A Zeova mii yãmb bɩ?
A Zeova mii yãmb bɩ?
“Zusoabã mii bãmb mengã neba.”—2 TƖM. 2:19.
1, 2. a) Bõe n da pak a Zezi n yɩɩda? b) Sogs-bʋs la d segd n leoke?
DAAR a yembre, fariziẽ n sok a Zezi woto: “Tõ-bʋg n yaa kãseng n yɩɩda?” A Zezi leokame: “Nong Zusoabã fo Wẽnnaamã ne f sũur fãa, la ne f sɩɩg fãa, la ne f yam fãa.” (Mat. 22:35-37) A Zezi ra nonga a Zeova hal wʋsgo. A sẽn da vɩ to-to wã wilgdame tɩ sẽn pak-a n yɩɩd yaa a kell n tall zood sõma ne a Zeova. Rẽ n so t’a kũumã sẽn wa n kolgã, a tõog n gom a sakrã yelle, n yeel tɩ yẽ ‘sakda a Ba wã tõodã n paad a nonglmã pʋgẽ.’—Zã 15:10.
2 Rũndã-rũndã, neb wʋsg yetame tɩ b nonga Wẽnnaam. Yaa vẽeneg tɩ tõnd me yeta woto. La sogs-kãsems n be tõnd ned kam fãa sẽn segd n sok a menga. Sogs-kãens la woto: “A Zeova mii maam bɩ? Wãn to la a get-ma? Rẽ yĩnga m tõe n yeelame tɩ m yaa a Zeova rẽnd bɩ?” (2 Tɩm. 2:19) D sã n tags tɩ d tõe n paama ãndũniyã fãa Naabã zoodo, sɩd bee yamleoogo!
3. Bõe yĩng tɩ kẽer tagsdẽ tɩ b pa tõe n paam n yɩ a Zeova rẽnda, la bõe n tõe n sõng-b tɩ b toeem tagsgo?
3 La neb nins sẽn nong Wẽnnaam a Zeova wã kẽer yaool n tagsdame tɩ yaa toog ne-b tɩ b tõog n lebg a zo-rãmba. Sãnda tẽedame tɩ b pa tar yõod ye. Rẽ kɩtame tɩ b tagsdẽ tɩ b pa tõe n paam n yɩ a Zeova rẽnd ye. La d sẽn mi t’a Zeova pa get tõnd wa tõnd sẽn get-d meng to-to wã, kengda d raoodo. (1 Sãm. 16:7) Tʋm-tʋmd a Poll yeela a kiris-nin-taasã woto: “Ned sã n nong Wẽnnaam, Wẽnnaam mii a soaba.” (1 Kor. 8:3) Y sã n dat tɩ Wẽnnaam bãng-yã, yaa tɩlae tɩ y nong-a. Tags-y n ges-y-yã. Bõe yĩng tɩ yãmb karemd seb-kãngã? Bõe yĩng tɩ y modgd wʋsg sẽn na yɩl n tõogd n maand a Zeova raabã ne y sũur fãa, ne y sɩɩg fãa, ne y yam fãa la ne y pãng fãa? Y sã n zoe n dɩka y meng n kõ a Zeova la y reeg lisgu, bõe yĩng tɩ y maan dẽ? Biiblã wilgdame t’a Zeova sẽn mi nebã sũyã baooda neb a sẽn get wa “bõn-neebã,” la t’a sã n yã ned a woto, a boond-a lame, rat n yeel t’a sõngd-a lame t’a lebg a zoa. (Karm-y Aze 2:7; Zã 6:44.) Rẽnd y tõe n kɩsa sɩd tɩ y sẽn tũud a Zeova wã, yaa a sẽn bool-yã yĩnga. A Zeova sã n bool ned t’a lebg a zoa, nin-kãng sã n kell n sak-a, a pa tond n bas-a ye. A Zeova nifẽ, a zo-rãmbã tara yõod hal wʋsgo. Sẽn paase, a nong-b lame.—Yɩɩl 94:14.
