Ka Sillelo me ren Jiowa?
Ka Sillelo me ren Jiowa?
“Ach Samol a silei chokewe ir noun.”—2 TIM. 2:19.
1, 2. (a) Met Jises a ekieki usun? (b) Ikkefa ekkewe kapas eis sipwe etittiner?
EÜ RÄN emön Farisi a eisini Jises: “Meni allük a kon aüchea seni meinisin?” Jises a pölüweni: “Kopwe echeni ewe Samol om Kot ren unusen lelukom, ren unusen [manauom] pwal ren unusen ekiekum.” (Mt. 22:35-37) Jises a fokkun tongei Seman we me a ekieki usun an üöch mwen mesan. Ina popun me mwen an epwe le mälo a tongeni apasa pwe Kot a silei i usun emön mi tuppwöl le älleasochisi an kewe allük. Ina minne, Jises a nonnom lon än Kot tong.—Jon 15:10.
2 Chommong aramas ikenäi ra erä pwe ra tongei Kot. Ese mwääl a pwal ina usun meefiach. Iwe nge, mi lamot sipwe etittina ekkeei kapas eis: ‘Ngang mi sillelo me ren Kot? Ifa än Kot ekiek usi? Me ren Jiowa ngang emön nöün?’ (2 Tim. 2:19) A ifa me amwararen ach tufichin chiechiöch ngeni ewe Sou Nemenem mi unusen Tekia seni meinisin!
3. Pwata a weires ngeni ekkoch ar repwe lükü pwe ra tongeni wiliti nöün Jiowa? Met epwe älisiir le likitalo ena esin ekiek?
3 Nge a pwal mwo nge weires ngeni ekkoch mi tongei Jiowa ar repwe ekieki pwe ra tufichin wiliti chiechian. Ekkoch ra meefi pwe esor aüchear. Ina popun ra ekieki pwe resap tongeni wiliti emön nöün Jiowa. Sia pwapwa pwe Jiowa a eäni ekiek mi sokkolo usuch. (1 Sam. 16:7) Iei alon ewe aposel Paul ngeni chienan kewe Chon Kraist: “Ewe aramas mi echeni Kot a sil me ren Kot.” (1 Kor. 8:3) A fokkun lamot om kopwe tongei Kot pwe kopwe sill me ren. Ekieki mwo: Met popun ka älleani ei puk? Pwata ka achocho le angang ngeni Jiowa ren unusen letipom, manauom, ekiekum me om pöchökkül? Met a amwökütuk le fangolo manauom me papatais? Ewe Paipel a äweweei pwe Jiowa ewe chon etittina letip, a panato wöün kewe, chokkewe mi aüchea me ren. (Älleani Akai 2:7; Jon 6:44.) Ina minne ka tongeni lükülük pwe ka angang ngeni Jiowa pun I a emmwenukoto pwe kopwe angang ngeni. Esap tongeni pöütaalo chokkewe ra fen ketiw pwe chienan, ika ra amwöchü ar tuppwöl ngeni. A wesewesen aücheaniir me tonger.—Kölf. 94:14.
4. Pwata sipwe aücheaniöchü ach chiechi ngeni Jiowa?
4 Pokiten iei Jiowa a fen panikicheto, mi lamot sipwe tümünü pwe sipwe nonnom lon an we tong. (Älleani Juta 20, 21.) Chechchemeni pwe Paipel a pwäratä pwe aramas ra tongeni pase seni Kot are tokolo seni. (Ipru 2:1; 3:12, 13) Äwewe chök me mwen än aposel Paul apasa alon we lon 2 Timoti 2:19, a kapas usun Himenaus me Filitus, a ffat pwe ekkena rüüemön mwän ra angang ngeni Jiowa, nge mwirin ra tokolo seni minne a enlet. (2 Tim. 2:16-18) Chechchemeni pwe pwal ekkoch lon ekkewe mwichefelin Kalesia ra likitalo ewe enlet. Amwo sipwe aücheaniöchü ach chiechi ngeni Jiowa.
5. (a) Ikkefa ekkoch napanap Kot a aücheani? (b) Pworausen iö kewe sipwele käeö?
