Am-ammonaka Kadi ni Jehova?
Am-ammonaka Kadi ni Jehova?
“Ammo ni Jehova dagidiay kukuana.”—2 TIM. 2:19.
1, 2. (a) Ania ti pakaseknan ni Jesus? (b) Ania dagiti saludsod nga usigentayo?
NAMINSAN, dinamag ti maysa a Fariseo ken Jesus: “Ania ti kadakkelan a bilin iti Linteg?” Simmungbat ni Jesus: “Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.” (Mat. 22:35-37) Ay-ayaten unay ni Jesus ti nailangitan nga Amana ken nagbiag a maitunos kadagita a sasao. Maseknan met iti takderna iti imatang ni Jehova, a pinaneknekanna dayta babaen ti kinamatalekna. Gapuna, sakbay la unay ti ipapatay ni Jesus, naikunana a pagaammo ti Dios nga isu ket simamatalek a nagtulnog kadagiti bilinna. Nagtalinaed ni Jesus iti ayat ni Jehova.—Juan 15:10.
2 Adu ita ti agkunkuna nga ay-ayatenda ti Dios. Sigurado a karamantayo iti dayta. Ngem napateg nga usigentayo: ‘Am-ammonak kadi ti Dios? Ania ti panangmatmat kaniak ni Jehova? Ibilbilangnak kadi kas kukuana?’ (2 Tim. 2:19) Anian a nagsayaat a panunoten nga addaantayo iti nasinged a relasion iti Soberano ti uniberso!
3. Apay a pagduaduaan ti dadduma nga ibilang ida ni Jehova a kukuana ken ania ti makatulong tapno maparmek dayta a kapanunotan?
3 Ngem narigat a patien ti dadduma a mangay-ayat ken Jehova a posible ti makigayyem kenkuana. Mariknada nga awan serserbida isu a pagduaduaanda no ibilang ida ni Jehova a kukuana. Ngem anian a makaparagsak ta naiduma ti panangmatmat kadatayo ti Dios! (1 Sam. 16:7) Kinuna ni apostol Pablo kadagiti padana a Kristiano: “No ti asinoman ayatenna ti Dios, am-ammona daytoy a tao.” (1 Cor. 8:3) Masapul nga ayatem ti Dios tapno am-ammonaka. Panunotem: Apay a basbasaem daytoy? Apay nga ikagkagumaam ti agserbi ken Jehova iti amin a puso, kararua, panunot, ken pigsam? No maysakan a dedikado ken bautisado, ania ti nakatignayam a nangaramid iti dayta? Kuna ti Biblia a ni Jehova, a mangsuksukimat iti puso, iyasidegna dagiti matarigagayan a bambanag. (Basaen ti Haggeo 2:7; Juan 6:44.) Maibagam ngarud nga agserserbika ken Jehova gapu ta inyasidegnaka. Dina pulos panawan dagidiay inyasidegna no agtalinaedda a matalek. Nakapatpategda iti Dios, ken ay-ayatenna unay ida.—Sal. 94:14.
4. Apay nga itultuloytayo a paneknekan nga am-ammonatayo ti Dios?
4 Gapu ta inyasidegnatayo ni Jehova, ikagumaantayo koma ti agtalinaed iti ayatna. (Basaen ti Judas 20, 21.) Laglagipentayo a kuna ti Biblia a posible ti mayadayo wenno umadayo iti Dios. (Heb. 2:1; 3:12, 13) Kas pagarigan, sakbay la unay dagiti sasao iti 2 Timoteo 2:19, dinakamat ni apostol Pablo da Himeneo ken Fileto. Agparang a kukua ida idi ni Jehova ngem immadayoda iti kinapudno. (2 Tim. 2:16-18) Dadduma met idi iti kongregasion ti Galacia ti am-ammo ti Dios ngem saanda a nagtalinaed iti naespirituan a lawag. (Gal. 4:9) Ditay koma pulos tagibassiten ti nagpateg a takdertayo iti imatang ti Dios.
5. (a) Ania ti dadduma a galad a nagpateg iti Dios? (b) Ania dagiti ulidan nga usigentayo?
5 Adda dagiti galad nga ipatpateg ni Jehova. (Sal. 15:1-5; 1 Ped. 3:4) Ti pammati ken kinapakumbaba ket pakabigbigan dagidiay am-ammo ti Dios. Usigentayo ti ulidan ti dua a lallaki ket kitaentayo no kasano nga impateg ida ni Jehova gapu kadagita a galad. Usigentayo pay ti maysa a lalaki a nangipagarup nga isu ket am-ammo ti Dios ngem gapu iti kinatangsitna, inlaksid ni Jehova. Adu ti masursurotayo kadakuada.
