Jehova Uyakwati Yini?
Jehova Uyakwati Yini?
“INkhosi [Jehova] iyabati lababayo.”—2 THIM. 2:19.
1, 2. (a) Jesu bekakhatsateka ngani? (b) Ngumiphi imibuto lokufanele sicabange ngayo?
NGALELINYE lilanga, umFarisi lotsite waya kuJesu wambuta, watsi: “Ngumuphi umyalo lomkhulu emtsetfweni seyiyonkhe?” Jesu wamphendvula watsi: “Uboyitsandza iNkhosi, Nkulunkulu wakho, ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho.” (Mat. 22:35-37) Jesu abemtsandza kakhulu Babe wakhe wasezulwini futsi bekaphila ngalamavi. Bekakhatsateka kakhulu ngebuhlobo bakhe naJehova, futsi loko wakuveta endleleni laphila ngayo. Ngekushesha ngembikwekufa kwakhe, bekangasho ngekuciniseka kutsi Nkulunkulu bekamati njengemuntfu lobekagcina imiyalo yaKhe ngekwetsembeka. Ngesizatfu saloko, Jesu wahlala elutsandvweni lwaJehova.—Joh. 15:10.
2 Bantfu labanyenti batsi bayamtsandza Nkulunkulu, futsi natsi sisemkhatsini wabo. Nobe kunjalo, kunetici letibalulekile lokufanele sicabange ngato, njengekutsi: ‘Nkulunkulu uyangati yini mine? Ungibheka njengemuntfu lonjani? Ngatiwa njengemuntfu waNkulunkulu yini?’ (2 Thim. 2:19) Kuyajabulisa kucabanga ngekutsi singaba nebuhlobo lobusedvute neMbusi wendzawo yonkhe!
3. Kungani labanye bangabata kutsi bangaba baJehova, futsi yini letabasita kutsi bancobe kucabanga lokunjalo?
3 Labanye bantfu labamtsandza kakhulu Jehova bakutfola kumatima kwetsemba kutsi angabati. Labanye batibona bangakabaluleki, ngesizatfu saloko bayangabata kutsi bangaba baJehova. Nanobe kunjalo, siyajabula ngekutsi Nkulunkulu usibuka ngendlela leyehlukile! (1 Sam. 16:7) Naku umphostoli Pawula lakutjela emaKhristu labekakanye nawo: “Nangabe umuntfu atsandza Nkulunkulu, yena-ke watiwa nguye Nkulunkulu.” (1 Khor. 8:3) Lutsandvo lonalo ngaNkulunkulu luyintfo lebalulekile lengakusita kutsi watiwe nguYe. Cabanga nganaku: Kungani ufundza lomagazini? Kungani wetama kamatima kukhonta Jehova ngenhlitiyo yakho yonkhe, umphefumulo, ingcondvo, kanye nemandla akho onkhe? Nangabe utinikele kuNkulunkulu waphindze wabhajatiswa, yini leyakwenta watsatsa letinyatselo? LiBhayibheli litsi Jehova uhlola tinhlitiyo, futsi nguye lodvonsa labo labanenshisekelo. (Fundza Hagayi 2:7; Johane 6:44.) Ngako-ke, ungaphetsa ngekutsi ukhonta Jehova ngesizatfu sekutsi nguye lokudvonsile. Angeke abashiye labo labadvonsile nangabe bahlala betsembekile. Nkulunkulu ubatsatsa njengalabaligugu, futsi ubatsandza kakhulu.—Hla. 94:14.
