Jeova Ej Ke Watõk Eok Ãinwõt Juon Iaan Ro Doon?
Jeova Ej Ke Watõk Eok Ãinwõt Juon Iaan Ro Doon?
‘Jeova ejel̦ã ro doon.’—2 TIMOTE 2:19.
1, 2. (1) Aolep men ko Jijej ear kõm̦m̦ani rar kalikkar ta? (2) Ta kajjitõk ko jej aikuj l̦õmn̦ak kaki?
JUON raan juon Parisi ear kajjitõk ippãn Jijej: “Ewi kien eo el̦ap ilo kien ko?” Jijej ear uwaake im ba: “Kwõn yokwe Irooj am̦ Anij kõn aolepen bũruom̦ im kõn aolepen am̦, im kõn am̦ l̦õmn̦ak otemjej.” (Matu 22:35-37) Jijej ear lukkuun yokwe Jeova. Aolep men ko ear kõm̦m̦ani ilo mour eo an rar kalikkar bwe ear kõn̦aan bwe Jeova en m̦õn̦õn̦õ ippãn. Eñin unin m̦okta jãn an kar mej, Jijej ear maroñ ba naan kein jãn aolepen bũruon: “Iar kõjparok kien ko an Jema, im ij pãd ilo an yokwe.”—Jon 15:10.
2 Elõñ armej rej ba bwe rej yokwe Anij. Bõlen em̦õj am̦ ba men in. Bõtab, ewõr kajjitõk ko kwõj aikuj l̦õmn̦ak kaki: Jeova ejel̦ã ke kajjieõ? Ewi an l̦õmn̦ak kõn eõ? Ej ke buñbũruon kõn men ko ij kõm̦m̦ani? Jeova ej ke watõk eõ ãinwõt juon iaan ro doon? (2 Timote 2:19) Jelukkuun jeraam̦m̦an bwe kõj armej, jemaroñ jem̦jerãik Jeova, eo Ekajoor Bõtata!
3. Etke jet rej l̦õmn̦ak bwe rejjab maroñ erom juon iaan ro doon Jeova? Ewi wãween remaroñ kajim̦we l̦õmn̦ak ko aer?
3 Jet armej rej yokwe Jeova bõtab epen aer l̦õmn̦ak bwe remaroñ ro jeran. Jet rej l̦õmn̦ak bwe ejjel̦o̦k tokjãer. Eñin unin rej ba bwe rejjab maroñ erom juon iaan ro doon Jeova. Bõtab ejjab jim̦we wãween l̦õmn̦ak rot in. Etke? Kõnke eoktak wãween an Jeova l̦õmn̦ak jãn armej ro. (1 Samuel 16:7) Baj l̦õmn̦ak m̦õk: Etke kwõj riiti bok in? Kwõjaam̦ kate eok jerbal ñan Jeova kõn aolepen bũruom̦ im am̦ kajoor? El̦aññe em̦õj am̦ ajel̦o̦k mour eo am̦ ñan Jeova im peptaij, etke kwaar kõm̦m̦ane men in? Baibõl̦ eo ej ba bwe Jeova ejel̦ã kõn bũruon armej ro im ej pukot ro im raorõk ippãn. Innem ej kamaroñ er bwe ren erom ro doon ak ro jeran. (Riit Haggeai 2:7; Jon 6:65.) Jeova ekõn̦aan bwe kwõn karejar ñan e, eñin unin kwõj juon iaan ro doon. Jeova ejamin el̦l̦o̦k jãn ro jeran el̦aññe rej tiljek wõt ñan e. El̦ap aer aorõk ippãn im elukkuun yokwe er.—Sam 94:14, UBS.
