Udiku mumanyike kudi Yehowa anyi?
Udiku mumanyike kudi Yehowa anyi?
‘Yehowa mmumanye badi bende.’—2 TIM. 2:19.
1, 2. (a) Yezu uvua uditatshisha bua tshinyi? (b) Nnkonko kayi itudi ne bua kudiela?
DITUKU dikuabu mufalesa kampanda wakebeja Yezu ne: ‘Mmukenji kayi udi mutambe mikuabu yonso?’ Yezu wakamuandamuna ne: ‘Sua Mukalenge Nzambi webe ne mutshima webe wonso ne muoyo webe wonso ne lungenyi luebe luonso.’ (Mat. 22:35-37) Yezu uvua munange Tatuende wa mu diulu bikole ne bivua bimuenekela ku nsombelu wende. Nsombelu wa Yezu uvua kabidi uleja ne: uvua uditatshisha bikole bua mushindu uvua Yehowa umuangata. Katupa kakese kumpala kua lufu luende, uvua mua kuamba ne: Nzambi uvua mumanye muvuaye utumikila mikenji yende ne lulamatu. Nunku Yezu wakashala mu dinanga dia Yehowa.—Yone 15:10.
2 Bantu ba bungi lelu badi bamba mudibu banange Nzambi. Nansha tuetu kabidi ke mututu tuamba. Kadi tudi ne bua kudikonka ne: Ndiku mumanyike kudi Nzambi anyi? Mmunyi mudi Yehowa ummona? Ndiku mumanyike bu muntu wende anyi? (2 Tim. 2:19) Kudia bulunda ne Mukalenge wa diulu ne buloba ndiakalenga dinene.
3. Bua tshinyi bitu bikolela bamue bantu bua kuitaba ne: Yehowa udi ubanyisha? Ntshinyi tshidi mua kubambuluisha bua kushintulula lungenyi luabu?
3 Kadi bidi mua kukolela bamue bantu badi banange Yehowa bikole bua kuitaba ne: badi ne mushinga ku mêsu kua Nzambi. Bamue badi badimona tshianana ne bela meji ne: Yehowa ki mmubamanye to. Nunku tudi mua kuikala ne disanka bua kumanya ne: Nzambi udi utumona mu mushindu mukuabu. (1 Sam. 16:7) Mupostolo Paulo wakambila bena Kristo nende ne: “Biananga muntu Nzambi, yeye udi mumanyibue kudi Nzambi.” (1 Kol. 8:3) Bua wewe kumanyika kudi Nzambi, udi ne bua kuanji kumunanga. Anji elabi meji, udi ubala tshibejibeji etshi bua tshinyi? Bua tshinyi udi udienzeja bua kuenzela Yehowa mudimu ne mutshima webe wonso, muoyo webe wonso, lungenyi luebe luonso ne bukole buebe buonso? Wewe muikale mudilambule kudi Nzambi ne mutambule, tshivua tshikusake bua kuenza nunku ntshinyi? Bible udi wamba ne: Yehowa udi ukonkonona mitshima ne ukoka bantu bimpe kudiye. (Bala Hagai 2:7; Yone 6:44.) Nunku, udi mua kuamba ne: udi ukuatshila Yehowa mudimu bualu mmukukoke kudiye. Kakulekela bantu badiye mukoke kudiye buobu bashale anu bamulamate. Nzambi udi ubangata ne mushinga wa bungi ne mmubanange bikole.—Mus. 94:14.
