Jeová hatene ita nuʼudar ninian ka lae?
Jeová hatene ita nuʼudar ninian ka lae?
“Naʼi [Jeová] hatene loloos sira neʼebé Naʼi nian.”—2 TIM 2:19.
1, 2. (a) Jesus hanoin liuliu kona-ba saida? (b) Ita presiza hanoin kona-ba pergunta saida deʼit?
LORON ida, ema fariseu ida hakbesik ba Jesus no husu: “Ukun-fuan ida-neʼebé mak boot liu?” Jesus hatán ba nia: “Ó sei hadomi Naʼi, ó-nia Maromak ho neon ho laran, ho ó-nia klamar tomak.” (Mt 22:35-37) Jesus hadomi tebes ninia Aman iha lalehan no nia hatudu ida-neʼe iha ninia moris tomak. Hodi laran-metin nafatin, Jesus hatudu katak nia mós hanoin kona-ba ninia relasaun ho Maromak Jeová. Tan neʼe, foin antes nia atu mate, nia hatete: “Haʼu . . . halo tuir haʼu Aman nia ukun-fuan sira no hela iha nia domin.”—Joao 15:10.
2 Ohin loron, ema barak hatete katak sira hadomi Maromak. Klaru katak ita mós hatete hanesan neʼe. Maibé, importante tebes ba ita atu hanoin kona-ba pergunta balu tuirmai: ‘Jeová hanoin saida kona-ba haʼu? Jeová “hatene loloos” haʼu, ka simu haʼu ka lae? Jeová haree haʼu nuʼudar ninian ka lae?’ (2 Tim 2:19) Hanoin toʼok, ita iha oportunidade furak tebes atu iha relasaun neʼebé besik ho Jeová, Ukun-Naʼin Boot Liu Hotu iha lalehan no rai!
3. Tansá mak susar ba irmaun-irmán balu atu hanoin katak sira bele sai Jeová ninian? Saida mak bele ajuda sira atu troka sira-nia hanoin?
3 Maibé, irmaun-irmán balu neʼebé hadomi tebes Jeová, dala ruma susar ba sira atu fiar katak Maromak simu sira nuʼudar ninia belun. Balu hanoin katak sira la bele sai Jeová ninian, tanba sente katak sira la iha folin. Maibé ita kontente tanba ita hatene katak Maromak la haree ita hanesan neʼe! (1 Sam 16:7) Apóstolu Paulo hatete ba ninia maluk kristaun sira: “Ema hadomi Maromak karik, Maromak hatene nia.” (1 Kor 8:3) Ita-nia domin ba Maromak mak buat neʼebé importante atu nia simu no hafolin ita. Hanoin toʼok: Tansá mak ita lee daudauk livru neʼe? Tansá mak ita hakaʼas an atu serbí Jeová ho ita-nia laran, neon, no kbiit tomak? Se Ita dedika Ita-nia an ona ba Maromak no hetan ona batizmu, saida mak book Ita atu halo nuneʼe? Bíblia esplika katak Jeová, neʼebé haree ema nia laran, nia mak dada sira atu sai ninia belun. (Lee Ageu 2:7; * Joao 6:44.) Tan neʼe, ita bele fiar katak ita serbí Jeová tanba nia mak dada ita. Nia sei nunka husik sira neʼebé nia dada ona atu sai ninia belun se sira laran-metin nafatin ba nia. Maromak hafolin sira no hadomi tebes sira.—Sal 94:14.
4. Tanbasá mak ita presiza hafolin nafatin ita-nia relasaun diʼak ho Jeová nuʼudar ninia belun?
4 Tanba Jeová dada ona ita, ita presiza hanoin oinsá atu hela nafatin iha ninia domin. (Lee Judas 20, 21.) Bíblia hatudu katak se ita la kuidadu, neineik-neineik ita bele hadook an husi Maromak. (Ebr 2:1; 3:12, 13) Porezemplu, antes apóstolu Paulo hakerek ninia liafuan iha 2 Timoteo 2:19, nia koʼalia kona-ba Himeneo no Fileto. Sira uluk serbí Jeová, maibé ikusmai sira husik lia-loos. (2 Tim 2:16-18) Ema kristaun balu husi kongregasaun sira iha Galasia mós husik lia-loos. (Gal 4:9) Nuneʼe, ita presiza hafolin nafatin ita-nia relasaun diʼak ho Jeová nuʼudar ninia belun.