4. Etke jej aikuj keememej bwe ad jem̦jerã ippãn Jeova ej juon jeraam̦m̦an el̦ap?
4 Kiiõ ke Jeova ear karuakl̦o̦k kõj ñan e bwe jen ro jeran, jej aikuj kõm̦m̦an bwe en yokwe wõt kõj. (Riit Jud 21.) Baibõl̦ eo ej kwal̦o̦k bwe jidik kõn jidik juon emaroñ ettol̦o̦k jãn Jeova ak emaroñ ilo̦k jãn e. Innem enaaj jako ad jeran Anij. (Hibru 2:1, UBS; 3:12, 13, UBS) Ñan waanjoñak, rijjelõk Paul ear kwal̦o̦k kõn Haimeniõs im Pailitõs m̦okta jãn an ba naan ko ilo 2 Timote 2:19. L̦õm̦arein ruo rar ri karejeran Jeova ak tokãlik rar ilo̦k jãn e. (2 Timote 2:16-18) Bareinwõt ro jet ilo kar congregation eo ilo Galetia rar ilo̦k jãn Jeova. Rar jab pãd wõt ilo m̦ool eo. (Galetia 4:9) Jej aikuj keememej bwe ad jem̦jerã ippãn Jeova ej juon jeraam̦m̦an el̦ap.
5. (1) Bwe jen maroñ juon iaan ro doon Jeova, ta wãween ko ruo ej aikuj wõr ippãd? (2) Ta joñak ko jenaaj bwebwenato kaki?
5 El̦aññe jekõn̦aan bwe jen juon iaan ro doon Jeova, ej aikuj wõr wãween ko rem̦m̦an ippãd. (Sam 15:1-5; 1 Piter 3:4, UBS) Ruo iaan wãween kein ej tõmak im ettã bõro. Jenaaj bwebwenato kõn ruo em̦m̦aan ro me Jeova ear yokwe er kõn aer kar kwal̦o̦k wãween kein. Im jenaaj bar bwebwenato kõn juon em̦m̦aan me Jeova ear el̦l̦o̦k jãn e kõn an kar utiej bũruon.
Jemen Ri Tõmak Otemjej
6. (1) Kõnke el̦ap kar tõmak eo an Ebream, ta eo ear kõm̦m̦ane? (2) Ewi wãween an kar Jeova watõke Ebream?
6 Ebream ear juon em̦m̦aan eo im “ear tõmak Jeova.” Baibõl̦ eo ej n̦aetan Ebream, “jemen ro otemjej rej tõmak.” (Jenesis 15:6; Rom 4:11) Kõn an kar l̦ap tõmak eo an Ebream, ear pokake Anij im ilo̦k ñan juon ãne ettol̦o̦k. Ear ilo̦k jen kapijukunen, ro m̦õttan, jerbal eo an im aolep men ko m̦weien. (Jenesis 12:1-4; Hibru 11:8-10) Ebream ear kate bwe en kajoor wõt tõmak eo an. Ewi wãween ad jel̦ã kõn men in? Eokwe, jejjo iiõ ko tokãlik Jeova ear jiroñ e bwe en katok kõn Aisak, l̦addik eo nejin. Ebream ear pokake wõt Jeova im ear pojak in kõm̦m̦ane men in. (Hibru 11:17-19) Ear tõmake aolep kallim̦ur ko an Jeova. Eñin unin Jeova ear lukkuun kaorõke im ear watõke juon iaan ro doon. (Riit Jenesis 18:19.) Jeova ear bareinwõt yokwe e ãinwõt juon jeran epaak.—Jemes 2:22, 23.
7. Ewi wãween Ebream ear watõk kallim̦ur ko an Jeova? Ewi wãween an kar kalikkar bwe ear wõr an tõmak ilo Jeova?
7 Jeova ear kallim̦uri Ebream im ba, ‘Inaj koorl̦o̦k ineõm joñan wõt bok ko ibarijet. Ro ineõm renaaj anjo̦ iion ri kõjdat ro aer.’ (Jenesis 22:17, 18, UBS) Meñe Ebream ear jab mour im loe an kũrm̦ool kallim̦ur in, ear wõnm̦aanl̦o̦k wõt im tõmake Jeova. Ear jel̦ã bwe aolep kallim̦ur ko an Jeova rem̦ool. Aolep men ko ear kõm̦m̦ani ilo mour eo an rar kalikkar bwe ear wõr wõt an tõmak ilo Jeova. (Riit Hibru 11:13, UBS.) Ak ta kõn kõj raan kein? Jeova ej ke watõke kõj ãinwõt an kar watõke Ebream?
