“Halai bá atu manán”
“Halai bá atu manán”
“Imi halai bá atu manán.”—1 KOR 9:24.
1, 2. (a) Oinsá mak Paulo fó laran-manas ba ema ebreu kristaun? (b) Paulo hatete ita presiza halo saida?
IHA karta neʼebé apóstolu Paulo hakerek ba ema ebreu kristaun, nia fó laran-manas ba sira hodi kompara sira-nia moris ho halai-taru. Nia fó-hanoin sira katak iha halai-taru neʼe, laʼós sira deʼit mak halai, maibé iha mós Jeová nia atan barak neʼebé iha tempu uluk halai ona toʼo rohan. Paulo hatete katak sira hanesan “sasin lubuk” neʼebé haleʼu ema kristaun. Nuneʼe, hodi nafatin hanoin kona-ba oinsá sira hatudu fiar no laran-metin, ida-neʼe bele ajuda ema ebreu kristaun atu kontinua halai toʼo rohan.
2 Iha lisaun uluk, ita koʼalia kona-ba Maromak Jeová nia atan balu nia ezemplu. Ita haree katak sira hotu hatudu fiar neʼebé metin ba Maromak, no ida-neʼe ajuda sira atu nafatin halo tuir Maromak durante sira-nia moris tomak. Oinsá mak ita mós bele halai toʼo rohan hanesan sira? Paulo hatete: “Ita mós, sei husik tiha buat hotu neʼebé hatodan ita, liuliu sala neʼebé belit metimetin mai ita, hodi halai toʼo rohan iha konkursu neʼebé ita tuir daudaun.”—Ebr 12:1.
3. Paulo nia liafuan ba ema kristaun hatudu saida?
3 Tansá mak Paulo hatete ba ema kristaun atu “husik” buat hotu neʼebé hatodan sira? Livru ida neʼebé koʼalia kona-ba ema kristaun iha Paulo nia tempu, esplika kona-ba oinsá ema halai-taru. (Backgrounds of Early Christianity) Livru neʼe hatete: “Ema gregu halo treinu no halai-taru ho isin-tanan.” * Maski ohin loron ita hanoin katak halai hanesan neʼe la hatudu respeitu, maibé iha tempu neʼebá, sira halo ida-neʼe tanba lakohi husik buat naran deʼit atu hatodan no hapara sira atu manán prémiu. Tan neʼe, Paulo nia liafuan hatudu katak ema kristaun presiza hakaʼas an nafatin atu la husik buat naran deʼit iha sira-nia moris atu hapara sira manán moris rohan-laek. Konsellu neʼe mós diʼak ba ita ohin loron. Se nuneʼe, buat saida deʼit mak bele hatodan ita hodi halo susar ba ita atu halai toʼo rohan?
“Husik tiha buat hotu neʼebé hatodan ita”
4. Iha Noé nia tempu, ema hanoin deʼit saida?
4 Paulo hatete atu ita husik buat hotu neʼebé “hatodan” ita. Ida-neʼe inklui buat hotu neʼebé bele dada ita-nia atensaun hodi hanetik ita atu halai toʼo rohan. Saida deʼit mak bele hatodan ita? Mai ita hanoin fali kona-ba Noé, Maromak nia atan ida neʼebé Paulo temi nuʼudar ezemplu kona-ba fiar. Jesus hatete: “Nuʼudar mosu tiha ona iha Noé nia loron, nuneʼe mós sei mosu iha Oan-Mane nia loron sira.” (Lc 17:26) Maski Jesus koʼalia kona-ba tempu neʼebé mundu aat neʼe atu lakon, maibé nia koʼalia liuliu kona-ba buat ida seluk. Neʼe mak dalan neʼebé ema halaʼo sira-nia moris. (Lee Mateus 24:37-39.) Ema barak liu iha Noé nia tempu lakohi hatene kona-ba Maromak, sá tan moris tuir dalan neʼebé halo nia kontente. Sira hanoin deʼit kona-ba saida? Sira hanoin kona-ba buat baibain deʼit iha moris, hanesan han, hemu, kaben no fó-kaben toʼo sira lakohi rona ba Maromak nia mensajen. Hanesan Jesus hatete, sira lakohi “hatene buat ida”.