4. Kungani kufanele sihlale sikhumbula kubaluleka kwekutsi satiwe nguNkulunkulu?
4 Nasekasidvonsile Jehova, kufanele sikhatsateke ngekutsi singatigcina njani siselutsandvweni lwakhe. (Fundza Juda 20, 21.) Khumbula kutsi liBhayibheli litsi kumelula kutehlukanisa naNkulunkulu. (Heb. 2:1; 3:12, 13) Ngembikwekutsi abhale emavi laku-2 Thimothi 2:19, Pawula wakhuluma ngaHumenayosi naFiletusi. Lamadvodza lamabili ake aba aJehova, kodvwa ekuhambeni kwesikhatsi alishiya liciniso. (2 Thim. 2:16-18) Phindze ukhumbule nekutsi labanye ebandleni laseGalathiya labebatiwa nguNkulunkulu, balishiya liciniso labebake balijabulela. (Gal. 4:9) Shengatsi natsi singabutsatsa njengalobuligugu buhlobo lesinabo naNkulunkulu.
5. (a) Ngutiphi letinye timfanelo Nkulunkulu latitsandza kakhulu? (b) Ngutiphi tibonelo lesitawutihlola?
5 Kunetimfanelo Jehova latitsandza kakhulu. (Hla. 15:1-5; 1 Phet. 3:4) Kukholwa kanye nekutfobeka kwaveta bantfu labebatiwa nguNkulunkulu. Ase sihlole tibonelo temadvodza lamabili kute sibone kutsi letimfanelo tawenta njani atsandzeka kuJehova. Sitawuphindze sifundze ngendvodza lebeyicabanga kutsi yatiwa nguNkulunkulu, kodvwa leyatigabatisa futsi yatfola kutsi Jehova besekayilahlile. Singatfola tifundvo letibalulekile kuletibonelo.
Babe Wabo Bonkhe Labakholwa NguNkulunkulu
6. (a) Ngukuphi kukholwa Abrahama lakuveta etetsembisweni taJehova? (b) Jehova abemati njani Abrahama?
6 Abrahama “wakholwa nguSimakadze.” Ubitwa ngekutsi “nguyise wabo bonkhe labakholwa nguNkulunkulu.” (Gen. 15:6; Rom. 4:11) Ngekukholwa, Abrahama washiya umuti wakhe, bangani bakhe, kanye nawo wonkhe umcebo wakhe kute aye eveni lelikhashane. (Gen. 12:1-4; Heb. 11:8-10) Kukholwa kwa-Abrahama kwachubeka kucinile iminyaka leminyenti. Loku kwabonakala ngesikhatsi alalela umyalo waJehova wekutsi ‘anikele nga-Isaka indvodzana yakhe kutsi abe ngumhlatjelo.’ (Heb. 11:17-19) Abrahama waveta kutsi unekukholwa etetsembisweni taJehova, ngaleso sizatfu, Nkulunkulu wamtsatsa njengalobalulekile futsi wamati kahle. (Fundza Genesisi 18:19.) Jehova akazange amane ati kutsi Abrahama uyaphila, kodvwa wajabulela kuba ngumngani wakhe.—Jak. 2:22, 23.
7. Yini lesiyicaphelako mayelana nekugcwaliseka kwetetsembiso taJehova, futsi loku kwamtsintsa njani Abrahama?
7 Kuyacapheleka kutsi Abrahama wafa angazange angene eveni labetsenjiswe lona. Akazange asibone nesitukulwane sakhe siba ‘njengesihlabatsi selugu lwelwandle.’ (Gen. 22:17, 18) Nanobe letetsembiso tingazange tigcwaliseke ngesikhatsi sa-Abrahama, wachubeka anekukholwa lokucinile kuJehova. Bekati kutsi nangabe Nkulunkulu asho lokutsite, bekutakwenteka nakanjani. Abrahama waphila ngekuvumelana nekukholwa kwakhe. (Fundza Hebheru 11:13.) Jehova usati njengalabo labanekukholwa lokufanana nekwa-Abrahama yini?
