Po o Silafia Oe e Ieova?
Po o Silafia Oe e Ieova?
“Ua silafia e Ieova ona lava tagata.”—2 TIMO. 2:19.
1, 2. (a) O le ā sa manatu mamafa i ai Iesu? (e) O ā fesili e tatau ona tatou iloiloina?
I SE tasi aso, na faalatalata atu ai se Faresaio iā Iesu ma fesili atu: “O le ā le poloaʻiga e sili i le Tulafono?” Na tali atu Iesu: “Ia e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa.” (Mata. 22:35-37) Sa alofa tele Iesu i lona Tamā i le lagi, ma na ola e tusa ai ma lenā fetalaiga. Sa manatu mamafa Iesu i lona tulaga i le silafaga a Ieova, ma sa faamaonia lenei mea i lona soifuaga faamaoni. O lea la, a o lata i lona maliu, sa mafai ona ia faapea mai, sa silafia o ia e le Atua, o sē na usiusitaʻi ma le faamaoni i Ana poloaʻiga. O lea na tumau ai Iesu i le alofa o Ieova.—Ioa. 15:10.
2 E toʻatele tagata i aso nei e faapea mai e alolofa i le Atua. E mautinoa e aofia ai ma i tatou i lenā aofaʻiga. Peitaʻi, o vala tāua nei e ao ona iloiloina: ʻPo o silafia aʻu e le Atua? O faapeʻī le silasila mai a Ieova iā te aʻu? Po o iloa aʻu o se tagata o Ieova?’ (2 Timo. 2:19) Maʻeu se faaeaga pe a manatunatu i se faiā vavalalata faapena, ma le Pule Silisili Ese o le aoao o mea!
3. Aiseā ua manatu ai nisi e lē mafai ona avea i latou ma tagata o Ieova, ma e faapefea ona teena lenā manatu?
3 Peitaʻi, o nisi e alolofa iā Ieova, e lē faigofie ona talitonu e faapea, e mafai ona silafia e Ieova i latou i se auala lelei. O nisi ua iai le faalogona o le lē aogā, ma ua latou manatu ai e lē mafai ona avea i latou ma tagata o Ieova. Ae maʻeu lo tatou fiafia, ona e mafai ona silasila mai le Atua iā i tatou i se auala e ese mai! (1 Samu. 16:7) Na taʻu atu e le aposetolo o Paulo i ona uso Kerisiano: “Afai e alofa se tasi i le Atua, e na te silafia lenā tagata.” (1 Kori. 8:3) O lou alofa i le Atua o se vala tāua ina ia silafia ai oe e ia. Seʻi manatu foʻi: Aiseā e te faitauina ai lenei mekasini? Aiseā e te taumafai ai e auauna iā Ieova ma lou lotoatoa, ola atoa, mafaufau atoa ma le malosi atoa? Afai ua e tuuina atu i le Atua ma papatisoina, o le ā na faapogaia ai oe e faia na laasaga? Ua taʻua i le Tusi Paia, o Ieova o lē e na te iloiloina loto o tagata, e na te tosina mai i latou ua manaʻomia. (Faitau le Hakai 2:7; Ioane 6:44.) O lea la, e mafai ona e faapea mai, ua e auauna iā Ieova ona o ia na tosina maia oe. E lē taitai ona tuua e Ieova i latou ua ia tosina maia, pe afai e latou te tumau i le faamaoni. E silasila le Atua iā i latou o ni ē e tāua tele iā te ia, ma e alofa faapelepele o ia iā i latou.—Sala. 94:14.
4. Aiseā e tatau ai ona tatou manatunatu pea i le silafiaina o i tatou e le Atua?
4 Afai ua tosina mai i tatou e Ieova, e tatau la ona tatou manatu mamafa ia tumau i lona alofa. (Faitau le Iuta 20, 21.) Ia manatua, ua faailoa mai i le Tusi Paia, e mafai ona tafetafea ese pe tuulafoaʻia e se tasi le Atua. (Epe. 2:1; 3:12, 13) O se faataʻitaʻiga, a o leʻi taʻua e Paulo le faamatalaga o loo i le 2 Timoteo 2:19, sa ia taʻua Umenaio ma Fileto. E foliga mai sa avea muamua i laʻua ma tagata o Ieova, ae na mulimuli ane la liliuese mai le upu moni. (2 Timo. 2:16-18) Ia manatua foʻi, i faapotopotoga i Kalatia, o nisi sa silafia e le Atua, e leʻi tumau i le malamalama faaleagaga lea sa latou olioli ai muamua. (Kala. 4:9) Seʻi aua lava neʻi o tatou manatu faatauvaa i lo tatou tulaga tautele i luma o le Atua.