Ti Ama Dagidiay Addaan Pammati
6. (a) Kasano nga impakita ni Abraham ti pammatina kadagiti kari ni Jehova? (b) Iti ania a wagas a ni Jehova am-ammona ni Abraham?
6 Ni Abraham ket “naaddaan iti pammati ken Jehova.” Kinapudnona, naawagan kas “ama dagidiay amin nga addaan iti pammati.” (Gen. 15:6; Roma 4:11) Gapu iti pammati ni Abraham, pinanawanna ti pagtaengan, gagayyem, ken sanikuana ket napan iti adayo a daga. (Gen. 12:1-4; Heb. 11:8-10) Nagtalinaed a natibker ti pammati ni Abraham iti panaglabas ti adu a tawen. Nalawag dayta idi “kaslanan indaton ni Isaac” nga anakna kas panagtulnog iti bilin ni Jehova. (Heb. 11:17-19) Nangipakita iti pammati kadagiti kari ti Dios isu nga imbilang ni Jehova kas naisangsangayan; pudno nga am-ammona ni Abraham. (Basaen ti Genesis 18:19.) Isu ket saan laeng nga am-ammo ni Jehova, impategna pay kas maysa a gayyem.—Sant. 2:22, 23.
7. Ania ti ammo ni Abraham maipapan kadagiti kari ni Jehova? Kasano nga impakitana ti pammatina?
7 Bayat ti panagbiag ni Abraham, saanna a naawat ti tawid a daga a naikari kenkuana. Dina met nakita ti bin-ina a nagbalin “kas kadagiti binukel ti darat nga adda iti aplaya.” (Gen. 22:17, 18) Nupay saan a natungpal dagita a kari idi panawenna, nagtalinaed a natibker ti pammatina ken Jehova. Ammona a no nagkari ti Dios, kasla natungpalen dayta. Wen nagbiag ni Abraham maitunos iti dayta a pammati. (Basaen ti Hebreo 11:13.) Am-ammonatayo kadi ni Jehova nga addaan iti pammati a kas ken Abraham?
Panaguray ken Jehova—Pakakitaan iti Pammati
8. Aniada a maitutop a tarigagay ti il-iliwen ti dadduma a matungpal?
8 Mabalin nga adda dagiti il-iliwentayo a matungpal kas iti panagasawa, maaddaan iti annak, ken nasayaat a salun-at. Normal laeng ken maitutop dagita a tarigagay. Ngem iti dadduma, mabalin a saan a natungpal ti maysa wenno ad-adu pay kadagita. No kasta ti kasasaadtayo, makita ti kadakkel ti pammatitayo iti wagas a panangtamingtayo kadagita.
9, 10. (a) Ania ti inaramid ti dadduma tapno matungpal dagiti tarigagayda? (b) Kombinsidoka kadi a matungpal dagiti kari ti Dios?
9 Saan a nainsiriban a salungasingem ti pagalagadan ti Dios tapno laeng matungpal ti tarigagaymo. Pagpeggadenna ti espiritualidadmo. Kas pagarigan, adda dagidiay nangpili iti pamay-an ti pannakaagas a maikontra iti bilin ni Jehova. Dadduma ti immawat iti trabaho a mangibus iti tiempo para iti pamiliada ken kadagiti gimong ti kongregasion. Adda pay dagidiay nakinobio wenno nakinobia kadagiti saan nga agserserbi ken Jehova. No aramiden dayta ti maysa a Kristiano, talaga kadi a kayatna nga isu ket maam-ammo ni Jehova? Ania ngata ti narikna ni Jehova no saan a nakauray ni Abraham kadagiti kari ti Dios? Kasanon no isu a mismo ti mangaramid iti pamay-an nga agnaed a permanente iti maysa a lugar ken pagbalinenna a nalatak ti bagina imbes nga aguray ken Jehova? (Idilig ti Genesis 11:4.) Agtultuloy ngata nga ibilang ni Jehova kas gayyemna?
