Midbid daw Kamo ni Jehova?
Midbid daw Kamo ni Jehova?
“Midbid ni Jehova an mga sadiri nia.”—2 TIM. 2:19, NW.
1, 2. (a) Sa ano interesado si Jesus? (b) Anong mga hapot an maninigo tang isip-isipon?
SARONG aldaw, may Fariseong nagdolok ki Jesus asin naghapot: “Arin an dakulang [“nakakalabi sa gabos na,” NW] pagboot sa katogonan?” Nagsimbag si Jesus: “Mamotan mo an Kagurangnan mong Dios [si Jehova] sa bilog mong puso, asin sa bilog mong kalag, patin sa bilog mong isip.” (Mat. 22:35-37) Dakula an pagkamoot ni Jesus sa saiyang Ama asin sia talagang namuhay oyon sa mga tataramon na iyan. Interesado man si Jesus sa kamugtakan nia sa atubangan ni Jehova, na ipinapaheling ini paagi sa maimbod na pamumuhay. Kun siring, kan madali na siang magadan, nasabi nia na midbid sia nin Dios bilang maimbod na nagkuyog sa mga togon Nia. Sa siring, si Jesus nagdanay sa pagkamoot ni Jehova.—Juan 15:10.
2 Dakol ngonyan an nagsasabing namomotan ninda an Dios. Mayong duda na kita iyo man. Minsan siring, dapat tang isip-isipon an seryosong mga bagay arog kan: ‘Midbid daw ako nin Dios? Ano an pagmansay sa sako ni Jehova? Midbid daw ako bilang sadiri nia?’ (2 Tim. 2:19) Marahayon na isip-isipon kun gurano kadakulang pribilehio an siring kadayupot na relasyon sa Soberano kan uniberso!
3. Taano an nagkapira ta nadedepisilan maniwala na puede sindang magin sadiri ni Jehova, asin ano an makakatabang na malabanan an siring na kaisipan?
3 Pero, an nagkapira na dakula an pagkamoot ki Jehova nadedepisilan maniwala na puede sindang mamidbid nin Dios sa positibong paagi. May mga nag-iisip na mayo sindang halaga, kaya kinukuestion ninda an ideya na sinda sadiri ni Jehova. Pero, maoogma nanggad kita huling puede kitang helingon nin Dios sa ibang anggulo! (1 Sam. 16:7) Sinabi ni Pablo sa mga kapwa Kristiano: “Kun an siisay man namomoot sa Dios, an siring namimidbid nia.” (1 Cor. 8:3) An pagkamoot sa Dios importanteng kahagadan tanganing mamidbid nia. Isip-isipa ini: Taano ta binabasa nindo an magasin na ini? Taano ta pinagmamaigotan nindong paglingkodan si Jehova sa bilog nindong puso, kalag, isip, asin kosog? Kun kamo nagdusay sa Dios asin nabautismohan na, taano ta ginibo nindo iyan? Ipinapaliwanag kan Biblia na si Jehova, na nagsisiyasat sa mga puso, dinadagka an kawiliwiling mga tawo. (Basahon an Haggeo 2:7; Juan 6:44.) Kun siring, makakapagkongklusyon kamo na naglilingkod kamo ki Jehova huli ta dinagka nia kamo. Nungka niang babayaan an mga dinadagka nia kun sinda magdadanay na maimbod. Para sa Dios, sinda mahalaga nanggad, asin namomotan niang marhay.—Sal. 94:14.
