“Señor konosé esnan ku ta di dje.”​—2 TIM. 2:19.

1, 2. (a) Den kiko Hesus tabata interesá? (b) Menshoná algun pregunta ku nos mester pensa ariba.

UN DIA un fariseo a aserká Hesus i puntr’é: “Ta kua ta e mandamentu di mas grandi di Lei?” Hesus a kontest’é: “Stima SEÑOR bo Dios ku henter bo kurason, i ku henter bo alma, i ku henter bo mente.” (Mat. 22:​35-37) Hesus tabata stima su Tata selestial masha hopi mes, i di bèrdat su manera di biba a demostrá esei. Ademas, Hesus tabata interesá pa e tin un bon relashon ku Yehova i a demostrá esaki pa medio di su bida fiel. P’esei, djis promé ku su morto, e por a deklará ku Dios konos’é komo un persona ku a obedesé Su mandamentunan fielmente. Pues, Hesus a keda den e amor di Yehova.​—Juan 15:10.

² Hopi hende awe ta bisa ku nan ta stima Dios. Sin duda, nos tambe ta bisa esei. Sinembargo, tin algun pregunta serio pa nos konsiderá, manera: ‘Mi por bisa ku Yehova “konosé” mi, òf ku mi tin su aprobashon? E ta konsiderá mi komo un hende ku ta pertenesé na dje?’ (2 Tim. 2:19) Ta ki un privilegio di por tin un amistat asina será ku e Soberano di universo!

3. Dikon ta difísil pa algun kristian kere ku nan por pertenesé na Yehova, i kiko lo yuda nan kambia nan manera di pensa?

³ Sinembargo, algun hende ku stima Yehova tin difikultat pa kere ku Dios konosé nan i ku nan tin su aprobashon. Tin di nan ta sinti ku nan no ta bal nada, p’esei nan ta duda si nan por pertenesé na Yehova. Ma nos por ta masha kontentu ku Dios sí ta mira nos for di un otro ángulo! (1 Sam. 16:7) Apòstel Pablo a bisa su rumannan kristian: “Si un hende ta stima Dios, e ta konosí pa Dios.” (1 Kor. 8:3) Ku otro palabra, pa Dios konosé bo, bo mester kumpli ku e rekisito importante di stim’é. Pensa riba lo siguiente: Dikon bo ta lesando e revista akí? Dikon bo ta hasiendo esfuerso pa sirbi Yehova ku henter bo kurason, alma i mente i ku tur bo forsa? Si bo a dediká bo bida na Dios i a batisá, kiko a motivá bo pa hasi esei? Beibel ta splika ku Yehova ta saminá kurason i ku e ta hala “e kosnan deseabel di tur e nashonnan” serka dje. (Hag. 2:7, NW; lesa  Juan 6:44.) Pues, bo por ta sigur ku bo ta sirbiendo Yehova pasobra el a hala bo serka dje. Hamas lo e bandoná esnan ku el a hala serka dje si nan keda fiel. Nan ta masha presioso den bista di Dios, i e ta stima nan sinfin.​—Sal. 94:14.

4. Dikon nos mester keda reflekshoná riba ki presioso nos amistat ku Yehova ta?

⁴ Unabes Yehova a hala nos serka dje, nos mester ta interesá pa keda den su amor. (Lesa Hudas 20 i 21.) Kòrda, Beibel ta mustra ku nos por apartá gradualmente òf alehá deliberadamente for di Dios. (Heb. 2:1; 3:​12, 13) Por ehèmpel, djis promé ku e palabranan di 2 Timoteo 2:19, apòstel Pablo a papia di Himeneo i Fileto. Un tempu e dos hòmbernan ei evidentemente tabata pertenesé na Yehova, pero despues nan a desviá for di e bèrdat. (2 Tim. 2:​16-18) Kòrda tambe ku den e kongregashonnan di e galationan, algun kristian ku Dios tabata konosé no a keda den e lus spiritual ku un tempu nan tabata disfrutá di dje. (Gal. 4:9) Semper nos mester kòrda ki maravioso nos amistat ku Yehova ta.

5. (a) Kua ta algun kualidat ku ta di gran balor pa Dios? (b) Ki ehèmpelnan nos lo konsiderá?

