Kana Mwa Zibwa Ki Jehova?
Kana Mwa Zibwa Ki Jehova?
“Mulena [Jehova] u ziba ba ba li ba hae.”—2 TIM. 2:19.
1, 2. (a) Jesu naa lata ku ezañi? (b) Ki lipuzo lifi ze lu swanela ku ipuza?
KA ZAZI le liñwi, Mufalisi yo muñwi a buza Jesu, a li: “Taelo ye tuna ya Mulao ki ifi?” Jesu a alaba, a li: “Lata Mulena Mulimu wa hao, ka pilu ya hao kaufela, ni ka moya wa hao kaufela, ni ka kutwisiso ya hao kaufela.” (Mat. 22:35-37) Jesu naa lata hahulu Ndatahe wa kwa lihalimu mi naa pilile ka ku lumelana ni manzwi ao. Jesu naa bonisize ka mupilelo wa hae kuli naa lata ku tabisa Jehova. Kabakaleo, nakonyana a si ka shwa kale, naa bulezi kuli naa ipeile ku utwa Mulimu ka busepahali. Naa ize: “Ni mamezi litaelo za Ndate, mi ni inzi mwa lilato la hae.”—Joa. 15:10.
2 Batu ba bañata kacenu ba li ba lata Mulimu. Ni luna lwa bulelanga cwalo. Kono ku na ni lipuzo za butokwa ze lu tokwa ku ipuza, ze cwale ka ze: ‘Kana na zibwa ki Mulimu? Jehova u ni nga cwañi? Kana u ni nga kuli ni wa hae?’ (2 Tim. 2:19) Ki nto ye tabisa hahulu ku ziba kuli lwa kona ku ba ni bulikani bo bu tiile cwalo ni Muambakani ya Pahami!
3. Ki kabakalañi batu ba bañwi ha ba ikutwanga kuli ha ba koni ku ba ba Jehova, mi ba kona ku tuhela cwañi ku ikutwa cwalo?
3 Kono batu ba bañwi ba ba lata hahulu Jehova ku ba belanga taata ku lumela kuli ba kona ku ba balikani ba hae. Ba bañwi ba ikutwanga kuli ha ba na tuso. Kabakaleo, ba nahana kuli ha ba koni ku ba ba Jehova. Ki nto ye nde ku ziba kuli Jehova ha lu ngi cwalo. (1 Sam. 16:7) Muapositola Paulusi naa bulelezi Bakreste ka yena kuli: “Mutu ha lata Mulimu, ki yena ya zibwa ki Mulimu.” (1 Makor. 8:3) Ku lata Mulimu ku butokwa hahulu kuli lu zibwe ki yena. Ha mu nahanisise taba ye: Ki kabakalañi ha mu bala magazini ye? Ki kabakalañi ha mu ikataza ku sebeleza Jehova ka pilu ya mina kaufela, ka moyo wa mina kaufela, ka muhupulo wa mina kaufela, ni ka maata a mina kaufela? Haiba nji mu ineezi ku Mulimu mi mu kolobelizwe, ki kabakalañi ha ne mu ezize cwalo? Bibele i bulela kuli Jehova, yena ya tatuba lipilu, u hohanga batu ba ba butokwa sina bufumu. (Mu bale Hagai 2:7; Joani 6:44.) Kabakaleo, mwa kona ku ba ni buikolwiso bwa kuli mu sebeleza Jehova kabakala kuli u mi hohile. Ha na ku yubeka batu ba ba hohilwe ki yena haiba ba zwelapili ku sepahala. Ki ba butokwa hahulu ku yena, mi u ba lata hahulu.—Samu 94:14.