4. Bua tshinyi tudi ne bua kutungunuka ne kuela meji pa malanda etu ne Nzambi?
4 Bu mudi Yehowa mutukoke kudiye, tudi ne bua kuditatshisha bua kushala mu dinanga diende. (Bala Yuda 20, 21.) Tuvuluke ne: Bible udi wamba ne: muntu udi mua kusesuka anyi kulekela Yehowa. (Eb. 2:1; 3:12, 13) Tshilejilu, kumpala kua mupostolo Paulo kutelaye mêyi adi mu 2 Timote 2:19, uvua muanji kuakula bua Humenayo ne Fileto. Bantu aba babidi bavua benzele Yehowa mudimu kadi pashishe bakalua kulekela bulelela. (2 Tim. 2:16-18) Tumanye kabidi ne: mu bisumbu bia mu Galatia muvua bamue bantu bavua kumpala banyishibue kudi Nzambi bakalua kulekela bulelela buvuabu banange. (Gal. 4:9) Katulenguludi malanda masheme atudi nawu ne Nzambi.
5. (a) Ngimue ngikadilu kayi idi Nzambi wanyisha? (b) Mbilejilu kayi bituakonkonona?
5 Kudi imue ngikadilu idi Yehowa munange bikole. (Mus. 15:1-5; 1 Pet. 3:4) Bamue bantu bavua Nzambi muanyishe bavua ne ditabuja ne budipueshi. Tukonkononayi bilejilu bia bantu babidi bua kumona muvua ngikadilu eyi mibasemeje pabuipi ne Yehowa. Netuakule kabidi bua muntu uvua wela meji ne: Nzambi udi umuanyisha kadi uvua mulue kupeta lutambishi ne kumonaye ne: Yehowa uvua mumubenge. Tudi mua kulongela malu mimpe ku bilejilu ebi.
Tatu wa badi bitabuja
6. (a) Mmunyi muvua Abalahama muleje ditabuja mu malu avua Yehowa mulaye? (b) Mmunyi muvua Yehowa wangata Abalahama?
6 Abalahama uvua muntu uvua ‘muitabuje Yehowa.’ Ke bualu kayi badi bamubikila ne: ‘Tatu wa bonso badi bitabuja.’ (Gen. 15:6; Lomo 4:11) Bua ditabuja, Abalahama wakumuka mu musoko wabu, kushiya balunda ne bintu biende bua kuya mu ditunga dia kule. (Gen. 12:1-4; Eb. 11:8-10) Bidimu bia bungi pashishe, ditabuja dia Abalahama ditshivua anu dikole. Diakamueneka pavuaye musue ‘kufila Isaka bu mulambu’ bua kutumikila mukenji wa Yehowa. (Eb. 11:17-19) Abalahama wakaleja ditabuja mu malu avua Yehowa mulaye, nunku Nzambi wakamuangata ne mushinga wa bungi. Bushuwa Yehowa uvua mumanye Abalahama. (Bala Genese 18:19.) Yehowa kavua anu mumanye ne: Abalahama udiku to, kadi uvua mumunange anu bu mulunda wende.—Yak. 2:22, 23.
7. Mbualu kayi butudi ne bua kumanya pa bidi bitangila dikumbana dia malu adi Yehowa ulaya? Mmunyi muvua Abalahama muleje ditabuja diende?
7 Tumanye ne: Abalahama kavua mupiane buloba buvua Nzambi mumulaye pavuaye ne muoyo to. Kavua kabidi mumone muvua dimiinu diende mua kulua ‘bu nsenga ya kukala kua mâyi manene.’ (Gen. 22:17, 18) Nansha muvua milayi eyi kayiyi mikumbane mu matuku ende a muoyo, Abalahama wakashala anu ne ditabuja dikole kudi Yehowa. Uvua mumanye ne: padi Nzambi wamba bualu, budi anu ne bua kukumbana. Bushuwa, ditabuja dia Abalahama divua dimuenekela mu nsombelu wende. (Bala Ebelu 11:13.) Tudiku bamanyike kudi Yehowa bu bantu badi ne ditabuja bu dia Abalahama anyi?
Kutekemena kudi Yehowa ntshimanyinu tshia ditabuja
8. Mmalu kayi mimpe atu bantu bajinga kukumbaja?
8 Tudi mua kuikala ne majinga atudi basue kukumbaja. Tshilejilu, kubuela mu dibaka, kulela bana ne kuikala ne makanda a mubidi mimpe mmajinga mimpe atu nawu bantu bonso. Kadi bantu ba bungi kabatu anu bakumbaja majinga onso aa to. Bikalabi nanku buetu tuetu, mushindu utudi tupita ne bualu ebu udi mua kuleja bukole bua ditabuja dietu.
