Siohwa Ketin Kupwurkin Uhk?
Siohwa Ketin Kupwurkin Uhk?
“Kaun-o ketin mwahngih irail kan me sapwellime.”—2 TIM. 2:19.
1, 2. (a) Dahme Sises ketin nsenohki? (b) Peidek dah kan me kitail anahne medemedewe?
EHU rahno Parisi men kalelapak rehn Sises: “Mehnia kosonned nan pelien Kosonnedo me keieu kesempwal?” Sises ketin sapengki: “Ke pahn poakohng Kaun-o omw Koht sang nan kapehdomw unsek, sang ni [“omw mour,” NW] unsek, sang ni omw lamalam koaros unsek.” (Mad. 22:35-37) Sises uhdahn ketin poakohng Siohwa. Mwomwen sapwellime mour kin kasalehda me e uhdahn nsenohki dahme Siohwa ketin medewehki ih. Ihme kahrehda mwohnte Sises eh ketin pwoula, e kak ketin mahsanih duwen sapwellime peik lelepek ong Koht, ni eh mahsanih: ‘I kin kapwaiada mahsen en Semei, oh kin poadidiong sapwellime limpoak.’—Sohn 15:10.
2 Aramas tohto rahnwet kin nda me re poakohng Koht. Kitail pil kin nda met. Ahpw mie ekei peidek kesempwal kan me kitail anahne medemedewe: ‘Dahme Siohwa ketin medewehkin ie? Ia duwe, I kak nda me Siohwa ketin “mwahngih” ie, de Siohwa ketin kupwurkin ie? Siohwa ketin wiahkin ie sapwellime?’ (2 Tim. 2:19) E inenen mwahu kitail en ahneki nanpwungmwahu rehn emen me keieu lapalap nanleng oh sampah.
3. Dahme kahrehda e apwal ong ekei ren kamehlele me re kak wiahla sapwellimen Siohwa? Dahme kak sewese irail en wekidala arail madamadau?
3 Ahpw e pil apwal ong ekei me poakohng Siohwa ren medewe me re kak kompoakepahnki. Ekei kin kamehlele me sohte kateparail. Pwehki met, re kin medewe me re sohte kak wiahla sapwellimen Siohwa. Ahpw e uhdahn mwahu en ese me Siohwa ketin mwahngih kitail ni ahl tohrohr! (1 Sam. 16:7) Medewehla met: Dahme kahrehda ke kin wadek pwuhk wet? Dahme kahrehda ke kin nantihong papah Siohwa sang ni omw mohngiong unsek, mour unsek, lamalam unsek, oh kehl unsek? Ma ke inoukihong Siohwa omw mour oh papidaisla, dahme kahrehda ke wia met? Paipel mahsanih me Siohwa ketin mwahngih mohngiong kan oh e ketin diar aramas me “kesempwal” ong ih. Eri, e ketin kamwakid de luke irail en wia kompoakepah kan. (Wadek Akkai 2:7; Sohn 6:44.) Eri, ke kak kamehlele me ke kin papah Siohwa pwehki eh ketin kupwurki met. E sohte pahn ketin likidmeliehla irail kan me e ketin luke en wia kompoakepah kan ma re kin kolokol arail lelepek. Koht kin ketin kesempwalkin irail oh e uhdahn ketin poakohng irail.—Mel. 94:14.
4. Dahme kahrehda ahnsou koaros kitail anahne medewe duwen kesempwalpen atail nanpwungmwahu rehn Siohwa?
4 Siohwa ketin kahrehiong kitail en karanihala, kahrehda kitail anahne dadaurete ni limpoak en Koht. (Wadek Sud 20, 21.) Tamataman me Paipel kasalehda me aramas kakete ekis ekis solahr nsenohki dahme Koht mahsanih de sohpeisang oh solahr wia kompoakepah. (Ipru 2:1; 3:12, 13) Karasepe, mwohnte 2 Timoty 2:19, wahnpoaron Pohl koasoia duwen Aimenihus oh Pailihdus. Ohl riemen pwukat mwomwen papah Siohwa mahs ahpw mwuhr ira kesehla padahk mehlel. (2 Tim. 2:16-18) Pil Ekei tohn mwomwohdisohn Kalesia solahr mi nan padahk mehlel. Ahnsou koaros, kitail anahne tamataman uwen kesempwal en atail nanpwungmwahu rehn Siohwa.