4. Ki kabakalañi ha lu swanela ku hupulanga kuli bulikani bwa luna ni Mulimu ki bwa butokwa hahulu?
4 Jehova ha sa lu hohile, lu swanela ku ina mwa lilato la hae. (Mu bale Juda 20, 21.) Mu hupule kuli Bibele i bonisa kuli kwa konahala ku yenduka kamba ku ikauhanya ku Mulimu. (Maheb. 2:1; 3:12, 13) Ka mutala, Paulusi a si ka bulela kale ze ñozwi kwa 2 Timotea 2:19, naa bulezi ka za Imeneo ni Fileto. Ku bonahala kuli baana ba babeli bao ne ba banga ba Jehova sapili, kono hasamulaho ne ba keluhile mwa niti. (2 Tim. 2:16-18) Mu hupule hape kuli mwa liputeho za mwa Galatia, batu ba bañwi ba ne ba zibwa ki Mulimu ne ba si ka zwelapili ku ina mwa niti. (Magal. 4:9) Kamukwaocwalo, lu swanela ku hupulanga kuli bulikani bwa luna ni Mulimu ki bwa butokwa hahulu.
5. (a) Ki tufi tulemeno to tuñwi to lu tokwa ku ba ni tona kuli lu zibwe ki Mulimu? (b) Ki mitala ifi ye lu ka nyakisisa?
5 Ku na ni tulemeno to lu tokwa ku ba ni tona kuli lu zibwe ki Jehova. (Samu 15:1-5; 1 Pit. 3:4) To tuñwi twa tulemeno to, ki tumelo ni buikokobezo. Ha lu nyakisiseñi mitala ya baana ba babeli ba ne ba latiwa ki Jehova kabakala kuli ne ba bonisize tulemeno to. Hape lu ka ituta ka za muuna ya naa na ni buikuhumuso mi kabakaleo a haniwa ki Mulimu. Lwa kona ku ituta lituto za butokwa kwa mitala yeo.
Ndatahe Batu ba ba na ni Tumelo
6. (a) Abrahama naa bonisize cwañi tumelo mwa lisepiso za Jehova? (b) Jehova naa nga cwañi Abrahama?
6 Abrahama naa li muuna ya naa “lumela ku Muñaa Bupilo.” Mane u bizwa kuli ki “ndatahe ba ba lumela kaufela.” (Gen. 15:6; Maro. 4:11) Ka tumelo, Abrahama naa siile munzi wa habo yena, balikani, ni bupilo bwa simbombo mi a tutela kwa naha ya kwahule. (Gen. 12:1-4; Maheb. 11:8-10) Abrahama naa zwezipili ku ba ni tumelo ye tiile. Nto ye bonisa cwalo kikuli hamulaho wa lilimo-limo naa itukiselize ku mamela taelo ya Jehova ya ku eza mwanaa hae Isaka sitabelo. (Maheb. 11:17-19) Abrahama naa bile ni tumelo mwa lisepiso za Jehova, mi a katelwa ki Mulimu. Jehova naa lata Abrahama sina mulikanaa hae.—Mu bale Jakobo 2:22, 23.
7. Abrahama naa zibañi ka za lisepiso za Jehova, mi naa bonisize cwañi tumelo ya hae?
7 Jehova naa sepisize Abrahama kuli baikulu ba hae ne ba ka “luwa minyako ya lila za bona” mi ne ba ka ba “sina lishabati le li fa likamba la liwate.” (Gen. 22:17, 18) Nihaike kuli lisepiso zeo ne li si ka talelezwa ka nako ya naa pila Abrahama, naa zwezipili ku ba ni tumelo ye tiile ku Jehova. Naa ziba kuli lisepiso za Mulimu za talelezwanga kamita, mi naa bonisize tumelo yeo ka mupilelo wa hae. (Mu bale Maheberu 11:13.) Kana Jehova u lu ziba kuli lu na ni tumelo ye swana sina ya Abrahama?
Mu Bonise Tumelo ka ku Libelela Jehova
8. Ki lika lifi ze ba lakazanga hahulu batu ba bañata?
8 Mwendi ku na ni lika ze lu lakaza hahulu, ze cwale ka ku kena mwa linyalo, ku ba ni bana, ni ku ikangula. Litakazo zeo ha li si ka fosahala. Kono buñata bwa luna ha lu fumanangi lika ze lu lakaza. Haiba lu mwa muinelo o cwalo, lwa kona ku bonisa mo i tiyezi tumelo ya luna ka lika ze lu ka eza.
