tayo met la saray nasyon ya satan la so ‘panseseetan dan anapen.’ Akin a mapeligro so pampaga ed saray pankaukolan tayo? Oniay imbaga nen Jesus: “Manalwar kayo pian say kapusoan yo et agbalot nabelatan ed sobran panangan tan alabas a panag-inum tan saray kapagaan ed bilay, tan bigbiglan onsabi ed sikayo itan ya agew a singa sakey a patit.”​—Luc. 21:34, 35.

8. Akin et nagkalalo lan kaukolan tayo natan ya ‘ekalen so amin a pakabelatan’?

⁸ Asingsingger tayo lad finish line. Agtayo sirin aabuloyan so antokaman a pakabelatan a makaamper ed sikatayon sumpalen so lumba. Maabig no unoren tayo iyan simbawa nen apostol Pablo: “Baleg a pakagunggonaan so maridios a debosyon daput no pasaragen tayo no antoy walad sikatayo.” (1 Tim. 6:6) No ipapuso tayo iyan imbaga nen Pablo, mas mainomay so pantultuloy tan panalo ed lumba.

“Say Kasalanan a Mainomay a Makaamper ed Sikatayo”

9, 10. (a) Antoy tutukoyen na balikas ya “say kasalanan a mainomay a makaamper ed sikatayo”? (b) Antoy posiblin nagawa ed pananisia na sakey a Kristiano?

⁹ Likud ed “amin a pakabelatan,” imbaga met nen Pablo a kaukolan tayon ekalen so “kasalanan a mainomay a makaamper ed sikatayo.” Anto itan? Tutukoyen na satan so ikapuy odino pakaandi pananisia tayo. Diad Biblia, diad sayan bersikulo labat nabasa so Griegon salita a nipatalos ya “mainomay a makaamper.” Imbaga na Bible scholar a si Albert Barnes a say bumabatik nensaman et agmansulong na kawes ta makaamper itan ed pilulumba to. Mipadpara, nepeg met ya ag-abuloyan na sakey a Kristiano a walay makaamper ed sikato, salanti, saray bengatlan mamakapuy odino sengegan ni ingen na pakaandi na pananisia to. Panon itan a posiblin nagawa?

¹⁰ Agtamtampol ya naandi so pananisia na sakey a Kristiano, noagta kalkalna tan agnaliklikas ni ingen. Diad bandad unaan na sulat nen Pablo ed saray Hebreon Kristiano, impasakbay ton manalwar ira pian ag-ira “niyarawi” tan ag-ira “nawalaan na mauges a puso ya andian na pananisia.” (Heb. 2:1; 3:12) No bilang ta walay sulong na sakey a bumabatik, makasbel itan ed pilulumba to, tan posiblin napatir. Lalo la no agto bidbiren ya mapeligro so pansulong na klase na abel a talagan makaamper ed ibatik to. Anto kasi makasengeg ya ibaliwala to itan a peligro? Ompan sikatoy mapaulyan odino alabas so talek tod sarili to odino sananey so akapokusan na isip to. Antoy naaralan tayod sayan simbawa nen Pablo?

11. Antoray nayarin sengegan na pakaandi na pananisia tayo?

¹¹ Nepeg tayon tandaan a say pakaandi pananisia na sakey a Kristiano et resulta na saray gagawaen to. Nipaakar ed “kasalanan a mainomay a makaamper ed sikatayo,” imbaga na sananey nin scholar a baleg so epekto na kaliberliber tayo, saray nakakaulop tayo, tan saray mismon kakapuyan tayo. Saraya so nayarin sengegay ikapuy odino pakaandi pananisia tayo.​—Mat. 13:3-9.

12. Antoran panonot so nepeg tayon ipapuso pian agnaandi pananisia tayo?

¹² Diad inlalabas na taotaon, papanonotan itayo na matoor tan makabat ya aripen a manalwar ed saray babantayan tan dedengelen tayo, ta walay epekto rad isip tan puso tayo. Pinasakbayan  da itayo nipaakar ed peligro na pampilalek a nawalaay dakel a kuarta tan kaykayarian. Say panagligliwaan na sayan mundo tan say lawas pampilalek ed balo iran gadyet et nayari met a mangisuawid sikatayo. Makapuy no isipen tayon is-istrikto iratan ya simbawa. Tan agtayo nepeg ya isipen a para labat itan ed arum ta mabiskeg so pananisia tayo. Aglabay nen Satanas a nasumpal tayoy lumba kanian sikatoy manguusar na agnaliklikas tan makapalikdo iran taktika. Walaray nagmaliw a mapaulyan, alabas so talek dad sarili da, tan sananey so akapokusay isip da. No nagawa iyad sikatayo, napepeligro so pangawat tayod premyo ya andi-anggaan a bilay.​—1 Juan 2:15-17.

13. Panon tayon naprotektaay sarili tayo ed saray mauges ya impluensya?

¹³ Diad inagew-agew, nakakaulop tayo iray totoon saray pilalek, panmoria, tan panagnonot da et mangipapatnag ed espiritu na mundo. (Basaen so Efeso 2:1, 2.) Balet, akadepende ed sikatayo no paimpluensyaan itayo odino andi. Say “dagem” ya tinukoy nen Pablo et makapatey. No ag-itayo lawas maalwar, ompan naaposan itayo legay lumba lapud satan a “dagem,” tan agtayo la nasumpal so lumba. Antoy makatulong pian makapantultuloy itayon ombatik? Say alimbawa nen Jesus. Sikato so sankaabigan a bumabatik ya akasabid finish line, tan sarag tayon aligey ehemplo to. (Heb. 12:2) Sarag tayo met ya aligey Pablo, a binmatik met ed lumba parad bilay tan pinaseseg to ray kapananisiaan ton aligen day alimbawa to.​—1 Cor. 11:1; Fil. 3:14.

