?Jehova i Save Yu?
?Jehova i Save Yu?
“Hae God, hem i save finis ol man blong hem.”—2 TIM. 2:19.
1, 2. (a) ?Oltaem Jisas i tingbaot wanem samting? (b) ?Wanem ol kwestin we yumi mas tingbaot?
WAN dei, wan Farisi i askem long Jisas se: “?Wanem loa blong God we i hae moa long ol narafala loa, i winim olgeta evriwan?” Jisas i ansa se: “Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.” (Mat. 22:35-37) Jisas i lavem tumas Jehova. Ol samting we hem i mekem long laef blong hem i soemaot se oltaem hem i tingbaot tingting we Jehova i gat long saed blong hem. From samting ya, bifo we Jisas i ded, Jisas i save harem gud blong tokbaot fasin blong hem blong obei oltaem long God. Hem i talem se: “Mi stap obei long ol tok blong papa blong mi, nao oltaem hem i stap lavem mi.”—Jon 15:10.
2 Plante man tede oli talem se oli lavem God. Mo yumi tu yumi talem samting ya. Be i gat sam impoten kwestin we yumi mas tingbaot, hemia se: ‘?Jehova i gat wanem tingting long saed blong mi? ?Mi mi save talem se Jehova i “save” mi, mo hem i glad long mi? ?Jehova i tingbaot mi se mi mi man blong hem?’ (2 Tim. 2:19) Yu traem tingbaot. !Yumi save fren gud wetem Hae King blong heven mo wol! !Hemia i nambawan tumas!
3. ?From wanem i had blong samfala oli tingbaot se oli save kam man blong Jehova? ?Mo wanem i save givhan long olgeta blong oli gat stret tingting long saed ya?
3 Samfala oli lavem Jehova, be i had yet blong oli tingbaot se oli save fren gud wetem hem. Samfala oli ting se oli nating nomo. From samting ya, oli ting se oli no save kam man blong Jehova. I gud tumas blong save se Jehova i no gat tingting olsem long yumi. (1 Saml. 16:7) Aposol Pol i talem long ol Kristin brata sista blong hem se: “Man we i lavem God, God i savegud hem.” (1 Kor. 8:3) Yu yu mas lavem God blong hem i save yu. Yu traem tingbaot samting ya: ?From wanem yu stap ridim buk ya? ?From wanem yu stap traehad blong mekem wok blong Jehova long olgeta hat blong yu, long olgeta laef blong yu, mo olgeta tingting blong yu? Sipos yu givim laef blong yu i go long Jehova finis mo yu baptaes, ?from wanem yu yu mekem samting ya? Baebol i talem se Jehova i stap lukluk long tingting mo hat blong yumi. Mo olgeta we oli olsem “ol gudgudfala samting,” hem i “pulum” olgeta oli kam long hem. Hemia i min se hem i singaot olgeta blong oli kam fren blong hem. (Ridim Hagae 2:7; Jon 6:44.) Taswe yu save gat strong tingting se yu stap mekem wok blong Jehova from we hem i pulum yu yu kam long hem. Sipos ol man we hem i pulum olgeta oli kam long hem oli stap tru long hem oltaem, bambae hem i neva lego olgeta. God i tinghae long olgeta, mo i lavem olgeta tumas.—Sam 94:14.
4. ?From wanem yumi mas tingbaot oltaem se fasin fren we yumi gat wetem Jehova i wan nambawan blesing?
4 Naoia we Jehova i pulum yumi i kam long hem finis, yumi mas meksua se yumi stap long laef ya we oltaem hem i lavem yumi. (Ridim Jud 20, 21.) Yumi mas tingbaot we Baebol i talem se yumi save lusum rod blong yumi, mo yumi save gowe long God, nao yumi no moa fren blong hem. (Hib. 2:1; 3:12, 13) Jes bifo long ol tok blong 2 Timoti 2:19, aposol Pol i tokbaot Haemenaeas mo Faelitas. I luk olsem se fastaem tufala ya i man blong Jehova, be biaen tufala i lego trutok. (2 Tim. 2:16-18) Samfala we oli stap long ol kongregesen blong Galesia tu, oli lego trutok. Yumi no mas ting nating long nambawan blesing we yumi gat blong fren gud wetem Jehova.