5. (a) Hahalok balu saida mak ita presiza haburas? (b) Ita sei koʼalia kona-ba ezemplu saida deʼit?
5 Se ita hakarak Jeová atu hatene ita nuʼudar ninia belun, iha hahalok balu neʼebé ita presiza haburas. (Sal 15:1-5; 1 Ped 3:4) Hahalok rua mak fiar no haraik-an. Mai ita koʼalia kona-ba ezemplu diʼak husi Maromak nia atan naʼin-rua neʼebé hatudu hahalok sira-neʼe. Ita mós sei koʼalia kona-ba Maromak nia atan ida neʼebé sai foti-an, no tanba ida-neʼe Jeová la simu ona nia nuʼudar ninia belun. Ita bele aprende buat neʼebé importante husi ezemplu sira-neʼe.
Aman ba sira hotu neʼebé fiar
6. (a) Oinsá mak Abraão hatudu fiar ba buat neʼebé Jeová promete? (b) Iha dalan saida mak Jeová hatene Abraão?
6 Maromak nia atan ida neʼebé “tau fiar ba Jeová” mak Abraão. Bíblia bolu nia nuʼudar ‘aman ba sira hotu neʼebé fiar’. (Gên 15:6; Rom 4:11) Hodi fiar, Abraão husik ninia uma, kolega sira no rikusoin hodi laʼo ba rai dook. (Gên 12:1-4; Ebr 11:8-10) Abraão fiar metin nafatin tanba liutiha tinan barak kuandu Jeová haruka nia atu hasaʼe ninia oan Isaac nuʼudar sakrifísiu, nia prontu atu halo tuir. (Ebr 11:17-19) Abraão tau fiar ba buat neʼebé Jeová promete, nuneʼe Maromak haree nia nuʼudar ema espesiál. Sin, Jeová hatene loloos Abraão. (Lee Gênesis 18:19. *) Neʼe laʼós deʼit katak Jeová hatene kona-ba Abraão, maibé nia mós hadomi Abraão nuʼudar ninia belun.—Tgo 2:22, 23.
7. Saida mak Abraão hatene kona-ba Jeová nia liafuan? Oinsá mak Abraão hatudu ninia fiar?
7 Maromak Jeová promete ba Abraão katak ninia bei-oan sei sai barak “hanesan rai-henek neʼebé iha tasi-ibun” no sei simu rai nuʼudar liman-rohan. (Gên 22:17, 18) Maski Abraão la haree ida-neʼe akontese durante nia moris, maibé nia fiar metin nafatin ba Jeová. Tanba Abraão hatene katak Maromak sempre kumpre ninia liafuan, nia hatudu ninia fiar liuhusi dalan neʼebé nia halaʼo ninia moris. (Lee Ebreu 11:13.) Oinsá ho ita? Jeová mós hatene ita nuʼudar ema neʼebé fiar metin hanesan Abraão ka lae?
Hatudu fiar hodi hein ba Jeová
8. Saida deʼit mak ema barak hakarak atu akontese?
8 Karik ita hakarak buat ruma atu akontese iha ita-nia moris, hanesan kaben, iha oan, ka atu iha saúde diʼak. Hakarak hanesan neʼe baibain deʼit. Maibé, karik ita barak la hetan buat neʼebé ita hakarak. Se nuneʼe, ita sei halo saida? Dalan neʼebé ita hasoru situasaun neʼe bele hatudu katak ita iha fiar neʼebé metin.
9, 10. (a) Ema balu halo saida atu hetan buat neʼebé sira hakarak? (b) Ita sente oinsá kona-ba Maromak nia promete?