Kulindza Jehova Kuluphawu Lwekukholwa
8. Ngutiphi tifiso letinhle labanye labafuna kutibona tigcwaliseka?
8 Kungenteka kutsi kunetintfo lesifisa kutibona tigcwaliseka. Kushada, kuba nebantfwana, kanye nekuba nemphilo lenhle kutifiso letingekwemvelo futsi letinhle. Nanobe kunjalo, kulabanyenti letifiso kungenteka tingagcwaliseki. Nangabe kunjalo nakitsi, indlela lesibhekana ngayo naleso simo, itawuveta kutsi kukholwa kwetfu kungakanani.
9, 10. (a) Labanye betame njani kuphumelelisa tifiso tabo? (b) Utiva njani ngekugcwaliseka kwetetsembiso taNkulunkulu?
9 Sitawube singakahlakaniphi nangabe sifuna kuphumelelisa leto tifiso ngendlela leshayisana nekuhlakanipha kwaNkulunkulu. Loku kungalimata buhlobo betfu naYe. Sibonelo saloko kutsi labanye bakhetsa tindlela tekwelapha letimelene netimiso taJehova. Labanye benta imisebenti lebehlukanisa nemindeni yabo nobe lebenta bangabi khona emihlanganweni yelibandla. Labanye batsandzana nemuntfu longasiye umKhristu. Nangabe umKhristu enta kanjalo, usuke akufuna mbamba yini kwatiwa nguJehova? Bekatawuphatseka njani Jehova kube Abrahama waphelelwa sineke nakabona tetsembiso taNkulunkulu tingagcwaliseki? Yini lebeyitakwenteka kube Abrahama wakhetsa kuphindze atakhele umuti futsi ente libito lakhe latiwe kunekutsi alindzele Jehova? (Catsanisa naGenesisi 11:4.) Bekatawuchubeka yini atiwa nguJehova?
10 Ngutiphi tintfo lofisa kutibona tigcwaliseka? Kukholwa kwakho kucine ngalokwenele yini kutsi ungakwati kulindza Jehova, lowetsembisa kufeza tonkhe tifiso takho letifanele? (Hla. 145:16) Njengobe kwenteka naku-Abrahama, letinye tetsembiso taNkulunkulu angeke tigcwaliseke ngesikhatsi tsine lesifuna ngaso. Nobe kunjalo, Jehova uyakujabulela kukholwa kwetfu lokufanana nekwa-Abrahama kanye nekwenta kwetfu ngekuvumelana nako. Kwenta kanjalo kutawuzuzisa tsine.—Heb. 11:6.
Umehluko Emkhatsini Wekutfobeka Kanye Nekutigabatisa
11. Khora wajabulela miphi imisebenti yaJehova, futsi loko kwaveta kutsi abembheka njani Nkulunkulu?
11 Mosi naKhora benta tintfo letingafanani nakutiwa endzabeni yekulalela ticondziso taJehova kanye netincumo takhe. Indlela labenta ngayo yatsintsa buhlobo babo naJehova. Khora abengumLevi longumKhohati, futsi wajabulela imisebenti yaJehova leminyenti, lebeyifaka ekhatsi kubona Jehova akhulula sive sema-Israyeli eLwandle loluBovu. Khora wasekela nesehlulelo saJehova lebesimelene nema-Israyeli langazange alalele eNtsabeni iSinayi, futsi wafaka sandla ekuhanjisweni kwelibhokisi lesivumelwane. (Eks. 32:26-29; Num. 3:30, 31) Wahlala atsembekile kuJehova iminyaka leminyenti futsi bantfu labanyenti baka-Israyeli bebamhlonipha.
