¿Jehová riqsiwanchikchu?

“[Jehovaqa] rejsin paypata kajkunata.” (2 TIM. 2:19.)

1, 2. a) ¿Imatataq Jesús astawan munarqa? b) ¿Imastataq tapurikunanchik tiyan?

JUK kutipi juk fariseo, Jesusta tapurqa: “Leypa kamachisqasninmanta mayqentaj aswan kurajri?”, nispa. Jesustaq kutichirqa: “[Jehová] Diosniykitaqa munakunki tukuy sonqoykiwan, tukuy almaykiwan, tukuy yuyayniykiwantaj”, nispa (Mat. 22:35-37). Jesusqa, kay rimaykunamanjina kawsarqa. Arí, Tatanta mayta munakurqa, paypa ñawpaqinpi allinpaq qhawasqa kayta munarqa, chaytataq chiqa sunqu kaspa rikuchirqa. Chayrayku niraq wañuchichkaptinkuqa, tukuy imapi Tatanpa kamachisqanta kasukusqanta, munakuynillanpipunitaq kasqanta nirqa (Juan 15:10).

² Kay tiempopiqa achkhas, Diosta riqsisqanchikta, munakusqanchikta ima ninchik. Chaywanpis allin kanman kaykunata tapurikunanchik: “¿Jehová riqsiwanchu? ¿Allinpaqchu qhawawan? ¿Paypatachu kani?”, nispa (2 Tim. 2:19). Dioswan allinpi kayqa may sumaqpuni.

3. ¿Imaraykutaq wakin, Diospa amigon kayta atisqankumanta iskaychasqasraq kachkanku? ¿Imataq manaña ajinata yuyanankupaq yanapanman?

³ Wakinqa, Jehovata tukuy sunqu munakuspapis, paypa amigon kayta atisqankumanta iskaychasqasraq kachkanku. Ichapis pisipaq qhawakusqankurayku, manataq Diospata kanankupaqjinachu kasqankuta yuyasqankurayku. Jehovarí mana ajinatachu qhawawanchik (1 Sam. 16:7). Pablo nisqanta qhawarina, pay nirqa: “Sichus mayqempis Diosta munakun chayqa, Diospis payta rejsin”, nispa (1 Cor. 8:3). Arí, Dios riqsinawanchikpaqqa, ñuqanchikraq payta munakunanchik tiyan. Tʼukurina: “¿Imaptintaq kay revistata ñawirichkani? ¿Imaraykutaq Jehovata tukuy sunquywan, almaywan, yuyayninwan, kallpaywan yupaychanaypaq kallpachakuni? ¿Payman qukuspa bautizakuniñachu? Jina kaptin, ¿imaraykutaq chayta ruwarqani?”. Arí, Diosqa, runaspa sunqusninkuta qhawan, allinpaq qhawasqallantataq payman pusan (Hageo 2:7, 8; Juan 6:44 ñawiriy). Chayrayku amigosnin kananchikpaq waqyawasqanchikrayku Paytaqa yupaychachkanchik. Payman chiqa sunqullapuni kasunchik chayqa, ni jaykʼaq saqirpariwasunchu. Diosqa, may allinpaq qhawawanchik, maytataq munakuwanchik (Sal. 94:14).

4. ¿Imaraykutaq Diospa amigosnin kasqanchik may sumaq kasqanpi tʼukurisunman?

⁴ Jehovap qayllanpiña kaspaqa, munakuyninpi kanallapaqpuni kallpachakuna (Judas 20, 21 ñawiriy). Bibliaqa, cristianos pisimanta pisi Diosmanta karunchakuyta atisqankuta rikuchin (Heb. 2:1; 3:12, 13). Sutʼincharinapaq apóstol Pabloqa, niraq 2 Timoteo 2:19 nisqanmanta parlachkaspa Himeneowan Filetowan, Diosmanta karunchakusqankuta nirqa. Chay runasqa, Jehovapta karqanku, chaywanpis chiqa kaqmanta karunchakurqanku (2 Tim. 2:16-18). Galacia qutuchakuymanta wakin hermanospis chayta ruwallarqankutaq. Paykunaqa, Diospa riqsisqasnin kaspapis, chiqa kaqmanta karunchakurqanku (Gál. 4:9). Diospa amigosnin kasqanchiktaqa, ni jaykʼaq pisipaq qhawanachu.