5. (a) ?Wanem sam fasin we Jehova i laekem? (b) ?Bambae yumi tokbaot wanem stori?
5 Sipos yumi wantem se Jehova i save yumi, yumi mas traehad blong gat sam fasin we hem i laekem. (Sam 15:1-5; 1 Pita 3:4) Tu fasin we Jehova i laekem, hemia bilif mo tingting daon. Bambae yumi tokbaot stori blong tu man we Jehova i lavem tufala from we tufala i bilif mo tufala i gat tingting daon. Mo bambae yumi tokbaot wan man we i flas, nao God i no moa fren wetem hem. Bambae stori blong trifala ya i tijim yumi long sam samting we i impoten.
Man Ya We i Stamba Blong Olgeta We Oli Bilif
6. (a) ?Ebraham i mekem wanem samting we i soemaot se hem i bilif long ol promes blong God? (b) ?I minim wanem se Jehova i save Ebraham?
6 Ebraham i wan man we i “bilif strong long Hae God.” Baebol i talem se hem i ‘stamba blong olgeta we oli bilif long God.’ (Jen. 15:6; Rom 4:11) From we Ebraham i bilif long God, hem i lego haos blong hem, ol fren blong hem, wok blong hem, mo gudfala laef blong hem, nao hem i go stap long wan kantri longwe long ples blong hem. (Jen. 12:1-4; Hib. 11:8-10) Ebraham i meksua se bilif blong hem i stap strong oltaem. Plante yia biaen hem i soemaot samting ya taem hem i rere blong obei long God mo kilim pikinini blong hem Aesak i ded, blong givim i go long God. (Hib. 11:17-19) Ebraham i bilif long ol promes blong Jehova, mo samting ya nao i mekem se God i jusumaot hem. Jehova i save Ebraham. (Ridim Jenesis 18:19.) Hemia i no min se Jehova i save nomo we Ebraham i laef. Be i min se Jehova i lavem Ebraham we i fren blong hem.—Jem. 2:22, 23.
7. ?Ebraham i save wanem long saed blong ol promes blong Jehova? ?Mo hem i soemaot bilif blong hem olsem wanem?
7 Jehova i mekem promes long Ebraham se olgeta we oli kamaot biaen long hem, bambae oli winim ol enemi blong olgeta nao oli tekem graon blong ol enemi ya, i blong olgeta. Mo Jehova i talem long Ebraham se olgeta we oli kamaot biaen long hem bambae oli plante we plante “olsem sanbij daon long solwota.” (Jen. 22:17, 18) Ebraham i gohed blong bilif strong long Jehova nating se hem i no luk ol promes ya oli kamtru. Hem i save se oltaem ol promes blong God oli mas kamtru, mo ol samting we hem i mekem long laef blong hem i soemaot bilif blong hem. (Ridim Hibrus 11:13.) ?Olsem wanem? ?Jehova i save yumi se yumi gat bilif olsem Ebraham?
Man We i Wet Long Jehova i Soemaot Se Hem i Bilif
8. ?Wanem sam samting we samfala oli wantem tumas, be oli no save kasem naoia?
8 I gat sam samting we yumi wantem tumas. Maet yumi wantem mared, yumi wantem gat pikinini, mo yumi wantem gat gudfala helt. I no rong blong wantem ol samting ya. Be plante long yumi i no kasem ol samting we yumi wantem. ?Sipos yumi wantem tumas wan samting, be yumi no save kasem naoia, bambae yumi mekem wanem? Samting we yumi mekem i save soemaot se bilif blong yumi i strong no nogat.