4. Bõe yĩng tɩ d pa segd n yĩm tɩ d sẽn paam n yaa a Zeova zoa wã yaa bũmb sẽn tar yõod wʋsgo?
4 A Zeova sã n bool neda, a soab segd n modgame n kell n pa a nonglmã pʋgẽ. (Karm-y Ziid 20, 21.) Tẽeg-y tɩ Biiblã wilgame tɩ ned sẽn paam n lebg Wẽnnaam zoa tõe n wa zãaga a meng ne-a, wall a tolg n bas-a, tɩ kɩt tɩ zoodã sãame. (Heb. 2:1; 3:12, 13) Wala makre, nand tɩ tʋm-tʋmd a Poll togs goam nins sẽn be 2 Tɩmote 2:19 wã, a goma a Hymane ne a Filɛt yelle. Tõe tɩ wakat n zĩnd tɩ nin-kãensã ra tũud a Zeova. La b wa n basa sɩdã. (2 Tɩm. 2:16-18) Tẽeg-y me tɩ Galat tigingã neb kẽer wa n basa sɩdã. (Gal. 4:9) Wakat fãa, segdame tɩ d tẽegdẽ tɩ d sẽn paam n yaa a Zeova zoa wã yaa bũmb sẽn tar yõod hal wʋsgo.
5. a) Sõdg-y zʋg-sõma nins sẽn noom Wẽnnaamã kẽere. b) Bõe yell la d na n gome?
5 D sã n dat t’a Zeova bãng-do, d segd n talla zʋg-sõma. (Yɩɩl 15:1-5; 1 Pɩɛ. 3:4) Wala makre, yaa tɩlae tɩ d tall tẽeb la sik-m-menga. D na n goma neb a yiib yelle. Yaa neb a Zeova sẽn da nonge, b sẽn da tar zʋg-sõma kãensa wã yĩnga. La d na n goma ned a to me yelle. A yɩɩ wuk-m-meng soaba, tɩ kɩt tɩ Wẽnnaam bas-a. D tõe n dɩka yam nin-kãensã fãa kibayã pʋsẽ.
Neb nins fãa sẽn tẽedã ba
6. a) Bõe la a Abrahaam maan n wilg t’a ra tẽeda a Zeova pʋlemsã? b) B sẽn yeel t’a Zeova ra mi a Abrahaamã võor yaa bõe?
6 A Abrahaam yɩɩ ned sẽn tall tẽeb ne a Zeova. Sɩd me, b bool-a lame tɩ ‘neb nins fãa sẽn tẽedã ba.’ (Sɩng. 15:6; Rom 4:11) A Zeova sẽn wa n yeel a Abrahaam t’a yik n yi a ba-yirã, a sẽn tall tẽebã yĩnga, a sakame n bas a zaka, a zo-rãmba, a tʋʋma, la a bũmb a taaba, n na n kẽng tẽn-zãrgẽ. (Sɩng. 12:1-4; Heb. 11:8-10) Yʋʋm wʋsg loogr poore, a Abrahaam ra ket n tẽeda Wẽnnaam ne a sũur fãa. Bũmb sẽn wilgd rẽ yaa a sẽn wa n sak a Zeova noore, n dɩk a biig a Izaak n na n maan maoongã. (Heb. 11:17-19) A Abrahaam tẽe bũmb nins fãa Wẽnnaam a Zeova sẽn pʋlmã, tɩ kɩt tɩ Wẽnnaam da nong-a hal wʋsgo. A sɩd ra mii a Abrahaam. (Sɩng. 18:19) Woto pa rat n yeel t’a Zeova ra miime t’a Abrahaam beeme bal ye. A Abrahaam da yaa a Zeova zo-nongre.—Karm-y Zak 2:22, 23.