9, 10. (a) Mmunyi muvua bamue bantu bakebe bua kukumbaja majinga abu? (b) Mmunyi muudi wangata dikumbana dia malu adi Nzambi mulaye?
9 Tuetu basue kukumbaja majinga etu mu mushindu udi kawuyi umvuangana ne meji a Nzambi mbibi. Bidi mua kunyanga ditabuja dietu. Tshilejilu, bamue bantu bavua basungule bua babuondope mu mushindu udi kawuyi umvuangana ne Dîyi dia Yehowa. Bakuabu mbitabe bua kuenza midimu idi ibapangisha bua kusomba pamue ne mêku abu anyi kubuela mu bisangilu. Tudi mua kuamba tshinyi bua disaka mananga ne muntu udi kayi Ntemu? Muena Kristo yeye mutuadije kuenza nunku, udiku bushuwa mua kuikala ukeba bua Yehowa amuanyishe anyi? Mmunyi muvua Yehowa mua kumvua bu Abalahama mutuadije kudiabakena bua dikumbana dia malu avua Nzambi mumulaye? Kadi mmunyi muvua Nzambi mua kumvua bu Abalahama musue kudienzela malu bua kudipetela nzubu munene ne kuenda lumu pamutu pa kutekemena Yehowa? (Tangila Genese 11:4.) Uvuaku mua kutungunuka ne kuikala mumanyike kudi Yehowa anyi?
10 Mmalu kayi audi musue kumona mudiwu akumbana? Udiku ne ditabuja dikole didi mua kukuambuluisha bua kutekemena Yehowa udi mulaye bua kukumbaja majinga ebe onso anyi? (Mus. 145:16) Anu bu muvuabi bua Abalahama, amue malu adi Nzambi mulaye kaakukumbana anu dîba ditudi tuetu tujinga to. Tshidibi, Yehowa mmusue bua tuikale ne ditabuja bu dia Abalahama ne tudileje mu malu atudi tuenza. Kuenza nunku kudi ne mushinga wa bungi.—Eb. 11:6.
Mudi budipuekeshi bushilangane ne lutambishi
11. Ndiakalenga kayi divua Kola mua kuikala nadi? Bidi bituleja tshinyi bua malanda avuaye nawu ne Nzambi?
11 Mose ne Kola bavua bashilangane bikole mu mushindu uvuabu banemeka malu avua Nzambi mulongolole ne mapangadika ende. Malu avuabu benza ke avua menze bua Yehowa abanyishe anyi kabanyishi. Kola uvua muena Lewi wa mu dîku dia Kohata, ne uvua ne diakalenga dia kuenza ne kumona malu a bungi mu mudimu wa Nzambi. Uvua mua kuikala mumone dipikudibua dia tshisamba tshia Isalele ku Mbuu mukunze, mutue nyama ku mikolo dilumbuluisha dia Yehowa dia bena Isalele bantomboji ku mukuna wa Sinai, ne uvua ne mudimu wa kuambula mushete wa tshipungidi. (Ekes. 32:26-29; Nom. 3:30, 31) Bidi bimueneka ne: uvua mulamate Yehowa munkatshi mua bidimu bia bungi ne bena Isalele ba bungi bavua bamuangata ne mushinga.