⁵ Tin algun kualidat ku ta di gran balor pa Yehova. (Sal. 15:​1-5; 1 Ped. 3:4) Fe i humildat ta dos di nan, i nan a destaká serka algun  hende ku Dios tabata konosé. Laga nos analisá e ehèmpel di dos hòmber ku Yehova a stima pa motibu ku nan a desplegá e kualidatnan akí. Tambe nos lo konsiderá e ehèmpel di un hòmber ku a kere ku Dios tabata konos’é i aprob’é pero ku a aktua ku orguyo i a bin deskubrí ku Yehova a rechas’é. Nos por siña algun lès balioso for di e ehèmpelnan akí.

Tata di Tur Ku Tin Fe

6. (a) Kon Abraham a demostrá fe den e promesanan di Yehova? (b) Den ki sentido Yehova tabata konosé Abraham?

⁶ Abraham tabata un hòmber ku a kere òf pone fe den Yehova. De echo, e ta ser yamá “tata di tur ku tin fe.” (Gén. 15:6; Rom. 4:11, BPK) Komo ku Abraham tabatin fe, el a bai laga su kas, su amigunan i e bida kómodo ku e tabatin pa e bai biba na un pais leu. (Gén. 12:​1-4; Heb. 11:​8-10) Hopi aña despues, ainda Abraham su fe tabata firme. Prueba di esaki ta ku e tabata kla pa obedesé Yehova su mandamentu i “ofresé Isaak,” su yu hòmber. (Heb. 11:​17-19) Abraham a demostrá fe den e promesanan di Yehova, p’esei Dios a konsider’é un persona spesial; di bèrdat e tabata konosé Abraham. (Gén. 18:19) Yehova no tabata djis sa ku Abraham ta eksistí, sino tambe a stim’é komo amigu.​—Lesa Santiago 2:​22 i 23.

7. Kiko ta remarkabel tokante e promesanan di Yehova, i ki efekto esaki tabatin riba Abraham?

⁷ Ta bon pa tuma nota ku Abraham no a risibí herensia di e tera ku Dios a primintié durante su bida. Tampoko e no a mira su desendientenan bira “manera e santu ku tin kantu di laman.” (Gén. 22:​17, 18) Apesar ku e promesanan akí no a kumpli durante Abraham su bida, el a keda ku un fe firme den Yehova. E tabata sa ku ora Dios duna su palabra, lo e kumpli sin falta. Sí, Abraham a hiba su bida na armonia ku e fe ei. (Lesa Hebreonan 11:13.) Yehova konosé nos komo hende ku tin un fe manera di Abraham?

Warda Riba Yehova Ta un Muestra di Fe

8. Menshoná algun kos ku mayoria di hende tin masha deseo di dje.

⁸ Kisas nos tin sierto kosnan ku nos tin masha gana di dje. Por ehèmpel, no ta nada malu si nos tin gana di kasa, di haña yu òf di tin un bon salú; tur ta deseonan natural. Pero hopi di nos kisas no ta haña loke nos ta deseá. Si ta asina den nos kaso, e manera ku nos ta trata ku e situashon akí lo por mustra kon firme nos fe ta.

9, 10. (a) Kon algun hende a purba di kumpli ku nan deseonan? (b) Kiko abo ta pensa tokante kumplimentu di e promesanan di Dios?

⁹ Lo no ta niun tiki sabí pa nos bai kontra  di e guia di Dios djis pa haña loke nos ta deseá. Esaki lo por perhudiká nos relashon ku Yehova. Por ehèmpel, algun hende a skohe sierto tratamentunan médiko ku ta bai kontra di e konseho di Yehova. Otronan a tuma un trabou ku ta kita tur nan tempu, i nan no por atendé nan famia ni asistí na e reunionnan di kongregashon. Òf kiko di esnan ku ta kuminsá un relashon romántiko ku un hende ku no ta sirbi Yehova? Akaso un kristian ta mustra ku di bèrdat e ke pa Yehova konos’é si e ta hasi un di kosnan ei? Kon Yehova lo a sintié si Abraham a pèrdè pasenshi pasobra e promesanan di Dios no a kumpli? Kiko si Abraham lo a tuma e asuntu den su mes man pa bai establesé su mes un kaminda i traha un nòmber famoso pa su mes en bes di warda riba Yehova? (Kompará ku Génesis 11:4.) Yehova lo a sigui rekonos’é komo su amigu?

¹⁰ Kiko ta e kosnan ku abo tin masha gana di dje? Bo fe ta sufisiente firme ku bo ta keda warda pa Yehova duna bo nan? El a primintí ku lo e satisfasé tur bon deseo ku bo tin. (Sal. 145:16) Meskos ku tabata e kaso ku Abraham, algun promesa di Dios lo no kumpli lihé manera nos ke. Sinembargo, Yehova lo apresiá mashá si nos desaroyá un fe manera di Abraham i aktua na armonia ku nos fe. Na final di kuenta, esei sigur lo benefisiá nos.​—Heb. 11:6.