5 A wor ekkoch napanap Jiowa a wesewesen aücheani. (Kölf. 15:1-5; 1 Pit. 3:4) Ruu me leir, lükü me tipetekison. Sipwe nengeni pworausen rüüemön mwän Jiowa a tonger pokiten a nom rer ekkena napanap. Sipwe pwal ppi pworausen emön, tittipan pwe a sill me ren Jiowa nge a lamalam tekia, iwe a küna pwe Jiowa a pöütaalo. Sia tongeni käeö ekkoch lesen mi aüchea seni ekkeei pworaus.
Semelapen Chokkewe mi Lükü Kot
6. (a) Pokiten Eperiam a lükü än Jiowa kewe pwon, met a föri? (b) Ifa usun Eperiam a sillelo me ren Jiowa?
6 Eperiam “a lükü ewe Samol mi Lapalap.” Ina popun a fen iteni “semelapen chokewe meinisin mi lükü Kot.” (Ken. 15:6; Rom 4:11) Ren an lükü Kot, a likitalo imwan, chiechian kewe me pisekin meinisin fän iten an epwe lo ngeni eü fönü towau. (Ken. 12:1-4; Ipru 11:8-10) Pwal mwo nge mwirin fite fite ier, a chüen pöchökkül an lükü. A pwälo ena lupwen a “eäni asor Isaak noun we” pwe epwe älleasochisi alon Jiowa. (Ipru 11:17-19) Eperiam a pwäratä pwe a lükü än Jiowa kewe pwon, ina minne a fokkun aüchea me wesewesen sill me ren. (Älleani Keneses 18:19.) Jiowa ese chök silei pwe i emön mwän mi manau lon ena atun, nge a pwal tongei usun emön chiechian.—Jem. 2:22, 23.
7. Met Eperiam a silei usun än Jiowa kewe pwon? Ifa usun a pwäratä an lükü?
7 Jiowa a pwon ngeni Eperiam pwe mwirimwirin kewe repwe usun “pien aroset” me “repwe nemeni fanüen ekewe chon oputeer.” (Ken. 22:17, 18) Inaamwo ika ena pwon ese pwönüetä le manauen Eperiam, nge a chüen pöchökkül an lükü. A silei pwe än Kot kewe pwon repwe chök pwönüetä me a pwäratä ena lükü ren an manaueni ewe sokkun manau mi apwapwaai Kot. (Älleani Ipru 11:13.) Sia sill me ren Jiowa usun emön mi eäni ewe sokkun lükü Eperiam a eäni?
Wikkiti Jiowa Eü Esissillen Lükü
8. Ikkefa ekkewe mettoch aramas ra kan äneänei?
8 Eli a wor mettoch sia fokkun äneänei. Äwewe chök ren pwüpwülü, nöünöü semirit me pöchökkülen inis. Ekkeei mettoch ese wor ngawan, nge ren chommong leich sise küna pwönütään minne sia tipeni. Ika ina usun, met sipwe föri? Minne sipwe föri epwe pwäraalo ükükün pöchökkülen ach lükü.
9, 10. (a) Met ekkoch ra föri ar repwe apwönüetä minne ra tipeni? (b) Met ka ekieki usun pwönüetään än Kot kewe pwon lon manauom?
9 Esap eü alen tipachem ach sipwe ü ngeni än Kot emmwen ren chök ach sipwe föri minne sia tipeni. Epwe tongeni atai ach chiechiöch ngeni Jiowa. Äwewe chök, ren ar repwe chikar seni ar samau, ekkoch ra filatä ewe sokkun minen älillis mi ü ngeni än Kot emmwen. Ekkoch ra eäni ewe esin angang mi eppeti ar fiti mwich are ese chüen wor ar fansoun ngeni ar famili. Ekkoch ra poputä le sani emön chon lükün. Ika emön Chon Kraist a föri ena, a wesewesen mochen epwe sill me ren Jiowa? Epwe ifa meefien Jiowa ika Eperiam ese mosonottam le witiwiti pwönütään an kewe pwon? Ifa usun ika Eperiam ese wikkitiwiti Jiowa nge a chök nomotiü lon leenian me pwisin kütta iteföüloon? (Alöllö ngeni Keneses 11:4.) Jiowa epwe chüen ekieki pwe Eperiam chiechian?
10 Ikkefa ekkewe mettoch ka fokkun tipeni? Mi pöchökkül om lükü le witiwiti Jiowa, ewe a pwon ngonuk pwe epwe awora om kewe mochen mi tipeeü ngeni letipan? (Kölf. 145:16) Ekkoch än Kot kewe pwon eli rese mwittir pwönüetä lon eü atun sia tipeni. Nge Jiowa a chüen aücheani ach äkkämääraatä ewe esin lükü usun än Eperiam me sopwelo le etipeeü manauach ngeni letipen Kot. Sipwe enletin küna feiöch wachemwuk ren ach föri ena.—Ipru 11:6.
