Premiopaq “llallinacoq cuenta cayë”

“Qamcunapis tse corir llallinacoq cuenta cayë.” (1 COR. 9:24.)

1, 2. a) ¿Imanötaq hebreu cristiänokunata Pablu yanaparqan? b) ¿Ima consëjokunatataq Diospa sirveqninkunaqa chaskirquntsik?

MANA wanushpa kawëpaq carrërata mana haqiyänampaq yanapëta tïrarmi, Pabluqa punta carta qellqanqanchö huk carrërachö cörreqkunapaq parlan. Y alleqmi rikätsirqan hapallankunalla mana këkäyanqanta. Entërunkunapam carrërata ushashqana “atsca nunacuna” kayarqan. Markäkïninkunata y imanö sinchikuyanqanta yarpäyaptinqa yanapanmanmi mana qelanashpa cörrir seguiyänampaq.

² Punta kaq yachatsikïchömi Jehoväman markäkoq ‘atsca nunacunapaq’ yachakurqantsik. Pëkunaqa llapanmi rikätsikuyashqa alleq markäkï imanö yanapakunqanta. Markäkïninkunarëkurmi tsë carrërata ushayanqanyaq cörriyashqa. ¿Imanöraq noqantsikpis tsëta rurashwan? Llapan cristiänokunata Pablu consejanqanta wiyakurmi: “Imanomi corir llallinacoq nunacunapis imapis mana atajäyänanpaq jinella coriyan; tse cuenta noqantsicpis jutsantsiccunata tapsicuricur, mana qelanashpa Dios munanqanno cawaquita tïrashun” (Heb. 12:1).

3. Griego cörreqkunapaq parlarnin, ¿imatataq yachatsikïta munarqan Pablu?

³ Këchö, “jutsantsiccunata tapsicuricur” nir qellqarëkanqantaqa maslla musyaratsimantsik El mundo clásico: la epopeya de Grecia y Roma ninqan librom: “Griëgokunaqa  qalapachöm cörriyänampaq yachakuyaq y llallinakurpis cörriyaq”. * Awmi rasumpam tsënö cörreqkunaqa ima lasaqninkunatapis llapanta qoturiyaq. Kanan witsankuna penqakïpaqtanö rikashqapis këtaqa rurayaq premiota ganayanarëkurmi. Tsëpenqa, ¿imamantaq yarpätsimantsik Pablu mandakunqan? Mana wanushpa kawëta premiotanö chaskinapaqqa, alläpam precisan tukï lasämaqnintsikta haqirinantsik. Tsë witsankunaqa alläpa alli consëjon karqan y kanampis tsënöllam. Pero, ¿ima lasaq qepikunaraq yanapamashwantsu carrërata ushanapaq?

“Jinella” cörrishun

4. ¿Imakunamantaq más yarpachakuyaq Noëpa tiemponchö nunakunaqa?

⁴ ¿Lasaq qepichöqa imakunataq kan “jinella” cörrinapaq Pablu consejakunampaqqa? Tsëchöqa kan carrërachö llapan yarpachakïnintsikta y sinchikïnintsikta pantakätsimaqnintsikmi. Noe kawanqan witsampaq Jesus parlanqanta rikärishun, kënömi nirqan: “Imanomi Noepa tiempuncho nunacuna cawaquicayarqan; tsenomi Diospita Shamushqa Nuna cutimunan junaqcunapis cawaquicayanqa” (Luc. 17:26). ¿Imëpis mana pasakunqannö ushakëpaqku Cristu parlëkarqan? Manam. Tsëpa rantinqa kanan witsankunachö nunakuna imanö kawayanqantam rikätsikïkarqan, tsëqa Noëpa tiemponkunachö kawënöllam (lei Mateo 24:37-39). Tsë tiempochö nunakunaqa llapannömi Diosta höra höralla yarpäyaq, y manam mandakunqankunatanäqa wiyakïta munayaqtsu. ¿Imakunamantaq imëpis masqa yarparäyaq? Mikïpaq, upyëpaq y casakïllapaqmi. Mana alliqa karqan Jesus ninqannöpis manam tsëkunata rurayanqantsu, sinöqa tsëllaman yarparäkurnin Dios willakunqankunata mana wiyakuyanqanmi.