7. Bõe la a Abrahaam da mi a Zeova pʋlemsã wɛɛngẽ, la wãn to la a wilg rẽ?
7 A Zeova ra pʋlma a Abrahaam t’a “yagensã na n tõoga b bɛɛbã tẽnse,” la tɩ b na n lebga wʋsg “wa bĩisr sẽn be ko-kãsengã noore.” (Sɩng. 22:17, 18) La baa a Abrahaam sẽn pa paam n yã pʋlem-kãensã pidsgã, a kell n tẽe a Zeova ne a sũur fãa. A ra miime t’a Zeova pʋleng fãa pidsdame. A sẽn vɩɩmd to-to wã wilgdame t’a sɩd ra tẽeda rẽ. (Karm-y Hebre dãmb 11:13.) Rẽ yĩnga a Zeova getame tɩ tõnd ned kam fãa tara tẽeb wa a Abrahaam bɩ?
D sã n gũud a Zeova yell buud fãa taoore, wilgdame tɩ d tara tẽebo
8. Bõe la neb wʋsg rat ne b sũur fãa?
8 D tõe n data bũmb ning ne d sũurã fãa. Wala makre, d tõe n dat n kẽe kãadem, d tõe n data rogem, wall d bẽedame, tɩ kɩt tɩ d rat laafɩ. Bõn-kãensã fãa tʋlgr pa wẽng ye. La tõe tɩ wʋsg baooda bõn-kãensã sʋkã bũmb a ye n nan pa paam ye. D sã n tara zu-loɛɛg a woto buudu, d manesem sẽn yaa to-to wã wilgda d tẽebã pãng sẽn ta zĩig ningã.
9, 10. a) Bõe la neb kẽer maan sẽn na yɩl n paam b sẽn date? b) Wẽnnaam pʋlemsã pidsg wɛɛngẽ, yãmb tagsg yaa wãna?
9 La d sã n kɩɩs Wẽnnaam noor sẽn na yɩl n paam d sẽn date, pa yam bũmb ye. Tõe n sãama zood ning sẽn be tõnd ne a Zeova sʋkã. Wala makre, kẽer sẽn baood laafɩ yĩng kɩtame tɩ b sak tɩbsg sẽn kɩɩsd Biiblã noyã. Sãnda saka tʋʋm sẽn dɩkd b sẽkã wʋsgo, tɩ kɩt tɩ b pa le tõe n paam sẽk n ges b zagsã rãmb yelle, wall b kẽnd tigissã ye. Kẽer yãka yam n do ned sẽn pa tũud a Zeova, wall yaa neb a woto n do-b tɩ b sake. Rẽ yĩnga kiris-ned sã n maan woto, a wilgdame t’a ratame t’a Zeova bãng-a sɩda? A Abrahaam sã n da pa maag a meng n gũ Wẽnnaam pʋlemsã pidsgu, Wẽnnaam tagsg ra na n yɩɩ wãn ne-a? Tags-y n ges-y wa a Abrahaam sẽn da na n getẽ t’a Zeova maasame, n yãk yam n na n maan bũmb n kɩt t’a yʋʋrã yi. (Ges-y Sɩngr 11:4.) Rẽ yĩnga a Zeova ra na n kell n geelg-a-la wa a zoa sɩda?
10 Yaa bõe la yãmb yẽ rat ne y sũur fãa? Rẽ yĩnga y tẽebã seka y na yals n gũ t’a Zeova wa kõ-y rẽ bɩ? A pʋlmame t’a na n wa kɩtame tɩ ‘bõn-vɩɩsã fãa paam bark tɩ seke.’ (Yɩɩl 145:16) A Zeova pʋlemsã kẽer tõeeme n pa pids tao-tao wa d sẽn da tagsdã ye. La d sã n kell n wilg tɩ d tara tẽeb wa a Abrahaam, a Zeova pa na n yĩm d yell ye. A na n keo-d lame.—Heb. 11:6.