Emön mi Tipetekison me Emön mi Lamalam Tekia
11. Met Kora a fen föri lon fite fite ier?
11 Sipwe nengeni pworausen Moses me Kora, mi sokkofesen napanapen ar föfför. Minne ra föri epwe älisikich le weweiti pwe än Jiowa ekiek usuch mi longolong woon ükükün ach süföliti minne a filatä me napanapen an föri. Kora, emön chon Lifai, mwirimwirin Kohat. Eli a küna än Jiowa amanaua ewe mwuun Israel me lon ewe Setipar, a pwal älisatä än Jiowa kapwüng ngeni chon Israel me woon ewe chukun Sainai, me a älillis le uweifetälei ewe pworofel. (Eks. 32:26-29; Num. 3:30, 31) A ffat pwe Kora a fen tuppwöl ngeni Jiowa ren fite fite ier, iwe, chommong lon Israel ra menniniiti.
12. Ifa usun än Kora lamalam tekia a kküü an chiechiöch ngeni Kot, usun met sia küna lon ewe lios lon pekin taropwe 30?
12 Nge lon ar säi ngeni ewe Fönüen Pwon, Kora a ekieki pwe ese kon pwüng napanapen än Jiowa emmweni Israel, iwe, a mochen föri ekkoch siwil. Mwirin pwal 250 mwän lon Israel ra fiti. Ra meefi nükünüköch pwe a wor ar ririöch ngeni Jiowa. Ra ereni Moses: “Ämi oua kon anapala nemeniemi. Pun unusen ei mwichen aramas a pin, nge ewe Samol mi Lapalap a nom lefiler.” (Num. 16:1-3) A ifa me lamalam tekiar! Moses a ereniir, “Ewe Samol mi Lapalap epwe pwärätä iön noun.” (Älleani Numperis 16:5.) Sorotä, lekuniolun ena rän, Kora me meinisin mi fitaalo an ü ngeni, ra mälo.—Num. 16:31-35.
13, 14. Ifa usun Moses a pwäratä an tipetekison?
13 Moses a sokko seni Kora, i “a fokun tipetekison seni aramasen fanüfan meinisin.” (Num. 12:3) A pwäratä an tipetekison ren an üppos le älleasochisi än Jiowa emmwen. (Eks. 7:6; 40:16) Ese wor pworaus lon Paipel pwe Moses ese kan tipeeü ngeni napanapen än Jiowa föri an angang, are a song pokiten an fiti minne Jiowa a ereni. Äwewe chök, Jiowa a ngeniir chommong allük mi tichik ren kaütään ewe imwenfel, usun chök, anüen terechin me fitu pwäken epwe tetetä woon ekkewe chechen tento. (Eks. 26:1-6) Eli fän ekkoch kopwe meefi letipengaw ika emön sou emmwen lon än Jiowa we mwicheich a ngonuk och kapasen emmwen mi fokkun tichik. Nge Jiowa emön sou emmwen mi unusöch, a ewisa angang ngeni nöün chon angang me a lükülük pwe iir repwe apwönüetä. A wor chommong popun mi mürinnö lupwen a awora emmwen mi tichik. Moses ese song me ese ekieki pwe Jiowa a angei seni an pwüngün filatä. A ereni ekkewe chon angang ar repwe föri meinisin usun minne Jiowa a fen allük ngeniir. (Eks. 39:32) A ifa me tipetekisonun! Moses a mirititi pwe ewe angang, än Jiowa nge a chök nöünöü i le apwönüetä.
14 Moses a tipetekison pwal mwo nge lupwen a wor popun an epwe lichippüng. Äwewe chök, lupwen ekkewe chon Israel ra ngününgününgaw an esor konik, Moses a fokkun song ngeniir me a epiningawa iten Jiowa. Pokiten ena, Jiowa a ereni pwe esap chüen emmwenaalong ekkewe aramas lon ewe Fönüen Pwon. (Num. 20:2-12) Moses me pwiin we, Aaron, ra likiitü fän än chon Israel ngününgününgaw fite fite ier. Nge iei, pokiten eü chök mwäällin Moses, esap chüen tongeni küna minne a fen äneänei fansoun langattam! Met Moses a föri? Pwüngün pwe a lichippüng, nge a tipetekison me ngüüri alon Jiowa. A silei pwe Jiowa emön Kot mi pwüng, “esap wor an mwäl.” (Tut. 3:25-27; 32:4) Ikenäi, lupwen sia ekieki usun Moses, sia küna pwe i mi fen sillelo me ren Jiowa.—Älleani Ekistos 33:12, 13.