5. ¿Imataq cörrinqantsikchö yanapamantsik?

⁵ Noëpa y familiampanöpis noqantsikpaqa imëkam ruranantsik kan. Kikintsik y familiantsik wananqantsikkunatam ashinantsik. Këta ruranapaqqa itsa atska tiempota, kallpata y qellëta wanantsik, y kë llapanqa tukïtam yarpakachätsimashwan, masran qellë mana kaptinnäqa. Hinamampis cristiano kashqam alläpa precisaq rurapakïnintsikkuna kapamantsik, Diospita yachatsikunantsik, reunionkunaman ëwanapaq preparakunantsik y hapallantsik y familiantsikwan estudianantsikpis. Noëpapis imëkam ruranampaq karqan, tsënö karpis Diosnintsik “ninqannömi rurarqan” (Gén. 6:22). Mana wanushpa kawëta chaskita munarqa, alläpam precisan hanantsikchö këkaq qepikunata llapan puëdenqantsikta haqirinantsik, hina cuidakunantsikmi mana precisaq lasaq qepikunata hanantsikman churëta.

6, 7. ¿Jesuspa ima consëjontataq yarparänantsik?

⁶ Tsëqa, ¿ima nïtataq munarqan Pablu “jinella” cörrinapaq consejakurqa? Këchöqa consejakun manam llapan ruranantsikpaq kaqkunata haqirinantsikpaqtsu. Jesusqa kënö pensanapaqmi nimantsik: “Ama yarpacachar llaquinashqa puriyanquitsu, ‘¿Imataraq micushun? ¿Imataraq upushun? ¿Imataraq yacacushun?’ nishpa. Tse cosascunapaqqa yarpacachäyan Diosta mana cäsucoq nunacunallam. Peru qamcunapa imequicunapis pishenqantaqa sielucho quecaq Dios Yayam musyan” (Mat. 6:31, 32).  ¿Imatataq rikätsikun kë versïculokuna? Kawënintsikchö wananqantsik röpakuna y mikïkunaqa huk lasaq qepi o ishkitsikoq rumimanmi tikrarinman tsëkunapaq alläpa yarpachakushqaqa.

⁷ Jesus kënö ninqanman yarparäshun: “Peru qamcunapa imequicunapis pishenqantaqa sielucho quecaq Dios Yayam musyan”. Kënö ninqanwanmi musyatsimantsik wananqantsikkunachö Jehová yanapamänantsikpaq kaqta. Tsënö kaptimpis, höraqa tsë awnimanqantsik ‘cosascunaqa’ manam noqantsik munanqantsiknötsu. Tsënö kaptimpis, Cristuqa yarpätsimantsik tsë cösaskunaman mana yarparäkunapaqmi, tsëkunamanqa “Diosta mana cäsucoq nunacunallam” yarpachakuyan. ¿Imanir? Kikinmi kënö nin: “Cuidacuyë shonqiquicuna munanqan mana alli bisiucunapita, machaquicunapita, y que bidacho imecapaqpis yarpacachecunapita. Tseno quecayaptiqui, paqtataq tse junaqcuna imeca trampa animalta tsareqno tsapuyäshunquiman” (Luc. 21:34, 35).

8. ¿Imanirtaq kanan imëpitapis más preciso imawampis mana nitipakashqa kanantsik?

⁸ Carrera ushanampaqqa ichikllanam pishin. Tsënö kaptinqa ima llakikïpaqraq kanman tukï mana precisaqkunawan nitipakashqa kar tsë carrërata mana ushashqaqa. Alli yachaq karqa Pablu ninqannömi kawëta tïranantsik: “Noqantsicqa musyantsicmi Dios munashqanno cawaqueqa biennintsicpaq canqanta” (1 Tim. 6:6). Awmi, tsë consëjota wiyakurninqa, tsë carrera ushanqantsikyaqmi tsarakushun.