9 La matenek duni se ita buka atu hetan buat neʼebé ita hakarak hodi kontra Maromak nia matadalan, tanba ida-neʼe bele estraga ita-nia relasaun ho Jeová. Porezemplu, ema kristaun balu hili tratamentu saúde nian neʼebé kontra Bíblia nia matadalan. Balu seluk foti serbisu neʼebé la fó tempu ba sira atu hamutuk ho sira-nia família ka atu tuir reuniaun sira. Balu seluk tan komesa namora ho ema neʼebé la serbí Jeová. Se ema kristaun ida halo buat hirak-neʼe, nia hakaʼas an duni atu sai Jeová nia belun ka lae? Hanoin toʼok, Jeová sente oinsá se Abraão la iha pasiénsia atu hein ba Ninia promete? Oinsá se Abraão halo nia rasik nia hakarak hodi hela metin iha fatin ida ka buka naran-boot duké hein ba Jeová? (Kompara ho Gênesis 11:4.) Se nuneʼe, Jeová sei kontinua haree nia nuʼudar ninia belun ka lae?
10 Saida deʼit mak ita hakarak atu akontese iha ita-nia moris? Ita iha fiar neʼebé metin hodi hein ba Jeová atu fó buat hotu neʼebé ita hakarak ka lae? (Sal 145:16) Karik buat balu neʼebé Jeová promete la mosu lalais tuir ita-nia hakarak. Maibé, se ita kontinua moris iha dalan neʼebé hatudu fiar hanesan Abraão, Jeová sei la haluha ita no sei fó bensaun ba ita.—Ebr 11:6.
Ezemplu kona-ba haraik-an no foti-an
11. Durante tinan barak, Coré hatudu hahalok saida?
11 Agora mai ita koʼalia kona-ba Moisés no Coré, neʼebé hatudu ezemplu la hanesan. Ita sei haree katak buat neʼebé Jeová hanoin kona-ba ita depende ba respeitu neʼebé ita hatudu ba ninia arranju no desizaun. Coré mak ema levita ida husi umakain Coath. Karik nia haree oinsá Jeová salva nasaun Israel hodi lori sira liuhusi Tasi Mean. No iha Foho Sinai, Coré apoia Jeová nia tesi-lia hasoru ema Israel balu neʼebé la halo tuir Maromak, no nia mós iha knaar atu lori arka aliansa nian. (Êx 32:26-29; Núm 3:30, 31) Ba tinan barak, nia hatudu laran-metin ba Jeová, no tan neʼe ema Israel barak hatudu respeitu ba nia.
12. Tanba Coré foti-an, ida-neʼe lori rezultadu saida?
12 Maski nuneʼe, nuʼudar nasaun Israel laʼo ba rai neʼebé Maromak promete ona, Coré hanoin katak iha problema ruma kona-ba dalan neʼebé Jeová lori ninia nasaun. Tan neʼe, Coré hakarak atu halo mudansa balu, no ema naʼin-250 mós tuir nia. Karik sira sente katak sira-nia relasaun ho Jeová sei diʼak hela, tan neʼe sira hatete ba Moisés: “Toʼo ona, tanba povu neʼe hotu santu no Jeová iha sira-nia leet.” (Núm 16:1-3) Ida-neʼe hatudu katak sira fiar an demais no foti-an. Moisés hatete ba sira: “Jeová sei fó-hatene sé mak ninian.” (Lee Números 16:5. *) Loron tuirmai, Coré no ema hotu neʼebé apoia nia mate.—Núm 16:31-35.
13, 14. Iha dalan saida deʼit mak Moisés hatudu haraik-an?