5. (a) O ā nisi o uiga e tāua i le Atua? (e) O ā faaaʻoaʻoga o le a tatou iloiloina?
5 E iai nisi o uiga e tāua tele iā Ieova. (Sala. 15:1-5; 1 Pete. 3:4) O le faatuatua ma le lotomaulalo, na iloga ai nisi na silafia e le Atua. Seʻi o tatou iloiloina faaaʻoaʻoga a ni tane se toʻalua, ina ia iloa ai le auala na alofagia ai i laʻua e Ieova ona o nei uiga. O le a tatou tilofaʻia foʻi le faaaʻoaʻoga a se tane na manatu o loo silafia o ia e le Atua, ae ona o le faamaualuga, na ia iloa mulimuli ane ai ua teena o ia e Ieova. E mafai ona tatou aʻoaʻoina ni lesona tāua mai i nei faaaʻoaʻoga.
Le Tamā o Ē e Faatuatua
6. (a) O ā mea na faia e Aperaamo ona o lona faatuatua i folafolaga a Ieova? (e) Na faapefea ona silasila Ieova iā Aperaamo?
6 O Aperaamo o se tane sa ʻfaatuatua iā Ieova.’ O lea na taʻua ai o ia o le “tamā o i latou uma e faatuatua.” (Kene. 15:6; Roma 4:11) Ona o le faatuatua o Aperaamo, na ia tuua ai lona fale, ana uō ma ana meatotino, ina ia malaga atu i se nuu mamao. (Kene. 12:1-4; Epe. 11:8-10) Sa malosi pea le faatuatua o Aperaamo i le tele o tausaga mulimuli ane ai. Ona o lona faatuatua ma le usitaʻia o le poloaʻiga a Ieova, ʻna semanū ai e na te ofo atu’ lona atalii o Isaako. (Epe. 11:17-19) Sa faaalia e Aperaamo lona faatuatua i folafolaga a Ieova, ma o lea na silasila ai le Atua iā te ia o sē e faapitoa, ma na silafia lelei e le Atua Aperaamo. (Faitau le Kenese 18:19.) E lē gata sa silasila mai le Atua o loo ola Aperaamo, ae sa faapelepele foʻi iā te ia o se uō.—Iako. 2:22, 23.
7. O le ā e lelei ona manatua e faatatau i le faataunuuina o folafolaga a Ieova, ma na faapefea ona aafia ai Aperaamo i lenei mea?
7 E lelei ona manatua, a o soifua Aperaamo, e na te leʻi maua le tofi o le fanua lea sa folafola atu iā te ia. E leʻi vaai foʻi o ia i le avea o lana fanau “e pei . . . o oneone o le matafaga.” (Kene. 22:17, 18) E ui e leʻi faataunuuina nei folafolaga a o soifua Aperaamo, ae na tumau pea le malosi o lona faatuatua iā Ieova. Sa ia iloa afai e fetalai Ieova, e mautinoa lava o le a faataunuuina. Ioe, sa ola Aperaamo e tusa ma lenā faatuatua. (Faitau le Eperu 11:13.) Po o silasila Ieova iā i tatou o ni ē e talitutusa lo tatou faatuatua ma le faatuatua o Aperaamo?
O le Faatalitali iā Ieova o se Faailoga o le Faatuatua
8. O ā nisi o faanaunauga talafeagai ua leva ona mananaʻo nisi ia faataunuuina?
8 Atonu e iai ni o tatou faanaunauga ua leva ona tatou mananaʻo ia faataunuuina. O le faaipoipo, le faia o ni fanau ma le mauaina o le soifua mālōlōina lelei, o ni faanaunauga masani ma e talafeagai. Ae mo le toʻatele, atonu ua lē faataunuuina se tasi pe sili atu o na faanaunauga. Afai o le tulaga lenā, o le auala e tatou te taulimaina ai, e ono faailoa atu ai le telē o lo tatou faatuatua.