5. a) ¿Ima kʼacha kaykunatataq Dios allinpaq qhawan? b) ¿Imastataq ukhuncharisun?

⁵ Dios riqsinawanchikpaqqa, pay allinpaq qhawasqan kʼacha kaykunata rikuchinanchik tiyan (Sal. 15:1-5; 1 Ped. 3:4). Chayrayku iñiyniyuq, llampʼu sunqutaq kananchik  tiyan. Kunanqa, Diospa iskay kamachisninpa kawsayninkumanta ukhuncharisun, paykunaqa chay kʼacha kaykunata rikuchisqankurayku Diospaq munasqa karqanku. Chantapis wak runap kawsayninmanta ukhuncharisun. Payqa, Diospa amigon kaspapis jatunchakusqanrayku qhisachasqa karqa. Paykunamantaqa, mayta yachakusunman.

Tukuy creeqkunap tatanku

6. a) ¿Imaynatá Diospa nisqasninpi atienekusqanta Abraham rikuchirqa? b) ¿Imaraykutaq nisunman Jehová Abrahamta riqsisqanta?

⁶ Abrahamqa Jehovap nisqanta “creerqa”. Arí, “tukuy creejkunaj tatanku” karqa (Gén. 15:6; Rom. 4:11). Payqa, wasinta, kapuyninta, amigosninta ima saqispa karu suyuman ripurqa (Gén. 12:1-4; Heb. 11:8-10). Arí, payqa tiempo pasasqanmanjina Diospi mayta atienekullarqapuni. Chaytataq Dios kamachisqanmanjina, churin Isaacta jaywayta munasqanpi rikuchirqa (Heb. 11:17-19). Abrahamqa, Diospa nisqasninpi atienekusqanta rikuchirqa, chayrayku Diosqa payta may allinpaq qhawarqa, chiqamantapunitaq riqsirqa (Génesis 18:19 ñawiriy). Jehovaqa, mana Abraham kawsasqallantachu yacharqa manaqa amigontajina munakurqa (Sant. 2:22, 23).

7. ¿Imatataq Abraham Jehovap nisqasninmanta yacharqa, imaynatataq chayta kawsayninpi rikuchirqa?

⁷ Abrahampa mirayninmanta kaqkunaqa, Sumaq Jallpʼata herenciatajina japʼinanku karqa, “mama qocha kantupi tʼiyu chhika[jinataq]” kananku karqa (Gén. 22:17, 18). Abrahamqa, mana chayta juntʼakuqta rikuspapis, Jehovapi atienekullarqapuni. Payqa, Diospa nisqan juntʼakusqantapuni yacharqa. Chayrayku kawsayninpiqa, Diospi atienekusqantapuni rikuchirqa (Hebreos 11:13 ñawiriy). ¿Ñuqanchiktarí Abrahamtajinachu Dios riqsiwanchik?

Jehovapi atienekuqkunaqa, paypi suyakunku

8. ¿Imastá achkha runas munanku?

⁸ Achkha runasqa, mana unquspa kawsakuyta, casarakuyta, wawasniyuq kayta ima, munanku. Chaykunata munayqa mana juchachu, chaywanpis mana munasqanchikmanjinapunichu kanman. Ajinapi rikukuspa imatachus ruwasqanchikqa, Diospi atienekusqanchiktachus manachus sutʼita rikuchinqa.

9, 10. a) ¿Imaynatá wakin imatachus munasqankuta juntʼayta munanku? b) ¿Imaynatá Jehovap nisqasninpi atienekusunman?