10 Ania dagiti il-iliwem a matungpal? Natibker kadi ti pammatim nga aguray ken Jehova a nangikari a penkenna dagiti umiso a tarigagaymo? (Sal. 145:16) Kas ken Abraham, ti dadduma a kari ti Dios ket mabalin a saan a dumteng iti tiempo a ninamnamatayo. Ngem no itultuloytayo ti mangipakita iti pammati a kas ken Abraham, dinatay baybay-an ni Jehova. Sigurado a gunggonaannatayo.—Heb. 11:6.
Ti Nagdumaan ti Kinapakumbaba ken Kinatangsit
11. Ania dagiti pribilehio a tinagiragsak ni Kore? Ania a kababalin ti imparangarangna?
11 Dakkel ti nagdumaan da Moises ken Kore no maipapan iti panagraem kadagiti urnos ken pangngeddeng ni Jehova. Ti reaksionda ket adda epektona iti panangmatmat kadakuada ni Jehova. Ni Kore ket maysa a Kohatita a Levita ken aduan iti pribilehio. Mabalin a ramanen dayta ti pannakakitana iti panangisalakan ni Jehova kadagiti Israelita iti Nalabaga a Baybay, panangsuportana iti panangukom ni Jehova kadagiti nasukir nga Israelita iti Bantay Sinai, ken maysa kadagiti agaw-awit iti lakasa ti tulag. (Ex. 32:26-29; Num. 3:30, 31) Agparang a nasungdo ken Jehova iti adu a tawen ken raraemen ti adu nga Israelita.
12. Kas nailadawan iti panid 28, ania ti epekto ti kinatangsit ni Kore iti pannakaam-ammo kenkuana ti Dios?
12 Ngem bayat nga agturturong dagiti Israelita iti Naikari a Daga, impagarup ni Kore nga adda di umiso iti urnos ti Dios. Kalpasanna, 250 a lallaki ti dimmasig ken Kore ket kayatda ti mangaramid kadagiti panagbalbaliw. Mabalin nga agtalekda a nasinged ti relasionda ken Jehova. Kinunada ken Moises: “Umanayen dayta kadakayo, agsipud ta ti intero a gimong nasantuanda amin ket ni Jehova adda iti tengngada.” (Num. 16:1-3) Natangsit ken nalabes ti panagtalekda iti bagida! Insungbat ni Moises: “Ipakaammonto ni Jehova no asino ti kukuana.” (Basaen ti Numeros 16:5.) Sakbay nga agngudo ti sumaruno nga aldaw, natay ni Kore ken ti amin a dimmasig kenkuana.—Num. 16:31-35.
13, 14. Kadagiti ania a pamay-an nga impakita ni Moises ti kinapakumbabana?
13 Iti kasumbangirna, ni Moises ti “kaemmaan pay laeng iti amin a tattao nga adda iti rabaw ti daga.” (Num. 12:3) Impakitana ti kinaemma ken kinapakumbabana babaen ti panangsurotna iti amin a bilin ni Jehova. (Ex. 7:6; 40:16) Awan ti mangipakita a kinuestionar ni Moises ti pamay-an ni Jehova a mangaramid iti bambanag wenno nasuron a mangsurot kadagiti bilinna. Kas pagarigan, nangted ni Jehova kadagiti detalyado a bilin maipapan iti pannakaibangon ti tabernakulo, kas iti kolor ti sinulid, bilang dagiti laog wenno pagyubonan a mausar iti panagaramid kadagiti lupot ti tolda. (Ex. 26:1-6) No dadduma, mabalin a marurodka no mangted ti maysa a manangaywan ti kongregasion kadagiti detalyado unay a bilin. Ngem ni Jehova ket perpekto a manangaywan nga ik-ikkanna dagiti adipenna iti trabaho nga aramidenda ket agtalek kadakuada. Adda naimbag a rason no mangted kadagiti detalyado a bilin. Ngem laglagipentayo nga idi naikkan ni Moises iti adu a detalye, saan a nasuron, dina pinanunot a naikkat ti wayawayana, wenno awan panagraem kenkuana ni Jehova. Imbes ketdi, siniguradona nga aramiden dagiti trabahador ti eksakto nga imbilin ti Dios. (Ex. 39:32) Anian a kinapakumbaba! Ammo ni Moises a trabaho dayta ni Jehova ken isu ti us-usarenna a mangitungpal iti trabahona.