Kwal̦o̦k Am̦ Tõmak ilo Am̦ Kõttare Jeova
8. Ta jet iaan men ko me ekkã an armej ro kõn̦aan?
8 Ilo mour in, elõñ men ko me jekõn̦aan. Jet rekõn̦aan m̦are. Bar jet rekõn̦aan bwe en wõr nejier ajri. Im ro jet rekõn̦aan bwe ren ãjmour wõt ilo mour ko aer. Ewõr ke jorrããn ñe jej kõn̦aan men kein? Ejjel̦o̦k ñan jidik. Bõtab, kajjitõk eo in: Jenaaj et el̦aññe ejjab tõprak kõn̦aan kein ad? Eokwe, pepe ko jej kõm̦m̦ani kõn men kein renaaj kalikkar el̦aññe ekajoor tõmak eo ad ak jaab.
9, 10. (1) Ta ko jet rej kõm̦m̦ani bwe en tõprak kõn̦aan ko aer? (2) M̦õttan jidik Jeova enaaj kajejjet aolep kallim̦ur ko an. Ewi am̦ l̦õmn̦ak kõn men in?
9 El̦aññe jej rupe kien ko an Jeova kõnke en tõprak kõn̦aan ko ad, eokwe men in ej kwal̦o̦k ad jajel̦o̦kjen̦. Men in emaroñ ko̦kkure jem̦jerã eo ad ippãn Jeova. Ñan waanjoñak, jet armej rej kõjerbale jet uno in aelõñ kein me rej n̦ae katak ko ilo Baibõl̦ eo. Rej ãindein kõnke rekõn̦aan bwe ren ãjmour wõt. Bar jet rej kããlõt jerbal ko me rej kõm̦m̦an bwe en jabwe aer iien ippãn ro rejetaer im ajri ro nejier. Rej jako jãn kweilo̦k ko kõn wõt aer poub ilo jerbal kein aer. Bar jet rej jerãik ak l̦õmn̦ak in pãlele ippãn juon eo me ejaje kõn Jeova. El̦aññe jej ãindein, jej ke kalikkar ad kõn̦aan bwe Jeova en watõk kõj juon iaan ro doon? Baj l̦õmn̦ak m̦õk: Ta eo enaaj kar wal̦o̦k el̦aññe Ebream ear jab pokake Jeova kõnke em̦õk in kõttar kallim̦ur ko an? En kar ewi an Jeova eñjake? Ta el̦aññe Ebream ear l̦oore kõn̦aan ko an make im kalõke juon im̦õn el̦ap? Im ear ke kõn̦aan bwe en buñbuñ etan? (Lale Jenesis 11:4.) Jaab, Ebream ear jab ãindein. El̦aññe en kar kõm̦m̦ane aolep men kein, Jeova eban kar watõke ãinwõt juon jeran.
10 Ak ta kõn kwe? Ta men ko me elukkuun l̦ap am̦ kõn̦aan? Kwõj ke tõmak im kõttar an naaj Jeova katõprak kõn̦aan kein am̦? Jeova ej kallim̦ur bwe enaaj katõprak ‘aolep kõn̦aan ko an armej otemjej.’ (Sam 145:16) Jet iaan kallim̦ur ko an Jeova reban itok ilo iien eo jej kõtmãne. Ta eo jenaaj kõm̦m̦ane kiiõ? Eokwe, jen ãinwõt Ebream. Aolep men ko jej kõm̦m̦ani ilo mour ko ad ren kalikkar bwe jej tõmak Jeova. Im keememej bwe Jeova eban mel̦o̦kl̦o̦k kõj. Ilo m̦ool, enaaj kajeraam̦m̦an kõj.—Hibru 11:6.