13 Maibé Moisés la hanesan ho Coré. Nia mak “mane neʼebé laran-maus liu fali ema seluk hotu neʼebé moris iha rai nia leten”. (Núm 12:3) Hodi halo tuir Jeová nia matadalan, nia hatudu laran-maus no haraik-an. (Êx 7:6; 40:16) Bíblia la dehan katak Moisés la simu Jeová nia dalan atu halo buat ruma ka nia hirus tanba nia tenke halo tuir Jeová nia matadalan. Porezemplu, Jeová fó matadalan neʼebé kompletu kona-ba oinsá atu harii tabernákulu, hanesan uza kabas ho kór saida no mós uza kail hira atu hatutan tenda nia hena. (Êx 26:1-6) Se irmaun ida neʼebé tau matan ba buat ruma iha Maromak nia organizasaun fó matadalan barak tebes kona-ba saida mak ita tenke halo, karik ita sente la kontente. Maibé, Jeová neʼebé tau matan ba buat hotu, nia fó serbisu ba ninia atan sira, no nia fiar katak sira sei halo serbisu neʼe didiʼak. Kuandu Jeová fó matadalan barak mai ita, nia iha razaun diʼak atu halo nuneʼe. Kuandu Jeová fó matadalan barak ba Moisés, Moisés la sai hirus hodi hanoin katak Jeová la husik nia livre atu uza ninia matenek rasik. Duké sente hanesan neʼe, Moisés hatete ba serbisu-naʼin sira atu halo tuir buat hotu neʼebé Jeová haruka. (Êx 39:32) Sin, Moisés hatudu duni haraik-an! Moisés hatene katak serbisu neʼebé nia halo mak Jeová nian, no katak Jeová uza nia nuʼudar serbisu-naʼin deʼit.
14 Moisés mós hatudu katak nia haraik-an kuandu nia hasoru situasaun neʼebé halo nia triste. Porezemplu, kuandu povu muramura tanba la iha bee, ida-neʼe halo Moisés sai hirus tebes no la fó glória ba Maromak. Tan neʼe, Jeová hatete ba Moisés katak nia sei la lori povu Israel ba rai neʼebé Nia promete. (Núm 20:2-12) Durante tinan barak, Moisés ho Aarão tahan hasoru ema Israel neʼebé sempre muramura. Maibé agora, tanba Moisés halo sala dala ida deʼit, nia labele ona hetan buat neʼebé nia hein kleur! Moisés halo saida? Maski Moisés triste, nia simu Jeová nia desizaun ho haraik-an. Moisés hatene katak Jeová mak Maromak neʼebé “sempre iha justisa”. (Deut 3:25-27; 32:4) Kuandu ita hanoin kona-ba Moisés, ita fiar katak Jeová haree Moisés nuʼudar ninian, loos ka lae?—Lee Êxodo 33:12, 13. *
Presiza haraik-an atu halo tuir Jeová
15. Ita aprende saida husi Coré nia hahalok foti-an?
15 Ita sente oinsá kuandu iha mudansa ruma iha kongregasaun kristaun iha mundu tomak ka kuandu katuas sira halo desizaun ruma? Atu Jeová bele simu ita, ita presiza halo tuir mudansa ka desizaun sira-neʼe. Coré ho ninia maluk sira hadook sira-nia an husi Maromak tanba sira fiar an demais, foti-an, no la hatudu fiar ba Jeová. Coré hanoin katak Moisés mak ema idade liu ona neʼebé halo desizaun oioin tuir deʼit nia rasik nia hakarak, maibé tuir loloos, Coré haluha katak Jeová mak lori nasaun Israel. Tan neʼe, nia la hatudu laran-metin ba sira neʼebé Maromak uza. Se Coré hein ba Jeová karik, Jeová bele ajuda nia atu komprende tansá nia presiza halo tuir ninia arranju, ka Jeová mós bele halo mudansa ruma se buat ruma la laʼo diʼak. Maibé, tanba Coré hatudu hahalok foti-an, nia estraga buat diʼak hotu neʼebé nia halo kleur ona ba Jeová ho laran-metin!
16. Oinsá mak Moisés nia ezemplu ajuda ita?
16 Buat neʼebé akontese ba Coré sai nuʼudar avizu ba irmaun sira neʼebé serbí nuʼudar katuas no mós ba ita hotu iha kongregasaun. Atu hein ba Jeová no halo tuir sira neʼebé nia uza atu tau matan ba kongregasaun, ita presiza hatudu haraik-an. Ita hatudu haraik-an no laran-maus hanesan Moisés ka lae? Ita simu no halo tuir sira neʼebé tau matan ba kongregasaun ka lae? Kuandu ita hasoru situasaun ruma neʼebé halo ita la kontente, ita kontrola ita-nia sentimentu ka lae? Se ita haraik an hodi halo tuir, Jeová sei simu ita nuʼudar ninian. Sin, Jeová hafolin no hadomi tebes sira neʼebé hatudu hahalok haraik-an no halo tuir.