9, 10. (a) Ua faapefea ona taumafai nisi ia faataunuuina o latou faanaunauga? (e) O ā ni ou faalogona e tusa ai o le faataunuuina o folafolaga a le Atua?
9 Maʻeu le lē atamai o lo tatou saʻili ia faataunuu nei faanaunauga i se auala e tuufaafeagai ma le atamai o le Atua. O le faia faapea e iʻu ai ina afāina faaleagaga se tasi. O se faataʻitaʻiga, o nisi ua latou filifilia ituaiga o togafitiga mo le soifua mālōlōina e feteenaʻi ma fautuaga a Ieova. O isi ua latou talia galuega totogi e umi se taimi e alu ese ai mai le aiga, po o sauniga a le faapotopotoga. Ae faapefea le faia o se faauōga fetosinaaʻi ma sē e lē talitonu? Afai e mulimuli atu se Kerisiano i se ala faapea, po o manaʻo moni e silafia o ia e Ieova? E faapeʻī faalogona o Ieova pe ana faapea e lē onosaʻi Aperaamo, e tusa ai ma le faataunuuina o Ana folafolaga iā te ia? Ae faapefea pe ana taulima e Aperaamo mataupu i lona lava atamai, ina ia toe faamautū lelei ai lona aiga ma faia se mea e taʻutaʻua ai o ia, nai lo le faatalitali atu iā Ieova? (Faatusatusa i le Kenese 11:4.) Po o le a tumau ona finagalo malie Ieova iā te ia?
10 O ā faanaunauga o loo e manaʻo ia faataunuuina? Po o lava le malosi o lou faatuatua e faatalitali ai pea iā Ieova, o lē ua folafola mai e na te faataunuuina ou faanaunauga saʻo? (Sala. 145:16) E pei ona sa tupu iā Aperaamo, atonu e lē faataunuuina nisi o folafolaga a le Atua, i le taimi e tatou te mananaʻo ai. Ae ui i lea, e tāua tele iā Ieova ona tatou atiaʻe se faatuatua e pei o Aperaamo, ma gaoioi e tusa ai ma lenā faatuatua. O le faia faapea e mautinoa e aogā tele iā i tatou.—Epe. 11:6.
Le Eseesega o le Lotomaulalo ma le Faamaualuga
11. O ā faaeaga atonu na maua e Koru, ma o le ā ua faaalia mai ai e faatatau i ona uiga agaʻi i le Atua?
11 E matuā tuufaafeagai lava Mose ma Koru, pe a oo i le tulaga o le faaalia o le faaaloalo mo faatulagaga ma faaiʻuga a Ieova. Na iai se sootaga o a la gaoioiga, i le auala na silasila ai Ieova iā i laʻua. O Koru o se sā Levī mai le aiga o Koato, ma sa ia mauaina le tele o faaeaga, lea atonu na aofia ai le vaai i le faasaoina atu o le nuu mai le Sami Ulaula, le lagolagoina o le faamasinoga a Ieova i tagata lē usiusitaʻi o Isaraelu i le Mauga o Sinai, ma le faia o se vaega i le feaveaʻiina o le atolaau o le feagaiga. (Eso. 32:26-29; Nu. 3:30, 31) E foliga mai sa faamaoni o ia iā Ieova mo le tele o tausaga, ma na maufaatuatuaina ai o ia e le toʻatele o tagata i le togālauapi o Isaraelu.
12. E pei ona faaalia i le ata i le itulau e 28, na faapefea i le faamaualuga o Koru ona aafia ai le silafia o ia e le Atua?
12 Peitaʻi, a o agaʻi atu le nuu o Isaraelu i le Nuu o le Folafolaga, na manatu Koru o loo iai ni faafitauli i faatulagaga a le Atua. O lea na ʻau atu ai isi alii tāua o le nuu e toʻa 250 iā Koru ma taumafai e faia ni suiga. Atonu sa mautinoa naʻuā Koru ma isi e faatatau i la latou faiā ma Ieova. Na latou faapea atu iā Mose: “Ua matou fiu iā te oulua, auā e paia le faapotopotoga atoa ma ua faatasi Ieova ma i latou.” (Nu. 16:1-3) Maʻeu se uiga o le faamaualuga ma le mautinoa naʻuā! Na faapea atu Mose iā i latou: “O le a faailoa mai . . . e Ieova po o ai lē e fai mo ia.” (Faitau le Numera 16:5.) E oo ane i le iʻuga o le aso na sosoo ai, ua fasiotia Koru ma i latou uma na fouvale faatasi ma ia.—Nu. 16:31-35
13, 14. O ā auala na faaalia ai e Mose lona lotomaulalo?