‘Jutsantsiccunata tapsicurishun’

9, 10. a) ¿Imapaqtaq Pablu parlan ‘jutsantsiccunata tapsicurinapaq’ nirqa? b) ¿Imaraq markäkïnintsikta pasarinman?

⁹ Pero Pabluqa manam “jinella” cörrinallapaqtsu nimantsik. Hina nimantsikmi ‘jutsantsiccunata tapsicurinapaqpis’. Griego idiömachö këkaq kë palabrakunaqa Bibliapa kë versïculonllachömi yurin. Kë versïculopaq parlarmi Albert Barnes yachaq nuna këta nirqan: “Ejerciciokunata ruraq nuna cörrirqa chankankunaman wankukaq röpataqa manam yakakunmantsu, tsënö karqa manam alleqllaqa cörrinqatsu. Tsënöllam huk cristiänopis qepätsinan kaqkunata haqirinan”. ¿Imakunaraq markäkïninta ushakäratsinman?

¹⁰ Markäkïnintsikqa o yärakuynintsikqa manam rastsu ushakärin. Këqa pasakun huk cristiano cuentata mana qokunqanyaq ichikllapa ichikllapa ushakarmi. Qellqanqan cartanchömi qepa kaq capïtulonkunachö rasumpa kaqpita rakikäkurir “mana alliman mana jeqacurcunapaq” consejakurqan, këmanqa chashwan ‘lluta pensaq shonqu Diosman mana creyicuptinmi’ (Heb. 2:1; 3:12). Yarpäshun, pipis carrërachö këkaptin röpan chankanman wankukäkuriptinqa ishkirinmi. Y këqa pasakunman, chankankunaman wankukaq röpakunata mana yakakunampaq nikäyaptin mana wiyakur yakakunqampitam. ¿Imanir-raq tsë consëjota wiyakuntsu? Kikinllaman markäkur o huk cösaskunaman yarpachakurnin. Rikärishun Pablu consejakunqan imanö yanapamänatapis.

11. ¿Imanöraq markäkïnintsikta o yärakuynintsikta oqrarishwan?

¹¹ Tsëqa, ¿imanirtaq markäkïninkunata oqrariyan? Unëpitana imatapis rurëkanqankunapitam. Bibliapita yachaq nunam kënö nirqan: “Raslla wankuramaqnintsik hutsam imamampis raslla ishkiratsimantsik”, “këqa kanman mëchö täranqantsikpitam, imanö kanqantsikpitam o pikunawan amigo kanqantsikpitam”. Huk parlëchöqa, mëchö kanqantsik, imachö pishipanqantsik y piwampis amïgo kanqantsikmi imamampis ishkiratsimashwan. Tsëkunaqa imëka sinchi kallpanöpis markäkïnintsiktam wallkäratsinman o ushakäratsinmampis (Mat. 13:3-9).

12. ¿Markäkïnintsikta mana hoqrarinapaqqa ima consëjokunatataq wiyakunantsik?

¹² Atska watapanam mäkoq mäkoq cumplido sirveq consejamarquntsik rikanqantsikkunapita y ruranqantsikkunapita alläpa cuidakunapaq, tsëkunaqa pensënintsikta y munënintsiktam tumakäratsin. Hinamampis, qellë kuyë, kushikï rurëkunata kuyë, y tsëraq tukï imëka yarqamoqkunata kuyëqa, carrerapitam horqaramashwan. Tsënö kaptinqa, ¿imanötaq rikantsik kë consëjokunata? ¿Alläpa mañakoqtanöku rikantsik? ¿Tsë consëjokuna wakinkunallapaq kanqantaku pensantsik? Tsënö pensëqa pasëpa mana allichi kanman. Satanaspa mundompa  trampankunaqa sasa o aja mäkunanmi y alläpa pantatsikoqmi, këkunam wakinkunata oqrakäratsishqa. Ama imëpis kikintsikllamanqa confiakushuntsu, hukman yarpachakïkäshuntsu, ni mana kaqpaq churashuntsu. ¡Mana wanushpa kawë premiotam oqrarishwan! (1 Juan 2:15-17.)