Un Kontraste Entre Humildat i Orguyo

11. Ki privilegionan Koré kisas tabatin, i kiko esei a indiká tokante su aktitut pa ku Dios?

¹¹ Moisés i Koré ta para na kontraste skèrpi ku otro pa loke ta trata mustra rèspèt pa Yehova su desishonnan i su manera di hasi kos. E manera ku nan a reakshoná a determiná kiko Yehova tabata pensa di nan. Koré tabata un levita di e famia di e koatitanan, i el a risibí hopi privilegio. Probablemente el a mira kon Yehova a libra e nashon dor di Laman Kòrá; el a apoyá Yehova su huisio kontra e israelitanan desobediente na Seru Sinaí i a yuda transportá e arka di pakto. (Eks. 32:​26-29; Num. 3:​30, 31) Evidentemente, el a keda leal na Yehova pa hopi aña, i p’esei hopi hende den e kampamentu di Israel tabata respet’é.

12. Manera e plachi na página 31 ta mustra, kon orguyo a afektá Koré su amistat ku Dios?

¹² Sinembargo, ora e nashon di Israel tabata riba kaminda pa e Tera Primintí, Koré a pensa ku tabatin algun kos robes den e manera ku e nashon tabata ser dirigí. Anto 250 otro hòmber prinsipal di e nashon a djòin Koré pa purba trese kambio. Koré i e otro hòmbernan ei tabatin sigur ku Yehova a konosé nan i ku nan tabatin su aprobashon. Nan di ku Moisés i Aaron: “Awor sí boso a bai muchu leu, pasobra henter e kongregashon ta santu, kada un di nan, i SEÑOR ta meimei di nan.” (Num. 16:​1-3) Esei sí tabata un aktitut hopi orguyoso! Nan tabatin demasiado konfiansa den nan mes. Moisés a bisa nan: “SEÑOR lo mustra ta ken ta di dje.” (Lesa Numbernan 16:5.) Na final di e siguiente dia, ya Koré i tur esnan ku a djòin e den e rebelion tabata morto.​—Num. 16:​31-35.

13, 14. Den ki maneranan Moisés a demostrá su humildat?

¹³ Na kontraste ku Koré, Moisés tabata “masha humilde, mas ku tur hòmber ku tabatin riba superfisie di tera.” (Num. 12:3) El a demostrá su humildat na e manera determiná ku e tabata sigui e instrukshonnan di Yehova. (Eks. 7:6; 40:16) No tin ningun indikashon ku Moisés kada bes tabata kuestioná Yehova su manera di hasi kos òf ku e tabata rabia pasobra e mester a sigui instrukshon ku Yehova a duna. Por ehèmpel, Yehova a duna instrukshonnan masha spesífiko mes relashoná ku konstrukshon di e tabernakel. Entre otro, el a bisa ki koló di hilu mester a usa i kuantu lùs mester a traha pa e kortina di e tabernakel. (Eks. 26:​1-6) Si un superintendente  humano den Dios su organisashon duna bo instrukshonnan ku ta parse sumamente detayá, lo bo por sinti bo tin biaha un poko fadá. Sinembargo, Yehova ta un superintendente perfekto. E ta kla pa duna su sirbidónan trabou pa hasi i ta konfia ku nan lo hasié bon. Ora e duna hopi detaye, e tin un bon motibu pa esei. Pero, ripará bon ku Moisés no a fada ku Yehova òf pensa ku Yehova tabata falt’é rèspèt òf a kita su libertat pasobra el a dun’é hopi instrukshon detayá. Mas bien, Moisés a sòru pa e trahadónan sigui e instrukshonnan i “hasi konforme tur loke SEÑOR a ordená.” (Eks. 39:32) Esaki sí tabata un aktitut humilde! Moisés a rekonosé ku e trabou tabata di Yehova i ku e tabata simplemente un peon ku Yehova tabata usa pa hasi e trabou ei.