‘Naawat Yo so Premyo’​—Panon?

14. Panon kaimportante ed si Pablo so pakasumpal tod lumba?

¹⁴ Panon kaimportante ed si Pablo so pakasumpal tod lumba? Diad samay unor lan impitongtong tod saray mamatatken ed Efeso, oniay inkuan to: “Agko ipapasen a makanakana ed siak so kamarerwak, a singa mabmabli itan, nasumpal ko labat so babatiken ko tan say ministeryon inawat ko ed Katawan a Jesus.” (Gawa 20:24) Maliket ton insakripisyo so amin a bengatla, anggan say mismon bilay to pian nasumpal to so lumba. Parad sikato,  andi-kakanaan so amin a sagpot to parad maong a balita no agto met lanlamang nasumpal so babatiken to. Ingen ta agmet kampante, a singa segsegurado lan manalo. (Basaen so Filipos 3:12-14.) Nen asingger lan manganggay bilay to insan to labat matalek ya imbagan: “Akilaban ak diad maabig a pilalaban, sinumpal koy pambabatik ko, tinumbok koy pananisia.”​—2 Tim. 4:7.

15. Antoy impaseseg nen Pablo ed saray kapara ton ombabatik ed lumba?

¹⁵ Labalabay nen Pablo ya nasumpal met na saray kapara ton Kristiano so lumba tan ag-ira onsusuko. Singa bilang, pinaseseg to ray Kristiano ed Filipos ya pansagpotan day dilin kilalaban da. Kaukolan day ‘ombemben a malet ed salita na bilay.’ Imbaga to met ed sikara no akin ya importante iya ed sikato: “Pian makapanliket ak diad agew nen Kristo, [pian] say impambatik ko odino impansagpot ko et aliwan anggapoy kakanaan.” (Fil. 2:16) Onia met so impaseseg tod saray Kristiano ed Corinto: “Ombatik kayo ta pian naawat yo [so premyo].”​—1 Cor. 9:24.

16. Akin et nepeg ya akapokus itayod finish line, odino ed premyo?

¹⁶ Diad saray marathon, agtampol nanengneng so finish line. Anggaman ontan, akapokus so nonot na sakey a bumabatik ed satan. Tan sano amta ton asingger lay finish line, mas determinado ton sumpalen so lumba. Mipara itan ed lumba parad bilay. Nepeg ya akapokus itayod finish line, odino ed premyo. Ontulong itan pian determinado itayon sumpalen so lumba.

17. Panon ya ontulong so pananisia pian akapokus itayod premyo?

¹⁷ Insulat nen Pablo: “Say pananisia et panagmatalek a seguradon nagawa iray bengatlan iilaloan, a walaay makakombinsin ebidensya a tua iratan anggano agnanenengneng.” (Heb. 11:1) Mabulos a tinaynan di Abraham tan Sara so mainawan panagbilay tan nanayam iran “sangkaili tan miaayam labat ed dalin a kawalaan da.” Antoy akatulong ed sikara? Tudtua ed sikara iray sipan na Dios, a singa “abayag da lan anengneng iratan.” Inkaindan nen Moises so “temporaryon panliket ed kasalanan” tan saray “kaykayamanan na Ehipto.” Akin et awalaan na ontan a pananisia tan inkakpel? “Akateen so ilalo to ed pakaawat [toy] tumang.” (Heb. 11:8-13, 24-26) Imbaga nen Pablo ya onia so ginawa na sarayan totoo “lapud pananisia.” Mabiskeg so pananisia ra, kanian akateen so nonot dad premyo. Agda inabuloyan ya nalingwanan da itan lapud mairap iran kipapasen. Amta ran tulongan ira na Dios, tan tooren ton tooren iray sipan to.

18. Antoray nepeg tayon gawaen pian ag-itayo ontayer ed lumba?

¹⁸ No dalepdepen tayoy malet a pananisia na sarayan lalaki tan bibii a walad Hebreos kapitulo 11 tan aligen tayoy alimbawa ra, napabiskeg met so pananisia tayo tan sarag tayon ekalen so “kasalanan a mainomay a makaamper ed sikatayo.” (Heb. 12:1) Tan “makapansasagyatan itayo a mangaro tan manggawa na maabig” no agtayo paulyan so pantitipon kaiba ray agagin mansasagpot met a napabiskeg so pananisia ra.​—Heb. 10:24.

19. Parad sika, akin et importantin mantultuloy ed lumba?

¹⁹ Asingsingger tayo lad finish line, aliling to et sankanengneng tayo la ‘tan! Panamegley na pananisia tan tulong nen Jehova, sarag tayon ‘ekalen so amin a pakabelatan tan say kasalanan a mainomay a makaamper ed sikatayo.’ On, sarasarag tayoy ombatik pian naawat so premyo​—saray bendisyon ya insipan na Dios tan Ama tayo, si Jehova.

[Paimano ed leksab]

Kasin Natandaan Mo?

• Panon tayon ‘ekalen so amin a pakabelatan’?

• Antoray nayarin sengegan na pakaandi pananisia na Kristiano?

• Akin et nepeg ya akapokus itayod premyo?

[Tepetepet Parad Panagaral]

[Litrato ed pahina 23]

Anto so “kasalanan a mainomay a makaamper ed sikatayo,” tan panon itayon naamper na satan?