Juon Ettã Bũruon im Juon Eutiej Bũruon
11. Ta eo Kora ear kõm̦m̦ane ium̦win elõñ iiõ ko?
11 Kiiõ jenaaj lale bwebwenato eo kõn Moses im Kora. L̦õm̦arein ruo rar lukkuun oktak jãn doon. El̦aññe jekõn̦aan bwe Jeova en watõke kõj juon iaan ro doon, jej aikuj kautiej l̦õmn̦ak im pepe ko an. Jen lale ewi wãween joñak kein an em̦m̦aan rein ruo emaroñ jipañ kõj ñan kõm̦m̦ane men in. Kora ear itok jen bwijin Livai, im ear jerbal ilo im̦õn kabbed eo an Jeova. Bõlen ear loe an kar Jeova lo̦mo̦o̦ren ri Israel ro ilo kabwilõñlõñ ke ear kõjepel dãn ko ilo lom̦al̦o eo. Ear juon iaan em̦m̦aan ro me Jeova ear kõjerbale er ñan kajeik ri Israel ro rar kabuñ ñan ekjab ke rar pãd ilo Tol̦ Sainai. Kora ear bareinwõt bõk jeraam̦m̦an eo ñan ineeke tebteb in kallim̦ur eo. (Exodus 32:26-29; Bõnbõn 3:30, 31) Ium̦win elõñ iiõ ko, Kora ear tiljek ilo an jerbal ñan Jeova. Eñin unin elõñ ri Israel ro rar kautiej e.
12. Ãinwõt an wal̦o̦k ilo peij 28, ta eo ear wal̦o̦k ñan kõtaan eo an Kora ippãn Jeova kõn wõt an kar utiej bũruon?
12 Bõtab ke rar epaakel̦o̦k Ãnen Kallim̦ur eo, Kora ear l̦õmn̦ak bwe ebõd wãween kar tõl aelõñ in Israel. Ear kõn̦aan kõm̦m̦an oktak ko. Enañin 250 em̦m̦aan ro rar errã ilo pepe in an Kora. Rar l̦õmn̦ak bwe kõtaan eo aer ippãn Jeova ear lukkuun kajoor im epaak. Rar ba ñan Moses im Aron: “Elab amiro wãlok! Ri Israel otemjej rej an Iroij im Iroij ej bed ibbedwõj jimor.” (Bõnbõn 16:1-3, UBS) Naan kein im kõm̦m̦an kein an armej rein ear lukkuun kalikkar an utiej bũrueer. Moses ear uwaak im ba ñan er: “Ilju ejjibboñ Iroij enaj kwalok ñõn kij wõn eo dron iad.” (Riit Bõnbõn 16:5, UBS.) Ta eo ear wal̦o̦k? Eokwe, raan eo tok juon, Kora im aolep ro doon rar mej.—Bõnbõn 16:31-35.
13, 14. Ilo wãween et ko Moses ear kwal̦o̦k ettã bõro?
13 Moses ear oktak jãn Kora. Ear ‘juon eo ettã bũruon im ejjel̦o̦k juon ioon lal̦ ettã bũruon im ãinwõt e.’ (Bõnbõn 12:3, UBS) Ear kwal̦o̦k ettã bõro ilo an kõm̦m̦ane aolep men ko Jeova ear jiroñe bwe en kõm̦m̦ani. (Exodus 7:6; 40:16) Aolep iien Moses ear kõm̦m̦ane men ko otemjej Jeova ear ba en kõm̦m̦ani. Im Baibõl̦ eo ejjab ba bwe Moses ekõn illu ñe Jeova ej lel̦o̦k naan in tõl ko ñan e. Ñan waanjoñak, Jeova ear kwal̦o̦k ñan Moses ilo tibrikin ewi wãween ej aikuj kalõke im̦õn kabbed eo an Jeova. Jeova ear kwal̦o̦k kõl̦ar in tõrej eo rej aikuj kõjerbale. Ear bareinwõt kwal̦o̦k jete roñin loklok ko armej ro rej aikuj kõm̦m̦ani ilo katiiñ ko ilo im̦õn kabbed. (Exodus 26:1-6, UBS) Ta eo jemaroñ katak jãn joñak in an Moses? El̦aññe juon elder ej kwal̦o̦k ewi wãween kwõj aikuj kõm̦m̦ane juon men, jet iien kwõmaroñ kitõtõ. Jeova ej ri tõl eo ad em̦m̦antata. Ej lel̦o̦k jerbal ko ñan ri karejar ro an, im ejel̦ã bwe enaaj em̦m̦an aer kõm̦m̦ani. El̦aññe ej letok elõñ tibrik ko kõn wãween jej aikuj kõm̦m̦ane juon jerbal, eokwe ewõr unin an kõm̦m̦ane men in. Ke Jeova ear kajjitõk bwe Moses en kõm̦m̦ane jet jerbal ko im lel̦o̦k elõñ tibrik ko, Moses ear jab illu. Ear jab l̦õmn̦ak bwe Jeova ear watõke ãinwõt juon ri kam̦akoko. Moses ear jiroñ ri jerbal ro bwe ren kõm̦m̦ani aolep men ko Jeova ear jiroñ e. (Exodus 39:32) Wãween l̦õmn̦ak im kõm̦m̦an ko an Moses rar kwal̦o̦k bwe ear ettã bũruon. Moses ear jel̦ã bwe jerbal ko rej an Jeova, im Jeova ej baj kõjerbal e ñan katõprak jerbal kein.