9, 10. (a) Ba bañwi ba ezizeñi kuli ba fumane ze ba bata? (b) Mu nahanañi ka za ku talelezwa kwa lisepiso za Jehova?
9 Ku tula mulao wa Mulimu kuli lu fumane lika ze lu bata ki butoto. Ku eza cwalo kwa kona ku sinya bulikani bwa luna ni Jehova. Ka mutala, ba bañwi ba ketile likalafo ze sa lumelelani ni likuka za mwa Bibele. Ba bañwi bona ba keni misebezi ye ba palelwisa ku banga hamoho ni mabasi a bona kamba ku fumanehanga kwa mikopano. Mi ba bañwi ba kenanga mwa libato ni batu ba ba sa sebelezi Jehova. Haiba Mukreste a eza cwalo, kana luli u bata ku zibwa ki Jehova? Jehova naa ka be a ikutwile cwañi kambe Abrahama naa si ka libelela lisepiso za hae? Ne ku ka ba cwañi kambe Abrahama naa ikezelize za naa lata ka ku ikahela munzi ni ku ikezeza libizo ku fita ku libelela Jehova? (Mu bapanye Genese 11:4.) Kana naa ka zwelapili ku zibwa ki Jehova?
10 Ki lika mañi ze mu lakaza hahulu? Kana mu na ni tumelo ye tiile ya ku libelela Jehova, ya sepisa ku lu fa lika ze nde ze lu bata? (Samu 145:16) Lisepiso ze ñwi za Jehova ha li talelezwangi honafo ka nako ye lu li bata. Kono Jehova ha na ku lu libala haiba lu zwelapili ku pila ka nzila ye bonisa kuli lu na ni tumelo ye swana sina ya Abrahama. Ku eza cwalo ku ka lu fumanisa mupuzo.—Maheb. 11:6.
Shutano ye Mwahalaa Buikokobezo ni Buikuhumuso
11. Ki lika mañi za naa ezize Kora ka lilimo ze ñata?
11 Ha lu nyakisiseñi mitala ya batu ba babeli ba ne ba shutana ili bo Mushe ni Kora. Ze ne ba ezize li lu tusa ku utwisisa mwa lu ngela Jehova ku likana ni mo lu bonela likatulo ni likezo za hae. Kora naa li Mulivi wa lusika lwa Makohati. Ku bonahala kuli naa bile ni tohonolo ya ku iponela za naa ezize Jehova kuli a pilise Maisilaele mwa Liwate le li Fubelu. Mi mwendi naa li yo muñwi wa batu ba naa itusisize Jehova ku bulaya Maisilaele ba ne ba si ka ipeya ku utwa ha ne ba li kwa Lilundu la Sinai, mi mwendi naa tusanga kwa ku shimba aleka ya bulikani. (Ex. 32:26-29; Num. 3:30, 31) Ku bonahala kuli naa sepahalile ku Jehova ka lilimo ze ñata, mi kabakaleo Maisilaele ba bañata ne ba mu kuteka.
12. Sina mo ku boniselizwe fa likepe la 28, Kora naa ngiwa cwañi ki Mulimu bakeñisa buikuhumuso bwa hae?
12 Kono Maisilaele ha ne ba liba kwa Naha ya Sepiso, Kora naa nahanile kuli ne ku na ni nto ye ñwi ye ne fosahalile ka mwa naa zamaiseza sicaba Jehova. Mi manduna ba 250 ba yema ni Kora kuli ba eze licinceho. Ne ba ikutwile kuli ne ba na ni bulikani bo bu tiile ni Jehova ni kuli ne ba lumelelwa ki yena. Ne ba ize ku Mushe ni Aruni, ba li: “Mu na ni muipo hahulu; kanti Kopano kaufela i kenile, mutu ni mutu, mi Muñaa Bupilo u mwahalaa bona.” (Num. 16:1-3) Manzwi a bona ao a bonisa kuli ne ba na ni buikuhumuso luli mi ne ba ezize ka buisepo bo bu tulile tikanyo. Mushe a ba bulelela, a li: “Muñaa Bupilo u ka bonisa ye li wa hae.” (Mu bale Numere 16:5.) Ha li to fitanga lizazi le li tatama manzibwana, Kora ni batu kaufela ba ne ba swalisani ni yena ne se ba shwile.—Num. 16:31-35.