4. Taano ta maninigo na padagos tang horophoropon an satong pagigin midbid nin Dios?
4 Oras na nadagka na kita ni Jehova, maninigo kitang magin interesado na magdanay sa pagkamoot nia. (Basahon an Judas 20, 21.) Girumdomon na sinasabi kan Biblia na may posibilidad na kita maanod o rumayo pa ngani sa Dios. (Heb. 2:1; 3:12, 13) Halimbawa, bago sabihon ni Pablo an nasa 2 Timoteo 2:19, sinambit nia si Himeneo asin Fileto. Minalataw na may panahon na nagin sadiri ni Jehova an duwang lalaking iyan, alagad kan huri nagsuhay sinda sa katotoohan. (2 Tim. 2:16-18) Girumdomon man na sa mga kongregasyon sa Galacia, an nagkapira na midbid na nin Dios dai nagdanay sa espirituwal na liwanag na nakamtan ninda kaidto. (Gal. 4:9) Nungka logod niatong baliwalaon an mahalagang marhay na kamugtakan niato sa atubangan nin Dios.
5. (a) Ano an nagkapirang kualidad na pinapahalagahan nin Dios? (b) Anong mga halimbawa an pag-oolayan niato?
5 May nagkapirang kualidad na espesyalmenteng pinapahalagahan ni Jehova. (Sal. 15:1-5; 1 Ped. 3:4) Huli sa pagtubod asin kapakumbabaan, napapalaen an nagkapira na midbid nin Dios. Pag-olayan niato an halimbawa nin duwang tawo tanganing maaraman kun paano nakatabang an mga kualidad na ini na mamotan sinda ni Jehova. Sisiyasaton man niato an dapit sa sarong tawo na naghona na sia midbid nin Dios alagad nagin orgolyoso kaya isinikwal ni Jehova. Makakanood kita nin mahahalagang leksion sa mga halimbawang ini.
An Ama kan mga May Pagtubod
6. (a) Paano ipinaheling ni Abraham an pagtubod sa mga panuga ni Jehova? (b) Paano si Abraham midbid ni Jehova?
6 Si Abraham sarong tawo na “tominubod ki Jehova.” Sa katunayan, inaapod sia na “ama nin gabos na minatubod.” (Gen. 15:6; Roma 4:11) Huli sa pagtubod, binayaan ni Abraham an saiyang istaran, mga katood, asin rogaring tanganing magduman sa harayong lugar. (Gen. 12:1-4; Heb. 11:8-10) Pakalihis nin dakol na taon, makosog pa man giraray an pagtubod ni Abraham. Risang-risa ini kan garo man sana “idinolot nia si Isaac” bilang pagkuyog sa pagboot ni Jehova. (Heb. 11:17-19) Si Abraham nagpaheling nin pagtubod sa mga panuga ni Jehova, kaya espesyal an pagmansay nin Dios sa saiya; talagang midbid Nia si Abraham. (Basahon an Genesis 18:19.) Bako sanang aram ni Jehova na nag-eeksister si Abraham; pinahalagahan nia ini bilang katood.—Sant. 2:22, 23.
7. Ano an mahalagang mangnohon manongod sa kaotoban kan mga panuga ni Jehova, asin ano an nagin epekto kaini ki Abraham?
7 Mahalagang mangnohon na kan panahon ni Abraham dai nia nakamtan an pamanang daga na ipinanuga sa saiya. Dai man nia naheling na an saiyang banhi nagin “siring kan baybay na iyaon sa guilid kan dagat.” (Gen. 22:17, 18) Minsan ngani an mga panugang ini dai naotob kan panahon ni Abraham, napagdanay niang makosog an pagtubod ki Jehova. Aram nia na kun an Dios manuga, iyan garo man sana naotob na. Iyo, namuhay si Abraham kaoyon kan pagtubod na iyan. (Basahon an Hebreo 11:13.) Midbid daw kita ni Jehova bilang igwa kan pagtubod na siring ki Abraham?
An Paghalat ki Jehova Tanda nin Pagtubod
8. Anong bako man salang kamawotan an gustong-gusto nin nagkapira na maotob?
8 Tibaad may kamawotan kita na gustong-gusto tang maotob. An pag-agom, pagkaigwa nin mga aki, saka marahay na salud gabos natural asin bako man salang kamawotan. Pero, para sa dakol tibaad dai naootob an saro o labi pa sa kamawotan na iyan. Kun totoo iyan sa sato, maheheling sa pag-atubang niato sa mga situwasyon na iyan kun gurano kakosog kan pagtubod niato.