⁹ Allinpaq qhawasqa kamachisnintajina Jehová riqsinawanchikta munanchik chayqa, mana munayninchikmanjinalla ruwaspa, munayninman churanakusunchu. Wakinqa, imaynatachus jampichikuyta akllaspa, Bibliap yuyaychasqanman churanakunku. Wakintaq  llamkʼayllaman quykukuspa familiankupaq chayri, tantakuykunaman rinankupaq manaña tiempochakuspa chayta ruwanku. Chantapis wakinkunaqa, mana Diosta yupaychaqkunawan munanakuyta qallarispa, mayta pantallankutaq. Chaykunata ruwaqkuna, ¿chiqamantachu Jehovawan allinpi kasqankuta allinpaq qhawanku? Abrahampi tʼukurina. Abraham, Diospa nisqasninta juntʼakunanta suyaspa saykʼupunman karqa chay, munasqanmanjinallataq allinchanman karqa chay, tukuy runaswantaq riqsichikuyta munanman karqa chaypis, ¿imatá Jehová paymanta yuyanman karqa? (Génesis 11:4, kikinchay.) ¿Jehová allillanpaqpunichu qhawanman karqa?

¹⁰ ¿Imastataq juntʼakuqta rikuyta munanki? ¿Jehovapi suyakunapaqjinachu iñiyninchik? Payqa, tukuy kawsaqkunap munayninta juntʼanqa (Sal. 145:16). Chaywanpis Diospa wakin nisqasninqa, mana usqhayllatachu juntʼakunman. Chayrayku Abrahamjina Diospi atienekunanchikpaq kallpachakusun chayqa, payqa ni jaykʼaq ñuqanchikmanta qunqakunqachu, bendeciwasuntaq (Heb. 11:6).

Moisesqa llampʼu sunqu karqa, Coretaq jatunchakuq karqa

11. ¿Imaynatataq Coré achkha watasta Jehovata yupaychanman karqa, chantá imastataq rikunman karqa?

¹¹ Jehovaqa, Moisesta Coreta imaqa, mana kikintachu qhawarqa. Imaraykuchus paykunaqa, Jehovap nisqasninta, kamachisqasninta ima, mana kikintachu qhawarqanku. Coremanta parlarina, payqa levita, Coatitataq karqa. Chantapis payqa, Jehová llaqtanta Puka quchapi kacharichisqanta, Sinaí urqupi mana kasukuqkunata jasutʼisqanta ima rikunman karqa, tratota ruwasqanmanta arcatataq apaysikunman karqa (Éxo. 32:26-29; Núm. 3:30, 31). Payqa, achkha watastasina Jehovaman chiqa sunqu karqa, chayrayku achkha israelitasqa, payta jatunpaq qhawarqanku.

12. Kay 28 paginapi rikunchikjina Coré jatunchakusqanrayku, ¿imataq karqa?

¹² Chaywanpis israelitas niraq Sumaq Jallpʼaman yaykuchkaptinku, Coreqa, Diospa llaqtanta mana allintachu kamachikuchkasqanta yuyarqa. Chayrayku 250 runaswan khuska Moisespa contranta uqharikurqa. Ichapis paykunaqa, Diospa ñawpaqinpi allinta ruwachkasqankuta yuyarqanku. Chayrayku Moisesman, Aaronman ima nirqanku: “Kaykamalla qankunaqa kamachiwasqayku. Tukuynin israelitas Diosman kʼumuykukunku, Diospaj tʼaqasqa kanku; Tata Diospis tukuyninkuwan kashan”, nispa (Núm. 16:1-3). Ajinata ruwaspaqa, mayta jatunchakuchkarqanku. Moisesrí phiñakunanmantaqa kutichirqa: “Qʼaya tutamanta Tata Diosqa willawasun pischus paypata kasqankuta”, nispa (Números 16:5 ñawiriy). Qʼayantin tardetaq Corewan, paywan kaqkuna ima, wañurqanku (Núm. 16:31-35).

