Kua Kite Ainei a Iehova ia Koe?

“Kua kite a Iehova i tona uaorai.”​—2 TIMO. 2:19.

1, 2. (a) Eaa ta Iesu e manako maata ra? (e) Eaa te au uianga ta tatou ka akamanako?

TETAI ra kua aravei atu tetai Pharisea ia Iesu e kua ui atu e: “Ko teea te akauenga i maata o te ture?” Kua pau atu a Iesu e: “E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa.” (Mata. 22:35-37) E inangaro maata to Iesu i tona Metua i te rangi e kua aru tikai i taua au tuatua ra. Kua akamanako meitaki katoa a Iesu i tona turanga ki mua ia Iehova, e kua akaari mai aia i teia na roto i tona oraanga akarongo mou. No reira, i mua ua ake i tona matenga, kua tuatua aia e kua kite te Atua iaia no tona tu akarongo mou i te aru anga i Tana au akauenga. Kua vai ua rai a Iesu ki roto i to Iehova aroa.​—Ioa. 15:10.

² Maata i teia tuatau te karanga ra e e inangaro to ratou i te Atua. Te tuatua katoa ra rai tatou i te reira. Inara, kia akamanako meitaki tatou i teia au uianga: ‘Kua kite ainei te Atua iaku? Eaa to Iehova manako iaku? Kua kiteaia ainei au e nona?’ (2 Timo. 2:19) E tikaanga ngateitei kia akamanako i te reira pirianga vaitata ki Tei Ngateitei i te ao katoa e pini ua ake!

3. Eaa tetai pae i ekoko ei me no Iehova rai ratou, e eaa te ka tauturu i te kopae atu i taua tu manako ra?

³ Te ngata ra i tetai pae e inangaro maata ra ia Iehova i te irinaki e ka kite papu mai te Atua ia ratou. Kua manako tetai pae e kare ratou e puapinga ana, e kua ekoko e me no Iehova rai ratou. Mataora tikai tatou e e tuke ta te Atua akara mai anga ia tatou! (1 Samu. 16:7) Kua akakite te apotetoro ko Paulo ki tona au taeake Kerititiano e: ‘Me inangaro tetai tangata i te Atua, kua kiteia mai aia e ia.’ (1 Kori. 8:3) E puapinga tikai toou inangaro no te Atua kia kite mai aia ia koe. Akamanako ana: Eaa ra koe i tatau ei i teia makatini? Eaa ra koe i tauta pakari ei i te tavini ia Iehova ma toou ngakau, manako e toou ririnui katoa? Me kua akatapuia koe ki te Atua e kua papetitoia, eaa tei akakeu ia koe kia rave i taua au takainga ra? Kua akamarama mai te Pipiria e na Iehova, tei akara meitaki i te ngakau, e akatae mai i te aronga inangaroia kiaia. (E tatau ia Hagai 2:7; Ioane 6:44.) No reira, papu tikai ia koe e te tavini ra koe ia Iehova no te mea nana i akatae mai ia koe kiaia. Kare rava aia e akaruke i te aronga tana i akatae mai kiaia me vai akarongo mou ratou kiaia. Te manako akaperepere ra te Atua ia ratou, e e inangaro maata tikai tona ia ratou.​—Sala. 94:14.

4. Eaa ra tatou ka akamanako ua ai e kia kiteaia mai tatou e te Atua?

⁴ Me akatae mai a Iehova ia tatou kiaia, kia manako ua rai tatou kia vai ua rai ki roto i tona aroa. (E tatau ia Iuda 20, 21.) Akamaara e te akaari maira te Pipiria e ka topa tatou ki muri me kore ka akaruke i te Atua. (Ebe. 2:1; 3:12, 13) Ei akaraanga, mua ua ake i te akakiteanga i roto ia 2 Timoteo 2:19, kua taiku mai te apotetoro ko Paulo ia Humenaio e Phileto. Kua tavini ana taua nga tangata ra ia Iehova, i muri mai ra kua akaruke raua i te tuatua mou. (2 Timo. 2:16-18) Akamaara e kare tetai pae i roto i te au putuputuanga o Galatia, tei kiteaia ana e te Atua, i noo ana ki roto i te tuatua mou mei ta ratou i mataora ana i mua ana. (Gala. 4:9) No reira, auraka  rava e ngaropoina ia tatou to tatou turanga akaperepere ki te Atua.

5. (a) Eaa tetai nga tu te akaperepere ra te Atua? (e) Eaa tetai au akaraanga ka akamanako atu tatou?