9, 10. (a) Ano an ginibo nin nagkapira sa paghihingoang maotob an kamawotan ninda? (b) Ano an saboot nindo manongod sa kaotoban kan mga panuga nin Dios?
9 Bako nanggad madonong na hingoahon na maotob an kamawotan na ini sa paagi na kontra sa diosnon na kadonongan. Iyan magigin kapahamakan nin saro sa espirituwal. Halimbawa, pinili nin nagkapira an mga klase nin pag-asikaso sa salud na kontra sa hatol ni Jehova. An iba nag-ako nin trabaho na nakakaubos nin panahon na para sa saindang pamilya o mga pagtiripon kan kongregasyon. O kumusta man an pagkaigwa nin romantikong relasyon sa bakong kapagtubod? Kun siring kaiyan an sarong Kristiano, talaga daw na hinihingoa niang mamidbid ni Jehova? Ano daw kutana an namatean ni Jehova kun si Abraham nagin bakong mapasensia dapit sa kaotoban kan mga panuga nin Dios sa saiya? Paano kun naggibo si Abraham nin sadiring paagi na mamirmehan giraray sa sarong lugar asin magin bantog imbes na maghalat ki Jehova? (Ikomparar an Genesis 11:4.) Sia daw padagos na magigin midbid ni Jehova sa paborableng paagi?
10 Anong kamawotan an gustong-gusto nindong maotob? Igo na daw an kosog kan pagtubod nindo tanganing makapaghalat ki Jehova, na nanunugang papanigoan an tamang kamawotan nindo? (Sal. 145:16) Arog kan ki Abraham, tibaad dai tolos maotob segun sa panahon na gusto niato an nagkapirang panuga nin Dios. Pero, pinapahalagahan ni Jehova an pagpatalubo niato nin pagtubod na arog ki Abraham asin an paghiro niato kaoyon kaiyan. Sierto nanggad na para sa satong kapakinabangan an paggibo kaiyan.—Heb. 11:6.
Pagkakalaen kan Kapakumbabaan Asin Pagigin Orgolyoso
11. Ano an tibaad nagin mga pribilehio ni Kora, asin ano an minalataw na ipinaparisa kaiyan manongod sa saboot nia sa Dios?
11 Magkalaen nanggad si Moises asin Kora kun dapit sa paggalang sa areglo asin mga desisyon ni Jehova. An reaksion ninda may epekto sa nagin pagmansay sa sainda ni Jehova. Si Kora sarong Kohatitang Levita, asin nagkaigwa nin dakol na pribilehio, na posibleng marhay na kaiba dian an pakaheling na maligtas an nasyon paagi sa pagbalyo sa Dagat na Pula, pagsuportar sa paghokom ni Jehova sa masinuway na mga Israelita sa Bukid nin Sinai, asin pagkaigwa nin papel sa pagdara kan kaban kan tipan. (Ex. 32:26-29; Bil. 3:30, 31) Minalataw na sia dakol na taon na nagin maimbod ki Jehova kaya iginalang sia nin dakol sa kampamento nin Israel.
12. Siring kan ipinapaheling sa pahina 28, paano an pagigin orgolyoso nakaapektar sa pagkamidbid nin Dios ki Kora?
12 Minsan siring, mantang an nasyon nin Israel pasiring sa Dagang Panuga, narisa ni Kora na garo baga may mga problema sa pagdirehir sa nasyon. Dangan 250 iba pang nangengenot na lalaki sa nasyon an kuminampi ki Kora sa pagprobar na gumibo nin mga pagbabago. Segurado si Kora asin an iba pa manongod sa relasyon ninda ki Jehova. Sinabihan ninda si Moises asin Aaron: “Nakakalabi na kamo huli ta an bilog na kasararoan, [anas] magña banal, asin yaon sa tahao ninda si Jehova.” (Bil. 16:1-3) Sobra nanggad an kompiansa asin pagigin orgolyoso ninda! Sinabihan sinda ni Moises: “Ipapahiling ni Jehova kun siisay an magña saiya.” (Basahon an Bilang 16:5.) Sa pagtatapos kan sunod na aldaw, nagadan si Kora asin an gabos na kuminampi sa saiya sa rebelyon.—Bil. 16:31-35.