13, 14. ¿Imaynamantá Moisés llampʼu sunqu kasqanta rikuchirqa?

¹³ Moisestaq mana Corejinachu karqa, astawanpis “aswan llampʼu sonqoyoj karqa, kay pachapi tukuy runasmanta nisqaqa” (Núm. 12:3). Payqa llampʼu sunqu kasqanta, Jehovap kamachisqanmanjinapuni ruwaspa rikuchirqa (Éxo. 7:6; 40:16). Chantapis payqa, Diospa kamachisqanta mana pisipaqchu qhawarqa, nitaq churanakurqachu. Sutʼincharinapaq Jehovaqa payta yupaychanapaq imaynatachus Tinkukuna Toldota ruwakunanta Moisesman kamachirqa. Chantapis imaynatachus telata sirananta, ima color qʼaytutachus, machkha ganchostachus churananta, wak imastawan ruwanantataq kamachirqa (Éxo. 26:1-6). Jehovaqa, llaqtanta yanapananpaq unaymantaña wakin runasta qhawaqkunatajina churan. Paykuna niwasqanchikta mana juntʼayta atinapaqjina qhawaspaqa,  ichá qʼinaqakusunman. Jehovarí, ni imapi pantaq qhawawaqninchik, kamachisninpi atienekuspataq llaqtanta qhawanankuta saqin. Chayrayku imaynatachus imatapis ruwakunanta nichkaspaqa, imaraykuchus chayta nichkasqanta yachan. Chayrayku Moisesqa, imaynatachus tinkukuna toldota ruwananta niptin, mana Jehovawan phiñakurqachu pisipaq qhawasqanta yuyaspa. Astawanpis kasukuspa, Jehová kamachisqanmanjinapuni ruwakunanta kamachirqa (Éxo. 39:32). Moisesqa, ¡may llampʼu sunqupuni karqa! Arí, Diospa ruwaynin kasqanta, paytaq yanapaqlla kasqanta yacharqa.

¹⁴ Moisesqa, juk kutipi israelitas mayta rimaptinku, phiñakuyninwan atipachikurqa, Jehovatataq pisipaq qhawarqa. Chayrayku Jehovaqa, mana paychu israelitasta Sumaq Jallpʼaman pusaykunanta nirqa (Núm. 20:2-12). Payqa, Aaronwan khuska achkha watasta israelitaspa rimasqankuta muchurqa. Chaywanpis Diosqa, Moisesta chay kutipi pantasqanrayku, unaytaña Sumaq Jallpʼaman yaykunanta suyakuchkasqanta mana juntʼakuqta rikunanta nirqa. Chayta yachaspa, ¿imatá ruwarqa? Moisesqa, llakikuspapis Jehovap nisqanmanjina kananta saqispa, llampʼu sunqu kasqanta rikuchillarqataq. Payqa, chiqan kaqta ruwaq Dios kasqanta yacharqa (Deu. 3:25-27; 32:4). Arí, Jehovaqa, Moisesta chiqa sunqu kamachintajina riqsirqa (Éxodo 33:12, 13 ñawiriy).

Jehovata kasukunapaqqa, llampʼu sunqu kananchik tiyan

15. ¿Imatá Coré pantasqanmanta yachakusunman?