Jeová hatene loloos sira neʼebé ninian
17, 18. Saida deʼit mak ajuda ita atu Jeová hatene ita nuʼudar ninian?
17 Diʼak atu hanoin kona-ba ema neʼebé Jeová hadomi no dada atu sai ninia belun. Hanesan ho ita, Abraão no Moisés mós ema sala-naʼin no iha problema. Maski nuneʼe, Jeová hatene sira nuʼudar ninian. Maibé Coré nia ezemplu hatudu katak se ita la kuidadu, ita bele hadook an husi Jeová no la sai ona ninia belun. Tan neʼe, ita ida-idak presiza husu ita-nia an: ‘Jeová hanoin saida kona-ba haʼu? Saida mak haʼu bele aprende husi Bíblia nia ezemplu sira-neʼe?’
18 Hodi hatene katak Jeová haree ninia atan sira neʼebé laran-metin nuʼudar ninian, ida-neʼe halo ita sente kmaan tebes. Tan neʼe, mai ita kontinua atu hatudu fiar, haraik-an, no hahalok seluk neʼebé halo Maromak hafolin ita liután. Sin, hodi Maromak Jeová hatene ita nuʼudar ninian, neʼe mak buat neʼebé espesiál tebes, tanba ida-neʼe halo ita moris kontente agora no sei lori bensaun furak mai ita iha futuru.—Sal 37:18.
[Nota–rodapé]
^ par. 3 Ageu 2:7: “‘No haʼu sei doko nasaun hotu, no buat sira neʼebé folin-boot husi nasaun hotu sei tama duni; no haʼu sei halo nakonu uma neʼe ho glória’, Jeová, Naʼi funu-naʼin mak hatete.”
^ par. 6 Gênesis 18:19: “Tanba haʼu koñese ona nia, atu nia fó mandamentu ba ninia oan sira no ninia umakain depois nia, atu sira halo tuir Jeová nia dalan kona-ba halo buat neʼebé loos no tesi-lia; hodi Jeová bele haraik duni ba Abraão buat neʼebé nia hatete ona kona-ba nia.”
^ par. 12 Números 16:5: “Depois neʼe nia koʼalia ba Coré no ba ninia ema-lubun hotu, hodi dehan: ‘Iha dadeer Jeová sei fó-hatene sé mak ninian, no sé mak santu, no sé mak tenke hakbesik ba nia, no ema neʼebé nia hili mak bele hakbesik ba nia.’”
^ par. 14 Êxodo 33:12, 13: “12 Tuirmai Moisés hatete ba Jeová: ‘Haree bá, Ita hatete ba haʼu: “Lori ema sira-neʼe sai,” maibé Ita seidauk fó-hatene sé mak Ita sei haruka hamutuk ho haʼu. Liután neʼe, Ita hatete: “Haʼu hatene didiʼak ó ho ó-nia naran no, liután neʼe, ó mak ida neʼebé monu loos ba haʼu-nia laran.” 13 No agora, se haʼu mak ida neʼebé monu loos ba Ita-nia laran, favór ida, halo haʼu hatene Ita-nia dalan sira, atu haʼu bele hatene Ita, hodi haʼu bele monu loos ba Ita-nia laran. No hanoin katak nasaun neʼe mak Ita-nia povu.’”
Ita hanoin-hetan?
• Jeová “hatene loloos ita”, neʼe katak sá?
• Oinsá mak ita bele hatudu fiar hanesan Abraão?
• Ita bele aprende saida deʼit husi Coré no Moisés?
[Pergunta estudu nian]
[Dezeñu iha pájina 26]
Hanesan Abraão, ita mós fiar katak Jeová sei kumpre buat hotu neʼebé nia promete ka lae?
[Dezeñu iha pájina 28]
Coré la halo tuir ho haraik-an
[Dezeñu iha pájina 29]
Jeová hatene ita nuʼudar ema neʼebé halo tuir ho haraik-an ka lae?