12. Njengobe kuvetiwe ekhasini 28, kutigabatisa kwayitsintsa njani indlela Khora labekatiwa ngayo nguNkulunkulu?
12 Nanobe kunjalo, ngesikhatsi sive saka-Israyeli sisendleleni leya eVeni Lesetsembiso, Khora wacala kubona emaphutsa emalungiselelweni aNkulunkulu. Emadvodza langu-250 labehola sive, nawo amsekela Khora kulemibono yakhe leliphutsa. Kungenteka kutsi Khora kanye nalamadvodza bebacabanga kutsi banebuhlobo lobuhle naJehova. Naku labakutjela Mosi: “Senihambe kakhulu! Sonkhe lesive singcwele, bonkhe ngamunye ngamunye wabo, futsi naNkulunkulu unabo.” (Num. 16:1-3) Lendlela labakhuluma ngayo beyiveta kutetsemba kakhulu kanye nekutigabatisa. Naku Mosi labatjela kona: “Simakadze utasikhombisa kutsi ngubani longewakhe.” (Fundza Numeri 16:5.) Ngasekupheleni kwelilanga lelilandzelako, Khora kanye nabo bonkhe labo labebamsekela ekuvukeleni kwakhe, bafa.—Num. 16:31-35.
13, 14. Mosi wakuveta njani kutfobeka kwakhe?
13 Ngalokwehlukile kuKhora, Mosi “bekangumuntfu lotfobekile kwendlula wonkhe umuntfu labekhona emhlabeni.” (Num. 12:3) Waveta kutfobeka kanye nebumnene bakhe ngekutsi atimisele kulalela sicondziso saJehova. (Eks. 7:6; 40:16) Kute lokuveta kutsi Mosi bekayingabata indlela yaJehova yekwenta tintfo nobe kutsi bekatfukutsela nakufanele alandzele ticondziso taJehova. Nasi sibonelo: Jehova wakhipha imiyalo leminyenti lebeyimayelana nekwakhiwa kwelithende lekukhontela. Lemiyalo beyifaka ekhatsi umbala wetindvwangu telithende kanye nelinani letinkintjo lebetitawusetjentiswa natentiwa. (Eks. 26:1-6) Ngaletinye tikhatsi, ungase utfukutsele nangabe umbonisi lotsite enhlanganweni yaNkulunkulu akuniketa ticondziso letingase tibonakale timatima. Kodvwa Jehova yena ungumbonisi lophelele, uhola ngemusa futsi uyatetsemba tinceku takhe. Nakasiniketa ticondziso letinyenti, usuke anesizatfu lesihle sekwenta kanjalo. Caphela kutsi Mosi akazange amtfukutselele Jehova ngekumnika ticondziso letinyenti, ente shengatsi Jehova umbukela phansi nobe umcedzela inkhululeko. Kunaloko, Mosi waciniseka kutsi letisebenti ‘tiyakwenta’ loko Nkulunkulu bekakushito. (Eks. 39:32) Loku bekuveta kubamnene. Mosi wacaphela kutsi lona bekungumsebenti waJehova kanye nekutsi yena bekamane nje asisebenti.
14 Kutfobeka kwaMosi kwabonakala ngesikhatsi ahlangabentana netimo letimatima lebetimtsintsa ngalokucondzile. Ngalelinye lilanga, Mosi wehluleka kutibamba kanye nekudvumisa Nkulunkulu ngesikhatsi bantfu bakhonona. Ngaleso sizatfu, Jehova wamtjela kutsi bekangeke asabangenisa labantfu eVeni Lesetsembiso. (Num. 20:2-12) Yena na-Aroni, umnakabo, bese babeketelele kukhonona kwema-Israyeli lokwatsatsa iminyaka leminyenti. Kodvwa ngesizatfu sekutsi Mosi bekangazange alalele ngalelolanga kuphela, bekangeke asakujabulela loko labekulindzele sikhatsi lesidze. Wasabela njani Mosi? Nanobe abephatseke kabi, ngekutfobeka, wasemukela sincumo saJehova. Bekati kutsi Jehova, unguNkulunkulu lolungile futsi longakwenti lokubi. (Dut. 3:25-27; 32:4) Nawucabanga ngaMosi, awumboni yini angulomunye walabo labebatiwa nguJehova?—Fundza Eksodusi 33:12, 13.