13. ¿Imaraq yanapamäshun kë mundopa wanutsikoq vienton mana wanutsimänapaq y tsënöpa cörrir sïguekänapaq?

¹³ Cada hunaqmi kë mundopa munëninkunata allipaq churaqkunawan y kë mundopa pensëninkunata väletseqkunawan tarinakuntsik (lei Efesios 2:1, 2). ¿Pensënintsikta tumakäratsiyanmantsuraq? Tsëqa kanqa imanöpis rikanqantsikpitam. Pabluqa rikätsikun kë mundopa pensënin mëchö tsëchöpis këkaq imëka viento cuenta kanqantam. Jehoväta sirveq nunakunapaqqa kë vientoqa imëka veneno cuentam, markäkïnintsiktam wanuratsin. Tsëmi tsë vientotaqa shütëta munanantsiktsu. Tsë vientota shütarqa wanurishunmi y manam ni imëpis tsë carrërata ushashuntsu. ¿Imaraq yanapamäshun cörrita mana haqinapaq? Jesus ruranqannölla rurëmi (Heb. 12:2). Hina huk alli ejemploqa Pablum, pëpis kë carrërachömi këkarqan y cristiano mayinkunatam kë carrërachö kayänampaq nirqan (1 Cor. 11:1; Fili. 3:14).

¿Imanötaq tsë premiota ganashwan?

14. ¿Pablupaqqa alläpaku precisarqan carrërata ushananyaq cörrïnan?

¹⁴ ¿Alläpaku Pablupaq precisaq mana wanushpa kawëta chaskinampaq carrërata ushëqa? Ëfesochö anciänokunapita despedikunampaq discursota rurarmi pëkunata kënö nirqan: “Wanuratsiyämänan captinpis, noqataqa manam ni ima qocamantsu, [...] ushanqäyaq[mi] willacur siguishaq, porqui alli willaquininta willacun[ä]paqmi Teyta Jesus acramashqa” (Hech. 20:24). Rikanqantsiknömi pëqa kë carrërata ushëtaqa kawëpaq o wanïpaq kanqantanö rikaq. Tsënö alläpa precisaptinmi tsë carrërata ushananrëkurqa wanurinampaqpis listo këkarqan. Diospita yachatsikïchöqa imëkatam rurarqan, pero yarpaqmi kë llapan ruranqankuna mana kaqllachö quedarinampaq kaqta tsë carrërata ushanqanyaq mana cörriptinqa. Pero manam tsë carrërachö këkanqampitaqa ganashqana kanqantaqa imëpis pensaqtsu (lei Filipenses 3:12, 13). Wanunampaq ichikllana pishikaptinran pëqa kënö  nirqan: “Imecano equecanopis, imeca coreq y pelyaq gananacoqnomi asta canancamayaq llapanta cumplirerqö Teyta Diosman marcäcur” (2 Tim. 4:7).

15. ¿Imanötaq Pablu animarqan carrërachö këkaq cristiano mayinkunata?

¹⁵ Hinamampis Pabluqa munarqanmi cristiano mayinkuna kë carrërata ushayanqanyaq cörriyänampaq y tsë nänipita mana yarqukuriyänanta. Tsërëkurmi Filipos markachö cristiänokunata sinchikuyänampaq kënö parlaparqan: “Wiñe cawepaq alli willaqui nenqanmannomi imepis tsaracuyänequi. Tsemi Jesucristu que patsaman cutimuptin qamcunarecur noqa allapa cushicushaq, jinantinpa purenqä, y willapäconqä mana embanu canqanta musyarir” (Fili. 2:16). Hina tsënöllam Corinto markachö këkaq cristiänokunapaqpis yarparaq. Tsë premioman yarpëkurmi pëkunata nirqan: “Qamcunapis tse corir llallinacoq cuenta cayë” (1 Cor. 9:24).

16. ¿Imanirtaq carrërata ushanantsikpaq kaqman y premiota chaskinantsikpaq kaqman imëpis yarparashwan?