5. (a) Mehnia irair kan kitail anahne kakairada pwe Koht en ketin kupwurkin kitail? (b) Mehn kahlemeng dah kan kitail pahn koasoiapene?
5 Mie ekei irair kan me kitail anahne kakairada ma kitail men Siohwa en ketin kupwurkin kitail. (Mel. 15:1-5; 1 Pit. 3:4) Mepwukat iei pwoson oh aktikitik. Kitail pahn koasoiapene duwen aramas riemen me Siohwa ketin poakohng pwehki ara kin kasalehda irair pwukat. Kitail pil pahn tehk duwen emen me aklapalap kahrehda Siohwa eh ketin soikala. Kitail kak sukuhlki ire kesempwal kan sang mehn kahlemeng pwukat.
Semen Irail kan me Pwoson Koht
6. (a) Pwehki Eipraam eh pwoson sapwellimen Siohwa inou kan, dahme e wia? (b) Ia duwen Siohwa eh uhdahn ketin mwahngih Eipraam?
6 Eipraam ohl me pwoson Siohwa. E adaneki “semen irail kan koaros me pwoson Koht.” (Rom 4:11) Pwehki eh pwoson, Eipraam perenki kohkohlahsang imwe, kompoakepah kan, eh doadoahk, oh soahng koaros me e ahneki pwe en kohla sahpw doh ehu. (Sen. 12:1-4; Ipru 11:8-10) Eipraam kolokolete eh pwoson kehlail mwurin sounpar tohto. Met sansalda ni eh onopada en peikiong sapwellimen Siohwa kehkehlik en meirongkihong nah pwutak Aisek. (Ipru 11:17-19) Eipraam kasalehda eh pwoson sapwellimen Siohwa inou kan oh met kahrehda Siohwa ketin kesempwalki ih. Siohwa uhdahn ketin mwahngih Eipraam. (Sen. 18:19) Met wehwehki me Siohwa sohte ketin mwahngihte Eipraam ahpw e pil ketin poakohng nin duwen kompoakepah.—Wadek Seims 2:22, 23.
7. Dahme Eipraam ese duwen sapwellimen Siohwa inou kan? Ia duwen eh kin kasalehda eh pwoson?
7 Siohwa ketin inoukihong Eipraam me kadaudoke kan pahn “kalowehdi eh imwintihti kan” oh re pahn “duwehte ngeder en pihk kan pohn oaroahr kan.” (Sen. 22:17, 18) Mendahki inou pwukat sohte pweida erein Eipraam eh wie momour, e kolokolete eh pwoson kehlail Siohwa. E ese me ahnsou koaros sapwellimen Koht inou kan kin pweida, oh e kasalehda nan eh mour pwoson wet. (Wadek Ipru 11:13.) Ia duwe, Siohwa ketin mwahngih kitail nin duwen aramas pwoson duwehte Eipraam?
Awihte Siohwa iei Kilelepen Omw Pwoson
8. Ia ekei soahng kan me aramas tohto kin uhdahn men wia?
8 Ele mie soahng kan me kitail men en pweida nan atail mour me duwehte pwopwoudida, naineki seri kan oh ahneki roson mwahu. E sohte sapwung en inangih mepwukat. Ahpw mepwukat koaros sohte kin pweiong me tohto rehtail. Ma mie mehkot me kitail uhdahn men en wiawi ahpw e sohte pweida, dahme kitail pahn wia? Mwomwen atail mwekid nan irair wet ele pahn kasalehda uwen kehlail en atail pwoson.