¹⁵ Kay tiempopi, Jehovap llaqtanta kamachiqkunaqa, tukuy imata imaynatachus ruwakunanta akllananku tiyan. Chayrayku imallatapis wakjinamantañataq ruwakunanta niptinku, ¿kasukunchikchu? Jehovaqa, qutuchakuyta qhawanankupaq churasqan hermanosta jatunpaq qhawaptillanchik, allinpaq qhawawasun. Mana Corejinaqa pantasunmanchu. Payqa, munasqanmanjina ruwasqanrayku, Diospa ñawpaqinpi manaña allinpaq qhawasqachu karqa, ajinamanta jatunchakusqanta, nitaq atienekusqanta rikuchirqa. Chantapis Coreqa, Jehová, Moisesniqta  kamachichkasqanta mana repararqachu. Chayta ruwaspaqa, Jehová llaqtanta kamachinanpaq churasqan runasman churanakurqa. Diospi atienekunanqa, may allinpuni kanman karqa. Jehovaqa, maychus kaqta yuyananpaq, imatachus ruwananpaqtaq yanapanman karqa. Chaywanpis jatunchakusqanrayku, achkha watasta chiqa sunquwan Diosta yupaychasqanqa qhasipaq karqa.

16. Moisés llampʼu sunqu kasqan, ¿imaynatá yanapawanchik?

¹⁶ Paymantaqa, tukuy cristianos, qutuchakuymanta ancianospis mayta yachakusunman. Chayrayku llampʼu sunqu kananchikqa may allinpuni, imaraykuchus Jehovapi suyakunapaq, llaqtanta qhawanankupaq churasqan hermanostapis kasukunapaq yanapawasun. Moisesjina llampʼu sunqu, kʼumuykukuq sunqu ima, kanapaq, ¿kallpachakunchikchu? ¿Qutuchakuypi michiqkunajina kaq hermanosta jatunpaqchu qhawanchik? ¿Niwasqanchikta kasukunchikchu? ¿Chʼampaykunasninchikta atipanapaq sumaq wakichisqachu kachkanchik? Llampʼu sunqu kasqanchikta, kasukuq kasqanchikta ima rikuchisun chayqa, Jehová riqsiwasun, maytataq munakuwasun.

Jehovaqa, paypata kaqkunata riqsin

17, 18. ¿Imataq Jehovap ñawpaqinpi allinpaq qhawasqa kanallapaqpuni yanapawasun?

¹⁷ Jehovaqa, wakin runasta munakurqa, amigosninpaqtaq riqsikapurqa. Paykunapi tʼukuriyqa mayta yanapawanchik. Rikurqanchikjina, Abrahamwan Moiseswanqa, ñuqanchikjina juchasapas kaspapis, Diospa ñawpaqinpi allinpaq qhawasqas karqanku. Chaywanpis Coré ruwasqanqa, Jehovamanta karunchakuyta atisqanchikta, manañataq allinpaqchu qhawasqa kayta atisqanchikta rikuchiwanchik. Chayrayku tapurikuna: “¿Chiqa sunqu yupaychaqtajinachu Jehová riqsiwan? ¿Imatá kaykunamanta yachakuni?”, nispa.

¹⁸ Jehová payman pusawasqanchikta, paypatajina qhawawasqanchikta ima yachayqa, mayta sunquchawanchik, ¿icharí? Chayrayku llampʼu sunquyuq kasqanchikta, iñiyniyuq kasqanchiktataq rikuchillasunpuni chayqa, Diosqa sapa pʼunchay aswan sumaqpaq qhawawasun. Arí, Paypa riqsisqan kayqa, ni imawan kikinchakunchu. Chayrayku kay tiempopi, aswan qhipamanpis achkha sumaq bendicionesta japʼisun (Sal. 37:18).

¿Yuyarikunkichu?

• ¿Ima niyta munan Jehovap riqsisqan kay?

• ¿Imaynamantá Abrahamjina kasunman?

• ¿Imatataq Coremanta, Moisesmanta ima yachakunchik?

[Tapuykuna]

[26 paginapi dibujo/foto]

¿Abrahamjinachu, Jehová tukuy nisqasninta juntʼananpi atienekunchik?

[28 paginapi dibujo/foto]

Coreqa jatunchakusqanrayku, Jehovap kamachisqanta mana jatunpaqchu qhawarqa

[29 paginapi dibujo/foto]

¿Kasukuq runastajinachu Jehová qhawawanchik?