⁵ Te vai ra tetai au tu te akaperepere tikai maira a Iehova. (Sala. 15:1-5; 1 Pete. 3:4) Ko te akarongo e te tu akaaka te akataka ra i tetai aronga tei kiteaia e te Atua. Ka akara ana tatou i tetai nga akaraanga o tetai nga tangata kia kite tatou e akapeea teia nga tu te akamareka anga ia Iehova. Ka akara katoa tatou i tetai tangata tei manako e kua kiteaia mai aia e te Atua, inara kua aru i te aerenga akatietie e kua kite mai e kua kopaeia aia e Iehova. Ka kite mai tatou i tetai au apiianga puapinga mei teia au akaraanga.

Te Metua no te Aronga Akarongo

6. (a) Kua akaari a Aberahama i teea tu akarongo ki roto i ta Iehova au taputou? (e) Akapeea a Aberahama te kiteaia mai anga e Iehova?

⁶ Ko Aberahama tetai tangata tei ‘akarongo kia Iehova.’ Kua kapikiia aia e ko ‘te metua no te aronga akarongo.’ (Gene. 15:6; Roma 4:11) No tona akarongo i akaruke ei a Aberahama i tona kainga, au oa, e tana au apinga kia aere ki tetai enua mamao. (Gene. 12:1-4; Ebe. 11:8-10) Kua vai ketaketa rai te akarongo o Aberahama i te au mataiti e manganui i muri mai. Kua akapapuia mai teia i tona ‘apai anga ia Isaaka’ tana tamaiti, te kauraro anga ki te akauenga a Iehova. (Ebe. 11:17-19) Kua akaari a Aberahama i tona akarongo ki roto i ta Iehova au taputou, no reira kua akaperepere te Atua iaia; kua kite tikai aia ia Aberahama. (E tatau ia Genese 18:19.) Kare a Iehova i kite ua i to Aberahama oraanga; kua akaperepere aia ia Aberahama ei oa nona.—Iako. 2:22, 23

7. Eaa te mea puapinga no runga i te akatupu anga i ta Iehova au taputou, e akapeea teia te akakeuanga ia Aberahama?

⁷ E mea puapinga i te kite e kare i rauka ana ia Aberahama te tuanga enua tei taputouia kiaia i tona tuatau. Kare katoa aia i kite ana i tana uanga te riro anga “mei te onetea i taatai ra.” (Gene. 22:17, 18) Noatu e kare teia au taputou i akatupuia i to Aberahama tuatau, kua vai ketaketa rai tona akarongo kia Iehova. Kua kite aia e me tuatua mai te Atua i tana tuatua kua tupu rai te reira. Ae, kua akaari a Aberahama i teia tu akarongo i roto i tona oraanga. (E tatau ia Ebera 11:13.) Kua kite ainei a Iehova e e akarongo to tatou mei to Aberahama rai?

Akaari i te Akarongo na te Tiaki Anga ia Iehova

8. Eaa te au anoano tau te inangaro maata ra tetai pae kia akatupuia?

⁸ Penei e au anoano to tatou te inangaro ra tatou kia akatupuia. Mei te akaipoipo, anau tamariki anga, e tetai oraanga kopapa meitaki.  E au anoano natura e te tau te reira. No te manganui ra kare taua au anoano ra e akatupuia. Me koia ia, ka akaari mai to tatou tu e mei teaa rai te ketaketa o to tatou akarongo.

9, 10. (a) Akapeea tetai pae te akatupu anga i to ratou au anoano? (e) Eaa toou manako no runga i ta te Atua au taputou e akatupuia ra?

⁹ Kare i te mea meitaki i te akatupu i teia au inangaro na roto i te tu te tuke ra ki te pakari o te Atua. Ka takino te reira i to tatou turanga pae vaerua. Ei akatauanga, kua iki tetai pae i tetai au tu rapakauanga te patoi ra i te akoanga a Iehova. Kua rave tetai pae i te anganga te apai ke ra ia ratou mei to ratou pamiri me kore te au uipaanga putuputuanga. Akapeea te akatupu anga i tetai pirianga akainangaro ki tetai tangata kare e tavini ana ia Iehova? Me aru tetai Kerititiano i taua mataara ra, te inangaro tikai ra ainei aia kia kiteaia mai aia e Iehova? Mei teaa ra to Iehova manako naringa kare a Aberahama i tiaki marie kia akatupuia ta te Atua au taputou kiaia? Akapeea me kua noo a Aberahama ki tetai ngai e kua akatupu i tetai ingoa rongonui nona uaorai ma te kore e tiaki atu ia Iehova? (Akaaite ia Genese 11:4.) Ka kitea uaia ainei aia e Iehova?

¹⁰ Eaa toou au anoano e inangaro maata ra koe kia akatupuia? Kua ketaketa ainei toou akarongo no te tiaki anga ia Iehova, tei taputou mai e ka akamerengo aia i taau e inangaro maata ra? (Sala. 145:16) Mei tei tupu kia Aberahama, kare tetai au taputou a te Atua e akatupu vivikiia mei ta tatou e inangaro ra. Noatu ra, te akaperepere maira a Iehova i to tatou akarongo e tupu ra mei to Aberahama rai, ia tatou e aru rotai ra i te reira. Ka puapinga maataia tatou me rave tatou i te reira.—Ebe. 11:6.