Lamoten Tipetekison lon ach Älleasochisi Jiowa
15. Met sia käeö seni än Kora lamalam tekia?
15 Jiowa epwe chök pwapwaitikich ika sia etiwa ekkewe ekkesiwil a fis. Mi lamot sipwe süföliti iir kewe Jiowa a nöünöü le emmweni ewe mwichefel. Met sipwe föri lupwen ekkeei mwän ra apwüngalo mettoch me siwili ekkoch kokkot lon ewe mwichefel? Ren än Kora me chienan kewe lamalam tekia me nafangawen lükü, ra pwisin äimurolo seni Kot. Meefien Kora pwe Moses emön chök chinnap mi pwisin apwüngalo ekkewe mettoch lon Israel, nge a mönükaalo pwe wesewesen Jiowa ewe a emmweni Israel. Ina popun, ese pwäratä an tüppwöl ngeni chokkewe Jiowa a nönnöünöü. Epwe fen öch ika Kora a chök witiwiti Jiowa, a fen tongeni älisi le weweiti popun a ina usun kokkotun are siwil ekkoch mettoch ika mi lamot. Pokiten än Kora lamalam tekia, a asolapalo meinisin an angang ngeni Jiowa fän tuppwöl ren fite fite ier.
16. Ifa usun än Moses leenien äppirü ren tipetekison epwe älisikich?
16 Minne a fis ngeni Kora a eü minen öüröür ngeni ekkewe elter me chon mwichefel ikenäi. Mi lamot tipetekison ika sipwe witiwiti Jiowa me älleasochisi chokkewe a nöünöü le emmweni ewe mwichefel. Sia pwäratä pwe kich mi tipetekison usun Moses? Sia mirititi wisen chokkewe ra emmwenikich me älleasochisi ar kewe emmwen? Lupwen sia lichippüng sia nemeniöchü meefiach? Ika sia föri ekkeei mettoch, Jiowa epwe pwapwaitikich me epwe echeni kich ika sia tipetekison me älleasochisi i.
Jiowa a Silei Iö kewe Nöün
17, 18. Met sipwe föfföri pwe Jiowa epwe sillenikich pwe kich nöün?
17 A öch ach sipwe ekieki pworausen chokkewe Jiowa a tonger me etiwer ar repwe chiechian. Eperiam me Moses iir rese unusöch, ra apwangapwang usun chök kich nge ra sillelo me ren Jiowa pwe iir nöün. Iwe nge, pworausen Kora a pwäratä pwe sia tongeni tokolo seni Jiowa, iwe sisap chüen küna an chen me sillelo me ren. Kich meinisin sipwe pwisin eäni ekkeei kapas eis: Ifa än Jiowa ekiek usi? Met ua tongeni käeö seni ekkeei pworaus lon Paipel?
18 Ach silei pwe me ren Jiowa chokkewe mi tuppwöl iir nöün, a fokkun aururukich. Ina popun, sipwe akkapöchökküla ach lükü, pwäppwäratä tipetekison me ekkewe ekkoch napanap pwe epwe lapolo än Jiowa echeni kich. Ach sillelo me ren Jiowa a eü feiöch, epwe atoto pwapwa wachemwuk iei me lon mwach kkan.—Kölf. 37:18.
Ka Chechchemeni?
• Met weween än emön sillelo me ren Jiowa?
• Ifa usun kopwe äppirü än Eperiam lükü?
• Ikkefa ekkewe lesen sia käeö seni Kora me Moses?
[Kapas Eis fán Iten ewe Lesen]
[Sasing lon pekin taropwe 29]
Usun chök Eperiam, sia lükü pwe Jiowa epwe unusen apwönüetä an kewe pwon?
[Sasing lon pekin taropwe 30]
Kora ese tipetekison me ese älleasochisi ekkewe emmwen
[Sasing lon pekin taropwe 31]
En mi sillelo me ren Jiowa usun emön mi tipetekison me älleasochis?