14 Moses ear kwal̦o̦k wõt ettã bõro meñe elõñ iien ear lukkuun inepata. Ñan waanjoñak, juon iien armej ro rar ellotaan kõn an kar ejjel̦o̦k dãn. Moses ear lukkuun inepata ippãn armej rein. Ke Jeova ear lel̦o̦k limen armej rein, Moses ear jab nõbare Jeova. Kõn wõt kar men in, Jeova ear jab kõtl̦o̦k an Moses tõl armej ro ñan Ãnen Kallim̦ur eo. (Bõnbõn 20:2-12) Eto an kar armej in Israel ro kar kainepataik Moses im Aron kõn aer aol̦ im ellotaan aolep iien. Im jãn wõt bõd in ear kõm̦m̦ane, Moses eban del̦o̦ñe Ãnen Kallim̦ur eo. Ta eo Moses ear kõm̦m̦ane kiiõ? Eokwe, jejel̦ã bwe ear inepata. Bõtab, ear kõttãik wõt bũruon im roñjake Jeova. Ear jel̦ã bwe Jeova e “tiljek im ejjel̦o̦k nana Ippãn. E wãnõk im jim̦we wõt.” (Duteronomi 3:25-27; 32:4) Ewi am̦ l̦õmn̦ak, Jeova ear ke watõke Moses ãinwõt juon iaan ro doon? Aet!—Riit Exodus 33:12, 13, UBS.
Pokake Jeova Ej Kitibuj Ettã Bõro
15. Ta eo jemaroñ katak jãn joñak eo an Kora?
15 El̦aññe jej kõttãik kõj im l̦oore oktak ko rej wal̦o̦k iloan doulul in, Jeova enaaj buñbũruon. Jej aikuj bareinwõt kõttãik kõj ñan ro Jeova ej kõjerbal er ñan tõl jerbal ko ilo congregation eo. Ñe em̦m̦aan rein rej kõm̦m̦ani pepe ko ak karõk ko rekããl ilo congregation eo, ta eo jej aikuj kõm̦m̦ane? Eokwe, jen keememej joñak eo an Kora. E im armej ro doon rar lõke er make. Kõn wõt men in, rar jab maroñ wõnm̦aanl̦o̦k wõt im ro jeran Anij. Kora ear l̦õmn̦ak bwe Moses ear juon l̦al̦l̦ap bajjek me ej kõm̦m̦ani pepe ko jãn e make. Ear mel̦o̦kl̦o̦k bwe Jeova ear kõjerbale Moses ñan tõl aelõñ in Israel. Kõn wõt l̦õmn̦ak in, Kora ear jab kõttãik e make ñan ri tõl ro Jeova ear kããlõt er. Ta eo Kora en kar kõm̦m̦ane? En kar kõttar an Jeova jipañ e. El̦aññe ear jab jim̦we wãween an ri tõl ro jerbal, en kar kõttar an Jeova kajim̦we ak kõm̦m̦an oktak ko. Bõtab, kõnke Kora ear jab kõm̦m̦ane men in, jejjab keememej aolep jerbal ko an ilo iien ko ear tiljek ñan Jeova. Ekkã ad keememej wõt e kõn an kar utiej bũruon im kõn an kar jab pokake Jeova.