5. Ita presiza halo saida deʼit hodi bele halai toʼo rohan?
5 Hanesan Noé no ninia família, ita mós iha buat barak atu halo loron-loron. Ita presiza buka moris no tau matan ba ita-nia família. Atu halo ida-neʼe, ita presiza uza tempu no forsa barak. Kuandu osan la iha, ida-neʼe bele halo ita hanoin barak kona-ba ita-nia presiza loroloron nian. Liután neʼe, nuʼudar ema kristaun neʼebé dedika an ona ba Jeová, ita presiza halo buat barak neʼebé importante liu iha ita-nia moris. Porezemplu, ita presiza bá haklaken, prepara ba reuniaun, tuir reuniaun, estuda Bíblia mesak no estuda nuʼudar família. Noé mós iha buat barak atu halo hodi serbí Maromak, maibé nia halo buat hotu neʼebé Jeová haruka, “nia halo nuneʼe duni”. (Gên 6:22) Se ita hakarak halo buat hotu neʼebé Jeová hakarak ita atu halo hodi bele halai toʼo rohan, ita labele hatodan liután ita-nia an ho buat neʼebé ladún importante.
6, 7. Ita presiza hanoin kona-ba Jesus nia liafuan saida?
6 Kuandu Paulo hatete atu ita husik “buat hotu” neʼebé hatodan ita, ninia liafuan neʼe katak sá? Neʼe la dehan katak ita sei husik ita-nia responsabilidade hotu. Maibé ita tenke hanoin nafatin saida mak Jesus hatete kona-ba ita-nia presiza loroloron nian, nia dehan: “Keta laran-taridu bá hodi dehan: ‘Ita sei han ka hemu, ka hatais loos saida?’ Jentiu sira buka buat sira-neʼe hotu. Maibé imi-nia Aman lalehan hatene katak imi kuran [buat] sira-neʼe.” (Mt 6:31, 32) Jesus nia liafuan neʼe hatudu katak ita-nia presiza loroloron nian, hanesan ai-han ka hatais, mós bele hatodan ita se ita husik buat sira-neʼe sai importante liu iha ita-nia moris. Buat sira-neʼe bele hanetik ita atu la halai toʼo rohan.
7 Agora, mai ita hanoin kona-ba Jesus nia liafuan neʼebé hatete: “Imi-nia Aman lalehan hatene katak imi kuran [buat] sira-neʼe.” Liafuan neʼe hatudu katak ita-nia Aman Jeová sei tau matan ba ita-nia presiza. Neʼe la dehan katak ita sei hetan buat hotu neʼebé ita hakarak. Maski nuneʼe, Jesus hatete atu ita la hanoin barak kona-ba ‘buat neʼebé jentiu sira buka’. Tanbasá? Jesus hatete: “Imi matan-moris neon-naʼin bá, keta laran-todan tan hahalok aat sira, tan lanu, tan fó neon resin ba moris neʼe atu loron neʼe keta toʼo tekiteki deʼit hanesan lasu.”—Lc 21:34, 35.
8. Tanbasá mak ita tenke husik “buat hotu neʼebé hatodan ita”?
8 Ita moris iha tempu neʼebé ita-nia halai-taru nuʼudar ema kristaun besik ona rohan. Nuneʼe, ita lakohi duni atu husik buat naran deʼit hapara ita atu halai toʼo rohan! Tan neʼe, ita tenke husik “buat hotu neʼebé hatodan ita”, no halo tuir apóstolu Paulo nia konsellu neʼebé hatete atu ita ‘laran-haksolok ho buat neʼebé ita iha ona’. (1 Tim 6:6) Halo ida-neʼe sei ajuda ita atu kontinua halai toʼo rohan no manán prémiu.
“Sala neʼebé belit metimetin mai ita”
9, 10. (a) “Sala neʼebé belit metimetin mai ita” mak saida? (b) Saida mak bele akontese ba ema kristaun nia fiar?
9 Paulo mós koʼalia kona-ba buat seluk neʼebé ita tenke husik. Neʼe mak “sala neʼebé belit metimetin mai ita”. Iha Bíblia, liafuan gregu neʼebé tradús nuʼudar “belit metimetin” mosu iha eskritura neʼe deʼit. Matenek-naʼin ida kona-ba Bíblia, naran Albert Barnes, hatete katak ema neʼebé halai-taru iha tempu antigu la hatais roupa neʼebé belit sira-nia ain hodi hanetik sira atu halai. Nia hatutan tan katak ema kristaun mós labele husik buat naran deʼit atu belit metimetin ba sira hodi bele halai toʼo rohan. Neʼe katak ita presiza husik buat naran deʼit neʼebé halo ita-nia fiar sai fraku ka halakon ita-nia fiar. Oinsá mak ema kristaun bele lakon ninia fiar?
10 Klaru katak ema kristaun la lakon ninia fiar derrepente deʼit. Maibé ida-neʼe bele akontese neineik-neineik, no karik nia la hatene katak ninia fiar sai fraku. Paulo mós fó avizu kona-ba perigu neʼe. Nia hatete katak sira presiza kuidadu atu labele neineik-neineik “laʼo dook” husi lia-loos no labele husik sira-nia laran “sai fiar-laek”. (Ebr 2:1; 3:12) Baibain, kuandu ema neʼebé halai-taru husik nia roupa belit ninia ain, nia monu. Maibé, tansá mak ema balu neʼebé halai-taru la haree perigu neʼe? Karik sira la kuidadu kuandu halai, fiar an demais, ka hanoin kona-ba buat seluk. Ita bele aprende saida husi Paulo nia konsellu neʼe?