13 I se tulaga tuufaafeagai, o Mose, “o le tagata e sili ona agamalu i tagata uma ua i luga o le fogāeleele.” (Nu. 12:3) Sa faaalia lona agamalu ma le lotomaulalo, e ala i le maumauaʻi e mulimuli i le taʻitaʻiga a Ieova. (Eso. 7:6; 40:16) E leai se faamaumauga e faailoa mai ai na masani ona fesiligia e Mose le auala a Ieova e faia ai mea, pe ita foʻi i le mulimuli atu i taʻiala sa faataatitia e Ieova. O se faataʻitaʻiga, na tuu mai e Ieova faatonuga e tusa ai o le fausiaina o le faleʻie paia, e oo lava i nai mea iti e pei o le lanu o le filo ma le aofaʻi o faamaulave, e tatau ona faaaogā e fai ai ʻie o le faleʻie paia. (Eso. 26:1-6) Afai e avatu iā te oe e se ovasia i le faalapotopotoga a Ieova, ni faatonuga e foliga mai ua soona auʻiliʻili mai, atonu e iʻu ina e fiu ai i nisi taimi. Peitaʻi, o Ieova o se ovasia e lelei atoatoa, o sē e tuuina mai galuega i ana auauna, ma e na te maufaatuatuaina i latou. Pe a ia aumaia ni faamatalaga auʻiliʻili, e na te faia faapea mo lo tatou lelei. Ae ia mātau, e leʻi ita Mose iā Ieova ina ua ia tuuina mai le tele o faamatalaga, ma manatu e faapea ua manatu faatauvaa Ieova iā te ia, pe taumafai e taofiofia lona sogasogā e faia ai ni mea fou, po o lona saʻolotoga foʻi. Nai lo lea, sa faamautinoa e Mose, “ua faapea lava ona . . . faia” e le ʻaufaigaluega, e ala i le mulimuli i faatonuga a le Atua. (Eso. 39:32) Maʻeu se ala lotomaulalo! Sa iloa e Mose o Ieova e ona le galuega, ma ua na o ia o se meafaigaluega ua faaaogā e faataunuuina le galuega.
14 Sa iloatino foʻi le lotomaulalo o Mose ina ua feagai ma tulaga lē lelei na aafia ai o ia. I se tasi taimi, na lē mafai ai e Mose ona pulea o ia, ma ia lē faapaiaina ai le Atua ina ua feutagaʻi ma tagata faitio. O le iʻuga, na fetalai Ieova iā Mose, o le a ia lē taʻitaʻia nei tagata i le Nuu o le Folafolaga. (Nu. 20:2-12) Sa tele tausaga o la onosaia ma lona uso o Arona, faitioga a tagata Isaraelu. Ae ona ua sesē Mose i lenei taimi e tasi, o lea o le a lē maua ai e ia le faamoemoe ua leva ona faatalitali i ai! Na faapefea ona tali atu Mose? E ui sa faanoanoa Mose, ae sa ia taliaina ma le lotomaulalo le faaiʻuga a Ieova. Sa ia iloa o Ieova o se Atua amiotonu, ma e lē o iā te ia se faiga lē tonu. (Teu. 3:25-27; 32:4) Pe a e mafaufau iā Mose, pe e te lē manatu ea iā te ia o sē na silafia e Ieova?—Faitau le Esoto 33:12, 13.