13, 14. Sa anong mga paagi ipinaheling ni Moises an kapakumbabaan nia?
13 Sa kabaliktaran, si Moises “kanigoan ka boot nin orog sa gabos na tauo na nageerok sa ibabao nin daga.” (Bil. 12:3) Ipinaheling nia an kahoyoan asin kapakumbabaan paagi sa pagigin determinadong sunodon an pagdirehir ni Jehova. (Ex. 7:6; 40:16) Mayong sinasabi sa Biblia na parateng kinukuestion ni Moises an pamamaagi ni Jehova o nauuyam sia huling dapat niang sunodon an mga prosedimientong itinatao ni Jehova. Halimbawa, mapadapit sa pagtogdok kan tabernakulo, nagtao si Jehova nin mga pagboot sagkod sa kasaditsaditing detalye, arog baga kan kolor nin torsido na gagamiton sa paggibo kan mga telang pantolda asin kun pira an botngol kaiyan. (Ex. 26:1-6) Kun an sarong paraataman na tawo sa organisasyon nin Dios nagtatao sa saindo nin instruksion na garo baga sobra kadetalyado, kun beses tibaad mauyam kamo. Minsan siring, si Jehova perpektong paraataman, na buka an palad na nagdedelegar asin nagtitiwala sa mga lingkod nia. Kun sia nagtatao nin dakol na detalye, igwa sia nin marahay na dahelan. Pero, tandaan na si Moises dai nauyam ki Jehova sa pagtao nin instruksion na siring kadetalyado, na garo baga minemenos sia ni Jehova o pinupugolan an pagkamapag-imbento o katalingkasan nia. Imbes, sinierto ni Moises na “siring” nanggad an gibohon kan mga nagtatrabaho bilang pagsunod sa instruksion nin Dios. (Ex. 39:32) Kanigoan na kapakumbabaan! Minidbid ni Moises na ki Jehova an gibohon na idto asin na sia ginagamit sana tanganing mahaman iyan.
14 An kapakumbabaan ni Moises narisa man kan mapaatubang sia sa negatibong mga kamugtakan na personal na nakaapektar sa saiya. Sa sarong pangyayari, si Moises nawaran nin pagpupugol sa sadiri asin dai pinakangbanal an Dios kan mapaatubang sia sa nagrereklamong banwaan. Bilang resulta, sinabi ni Jehova ki Moises na bako sia an madara kan banwaan pasiring sa Dagang Panuga. (Bil. 20:2-12) Tinagalan ninda ni Aaron an pagreklamo kan mga Israelita sa laog nin dakol na taon. Dangan, huling si Moises napasala sa pagkakataon na iyan, dai nia maeeksperyensiahan an haloyon nang hinahalat nia! Ano an nagin reaksion ni Moises? Minsan ngani natural sanang madesganar, mapakumbabang inako ni Moises an desisyon ni Jehova. Aram nia na si Jehova matanos na Dios, na sa Saiya mayong inhustisya. (Deut. 3:25-27; 32:4) Kun iniisip-isip nindo si Moises, bako daw na an pagmansay nindo sa saiya saro na midbid ni Jehova?—Basahon an Exodo 33:12, 13.