9, 10. (a) Dahme ekei kin wia pwehn alehdi dahme re mwahuki? (b) Ia omw madamadau me pid sapwellimen Siohwa inou kan me pahn pweida nan omw mour?
9 E sohte wia elen loalokong en uhwong sapwellimen Koht kaweid oh song en kapwaiada atail ineng kan. Met kak kauwehla atail nanpwungmwahu rehn Siohwa. Karasepe, ekei kin pilada soahng kan ong epwelpen paliwar me kin uhwong kaweid en Paipel. Ekei alehda doadoahk me kihsang arail ahnsou ong arail peneinei oh mihting en mwomwohdiso kan. Ekei kin tepida mwahukihda emen me sohte kin papah Siohwa. Ma Kristian emen wia met, e kin nannantihong wia emen me Siohwa ketin kupwurki? Medewehla ma Eipraam sohla kak kanengamahiong awiawih sapwellimen Koht inou kan. Ia pahn sapwellimen Siohwa pepehm? Ia duwen ma Eipraam wia dahme e men wia oh koasoanehdi en pwurehng kousoan ehu wasa? Ia duwen ma e pein pilada wiahla aramas ndand men ahpw sohte awih lao Siohwa ketin mwekid? (Pil kilang Senesis 11:4.) Ia duwe, Siohwa pahn ketin medewe me e wiewiahte kompoakepah?
10 Soahng dah kan me ke uhdahn men en pweida rehmw? Omw pwoson kin kehlail en awiawihete Siohwa pwehn ketikihong uhk soahng pwukat? E kin ketin inoukihda me e pahn ketin kaitarala “anahn akan koaros.” (Mel. 145:16) Ekei sapwellimen Siohwa inou kan ele sohte pahn pweida ni ahnsou me ke kasikasik. Ahpw ma kitail kin mour ni ahl ehu me kasalehda pwoson duwehte ahn Eipraam, Siohwa sohte pahn ketin likidmelieikitailla. E pahn ketin katingih kitail.—Ipru 11:6.
Karasaras en Aktikitik oh Aklapalap
11. Dahme Kora kin wia erein sounpar tohto?
11 Kitail pahn tehkpene karasaras kan duwen ohl riemen, Moses oh Kora, ara wiewia kan wekpeseng. Ara wiewia kan sewese kitail en wehwehki me dahme Siohwa kin ketin medewehkin kitail poahsoankihda uwen atail wauneki sapwellime koasoandi oh pilipil kan. Kora emen mehn Lipai, kisehn peneineien Kohad. E iang kilang dahme Siohwa ketin wia pwehn kapitala mehn Israel ko ni ar kotehla Sehd Weitahtao. E pil iang utung sapwellimen Siohwa kadeik ong irail me sapeik kan ni Nahnahn Sainai, oh e pil iang sawas wa kohpwahn inowo. (Eks. 32:26-29; Nemp. 3:30, 31) E mwomwen me e loalopwoat ong Siohwa sounpar tohto, oh pwehki met, tohto mehn Israel kan kin wauneki.
12. Nin duwen eh kileldi nan pali 30,pwehki Kora eh aklapalap, dahme wiawihong eh nanpwungmwahu rehn Siohwa?
12 Ahpw ni arail kohkohlahng Sapwen Inowo, Kora kin medemedewe me sapwellimen Siohwa elen kaweid wehio sapwung. E men wekidala. Eri ohl 250 iangala. Re kamehlele me re ahneki nanpwungmwahu rehn Siohwa. Irail eri ndaiong Moses oh Aaron: “Kumwa nohn daulihala! KAUN-O ketin sapwellimanki mehn Israel koaros, oh KAUN-O kin ketiket rehtail koaruhsie.” (Nemp. 16:1-3) Madamadau oh wiewia wet kasalehda aklapalap. Re nohn koapworopworki pein irail. Moses padahkihong irail: “KAUN-O pahn ketin kasalehiong kitail ihs me e ketin sapwellimanki.” (Wadek Nempe 16:5.) Mwohn rahn mwurio eh imwisekla, Kora oh ienge ko mehla.—Nemp. 16:31-35.