O le Gauaʻi iā Ieova e Manaʻomia ai le Lotomaulalo
15. O le ā e mafai ona tatou aʻoaʻoina mai i gaoioiga faamaualuga a Koru?
15 O le auala e tatou te tali atu ai i suiga i le faapotopotoga faa-Kerisiano i le lalolagi aoao, ma faaiʻuga e faia e i latou o loo taʻimua, e telē sona aafiaga i le avea o i tatou o ni ē e silafia e Ieova. Na faaesea e Koru ma ana aumea i latou lava mai le Atua, e ala i lo latou soona mautinoa naʻuā, faamaualuga ma lē faatuatua. E ui lava sa manatu Koru o loo faia e le tamā matua o Mose faaiʻuga mai lea aso i lea aso, ae i le tulaga moni, o Ieova sa taʻitaʻia le nuu. E leʻi taulaʻi atu Koru i lenā mea moni, ma iʻu ai ina lē faamaoni o ia i ē sa faaaogā e Ieova. O se faiga atamai mo Koru pe ana faapea e faatalitali atu iā Ieova mo se malamalamaga manino, po o ni suiga pe afai e manaʻomia moni lava. Ma o le iʻuga, na faaleagaina ai e Koru lona talaaga o le auauna faamaoni, e ala i ana gaoioiga faamaualuga!
16. E faapefea i le mulimuli i le faaaʻoaʻoga a Mose o le lotomaulalo, ona aafia ai le auala e silafia ai e Ieova i tatou?
16 Ua aumaia ai i lenā tala se lapataʻiga tāua mo toeaina ma isi i le faapotopotoga i aso nei. O le faatalitali atu iā Ieova ma mulimuli i taʻiala mai i ē o loo taʻimua, e manaʻomia ai le lotomaulalo. Po o faaalia e tatou te lotomaulalo ma agamalu e pei o Mose? Po o mafai ona tatou amanaʻia le tulaga o ē o loo taʻimua iā i tatou, ma gauaʻi i faatonuga o loo tatou mauaina? Po o mafai ona tatou manumalo i ni o tatou lava faalogona faaletagata, pe a fesagaʻia ma mea tatou te lē fiafia ai? Afai o loo tatou faia faapea, o le a avea foʻi i tatou o ni ē e maua le finagalo malie o Ieova. O lo tatou lotomaulalo ma gauaʻi, o le a alofagia ai i tatou e Ia.
E Silafia e Ieova Ona Tagata
17, 18. O le ā e mafai ona fesoasoani ina ia iloa ai pea i tatou o ni tagata o Ieova?
17 E aogā ona tatou manatunatu i ē ua tosina mai ma silafia lelei e Ieova. Sa lē lelei atoatoa Aperaamo ma Mose, ma sa iai o la masei e pei foʻi o i tatou. Peitaʻi, sa silafia e Ieova i laʻua o ni ona tagata. Ae ua faaalia mai i le faaaʻoaʻoga a Koru, e ono mafai ona tatou tuulafoaʻia Ieova, ma lē toe silafia ai e Ieova i tatou ma maua lona finagalo malie. E lelei ona fesili ifo le tagata iā te ia lava: ʻO faapeʻī le silasila mai a Ieova iā te aʻu? O le ā e mafai ona ou aʻoaʻoina mai i nei faaaʻoaʻoga faale-Tusi Paia?’
18 O se matuā faamāfanafanaloto lou iloaina, e silasila Ieova i ē faamaoni ma ē na ia tosina maia, o i latou o ona tagata. Ia faaauau ona atiaʻe le faatuatua, lotomaulalo, ma isi uiga ia e atili ai ona alofagia oe e lo tatou Atua. E lē fesiligia o se faaeaga e matuā tāua le silafia o i tatou e Ieova, ma e aumaia ai le faamalieina i o tatou olaga i le taimi nei, atoa ma faamanuiaga matagofie i le lumanaʻi.—Sala. 37:18.
Pe E te Manatua?
• O le ā le tulaga tāua i luma o Ieova e mafai ona e mauaina?
• E mafai faapefea ona e faataʻitaʻi i le faatuatua o Aperaamo?
• O ā lesona e mafai ona tatou aʻoaʻoina mai iā Koru ma Mose?
[Fesili mo le Suʻesuʻega]
[Ata i le itulau 26]
I le pei o Aperaamo, po o tatou faatuatua o le a faataunuuina atoatoa e Ieova ana folafolaga?
[Ata i le itulau 28]
E leʻi lotomalie Koru e gauaʻi atu ma le lotomaulalo i faatonuga
[Ata i le itulau 29]
Po o silafia oe e Ieova o sē e gauaʻi ma le lotomaulalo i faatonuga?