Sik-m-meng soaba, la wuk-m-meng soaba
11. Tõe tɩ bõe la a Koore maan yʋʋm wʋsg pʋgẽ?
11 D gom neb a yiib zʋg sẽn pa wõneg taab baa bilf yelle. Yaa a Moiiz ne a Koore. B ned kam fãa sẽn maan bũmb ninsã sõngd-d lame tɩ d bãng t’a Zeova sẽn get tõnd to-to wã bee ne d sã n tũuda a noyã la d teend a seglsã, wall d sã n pa maand woto. A Koore ra yaa Levi buudã neda, n yaa a Kehat yagenga. Tõe t’a paam n yãa a Zeova sẽn maan bũmb ning n fãag Israɛll nebã Mog-miuugẽ wã. Tõe me t’a naaga Levi neb nins sẽn yɩ-b sakdb Sinayi tãngẽ wã, n sõng n kʋ Israɛll neb nins sẽn kɩɩsã. A leb n tog n da sõngd n tʋkda kãabg koglgã. (Yik. 32:26-29; Sõd. 3:29-31) Rẽnd wõnda a Koore tũu a Zeova ne pʋ-peelem n kaoos yʋʋma, tɩ kɩt tɩ Israɛll nebã wʋsg ra nand-a.
12. Wãn to la a Koore wʋk-m-mengã wã-a? Ges-y foto wã sẽn be seb-neng 31 wã me.
12 La Israɛll nebã sẽn wa n be kãabg tẽngã sor zugã, a Koore wa n tagsdame t’a Zeova sẽn wilgd buudã sor to-to wã pa zemse, tɩ kɩt t’a tʋlg n na n dems yɛlã. A paamame tɩ neb 250 sẽn yaa buudã taoor dãmb kẽ-a. Tõe t’a Koore ne a poorẽ dãmbã ra kɩsa sɩd t’a Zeova bee ne-ba. B tɩ yeela a Moiiz woto: “Yãmb zẽkda y mens wʋsgo; tɩ bõe, Israɛll nebã fãa gill yaa yɩlma, tɩ Zusoabã be bãmb sʋka.” (Sõd. 16:1-3) Ad b sɩd wuka b mens tɩ loog noore! B ra kɩsa sɩd ne b sũy fãa tɩ bãmb sẽn get yɛlã to-to wã zemsame. La a Moiiz yeel-b-la woto: “Zusoabã na n wilga sẽn yaa-a bãmb neda.” (Karm-y Sõdb 16:5.) Daar-n-kãng vẽkembeoogo, wĩndgã sẽn wa n na n kẽ t’a Koore ne a poorẽ dãmbã fãa kiime.—Sõd. 16:31-35.
13, 14. Wãn to la a Moiiz wilg t’a yaa sik-m-meng soaba?
13 La a Moiiz yẽ ra yaa toor fasɩ. Biiblã yeelame t’a ra “yaa sik-m-meng soab wʋsg n yɩɩd nebã fãa sẽn [da] be dũniyã zugã.” (Sõd. 12:3) Bũmb sẽn wilgd rẽ yaa t’a Zeova sẽn yeel t’a maan bũmb ninsã fãa, a maan-b-la kɛpɩ. (Yik. 7:6; 40:16) Biiblã pʋgẽ, d pa tõe n yã zĩig baa a yembr a Moiiz sẽn wilg t’a Zeova sẽn get a nin-buiidã yell to-to wã pa zemse, wall a sẽn sãam a sũur ne a Zeova, a noor yĩng ye. Wala makre, a Zeova sẽn wa n yeel t’a tilg sɛk-roogã, a kõ-a-la noy ball-balle. A wilg-a-la gĩs nins a sẽn da segd n tall n wʋg sɛk-roogã futã kõbg sẽn da segd n yɩ to-to, la a wilg-a gãtsã sõor me. (Yik. 26:1-6) Wakat ninga, yel-gɛt sã n wa kõ-y no-bõoneg wʋsg tɩ y getẽ tɩ b tũubã yaa toogo, tõe n sãama y sũuri. La a Zeova yẽ yaa yel-gɛt sẽn zems zãnga. A sã n bobl a nin-buiidã tʋʋmde, a kɩta sɩd tɩ b na n tõog n tʋʋm-a lame tɩ zemse. A sã n wa kõt noy ball-balle, a mii rẽ võore. A Moiiz sũur pa yik ne a Zeova, wall a tags t’a sẽn kõ-a noy ball-ballã wilgdame t’a pa nand-a ye. A leb n pa tags t’a Zeova weoogd-a lame ye. A Moiiz pʋd n kɩtame tɩ tʋm-tʋmdbã maan wa a Zeova sẽn yeelã bal kɛpɩ. (Yik. 39:32) Ad woto sɩd wilgdame t’a ra yaa sik-m-meng soaba! A Moiiz ra miime tɩ yaa a Zeova n so tʋʋmdã, la tɩ yẽ ra yaa wa tʋʋm-teoog a nugẽ.