An Pagpasakop ki Jehova Nangangaipo nin Kapakumbabaan
15. Ano an manonodan niato sa pagigin orgolyoso ni Kora?
15 May epekto sa pagkamidbid sa sato ni Jehova an reaksion niato sa mga pagliliwat sa pambilog na kinaban na Kristianong kongregasyon asin sa mga desisyon kan mga nangengenot dian. Si Kora asin an kairiba nia ruminayo ki Jehova huli sa sobrang kompiansa, pagigin orgolyoso, asin kakulangan nin pagtubod. Minsan ngani sa pagheling ni Kora an gurang nang si Moises an naggigibo nin pang-aroaldaw na desisyon, si Jehova talaga an nagdidirehir sa nasyon. Nalingawan ni Kora an katotoohan na iyan, kaya dai sia nakapaheling nin kaimbodan sa mga tawong ginagamit nin Dios. Mas madonong kutana kun si Kora naghalat ki Jehova para sa mas malinaw na pakasabot o mga pagliliwat kun talagang kaipuhan iyan. Kaya, sa huri, rinaot ni Kora an saiyang rekord nin maimbod na paglilingkod huli sa pagigin orgolyoso!
16. Paano kita mamimidbid ni Jehova kun susunodon niato an halimbawa nin kapakumbabaan ni Moises?
16 An pagkasaysay na iyan seryosong patanid para sa mga magurang sa kongregasyon asin sa iba pang miembro kaiyan ngonyan. Kaipuhan an kapakumbabaan sa paghalat ki Jehova asin pagsunod sa instruksion kan mga ninombrahan na mangenot. Ipinapaheling daw niato na kita mapakumbaba asin mahoyo arog ni Moises? Kaya daw niatong midbidon an katongdan kan mga nangengenot sa sato asin sunodon an instruksion na itinatao sa sato? Makakaya man daw niatong kontrolon an personal na pagmate niato kun kita nadedesganar? Kun iyo, kita mamimidbid man ni Jehova sa paborableng paagi. Huli sa satong kapakumbabaan asin pagpasakop, kita mamomotan nia.
Midbid ni Jehova an mga Sadiri Nia
17, 18. Ano an makakatabang sa sato na padagos na mamidbid bilang sadiri ni Jehova?
17 Makikinabang kita kun hohorophoropon niato an mga dinagka asin midbid ni Jehova sa paborableng paagi. Si Abraham asin Moises bakong perpekto asin may depekto, arog niato. Pero, midbid sinda ni Jehova bilang sadiri nia. Minsan siring, iiniilustrar kan halimbawa ni Kora na may posibilidad na kita rumayo ki Jehova asin sa siring dai na nia midbidon na may pag-oyon. Marahay na hapoton kan kada saro sa sato an sadiri: ‘Ano an pagmansay sa sako ni Jehova? Ano an manonodan ko sa mga halimbawang ini sa Biblia?’
18 Mararanga kamong marhay sa pakaaram na an pagmansay ni Jehova iyo na sadiri nia an mga maimbod na dinagka nia. Padagos na pataluboon an pagtubod, kapakumbabaan, asin iba pang mga kualidad na makakatabang na orog pa kamong mamotan nin Dios. Mayong duda na an pagigin midbid ni Jehova mahalagang marhay na pribilehio na nagbubunga nin pagkakontento sa buhay niato ngonyan, asin magtatao nin marahayon na mga bendisyon sa maabot na panahon.—Sal. 37:18.
Nagigirumdoman daw Nindo?
• Anong mahalagang marhay na kamugtakan an puede nindong makamtan sa atubangan ni Jehova?
• Paano nindo maaarog an pagtubod ni Abraham?
• Anong mga leksion an manonodan niato ki Kora asin Moises?
[Mga Hapot Para sa Pag-adal]
[Ritrato sa pahina 26]
Arog ni Abraham, kita daw nagtutubod na lubos na ootobon ni Jehova an mga panuga nia?
[Ritrato sa pahina 28]
Habo ni Kora na mapakumbabang magpasakop sa pagdirehir
[Ritrato sa pahina 29]
Midbid daw kamo ni Jehova bilang mapakumbabang nagsusunod sa instruksion?