13, 14. Mushe naa bonisize cwañi buikokobezo bwa hae?
13 Kono Mushe yena naa shutana hahulu ni Kora. Mushe “ne li mutu ya musa hahulu, ku fita mutu ni mutu ya mwa lifasi.” (Num. 12:3) Naa bonisize musa wa hae ni buikokobezo ka ku eza feela ka mwa naa mu laelezi Jehova. (Ex. 7:6; 40:16) Ha ku na nto ye bonisa kuli Mushe naa kakanyanga mwa naa ezeza lika Jehova kamba kuli naa nyemanga kabakala kuli naa tokwa ku latelela litaelo za Jehova. Ka mutala, Jehova naa file litaelo kaufela za mo ne i swanela ku yahelwa tabernakele, ze cwale ka mubala wa bwanda ni palo ya mañomelelo ze ne ba tokwa ku itusisa kuli ba luke masila a tabernakele. (Ex. 26:1-6) Haiba muokameli mwa kopano ya Mulimu a mi fa litaelo za mwa ku ezeza nto ni nto, fokuñwi mwa kona ku zwafa. Kono Jehova ki muokameli ya petehile. U fanga batanga ba hae musebezi mi wa ba sepa kuli ba ka u eza hande. Haiba a lu fa litaelo ze ñata, u na ni libaka le li utwahala la ezeza cwalo. Mushe naa si ka nyemela Jehova kamba ku nahana kuli Jehova naa sa mu kuteki bakeñisa ku mu fa litaelo ze ñata-ñata. Naa si ka nahana kuli Jehova naa mu palelwisa ku ba ni tukuluho. Kono Mushe naa bulelezi babeleki kuli ba eze ona cwalo feela mwa naa ba laelezi Jehova. (Ex. 39:32) Mushe naa ikokobeza luli! Naa ziba kuli naa eza musebezi wa Jehova mi naa itusiswa ki yena kuli a pete musebezi wo.
14 Mushe naa bonisize kuli naa na ni buikokobezo niha naa li mwa miinelo ye ne kona ku mu sitatalisa. Ka nako ye ñwi, Mushe naa palezwi ku iswala mi naa palezwi ku kanyisa Mulimu batu ha ne ba bilaezi kuli ne ku si na mezi. Kabakaleo, Jehova naa bulelezi Mushe kuli ha na ku etelela batu ku kena mwa Naha ya Sepiso. (Num. 20:2-12) Mushe ni Aruni ne ba itiisize ka lilimo ze ñata Maisilaele ha ne ba nze ba tongoka. Mi bakeñisa kuli Mushe naa ezize foso i liñwi yeo, naa si ke a fumana nto ya naa lakalize ka nako ye telele! Mushe naa ezize cwañi? Ki niti kuli naa swabile. Kono naa ikokobelize mi naa amuhezi katulo ya Jehova. Naa ziba kuli Jehova ki Mulimu ya lukile, “ya si na bumaswe.” (Deut. 3:25-27; 32:4) Ha lu nahana ka za Mushe kacenu, lwa ziba kuli ki mutu ya naa zibwa ki Jehova.—Mu bale Exoda 33:12, 13.