14 Baa a Moiiz sã n da wa seg zu-loɛɛg sẽn sãamd a sũur wʋsgo, a kelld n wilgame t’a yaa sik-m-meng soaba. Daar a ye, nin-buiidã yẽgma koom kaalem poorẽ, t’a Moiiz sũur yik t’a maan bũmb sẽn pa yɩ Wẽnnaam noogo. Woto kɩtame t’a Zeova yeel t’a Moiiz kõn tall nin-buiidã n ta kãabg tẽngã pʋgẽ ye. (Sõd. 20:2-12) Israɛll nebã yẽgengã namsa a Moiiz ne a Aarõ na maan yʋʋma. La kong-kãng yĩng bal kɩtame t’a Moiiz pa na n paam bũmb ning a sẽn da sɩng n gũud hal daar zãrã ye! A Moiiz manesem yɩɩ wãna? Yaa vẽeneg t’a sũur sãamame, la a sẽn yaa sik-m-meng soabã yĩnga, a saka a Zeova sẽn yeelã. A ra miime t’a Zeova yaa tɩrg n pa maand kɛgr ye. (Tõo. 3:25-27; 32:4) Rũndã-rũndã, d sã n tẽeg a Moiiz yelle, d yetame t’a yɩɩ ned a Zeova sẽn da mi.—Karm-y Yikr 33:12, 13.
A Zeova sakr baooda sik-m-menga
15. A Koore wuk-m-mengã sẽn kɩt t’a maan bũmb ninsã wilgda tõnd bõe?
15 Sẽn na yɩl n ta a Zeova yam, rẽndame tɩ d sakd toeeng nins fãa a siglgã sẽn mi n maandẽ wã. Sẽn paase, d segd n sakda neb nins sẽn lʋɩt taoor tigingã pʋgẽ wã. Nin-kãensã sã n wa rɩk sardo, pa rẽ bɩ yaa d sẽn da minim n maand bũmb ning to-to wã la b toeem-yã, d manesem yaa wãna? A Koore ne a poorẽ dãmbã sẽn da tẽed tɩ bãmb sẽn get yɛlã to-to wã n zemsã yĩnga, b maan n sãama zood ning b sẽn da tar ne Wẽnnaamã. B ra yaa wuk-m-mens rãmba, la neb sẽn pa tall tẽebo. A Koore ra tagsdame t’a Moiiz yaa nin-kẽem bal sẽn da kõt nebã a toorẽ noyã. Woto kɩtame t’a yĩm tɩ yaa a Zeova meng n wilgd a nin-buiidã sore. Rẽ n kɩt t’a kɩɩs neb nins Wẽnnaam sẽn da lʋɩɩs a nin-buiidã taoorã. Bũmb sã n da segda ne remsgo, a Koore ra tog n gũume t’a Zeova wa rems bõn-kãng a toore. A sã n da maan woto, a Zeova ra tõe n sõng-a lame t’a bãng yɛlã sẽn da yaa to-to wã võore. La a Koore sẽn maan bũmb ningã kɩtame tɩ rũndã-rũndã, d pa tẽr tʋʋm-sõma nins fãa a sẽn da tʋm a Zeova yĩngã ye. D sẽn wae n tẽegdẽ bal yaa t’a yɩɩ wuk-m-meng soaba, tɩ kɩt t’a kɩɩs a Zeova.