11. Saida deʼit mak bele halakon ita-nia fiar?
11 Ita presiza hanoin-hetan katak se ema kristaun ida lakon ninia fiar, ida-neʼe akontese tanba rezultadu husi buat neʼebé nia halo iha ninia moris. Matenek-naʼin ida seluk neʼebé koʼalia kona-ba “sala neʼebé belit metimetin mai ita”, nia esplika katak ida-neʼe kona-ba ita-nia situasaun iha moris, ema neʼebé ita ransu, no ita-nia hakarak neʼebé laloos. Buat sira-neʼe hotu iha forsa boot no bele halo ita-nia fiar sai fraku ka halakon ita-nia fiar.—Mt 13:3-9.
12. Atu la lakon ita-nia fiar, ita presiza halo tuir konsellu no avizu saida deʼit?
12 Durante tinan barak ona, atan laran-metin no matenek fó konsellu mai ita atu kuidadu kona-ba buat neʼebé ita haree no rona tanba buat sira-neʼe bele kona ita-nia hanoin no ita-nia hakarak. Ita mós simu avizu kona-ba la buka demais osan no sasán. Se ita gosta deʼit atu haree filme ka rona múzika, ka sempre hakarak atu hetan sasán ho modelu foun, ita sei la iha tempu atu halo buat neʼebé importante liu. Tan neʼe, perigu atu ita sente katak konsellu sira-neʼe halo ita la livre. Perigu mós atu hanoin katak konsellu neʼe ba ema seluk, laʼós ba ita, tanba ita sente katak ita iha fiar neʼebé metin. Satanás nia mundu neʼe book ita atu hanoin hanesan neʼe atu halo ita la fó atensaun ba avizu neʼebé ajuda ita atu halai toʼo rohan. Ema balu lakon ona sira-nia fiar tanba sira la kuidadu, fiar an demais, ka husik buat mundu neʼe nian dada sira-nia atensaun. Se ida-neʼe akontese ba ita, ita bele lakon moris rohan-laek nuʼudar ita-nia kolen.—1 Joao 2:15-17.
13. Atu mundu nia hanoin la book ita, ita presiza halo saida?
13 Loron-loron, ema iha Satanás nia mundu book ita atu ita mós sai hanesan ho sira. Sira hakarak ita atu iha hanoin hanesan kona-ba buat neʼebé importante no la importante, no sira mós hakarak ita atu halo tuir buat neʼebé sira halo. (Lee Efeso 2:1, 2.) Maski nuneʼe, ita bele deside atu husik ka la husik mundu nia hanoin kona ita. Mundu neʼe nia hanoin mak hanesan anin neʼebé iha venenu. Tan neʼe, ita presiza proteje ita-nia an husi anin neʼe hodi bele halai toʼo rohan. Saida mak bele ajuda ita atu halai nafatin? Ita bele halo tuir Jesus neʼebé hatudu ezemplu diʼak liu hotu kona-ba halai toʼo rohan. (Ebr 12:2) Ita mós iha Paulo nia ezemplu. Nia mós halai toʼo rohan, no nia fó laran-manas ba ninia maluk sira atu halo tuir nia.—1 Kor 11:1; Flp 3:14.
Oinsá ita bele halai “atu manán”?
14. Oinsá mak Paulo hatudu katak importante tebes ba nia atu halai toʼo rohan?
14 Oinsá mak Paulo hatudu katak importante tebes ba nia atu halai toʼo rohan? Kuandu nia koʼalia ba katuas kristaun sira iha Éfeso, nia hatete: “Haʼu haree haʼu-nia moris nuʼudar folin-laek mai haʼu, haʼu buka deʼit atu ramata haʼu-nia dalan no knaar neʼebé haʼu simu husi Naʼi Jesus.” (Apos 20:24) Paulo prontu atu saran buat hotu, inklui mós ninia moris, atubele halai toʼo rohan. Maski nia serbisu makaʼas atu haklaken lia-foun diʼak, maibé nia hatete katak ninia hakaʼas-an neʼe saugati deʼit se nia la halai toʼo rohan. Nia mós la hanoin katak nia manán ona ninia prémiu. (Lee Filipe 3:12, 13.) Kuandu Paulo besik atu mate mak nia foin hatete: “Haʼu halo tiha funu didiʼak toʼo rohan; haʼu halai tiha toʼo rohan, haʼu laran-metin iha fiar.”—2 Tim 4:7.