13, 14. Ni ahl dahkei me Moses kasalehda eh aktikitik?
13 Moses weksang Kora. E wia “ohl aktikitik men, me keieu aktikitik rehn aramas en sampah kan.” (Nemp. 12:3) E kin kasalehda me e aktikitik sang ni eh kin kapwaiada dahme Siohwa ketin kaweidki en wia. (Eks. 7:6; 40:16) Kitail sohte kin wadek nan Paipel me ahnsou koaros Moses kin sapwungki sapwellimen Siohwa koasoandi kan, de e lingeringerda pwehki eh anahne idawehn sapwellime kaweid. Karasepe, Siohwa ketikihong ire pisetik kan duwen koukoudahn impwal sarawio. Kaweid pwukat pidada pohn dereht kan oh uwen tohtohn pwakel kan me mehn Israel kan en doadoahngki wiahda likou kan en impwal sarawio. (Eks. 26:1-6) Mwein ekei pak ke kakete mworuskihla ma sounapwalih men nan sapwellimen Koht pwihn kihong uhk kaweid pisetik kan. Ahpw Siohwa iei sounapwalih unsek men. E kin ketikihong sapwellime ladu kan ar doadoahk oh ketin likih me re pahn kapwaiada. Mie kahrepe mwahu ni eh ketikihda ire pisetik tohto. Moses sohte lingeringerda pahn Siohwa de medewe me Siohwa sohte ketin wauneki pwehki eh ketikihong kaweid pisetik tohto. Moses sohte medewe me Siohwa ketikihsang eh saledek en wiahda pilipil. Moses padahkihong tohndoadoahk ko en kapwaiada mehkoaros me Siohwa ketin kaweidki irail. (Eks. 39:32) Ia uwen eh aktikitik! Moses ese me doadoahko sapwellimen Siohwa, oh Siohwa ketin doadoahngki ih en kapwaiada.
14 Moses kin kasalehda aktikitik ahnsou me mie kahrepe kan en nsensuwedla. Karasepe, ni aramas ako ar kaulimki me sohte nimerail pihl, Moses uhdahn lingeringerda pahrail oh sohte kawauwih Siohwa. Pwehki met, Siohwa ketin mahsanihong Moses me e sohte pahn kahluwalahng aramas ako nan Sapwen Inowo. (Nemp. 20:2-12) Sounpar tohto, Moses oh Aaron kin wie lokolongki ara kin rongorong ahn mehn Israel ko kaulim kan. Ahpw pwehki sapwungo, Moses solahr kak alehdi dahme e kasikasik ahnsou reirei. Dahme Moses wia? Ei e mworusala, ahpw e aktikitik oh pwungki sapwellimen Siohwa pilipil. E ese me Siohwa iei Koht pwung men oh “kin ketin wiahda dahme pwung oh pahrek.” (Deud. 3:25-27; 32:4) Rahnwet, ni atail kin tamanda Moses, kitail kin medewehki me ih emen me Siohwa ketin kupwurki.—Wadek Eksodus 33:12, 13.