16. Wãn to la a Moiiz mak-sõngã tõe n naf tõndo?
16 Bũmb ning sẽn paam a Koore wã yaa sagl n kõ kãsem dãmbã la tigingã neb a taabã fãa. D sã n dat n tõogd n gũud a Zeova la d sakd neb nins a sẽn tũnugd n wilgd tigingã sorã, d segd n yɩɩ sik-m-mens rãmba. Rẽ yĩnga tõnd ned kam fãa wilgdame t’a yaa sik-m-meng soab wa a Moiiz bɩ? D sak n deegame t’a Zeova tũnugda ne neb nins a sẽn lʋɩɩs tigingã taoorã n wilgd-d sor bɩ? D sakda nin-kãensã bɩ? Baa bũmb sã n wa sãam d sũuri, d tõogda d meng bɩ? D sã n maand woto fãa, d tata a Zeova yam. D sik-m-mengã la d sakrã na n kɩtame t’a nong-do.
A Zeova mii neb nins sẽn yaa yẽ rẽndã
17, 18. Bõe n tõe n kɩt tɩ d kell n yɩ a Zeova rẽnda?
17 D sã n bʋgsd neb nins sẽn paam n yɩ a Zeova zo-rãmbã mak-sõngã zugu, na n naf-d lame. A Abrahaam ne a Moiiz fãa ra yaa koangdb la neb sẽn da segd zu-loees wa tõnd me. Baasgo, a Zeova bool-b lame t’a zo-rãmba, la neb a sẽn so. La a Koore yẽ pa paam woto ye. Bũmb ning sẽn paam-a wã wilgdame tɩ d sã n lebg a Zeova zoa, d sã n pa gũusi, d tõe n wa zãaga d mens ne-a n sãam zoodã. Yɩta sõma tɩ tõnd ned kam fãa sok a meng woto: ‘Wãn to la a Zeova get-ma? Sagl-bʋs la Biiblã kiba-kãensã kõt-ma?’
18 A Zeova geta neb nins sẽn tũud-a ne b sũy fãa wã wa neb sẽn yaa yẽ rẽnda. Woto sɩd kengda d raood wʋsgo! Bɩ d ket n baood zʋg-sõma sẽn na n kɩt tɩ d maneg n ta Wẽnnaam yam. Wala makre, d paasd d tẽebã pãnga, la d baood sik-m-menga. D sã n paam t’a Zeova mi-du, yaa zu-zẽkr tɛkẽ n kõ-do. Neb nins sẽn paam t’a Zeova nong-bã vɩɩm noom-b-la rũndã-rũndã, la b saagd n na n wa paama bark toor-toor beoog-daar me.—Yɩɩl 37:18.
Y tẽrame bɩ?
• Paam t’a Zeova mi-f rat n yeelame tɩ bõe?
• Wãn to la d tõe n wilg tɩ d tara tẽeb wa a Abrahaam?
• A Koore ne a Moiiz fãa manesmã wilgda tõnd bõe?
[Zãmsgã sogsgã]
[Foto seb-neng 29]
Tõnd me tẽeda wa a Abrahaam t’a Zeova na n pidsa a pʋlemsã fãa bɩ?
[Foto seb-neng 31]
A Koore ra pa sikd a meng n sakd Wẽnnaam sor-wilgrã ye
[Foto seb-neng 32]
Yãmb sikda y meng n sakd a Zeova tɩ kɩt t’a mi-y bɩ?