¹⁴ E humildat di Moisés tabata bisto tambe ora el a konfrontá sirkunstansianan negativo ku a afekt’é personalmente. Un biaha, Moisés a pèrdè su dominio propio i no a santifiká Dios ora e tabata trata ku e pueblo ku tabata blo keha. Pa motibu di esei, Yehova a bisa Moisés ku lo e no permitié hiba e pueblo den e Tera Primintí. (Num. 20:​2-12) Pa hopi aña, Moisés ku su ruman Aaron a soportá e kehamentu di Israel. Anto pasobra Moisés a faya na esun okashon ei, lo e no a risibí loke el a spera riba dje pa asina tantu aña! Kon Moisés a reakshoná? Ta di komprondé ku e tabata hopi desepshoná, pero humildemente el a aseptá e desishon di Yehova. E tabata sa ku Yehova ta un Dios hustu, serka ken no tin inhustisia. (Deu. 3:​25-27; 32:4) Ora bo pensa riba Moisés, bo no ta mir’é komo un persona ku Yehova tabata konosé?​—Lesa Eksodo 33:​12 i 13.

Pa Obedesé Yehova Nos Mester Ta Humilde

15. Kiko nos por siña for di loke e hòmber orguyoso Koré a hasi?

¹⁵ E manera ku nos ta reakshoná riba sierto ahustenan den e kongregashon mundial i riba desishonnan ku e rumannan ku ta dirigí ta tuma ta determiná si nos lo tin e aprobashon di Yehova. Koré i su sosionan a alehá nan mes for di Dios pa motibu di nan orguyo, demasiado konfiansa den nan mes i falta di fe. Aunke den bista di Koré ta e hòmber  bieu Moisés tabata tuma e desishonnan di tur dia, en realidat ta Yehova tabata Esun ku a dirigí e nashon. Koré a pèrdè esei for di bista i ta p’esei e no a mustra lealtat na esnan ku Dios tabata usa. Lo tabata muchu mas sabí si Koré a warda riba Yehova. Yehova lo por a yud’é komprondé dikon kos tabata bai asina òf e por a hasi kambio si di bèrdat esei tabata nesesario. Pues al final, e akshon orguyoso di Koré a pone e bon registro di sirbishi fiel ku e tabatin bai pèrdí!

16. Kon Moisés su ehèmpel di humildat por yuda nos?

¹⁶ E relato ei di Koré ta un spièrtamentu serio pa ansianonan i otro rumannan den kongregashon awe. Nos mester ta humilde pa nos por warda riba Yehova i sigui e instrukshonnan di esnan nombrá pa dirigí e kongregashon. Nos ta demostrá ku nos ta mesun humilde i mansu ku Moisés? Nos ta rekonosé e posishon di esnan ku ta dirigí e kongregashon, i nos ta obedesé e instrukshonnan ku nos ta risibí? Nos ta kontrolá nos sintimentunan ora nos keda desepshoná? Si ta asina, Yehova lo konosé nos tambe, i nos lo tin su aprobashon. Nos humildat i sumishon lo hasi nos presioso pa Yehova.

Yehova Konosé Esnan Ku Ta Pertenesé na Dje

17, 18. Kiko por yuda nos keda ku e aprobashon di Yehova?

¹⁷ Ta bon pa nos meditá riba ehèmpel di e personanan ku Yehova a hala serka dje i ku tabatin su aprobashon. Abraham ku Moisés tabata imperfekto i tabatin nan fayonan, meskos ku nos. Asina mes, Yehova tabata konosé nan komo hende ku ta pertenesé na dje. Sinembargo, e ehèmpel di Koré ta mustra ku ta posibel pa nos alehá for di Yehova; lo e no konosé nos mas e ora ei, ni nos lo no tin su aprobashon. Ta bon pa kada un di nos puntra su mes: ‘Kiko Yehova ta pensa di mi? Kiko mi por siña for di e ehèmpelnan akí di Beibel?’

¹⁸ Yehova ta konsiderá su sirbidónan fiel ku el a hala serka dje komo hende ku ta pertenesé na dje. Esaki por ta un gran konsuelo pa nos. P’esei sigui kultivá fe, humildat i otro kualidatnan ku lo hasi bo mas presioso ainda pa nos Dios. Ta un privilegio maravioso ku Yehova konosé nos. Esei ta duna nos satisfakshon den nos bida aktual i ta duna nos e speransa di haña bendishonnan maravioso den futuro.​—Sal. 37:18.

Bo Ta Kòrda?

• Ki relashon presioso bo por tin ku Yehova?

• Kon bo por imitá e fe di Abraham?

• Ki lèsnan nos por siña for di Koré i Moisés?

[Preguntanan di Estudio]

[Plachi na página 29]

Nos tin fe, meskos ku Abraham tabatin, ku Yehova lo kumpli ku tur su promesanan?

[Plachi na página 31]

Koré no tabata humilde ni dispuesto pa sigui instrukshon

[Plachi na página 32]

Yehova konosé bo komo un hende humilde ku ta sigui instrukshon?