Tuke o te Tu Akaaka e te Akatietie

11. Eaa te au apainga ngateitei ta Kora i mataora ana i te rave, e eaa ta teia i akaari mai no runga i tona tu ki te Atua?

¹¹ E tuke tikai te nga turanga o Mose e Kora i te akangateitei anga i ta Iehova akanoonooanga e tana au tukuanga tika. Ka marama tatou eaa to Iehova manako no runga ia raua. No roto mai a Kora i te uanga o te Kohata ngati Levi, e kua mataora aia i tana au apainga ngateitei e manganui, e te kite anga i te akaoraia anga te iti tangata i te Tai Muramura, te turuturuanga i ta Iehova akavaanga i te ngati Iseraela akarongo kore i te Maunga Sinai, e te tauturu anga i te apai i te aruna koreromotu. (Exo. 32:26-29; Nume. 3:30, 31) Kua tiratiratu ua ana aia kia Iehova no te au mataiti e kua akangateiteiia e te manganui o te iti tangata o Iseraela.

12. Mei tei akaariia i te kapi 28, akapeea te tu akatietie o Kora te kiteaia anga e te Atua?

¹² Inara, i te iti tangata o Iseraela e aere ra ki te Enua Taputouia, kua manako a Kora e e au manamanata tetai i roto i tu e aratakiia ra te iti tangata. E kua piri atu tetai au tane taoonga teitei e 250 o te iti tangata kia Kora, kia tauta i te rave i tetai au tauianga. Kua irinaki papu tikai a Kora e tetai ke i to ratou pirianga kia Iehova. Kua akakite ratou kia Mose e: “Te akamaata rava na korua, no te mea te tapu katoa nei te uipaanga katoa e pini ua ake, e tei roto a Iehova ia ratou ra.” (Nume. 16:1-3) E tu akatietie tikai te reira e te irinaki papu ia ratou uaorai! Kua akakite a Mose kia ratou e: ‘Na Iehova rai e akakite mai i tona ra.’ (E tatau ia Numero 16:5.) Tae anga ki te openga o tera mai ra, kua mate a Kora e te aronga tei piri atu kiaia i te meameaau.​—Nume. 16:31-35.

13, 14. Na roto i teea au mataara i akaari ei a Mose i tona tu akaaka?

¹³ Te tuke, “e maru maata to taua tangata ra to Mose, i to te tangata ravarai o te ao katoa nei.” (Nume. 12:3) Kua akaari aia i te tu maru e te tu akaaka na te tauta anga i te aru i ta Iehova aratakianga. (Exo. 7:6; 40:16) Kare e akakiteanga e kua ekoko ana a Mose i ta Iehova mataara no te rave anga i te au mea me kore kua mareka kore aia i te aru i te au  kaveinga ta Iehova i akanoo. Ei akaraanga, kua oronga a Iehova i te au akauenga no te akatu anga i te tapenakara e te aru anga i te au akakiteanga rikiriki, mei te kara o te taura e te numero o te tatai no te maani anga i te au tapoki o te puakapa. (Exo. 26:1-6) Penei kare koe e mareka ana i tetai taime me oronga mai tetai akaaere i roto i te akaaerenga o te Atua i tetai au ikuikuanga rikiriki puapinga kia koe. E akaaere apa kore a Iehova te tua tua meitaki ra i te angaanga e te irinaki ra i tona au tavini. E au tumu meitaki tetai i oronga mai ei aia i te au akakiteanga rikiriki. Kia akamaara e kare a Mose i riri ana ia Iehova te oronga anga mai i te au ikuikuanga rikiriki puapinga, mei te mea rai e kare a Iehova e akangateitei ana iaia me kore kare e oronga ana kiaia tetai tikaanga kia iki. Mari ra, kua akapapu a Mose e “kua akapera rai” te aronga angaanga te aru anga i ta te Atua au aratakianga. (Exo. 39:32) E tu akaaka tikai te reira! Kua kite a Mose e na Iehova te reira angaanga e te taangaangaia ra aia kia rave i te reira.