Peikiong Siohwa Anahne Aktikitik
15. Dahme kitail kak sukuhlki sang en Kora aklapalap?
15 Kitail kak ahneki sapwellimen Siohwa kupwuramwahu ma kitail kin pwungki wekidekla kan me kin wiawihda. Eri kitail anahne kasalehda wahu ong irail kan me Siohwa ketin pilada pwe ren kahluwa mwomwohdiso. Dahme kitail kin wia ma re kin wiahda pilipil kan de wekidala koasoandi kan en mwomwohdiso? Pwehki Kora oh ienge ko koapworopworki pein arail elen wia soahng kan, re sohla wia kompoakepahn Koht. Re aklapalap oh sohte pwoson. Kora medewe me Moses ohl mah men me kin wiahda pein eh pilipil kan, ahpw e manokehla me Siohwa me kin ketin kaukaweid wehio. Kahrehda e sohte loalopwoatohng irail kan me Koht kin ketin doadoahngki. Kora anahne awih lao Siohwa ketin mwekid. Siohwa kak ketin sewese en wehwehki kahrepen soahng kan oh wekidekla kan ma mie anahnepe. Pwehki dahme Kora wiahdao, rahnwet kitail sohte kin medewe erein sounpar kan me e kin loalopwoat ni eh papah Siohwa. Kitail kin medewehki ih emen me sapeikiong Siohwa pwehki eh aklapalap.
16. Ia duwen mehn kahlemeng en Moses eh kak sewese kitail?
16 Dahme wiawihong Kora wia mehn kataman ehu ong elder kan oh meteikan nan mwomwohdiso rahnwet. Kitail anahne aktikitik ni atail kin awiawih Siohwa en ketin mwekid oh kitail anahne peikiong irail kan me e ketin doadoahngki pwe ren kahluwa mwomwohdiso. Kitail kin kasalehda aktikitik oh mpahi duwehte Moses? Kitail kin wehwehki oh pwungki irail kan me Siohwa ketin pilada ren kahluwa mwomwohdiso? Kitail kin peikiong arail kaweid kan? Kitail kin kanengamah ma kitail kin mworusala? Ma kitail kin wia soahng pwukat, Siohwa pahn ketin kupwurkin kitail. Ma kitail kin aktikitik oh peik e pahn ketin kesempwalkin kitail.
Siohwa Ketin Mwahngih Sapwellime kan
17, 18. Dahme kak sawas pwe Siohwa en ketin pousehlahte kupwurkin kitail?
17 E mwahu kitail en medewe mehn kahlemeng kan en irail kan me Siohwa ketin poakohng oh luke ren wia kompoakepah. Eipraam oh Moses soh unsek oh mie ara kahpwal kan duwehte kitail. Ahpw Siohwa ketin wiahki ira kompoakepah oh duwehte sapwellime. Dahme wiawihong Kora weksang met. Eh wiewia kan kasalehda me kitail kakete sohpeisang Siohwa oh sohla wia kompoakepah. Emenemen kitail anahne medewe soangen peidek me duwehte: Dahme Siohwa kin ketin medewehkin ie? Dahme I kak sukuhlki sang karasaras en nan Paipel pwukat?
18 Siohwa kin ketin medewehki irail me lelepek kan aramas akan me e ketin sapwellimanki. Met kin kansenamwahwih kitail. Eri kitail en pousehlahte nantihong kasalehda pwoson oh aktikitik. Omw pahn wia met pahn kahrehiong uhk ken ahpwte kesempwalla rehn atail Koht. E wia kapai kaselel ehu Siohwa en ketin kupwurkin kitail. Irail kan me e kin ketin kupwuramwahwih kin ahneki mour nsenamwahu met oh re pahn pil ahneki kapai kaselel kan ni ahnsou kohkohdo.—Mel. 37:18.
Ke Tamataman?
• Ia wehwehn Siohwa eh kin ketin kupwurkin uhk?
• Ia duwen omw pahn kak kahlemengih en Eipraam pwoson?
• Dahme kitail kak sukuhlki sang Kora oh Moses?
[Peidek en Onop]
[Kilel nan pali 29]
Kitail kin pwoson me ahnsou koaros sapwellimen Siohwa inou kan kin pweida duwehte Eipraam?
[Kilel nan pali 30]
Kora aklapalap oh sohte men idawehn koasoandi kan
[Kilel nan pali 31]
Siohwa kin ketin kupwurkin uhk pwehki omw kin aktikitik oh peik?