Kulalela Jehova Kudzinga Kutfobeka
15. Yini lesingayifundza ngekutigabatisa kwaKhora?
15 Indlela lesisabela ngayo elushintjweni lolwentiwa emabandleni ebuKhristu lasemhlabeni wonkhe kanye nasetincumeni letentiwa ngulabo labaholako kuwo, iyayitsintsa indlela Jehova lasati ngayo. Khora kanye nebangani bakhe batehlukanisa naNkulunkulu ngekutetsemba kwabo kakhulu, kutigabatisa, kanye nekuba bete kukholwa. Nanobe Khora bekacabanga kutsi nguMosi lobekenta tincumo tamalanga onkhe, kodvwa kahlekahle bekunguJehova lobekacondzisa leso sive. Khora wehluleka kulibona lelociniso, futsi ngesizatfu saloko wehluleka nekuhlonipha labo Nkulunkulu labekabasebentisa. Bekungaba kuhlakanipha ngaye kube wakhetsa kulindza Jehova kute akhanyise kucondza labenako nobe ente lushintjo loludzingekako. Ekugcineni, ngesizatfu setento takhe tekutigabatisa, Khora wonakalisa umlandvo wakhe wekwetsembeka.
16. Kulandzela sibonelo saMosi sekutfobeka kutasisita njani kutsi satiwe nguJehova?
16 Nalamuhla, lokulandzisa kuniketa labadzala kanye nalabanye ebandleni secwayiso lesibalulekile. Kulindza Jehova kanye nekulandzela ticondziso takhe lesitiniketwa ngulabo labaholako, kudzinga kutsi sitfobeke. Siyaveta yini kutsi natsi sitfobekile futsi simnene njengaMosi? Siyasicaphela yini sikhundla salabo labaholako emkhatsini wetfu, futsi silalele ticondziso labasiniketa tona? Siyakwati yini kulawula imiva yetfu nangabe sidvumatekile? Nangabe kunjalo, natsi Jehova utasati njengebantfu labalungile. Kutitfoba kwetfu kanye nekulalela kutasenta sitsandvwe nguye.
Jehova Uyabati Lababakhe
17, 18. Yini letasisita kutsi sichubeke satiwa njengalabo labemukelwa nguJehova?
17 Kubalulekile kutsi sicabange ngalabo Jehova labadvonsa waphindze wabati njengalabalungile. Njengatsi, bo-Abrahama kanye naMosi bebanesono futsi nabo bebawenta emaphutsa. Nanobe kunjalo, bebatiwa nguJehova njengalabo lababakhe. Sibonelo saKhora siveta kutsi kungaba melula kutehlukanisa naJehova futsi sigcine sesingemukeleki kuye. Ngamunye wetfu wenta kahle kutibuta: ‘Jehova ungibona ngingumuntfu lonjani? Yini lengingayifundza kuletibonelo letiseBhayibhelini?’
18 Ungatfola indvudvuto ngekwati kutsi Jehova ubatsatsa njengalababakhe bantfu labetsembekile futsi labadvonsile. Chubeka ukhulisa kukholwa kwakho, kutfobeka, kanye naletinye timfanelo letitakwenta utsandzeke kakhulu kuNkulunkulu wetfu. Kwatiwa nguJehova kuyasijabulisa, futsi kutasiletsela tibusiso letinyenti esikhatsini lesitako.—Hla. 37:18.
Uyakhumbula?
• Ngubuphi buhlobo longabujabulela naJehova?
• Ungakulingisa njani kukholwa kwa-Abrahama?
• Ngutiphi tifundvo lesititfola esibonelweni saKhora kanye naMosi?
[Imibuto Yesihloko Lesifundvwako]
[Sitfombe ekhasini 26]
Njenga-Abrahama, siyakholwa yini kutsi Jehova utatifeza tonkhe tetsembiso takhe?
[Sitfombe ekhasini 28]
Khora bekangafuni kulalela sicondziso
[Sitfombe ekhasini 29]
Jehova ukwati njengaloyo lotilalela ngekutfobeka yini ticondziso takhe?