¹⁴ Kua kiteaia te tu akaaka o Mose te aro atu anga aia i te au turanga kino tei akariri iaia. I tetai atianga, kua riri a Mose e kare i akatapu i te Atua te ariu atu anga ki te kopekope a te iti tangata. Tei tupu mai, kua akakite a Iehova kia Mose e kare aia e arataki i te iti tangata ki roto i te Enua Taputouia. (Nume. 20:2-12) Kua roa te tuatau te akakoromaki anga raua ko tona tuakana ko Aarona, i te kopekope a te ngati Iseraela. No te mea kua tarevake a Mose i taua atianga ra, kare aia e kite i tana i tapapa ana no tetai tuatau roa! Eaa ta Mose i rave? Noatu kua maromaroa a Mose, kua ariki akaaka ra aia i ta Iehova ikianga. Kua kite aia e e Atua tuatua tika a Iehova e kare e tu tika kore i roto iaia. (Deu. 3:25-27; 32:4) Me akamanako koe ia Mose, te kite ra ainei koe iaia e ko tetai tei kiteaia e Iehova?​—E tatau ia Exodo 33:12, 13.

Anoanoia te Tu Akaaka kia Kauraro kia Iehova

15. Eaa ta tatou i kite mai mei te tu akatietie o Kora?

¹⁵ Ka akaari mai to tatou tu ki te au akatikatikaanga i roto i te putuputuanga Kerititiano i te ao katoa e te au ikianga tei raveia e te aronga e arataki ra e me kua kiteaia mai tatou  e Iehova. Kua akatakake a Kora e tona au tangata ia ratou mei te Atua no to ratou irinaki papu ia ratou uaorai, te tu akatietie e te akarongo kore. Kua irinaki a Kora e na te tangata ruaine ko Mose e rave ra i te au ikianga i te au ra, inara ko Iehova te arataki tikai ra i te iti tangata. Kua ngaropoina ia Kora te reira e kare i akangateitei i te aronga ta te Atua e taangaanga ra. E meitaki atu ia Kora i te tiaki ia Iehova no tetai akamarama anga meitaki me kore no tetai akatikatika anga me ka anoano tikaiia te reira. No reira i te openga, kua takore a Kora i tona rekoti tiratiratu no tona tu akatietie!

16. Akapeea te aru anga i to Mose akaraanga no te tu akaaka te tauturu anga ia tatou kia kiteaia mai e Iehova?

¹⁶ E akamatakiteanga pakari ta teia papaanga e oronga mai nei no te aronga pakari e tetai atu i roto i te putuputuanga i teia tuatau. Ka anoanoia te tu akaaka kia tiaki ia Iehova e kia aru i te au aratakianga a te aronga tei ikiia kia arataki. Te akaari ra ainei tatou e e tu akaaka e te maru to tatou mei to Mose rai? Te ariki ra ainei tatou i te turanga o te aronga e arataki ra i rotopu ia tatou e te kauraro ra ki te au aratakianga e orongaia maira? Ka rauka ainei ia tatou i te akatere i to tatou manako me aro atu i tetai au mea kare tatou e mareka ana? Me akapera tatou ka mareka mai a Iehova ia tatou. Ka akaperepere aia ia tatou no to tatou tu akaaka e te kauraro.

Kua Kite a Iehova i Tona Uaorai

17, 18. Eaa te ka tauturu ia tatou kia kitea uaia mai e no Iehova tatou?

¹⁷ E puapinga tikai kia akamanako i te aronga ta Iehova i akatae mai kiaia e tana e mareka ra. E tu apa e te paruparu to Aberahama raua ko Mose, mei ia tatou rai. Inara, kua kiteaia raua e Iehova e nona uaorai. Te akaari maira te akaraanga o Kora e ka rauka ia tatou i te akaruke ia Iehova e kare e kite akaouia mai e ia ma te tu mareka. Ka anoanoia tatou tataki tai kia ui kia tatou uaorai e: ‘Eaa to Iehova manako iaku? Eaa taku ka kite mai mei teia au akaraanga Pipiria?’

¹⁸ Ka akapumaanaia koe i te kite e te manako maira a Iehova i tona au tavini akarongo mou tana i akatae mai kiaia. E akatupu atu rai i te akarongo, te akaaka e tetai atu au tu kia akaperepere mai a Iehova ia tatou. E tikaanga ngateitei tikai te kiteaia anga e Iehova, te ka akamerengo i to tatou oraanga i teianei, e ka rauka mai te au akameitakianga umere no te tuatau ki mua.​—Sala. 37:18.

Maara Ainei ia Koe?

• Eaa te turanga akaperepere ka mataora koe e Iehova?

• Akapeea koe me aru i te akarongo o Aberahama?

• Eaa te au apiianga ta tatou i kite mai mei ia Kora raua ko Mose?

[Au Uianga Apii]

[Tutu i te kapi 26]

Irinaki ainei tatou mei ia Aberahama rai e ka akatupu meitaki a Iehova i tana au taputou?

[Tutu i te kapi 28]

Kare a Kora i kauraro akaaka puareinga ana ki te aratakianga

[Tutu i te kapi 29]

Kua kite ainei a Iehova ia koe ei tangata kauraro akaaka ki te au aratakianga?