16. Ewi wãween joñak eo an Moses emaroñ jipañ kõj?
16 Men eo ear wal̦o̦k ñan Kora ej menin kakkõl ñan elder ro im ro jet ilo congregation eo ilo raan kein. Bwe jen maroñ kõttar wõt Jeova im pokake ro ej kããlõt er ñan tõl jerbal ko ilo congregation eo, jej aikuj kõttãik kõj make. Jej ke kwal̦o̦k ettã bõro ãinwõt kar Moses? Jej ke mel̦el̦e im kile bwe Jeova ej kõjerbal jet em̦m̦aan ro ñan tõl jerbal ko ad ilo congregation eo? Jej ke pokake naan in tõl ko aer? El̦aññe jej inepata ãinwõt kar Moses, jej ke kate ñan kõttãik wõt kõj? El̦aññe jej kõm̦m̦ane aolep men kein, Jeova enaaj m̦õn̦õn̦õ im buñbũruon ippãd. Ad kwal̦o̦k ettã bõro enaaj kõm̦m̦an bwe en l̦apl̦o̦k an Jeova kaorõk kõj.
Jeova Ejel̦ã Kajjien Armej Ro Doon
17, 18. Ta ko jej aikuj kõm̦m̦ani bwe Jeova en maroñ buñbũruon ippãd?
17 Ewõr tokjãn ñan ad l̦õmn̦ak kõn joñak ko an ro me Jeova ear yokwe er im kõn̦aan bwe ren ro jeran. Ebream im Moses rej ãinwõt kõj kõnke rar jab weeppãn im rar bar iion apañ ko. Bõtab, Jeova ear watõk er ro jeran im ro doon. Ak kõn Kora, Jeova ear jab watõke ãinwõt juon iaan armej ro doon. Joñak eo an Kora ej kalikkar bwe el̦aññe ej utiej bũruod, jemaroñ el̦l̦o̦k jãn Jeova im jako jãn ad ro jeran. Jej aikuj kajjitõk ippãd make kajjitõk kein: Jeova ej ke watõk eõ ãinwõt juon jeran im juon iaan armej ro doon? Ta eo imaroñ katak jãn waanjoñak kein an Ebream, Moses im Kora?
18 El̦ap ad m̦õn̦õn̦õ bwe Jeova ej watõk ri karejar ro an retiljek ãinwõt ro doon. Kõn men in, kwõn wõnm̦aanl̦o̦k wõt im kõttãik bũruom̦ im kwal̦o̦k bwe kwõj tõmak Jeova. Men in enaaj kõm̦m̦an bwe en l̦apl̦o̦k wõt an Jeova kaorõk eok. Ñe Jeova ej watõke eok ãinwõt juon iaan armej ro doon, men in ej juon jeraam̦m̦an el̦ap. Ro me rej kabuñbũruon Jeova renaaj m̦õn̦õn̦õ kiiõ im bareinwõt ilo raan ko rej pãd im̦aan.—Sam 37:18.
Kwoj Keememej Ke?
• Jeova ej watõke armej ro doon ãinwõt ta?
• Ewi wãween kwõmaroñ anõke tõmak eo an Ebream?
• Ta eo jemaroñ katak jãn joñak ko an Kora im Moses?
[Kajitõk ko ñan katak]
[Pija ilo peij 26]
Jej ke tõmak bwe aolep kallim̦ur ko an Jeova renaaj jejjet kitieir, ãinwõt kar Ebream?
[Pija ilo peij 28]
Kora ear utiej bũruon im ear jab kõn̦aan l̦oor naan in tõl ko
[Pija ilo peij 29]
Jeova ej ke watõk eok ãinwõt juon eo ettã bũruon im ej pokake?