Lu Tokwa ku Ikokobeza Kuli lu Utwe Jehova
15. Lu kona ku itutañi kwa likezo za Kora ya naa ikuhumusa?
15 Lwa kona ku lumelelwa ki Jehova haiba feela lu amuhela licinceho ze ezwa. Mi lu swanela ku kuteka batu ba itusisa Jehova ku etelela puteho. Lu ezanga cwañi batu bao ha ba eza likatulo kamba licinceho za mwa ku ezeza lika ze ñwi mwa puteho? Bakeñisa kuli Kora ni batu ba ne ba swalisani ni yena ne ba isepile hahulu, ne ba latehezwi ki bulikani bwa bona ni Mulimu. Ne ba ikuhumusa mi ne ba na ni tumelo ye nyinyani. Kora naa nahana kuli Mushe ne li musupali ya naa ikezeza feela za hae, kono naa libezi kuli Jehova ki yena ya naa itusisa Mushe ku etelela sicaba. Kabakaleo, Kora naa si ka sepahala kwa batu ba naa itusisa Mulimu. Naa swanela ku libelela Jehova kuli a mu tuse ku utwisisa kamba kuli a cince lika haiba nji luli ne li tokwahala ku cinciwa. Bakeñisa kuli Kora naa ezize cwalo, kacenu ha lu hupulangi ka za mwa naa sebelelize Jehova ka busepahali. Lu mu hupulanga kuli ne li mutu ya naa si ka utwa Jehova kabakala buikuhumuso bwa hae.
16. Mutala wa Mushe wa ku ikokobeza u kona ku lu tusa cwañi?
16 Ze ne ezahezi ku Kora ki temuso kwa baana-bahulu ni ba bañwi mwa puteho kacenu. Lu tokwa ku ba ni buikokobezo kuli lu libelele Jehova ni ku latelela zamaiso ya batu ba ketile. Kana lwa bonisanga kuli lu na ni buikokobezo ni musa sina mwa naa inezi Mushe? Kana lwa utwisisa ni ku lumela kuli Jehova ki yena ya itusisa batu ba ba etelela mwa puteho? Kana lwa mamela litaelo za bona? Kana lwa iswalanga ha lu sitatalisizwe? Haiba lu eza cwalo, lu ka lumelelwa ki Jehova. Mi haiba lu ikokobeza ni ku mu utwa lu ka ba batu ba butokwa ku yena.
Jehova wa Ziba Batu ba ba li ba Hae
17, 18. Ki lika mañi ze ka lu tusa ku zwelapili ku lumelelwa ki Jehova?
17 Ki hande ku nahanisisa mitala ya batu ba ne ba hohilwe ki Jehova ni ku zibwa ki yena. Abrahama ni Mushe ne li batu ba ba si ka petahala mi ne ba na ni mifokolo sina mo lu inezi luna. Nihakulicwalo, ne ba zibwa ki Jehova kuli ne li ba hae. Kono mutala wa Kora u bonisa kuli kwa konahala ku ikauhanya ku Jehova ni ku tuhela ku zibwa ki yena. Yo muñwi ni yo muñwi wa luna u swanela ku ipuza kuli: ‘Jehova u ni nga cwañi? Ni kona ku itutañi kwa mitala yeo ya mwa Bibele?’
18 Jehova u nga batanga ba hae ba ba sepahala kuli ki batu ba hae. Taba yeo ya lu omba-omba luli. Kamukwaocwalo, mu tundamene ku ba ni tulemeno to tu cwale ka tumelo ni buikokobezo. Tulemeno to, tu ka tahisa kuli mu be ba butokwa hahulu ku Mulimu wa luna. Ki tohonolo ye tuna ku zibwa ki Jehova. Ba ba lumelelwa ki yena ba tabile cwale mi ba ka fuyolwa hahulu kwapili.—Samu 37:18.
Kana Mwa Hupula?
• Ku zibwa ki Jehova ku talusañi?
• Mu kona cwañi ku ba ni tumelo ye swana sina ya Abrahama?
• Lu itutañi ku Kora ni Mushe?
[Lipuzo za Tuto]
[Siswaniso se si fa likepe 26]
Kana lu na ni tumelo ye swana ni ya Abrahama ya kuli Jehova wa talelezanga lisepiso za hae?
[Siswaniso se si fa likepe 28]
Kora naa sa lati ku latelela litaelo ka buikokobezo
[Siswaniso se si fa likepe 29]
Kana mwa zibwa ki Jehova kuli mu batu ba ba ikokobeza ni ku ipeya ku utwa?