9, 10. (a) ?Samfala oli mekem wanem blong kasem ol samting we oli wantem? (b) ?Yu yu harem olsem wanem long saed blong ol promes blong God?
9 I no waes nating sipos yumi traem kasem ol samting ya long wan rod we i agensem tok blong God. Samting ya i save spolem gudfala fasin fren blong yumi wetem Jehova. Yu traem tingbaot. Samfala we oli sik oli jusum blong go luk kleva, no oli agri long sam tritmen we i no stret long tingting blong God. Sam narafala oli jusum wan wok we i mekem se oli no gat taem blong joen wetem famle blong olgeta, mo blong go long ol miting blong kongregesen. Mo samfala oli frenem man no woman we i no wan Witnes blong Jehova. ?Sipos wan Kristin i mekem samting ya, yu ting se hem i stap traehad blong mekem we Jehova i save hem? Yu traem tingbaot sipos Ebraham i no moa wet long Jehova blong i mekem ol promes blong hem i kamtru. ?Bambae Jehova i harem olsem wanem? ?Olsem wanem sipos Ebraham i folem prapa tingting blong hem, mo i go stap gud long wan haos bakegen? ?Olsem wanem sipos hem i traem kasem haenem i bitim we hem i wet long Jehova? (Skelem wetem Jenesis 11:4.) ?Bambae Jehova i tingbaot yet se Ebraham i fren blong hem?
10 ?Wanem ol samting we yu yu wantem tumas? ?Yu yu gat strong bilif blong yu wet long Jehova blong i givim ol samting ya long yu? Hem i promes se bambae “olgeta samting we i laef oli harem gud, from we oli kasem ol samting we oli wantem tumas.” (Sam 145:16, NW) Maet sam promes blong Jehova oli no kamtru kwik olsem we yumi wantem. Be sipos yumi laef long wan fasin we i soemaot se yumi bilif olsem Ebraham, bambae Jehova i no save fogetem yumi. Bambae hem i mekem i gud tumas long yumi.—Hib. 11:6.
Stori Blong Wan Man We i Gat Tingting Daon Mo Wan Man We i Flas
11. ?Wanem wok we Kora i mekem blong plante yia?
11 Bambae yumi tokbaot stori blong tu man we fasin blong tufala i defren. Tufala ya hemia Moses mo Kora. Samting we tufala i mekem i givhan long yumi blong kasem save se tingting we Jehova i gat long yumi, i dipen long fasin blong yumi blong respektem ol desisen blong hem mo ol rod blong hem blong mekem samting. Kora i laen blong Kohat we oli ol Livaet. Maet hem i gat janis blong luk ol samting we Jehova i mekem taem ol man Isrel oli aot long Ijip mo oli krosem Red Si. Mo taem ol man Isrel oli no obei long God long hil ya Sinae, maet Kora i joen wetem olgeta ya we oli mekem jajmen blong Jehova i kamtru. Mo maet hem i givhan blong karem Bokis ya we i Saen blong Promes blong God. (Eks. 32:26-29; Nam. 3:30, 31) I luk olsem se Kora i stap tru long Jehova blong plante yia, mo from samting ya, plante man Isrel oli gat respek long hem.
12. Olsem yu luk long pija long pej 31, ?flas fasin i mekem wanem long fasin fren blong Kora wetem God?
12 Be taem oli stap wokbaot i go long Promes Lan, Kora i ting se wan samting i no stret long fasin we Jehova i stap lidim neson blong Isrel. Hem i wantem jenisim sam samting. Ale 250 man oli joen wetem Kora blong mekem ol jenis ya. Oli ting se Jehova i save olgeta mo oli ting se hem i glad long olgeta. Oli talem long Moses mo Eron se: “!Tufala! !Yutufala i go tumas ya! Yumi evriwan long kampani ya i blong Hae God, mo hem i stap wetem yumi evriwan.” (Nam. 16:1-3) !Olgeta ya oli flas tumas! !Oli ting se oli save rod we i moa gud! Moses i talem long olgeta se: “Hae God bambae i soemaot long yumi se hu nao i tabu, i man blong hem.” (Ridim Namba 16:5.) Long nekis dei nomo, Kora mo olgeta we oli joen wetem hem oli ded.—Nam. 16:31-35.