12. Anu mudibi bileja mu dibeji dia 28, mmunyi muvua lutambishi lunyangile Kola malanda ende ne Nzambi?
12 Kadi pavua tshisamba tshia Isalele tshiya tshitangile mu Buloba bulaya, Kola wakela meji ne: kabatshivua balombola tshisamba mu mushindu muimpe to. Nunku bakulu bakuabu 250 bakakuata ku tshia Kola bua kuteta mua kushintulula malu. Kola ne bantu abu bavua ne bua kuikala bela meji ne: bavua anu ne malanda mimpe ne Yehowa. Bakambila Mose ne: ‘Nudi nutamba kudienzela malu, bualu bua bantu bonso mbantu ba tshijila ne Yehowa udi munkatshi muabu.’ (Nom. 16:1-3) Bushuwa bavua ne didieyemena ne diambu. Mose wakabambila ne: ‘Yehowa neatuleje bantu bende.’ (Bala Nomba 16:5.) Dituku diakalonda, Kola ne bantu bonso bavua baditue nende mu buntomboji bakafua.—Nom. 16:31-35.
13, 14. Mmushindu kayi uvua Mose muleje ne: udi ne budipuekeshi?
13 Kadi Mose yeye ‘uvua ne kalolo be, wakatamba bantu bonso ba pa buloba ne kalolo.’ (Nom. 12:3) Wakaleja kalolo ne budipuekeshi bualu uvua mudisuike bua kulonda bulombodi bua Yehowa. (Ekes. 7:6; 40:16) Kakuena bualu budi buleja ne: Mose uvua welesha mpata mushindu uvua Yehowa wenza malu anyi bivua bimutonda bua kulonda mushindu uvua Yehowa uya ne malu to. Tshilejilu, Yehowa wakaleja too ne mu katoba mushindu wa kuasa ntenta wa kusambakena, kulejaye malu bu mudi mekala a manda ne bungi bua bilamakajilu bia kuasa ku bilamba bia ntenta. (Ekes. 26:1-6) Bidi mua kukutonda wewe muikale wenza mudimu ne muanetu kampanda udi ulombola mudimu kampanda mu bulongolodi bua Yehowa udi ukuleja too ne mu katoba tshiudi ne bua kuenza. Kadi Yehowa mmupuangane ne udi upesha bantu bende midimu ne disanka, mumanye ne: nebayenze bimpe. Padiye umvuija malu too ne mu katoba, udi ne tshidiye wenzela nanku. Nunku tumanyayi ne: Mose kavua mufikile Yehowa munda bua muvuaye mumuleje too ne mu katoba mua kuenza mudimu au bienze anu bu ne: Yehowa uvua umupetula anyi umupangisha bua kuenza mudimu mudilekelele. Kadi Mose wakaditatshisha bua bena mudimu ‘benze malu onso’ anu muvua Nzambi muambe. (Ekes. 39:32) Uvua muleje bushuwa budipuekeshi. Mose uvua mumanye ne: mudimu ngua Yehowa, ne Yehowa uvua ukuata nende mudimu anu bua kuukumbaja.
14 Budipuekeshi buvua nabu Mose buvua bumuenekele kabidi pavuaye utuilangana ne malu avua amunyingalaja. Umue musangu Mose wakajimija didikanda ne wakapanga bua kutumbisha Nzambi kumpala kua bena Isalele bavua badiabakena bua mâyi. Nunku Yehowa wakambila Mose ne: kavua mua kubuela ne bena Isalele mu Buloba bulaya to. (Nom. 20:2-12) Mose ne muanabu Alona bakavua batantamene ntatu ya bungi bua muvua bena Isalele ba bungi badiabakena. Nunku bu muvua Mose muenze tshilema, kavua kabidi mua kubuela mu Buloba bulaya buvuaye mutekemene munkatshi mua bidimu bia bungi to. Mose wakenza tshinyi? Nansha muvuaye mua kuikala mutekete mu mikolo, Mose wakitaba dipangadika dia Yehowa ne budipuekeshi buonso. Uvua mumanye ne: Yehowa udi Nzambi wa buakane udi kayi ne malu mabi. (Dut. 3:25-27; 32:4) Paudi welangana meji pa tshilejilu tshia Mose, kuenaku umona ne: Yehowa uvua umuanyisha anyi?—Bala Ekesode 33:12, 13.