¹⁶ Kë carrërachö cörreqkunaqa manam musyayantsu o rikäyantsu kë carrera mëchö ushanampaq kaqta. Tsënö kaptimpis, cörrikaqkunaqa manam huk cösaskunamanqa yarpachakuyantsu, y masran chäriyänampaq ichikllana pishikanqanta musyarqa. Noqantsikwampis tsënöllam pasakunan. Chaskinantsikpaq kaq premiomanmi imëpis yarparänantsik. Tsëta rurarqa imëpis masmi sinchikushun tsëta chaskinapaq.

17. ¿Diosta sirveqkunata imanötaq yanapashqa chaskiyänampaq kaqkunaman yarparëqa?

¹⁷ Pablu rikätsikunqannömi kë carrërapaqqa alläpa precisan markäkïnintsik, tsëpaq parlarmi këta nirqan: “Marcäquiyoq queqa imatapis rasonpa chasquinantsicpaq caqta seguracur shuyaquimi, y ima mana ricanqantsiccunatapis rasonpa ricarim” (Heb. 11:1). Abrahanpaqwan Särapaq yarpärishun. ¿Imanirtaq tukï kayäpunqanta haqirïkur Canaán markachö “forasterunolla” kawayarqan? Porque “carupita[m] ricayarqan allapa cushicur” Jehová awnikunqankuna cumplikaqta. Hina yarpärishun Moisespaq. ¿Imanirtaq “etsanpa muneninta rurar juc ratu que patsacho gosacuritaqa” y “atsca qelleyoq cushishqa Egiptu marcacho cawaquitaqa” munarqantsu? Markäkïninrëkurmi. Tsëmi yanaparqan “Diospita premiuta chasquinanpaq” kaqman yarparänampaq (Heb. 11:8-13, 24-26). Imanö allim Jehoväta unë sirveqkunapaq parlarnin Pablu kënö nir qallanqanqa: “Marcäcoq carninmi”. Awmi markäkininkunam yanaparqan ima prueba y sasa o aja kawëkuna kaptimpis Jehová pëkunapaq rurëkanqanta rikäyänampaq y shamoq tiempochö imakunata ruranampaq kaqtapis.

18. ¿Imaraq yanapamäshun raslla wankumaqnintsik hutsa mana ishkitsimänapaq?

¹⁸ Markäkïnintsik más sinchiyänanta munarqa y tsënöpa raslla wankumaqnintsik hutsaman mana ishkinapaqqa, Hebreus libropa 11 kaq capïtulonchö ollqukunapa y warmikunapa kawëninkunatam estudianantsik y pëkunanölla rurëta tïranantsik (Heb. 12:1). Jehoväta sirveq cristiano mayintsikkunawanmi ëllukänantsik o gorikänantsïk “jucnintsic jucnintsic yanapanacur cuyanacur” alli kaqkunata rurar këkänapaq (Heb. 10:24).

19. ¿Imanirtaq mana wanushpa kawëpaq carrërachö cörrëkänantsiklla?

¹⁹ Ichikllanam kë carrera usharinampaq pishin. ¡Mëchö ushanampaq kaqtapis rikëkantsiknam! Markäkunqantsikrëkur y Jehová yanapamanqantsikrëkurmi Pablu kënö consejakunqanta cumplïta puëdentsik: “Imanomi corir llallinacoq nunacunapis imapis mana atajäyänanpaq jinella coriyan; tse cuenta noqantsicpis jutsantsiccunata tapsicuricur” cörrishun. Hinëlla cörrinqantsikmi yanapamäshun kuyashqa Teytantsik Jehová awnimanqantsik premiota chaskinapaq.

[Päginapa ura kuchunchö willakï]

¿Imatataq yachakurquntsik?

• ¿Ima ninantaq “jinella” cörrishun neq consëjoqa?

• ¿Imaraq huk cristiänopa markäkïninta ushakäratsinman?

• ¿Imanirtaq chaskinantsikpaq premioman yarparashwan?

[Yachakunapaq kaqpa tapukïninkuna]

[26 kaq päginachö dibüju]

¿Imataq raslla wankuramaqnintsik hutsaqa y imanöraq ishkiratsimashwan?