13, 14. ?Moses i mekem wanem we i soemaot se tingting blong hem i stap daon?
13 Fasin blong Moses i defren olgeta long Kora. “Hem i wan man we tingting blong hem i stap daon moa, i no gat wan narafala man long wol we tingting blong hem i stap daon olsem hem.” (Nam. 12:3) Hem i soemaot we tingting blong hem i stap daon from we hem i mekem ol samting, stret olsem we Jehova i talem long hem. (Eks. 7:6; 40:16) Long Baebol, yumi no luk se Moses i stap komplen oltaem long saed blong rod we Jehova i yusum blong mekem ol samting, mo i no stap kros from we hem i mas folem ol tok blong Jehova. Taem Jehova i talem long Moses blong wokem haos tapolen, hem i talem ol smosmol samting we hem i mas mekem. Hem i talem kala blong ol tred we oli mas yusum mo i talem namba blong ol rop we oli mas somap long ol kaliko. (Eks. 26:1-6) Sipos wan elda long ogenaesesen blong God i talem long yu ol smosmol samting we yu mas mekem long wan wok, maet samtaem yu harem nogud. Be Jehova i lukaot long ogenaesesen blong hem long wan fasin we i stret gud olgeta. Hem i givim wok long ol man blong hem, mo i trastem olgeta se bambae oli mekem gud wok ya. Sipos hem i mas talem plante smosmol samting we oli mas mekem, hemia from wan gudfala risen. Taem Jehova i talem long Moses ol smosmol samting we hem i mas mekem, Moses i no kros long Jehova mo i no ting se Jehova i stap daonem hem. Moses i no ting se Jehova i stap blokem hem blong i mekem samting long tingting blong hem. Be Moses i meksua se ol man blong wok oli “wokem evri samting stret olsem we Hae God i talem.” (Eks. 39:32) !Yes, Moses i gat tingting daon! Moses i save se wok ya i blong Jehova, mo hem i wan man blong wok nomo.
14 Moses i gat tingting daon nating se i harem nogud from sam samting we i hapen long hem. Yumi save tingbaot samting we i hapen taem ol man Isrel oli komplen from we oli no gat wota. Moses i kros tumas long olgeta mo i no leftemap nem blong Jehova. From samting ya, Jehova i talem long Moses se bambae hem i no lidim ol man Isrel oli gotru long Promes Lan. (Nam. 20:2-12) Plante yia Moses mo Eron tufala i gat longfala tingting. Tufala i stap harem komplen blong ol man Isrel. Mo naoia, from mastik ya nomo, Moses i no save kasem samting we hem i stap wet long hem longtaem finis. ?Moses i mekem wanem? I tru se hem i harem nogud tumas. Be hem i gat tingting daon mo hem i folem desisen blong Jehova. Moses i save se Jehova i wan God blong stret fasin, hem i no save mekem wan samting we i no stret. (Dut. 3:25-27; 32:4) Tede, taem yumi tingbaot Moses, yumi tingbaot se hem i wan man we Jehova i savegud hem.—Ridim Eksodas 33:12, 13.
Yumi Mas Gat Tingting Daon Blong Obei Long Jehova
15. ?Yumi lanem wanem long samting we Kora i mekem?