Bua kukokela Yehowa bidi bikengela kuikala ne budipuekeshi
15. Tudi mua kulongela tshinyi ku lutambishi lua Kola?
15 Mushindu utudi tuenza malu padibu bakajilula amue malu mu tshisumbu tshia bena Kristo ne padi bana betu badi batulombola bangata mapangadika udi ne buenzeji pa malanda etu ne Yehowa. Kola ne bena diende bakumbuka kudi Nzambi bua didieyemena, lutambishi ne dipanga ditabuja. Nansha muvua Kola umona ne: Mose muntu mukulakaje ke uvua wangata mapangadika ku dituku ne ku dituku bua tshisamba tshijima, mu bulelela Yehowa ke uvua utshilombola. Kola wakapua bualu abu muoyo, ke bualu kayi wakapanga bua kulamata bantu bavua Nzambi ukuata nabu mudimu. Bivua mua kuikala bimpe bu Kola mueyemene Yehowa bua kutokesha malu anyi kuakudimuna bikalabi bivua bikengela. Ndekelu wa bionso, Kola wakanyanga mudimu wende wonso uvuaye muenzele Yehowa ne lulamatu anu bua lutambishi.
16. Mmunyi mudi tshilejilu tshia Mose tshia budipuekeshi mua kutuambuluisha?
16 Bualu ebu ndilongesha dinene bua bakulu ne bantu bakuabu mu tshisumbu lelu. Kueyemena Yehowa ne kulonda bulombodi budibu bafila kudi bantu badiye muteke bua kutulombola kudi kulomba budipuekeshi. Tutuku petu tuleja ne: tudi ne budipuekeshi ne kalolo anu bu Mose anyi? Tudiku mua kuanyisha muaba udi nawu badi batulombola mu tshisumbu ne kukokela bulombodi buabu anyi? Tutuku tudikanda padibu batunyingalaja anyi? Tuetu tuenza nanku Yehowa neatuanyishe. Yehowa neatunange bituikala ne budipuekeshi ne tumutumikila.
Yehowa mmumanye bantu bende
17, 18. Ntshinyi tshidi mua kutuambuluisha bua Yehowa atungunuke ne kutuanyisha?
17 Mbimpe kuelangana meji pa bilejilu bia bantu bavua mu malanda mimpe ne Yehowa. Abalahama ne Mose bavua bapange bupuangane ne bavua bena mapanga anu bu tuetu. Kadi Yehowa uvua ubangata bu bantu bende. Kadi tshilejilu tshia Kola tshidi tshileja ne: tudi mua kusesuka kudi Yehowa ne kujimija dianyishibua dietu. Mbimpe yonso wa kutudi adikonke ne: ‘Yehowa utu ummona mushindu kayi? Ntshinyi tshindi mua kulongela ku bilejilu bia mu Bible ebi?’
18 Paudi umanya ne: Yehowa udi wangata bantu badi bamulamate bu bantu bende, bidi mua kukukolesha. Tungunuka ne kuleja ditabuja, budipuekeshi ne ngikadilu mikuabu idi mua kukusemeja pabuipi ne Nzambi. Kakuyi mpata, kuanyishibua kudi Yehowa ndiakalenga dinene didi ditupesha disanka mpindieu ne mu matuku adi alua.—Mus. 37:18.
Newandamune munyi?
• Mmalanda a mushindu kayi audi mua kudia ne Yehowa?
• Mmunyi muudi mua kuidikija ditabuja dia Abalahama?
• Ntshinyi tshitudi mua kulongela ku tshilejilu tshia Kola ne Mose?
[Nkonko ya dilonga]
[Tshimfuanyi mu dibeji 26]
Anu bu Abalahama, tudiku tuitabuja ne: Yehowa neakumbaje malu onso adiye mulaye anyi?
[Tshimfuanyi mu dibeji 28]
Kola kavua ukokela bulombodi ne budipuekeshi to
[Tshimfuanyi mu dibeji 29]
Yehowa mmukumanyaku bua muutu ukokela bulombodi ne budipuekeshi anyi?