15. Paulo fó laran-manas ba ninia maluk kristaun sira atu halo saida?
15 Liután neʼe, Paulo hakarak tebes atu ninia maluk sira mós halai toʼo rohan. Porezemplu, nia fó laran-manas ba ema kristaun sira iha Filipe atu hakaʼas an atu hetan salvasaun. Nia fó-hanoin sira atu nafatin “laran-metin ba liafuan moris nian”, nia mós hatete: “Haʼu sei haksolok hodi gaba an kona-ba imi iha Kristu nia loron, wainhira haʼu sei haree katak haʼu-nia hakaʼas-an no serbisu la sai leet deʼit.” (Flp 2:16) Paulo mós fó laran-manas ba ema kristaun sira iha Korinto hodi dehan: “Imi halai bá atu manán.”—1 Kor 9:24.
16. Tanbasá mak ita presiza fiar duni katak ita bele simu prémiu, ka kolen?
16 Kuandu ema komesa halai-taru iha dalan neʼebé naruk hanesan maratona, sira la haree rohan. Maski nuneʼe, sira hanoin deʼit mak atu halai toʼo rohan no sira hatene katak rohan neʼe besik daudauk. Kuandu ema neʼebé halai-taru haree ona rohan, ida-neʼe halo sira hakaʼas an liután atu toʼo neʼebá. Ita-nia halai-taru nuʼudar ema kristaun mós hanesan neʼe. Ita presiza fiar duni katak ita bele simu prémiu, ka kolen, tanba ida-neʼe sei ajuda ita hakaʼas an atu manán prémiu neʼe.
17. Oinsá mak fiar neʼebé metin ajuda ita?
17 Apóstolu Paulo hakerek: “Fiar mak laran-metin kona-ba rahun-diʼak sira neʼebé ita hein, hatene loloos katak buat sira neʼebé ita matan la haree ohin iha duni.” (Ebr 11:1) Abraão no Sara prontu atu husik moris diʼak hodi moris nuʼudar “ema rai seluk nian no ema laʼo-rai iha mundu neʼe”. Saida mak ajuda sira atu halo ida-neʼe? “Sira haree [buat neʼebé Maromak hakotu ona] husi dook.” Moisés la simu “haksolok ba tempu uitoan iha sala laran” no “rikusoi tomak Egiptu ninian”. Oinsá mak nia bele iha fiar no forsa atu halo ida-neʼe? Bíblia hatete katak ninia “matan hateke ba kolen loloos”. (Ebr 11:8-13, 24-26) Paulo hatete katak sira ida-idak halo tuir Maromak “hodi fiar”. Sira-nia fiar neʼebé metin ajuda sira atu la husik situasaun susar ruma halo sira haluha kona-ba prémiu neʼebé sira atu simu. Sira mós hatene katak Maromak ajuda nafatin sira no sei kumpre buat hotu neʼebé nia promete.
18. Hodi halo saida deʼit mak ita bele halai toʼo rohan?
18 Hodi hanoin didiʼak kona-ba Maromak nia atan sira neʼebé temi iha Ebreu kapítulu 11 no hodi halo tuir sira-nia ezemplu, ita bele hametin ita-nia fiar no husik “sala neʼebé belit metimetin mai ita”. (Ebr 12:1) Ita mós bele “hakaʼas malu atu hadomi no halo hahalok diʼak” hodi halibur hamutuk ho ita-nia maluk sira neʼebé hakaʼas an atu hametin sira-nia fiar.—Ebr 10:24.
19. Oinsá ita sente kona-ba kontinua halai toʼo rohan?
19 Ita-nia halai-taru besik atu ramata. Neʼe hanesan ita haree ona rohan. Ho fiar neʼebé metin no Jeová nia ajuda, ita mós bele ‘husik buat hotu neʼebé hatodan ita no sala neʼebé belit metimetin mai ita’. Sin, ita bele duni kontinua halai toʼo rohan hodi manán prémiu neʼebé ita-nia Aman Jeová promete ona mai ita.
[Nota–rodapé]
^ par. 3 Ema judeu iha tempu uluk sente katak ida-neʼe la hatudu respeitu. Livru 2 Macabeus hatete katak kuandu amlulik boot naran Jasão hakarak harii fatin boot ida iha Jerusalém atu halaʼo desportu hanesan ema gregu sira, ema judeu barak sai hirus.—2 Macabeus 4:7-17.
Ita hanoin-hetan?
• Oinsá mak ita bele husik “buat hotu neʼebé hatodan ita”?
• Saida deʼit mak bele halakon ita-nia fiar?
• Tanbasá mak ita presiza fiar duni katak ita bele simu prémiu?
[Pergunta estudu nian]
[Dezeñu iha pájina 23]
Saida mak “sala neʼebé belit metimetin mai ita”, no oinsá mak ida-neʼe bele akontese ba ita?