15 Sipos yumi folem ol jenis long Kristin kongregesen, bambae Jehova i glad long yumi. Mo yumi mas gat respek long ol brata we Jehova i yusum blong lidim kongregesen. ?Bambae yumi mekem wanem taem ol brata ya oli mekem sam desisen no taem oli mekem sam jenis long fasin blong yumi blong wok long kongregesen? Kora mo ol man we oli joen wetem hem, oli ting se oli save rod we i moa gud. From samting ya, oli no moa fren blong God. Oli flas mo bilif blong olgeta i no strong. Kora i ting se Moses i wan olfala man we i stap folem prapa tingting blong hem nomo. Be hem i foget se Jehova nao we i stap lidim neson blong Isrel. Olsem nao, Kora i no stap tru long olgeta we God i yusum. Sipos Kora i bin wet nomo long Jehova, Jehova i save givhan long hem blong kasem save from wanem ol samting oli stap olsem no Jehova i save jenisim sam samting. From fasin blong Kora, tede yumi no moa tingbaot se Kora i mekem wok blong Jehova blong plante yia. Be yumi stap tingbaot se hem i no obei long Jehova from we hem i flas tumas.
16. ?Fasin blong Moses blong gat tingting daon i givhan long yumi olsem wanem?
16 Samting we i hapen long Kora i givhan long ol elda mo ol narafala long kongregesen tede, blong oli lukaot gud. Yumi mas gat tingting daon, blong yumi wet long Jehova mo blong yumi obei long olgeta we Jehova i yusum blong lidim kongregesen. ?Olsem wanem? ?Yumi gat tingting daon olsem Moses? ?Yumi kasem save se Jehova i yusum samfala blong lidim kongregesen, mo yumi glad we hem i mekem olsem? ?Yumi mekem ol samting we oli talem long yumi? ?Yumi bos long tingting blong yumi taem yumi harem nogud from sam samting we i hapen? Sipos yumi mekem ol samting ya, bambae Jehova i glad long yumi. Sipos yumi gat tingting daon mo yumi obei, bambae hem i tinghae long yumi.
Jehova i Save Olgeta We Oli Man Blong Hem
17, 18. ?Yumi mas mekem wanem blong Jehova i glad oltaem long yumi?
17 Taem yumi tingting dip long stori blong olgeta we Jehova i lavem olgeta mo i singaot olgeta blong oli fren wetem hem, samting ya bambae i givhan long yumi. Ebraham mo Moses tufala i olsem yumi. Tufala i sinman mo tufala i gat ol trabol long laef blong tufala. Be Jehova i tingbaot tufala se tufala i fren blong hem, tufala i man blong hem. Long saed blong Kora i defren olgeta. Stori blong hem i soemaot se yumi save gowe long Jehova mo yumi no moa fren blong hem. I gud yumi tingbaot ol kwestin olsem: ‘?Wanem tingting blong Jehova long saed blong mi? ?Mi mi lanem wanem long stori blong olgeta ya we Baebol i tokbaot?’
18 Jehova i tingbaot ol man we oli stap tru long hem se oli ol man blong hem. Samting ya i mekem yumi harem gud tumas. Taswe yumi mas traehad oltaem blong gat ol fasin olsem bilif mo tingting daon. Ol fasin olsem bambae oli mekem se God i tinghae moa long yumi. I wan nambawan blesing blong Jehova i save yumi. Olgeta we Jehova i glad long olgeta, oli harem gud long laef blong olgeta naoia, mo bambae oli kasem ol nambawan blesing long fiuja.—Sam 37:18.
?Yu Yu Tingbaot?
• ?I minim wanem se Jehova i save yu?
• ?Yu save mekem wanem blong soemaot se yu bilif olsem Ebraham?
• ?Yumi lanem wanem long stori blong Kora mo Moses?
[Kwestin]
[Tok blong pija long pej 29]
?Yumi bilif olsem Ebraham, se oltaem Jehova i mekem ol promes blong hem i kamtru?
[Tok blong pija long pej 31]
Kora i no gat tingting daon mo i no wantem obei long narafala
[Tok blong pija long pej 32]
?Jehova i save yu olsem wan man we i gat tingting daon mo i obei?