14 Impakita met ni Moises ti kinapakumbabana idi naipasango iti narigat a kasasaad a mabalin a pakaupayanna. Naminsan, saan a nakapagteppel ken dina napadayawan ti Dios gapu kadagiti reklamador a tattao. Kas resultana, imbaga ni Jehova a saan a makastrek ni Moises iti Naikari a Daga. (Num. 20:2-12) Adu a tawen nga inan-anusanda ken Aaron ti panagtanabutob dagiti Israelita. Ngem gapu laeng iti maysa a kamali saannan a matagiragsak ti nabayagen nga inur-urayna! Ania ti reaksion ni Moises? Nupay mabalin a naupay, sipapakumbaba nga inawatna ti desision ni Jehova. Ammona a nalinteg a Dios ni Jehova ken kinahustisia ti amin nga aramidna. (Deut. 3:25-27; 32:4) No panunotem ni Moises, maibagam kadi nga isu ket am-ammo ni Jehova?—Basaen ti Exodo 33:12, 13.
Kasapulan ti Kinapakumbaba iti Panagpasakup ken Jehova
15. Ania ti maadaltayo iti kinatangsit ni Kore?
15 Am-ammonatayo ni Jehova no awatentayo dagiti panagbalbaliw ken desision dagiti mangidadaulo iti kongregasion. Simmina iti Dios da Kore ken ti kakaduana gapu iti nalabes a panagtalekda iti bagida, natangsitda, ken bassit ti pammatida. Para ken Kore, ti lakayen a ni Moises ti inaldaw nga agar-aramid iti desision ngem nalipatanna a ni Jehova ti talaga a mangiturturong iti nasion, isu a saan a nagtalinaed a nasungdo kadagiti us-usaren ti Dios. Nasaysayaat koma no naguray ken Jehova a mangted kadagiti pannakalawlawag wenno panagbalbaliw no kasapulan. Nagbanaganna, dinadael ni Kore ti matalek a panagserbina gapu iti kinatangsitna!
16. No napakumbabatayo kas ken Moises, ania ti epekto dayta iti pannakaam-ammo kadatayo ni Jehova?
16 Agserbi dayta a salaysay kas pakdaar kadagiti panglakayen ken dadduma pay iti kongregasion ita. Kasapulan ti kinapakumbaba iti panaguray ken Jehova ken iti panagtulnog iti bilin dagiti nadutokan a mangidaulo. Napakumbaba ken naemmatayo kadi kas ken Moises? Bigbigentayo kadi ti akem dagiti mangidadaulo kadatayo ken agpasakup iti panangiwanwanda? Kabaelantayo kadi a kontrolen ti riknatayo no maupaytayo? No kasta, am-ammo ken ipatpategnatayo ni Jehova gapu iti kinapakumbaba ken panagpasakuptayo.
Am-ammo ni Jehova Dagidiay Kukuana
17, 18. Ania ti makatulong tapno agtultuloytayo nga am-ammo ken kukua ni Jehova?
17 Nagsayaat a panunoten dagidiay inyasideg ni Jehova ken an-anamonganna. Imperpekto ken adda pagkapuyan da Abraham ken Moises a kas kadatayo. Ngem am-ammo ida ni Jehova kas kukuana. Ti ulidan ni Kore ipakitana a posible a mayadayotayo ken Jehova ket mapukawtayo ti anamongna. Nasayaat nga isaludsodtayo iti bagitayo: ‘Ania ti panangmatmat kaniak ni Jehova? Ania ti maadalko kadagiti pagarigan iti Biblia?’
18 Makaparagsak a maammuan nga ibilang ni Jehova a kukuana dagidiay matalek nga inyasidegna. Itultuloymo a parayrayen ti pammatim, kinapakumbabam, ken dadduma pay a galad tapno ad-adda a maipategnaka ti Dios. Naisangsangayan a pribilehio no am-ammonaka ni Jehova. Mangted dayta iti makapnek a biag ita ken agkakaimbag a bendision iti masanguanan.—Sal. 37:18.
Malagipyo Kadi?
• Ania a nagpateg a takder ti mabalintayo a tagiragsaken iti imatang ni Jehova?
• Kasanotayo a matulad ti pammati ni Abraham?
• Ania ti maadaltayo kada Kore ken Moises?
[Salsaludsod]
[Ladawan iti panid 26]
Kas ken Abraham, kombinsidotayo kadi nga itungpal amin ni Jehova ti karina?
[Ladawan iti panid 28]
Saan a napakumbaba ken saan a managpasakup ni Kore
[Ladawan iti panid 29]
Pagaammonaka kadi ni Jehova a napakumbaba ken managpasakup?
