Sena Jehova Ulimuzyi?
Sena Jehova Ulimuzyi?
“Jehova ulibazyi aabo babalilwa kulinguwe.”—2 TI. 2:19.
1, 2. (a) Ino ncinzi ncaakabikkila kapati maano Jesu? (b) Ino mibuzyo nzi njotweelede kulanga-langa?
BUMWI buzuba mu Farisi wakaboola kuli Jesu akubuzya kuti: “Ino nguuli mulawo mupati mu Mulawo?” Jesu wakaingula kuti: “Weelede kuyanda Jehova Leza wako amoyo wako woonse abuumi bwako boonse amizeezo yako yoonse.” (Mt. 22:35-37) Jesu wakali kubayanda kapati Bausyi bakujulu alimwi wakalutondezya luyando oolu mubuumi bwakwe. Jesu wakabikkila kapati maano kucilongwe cakwe a Jehova alimwi wakacita oobo kwiinda mukusyomeka mubuumi bwakwe boonse. Aboobo, katanafwa Jesu wakali kukonzya kwaamba kuti Leza wakalimuzyi kuti muntu wakali kutobela milawo yakwe cakusyomeka. Aboobo Jesu wakazumanana kuba muluyando lwa Jehova.—Joh. 15:10.
2 Bantu banji mazuba aano baamba kuti balamuyanda Leza. Cakutadooneka andiswe tulalibikkilizya mumweelwe ooyu. Nokuba boobo, mibuzyo iiyandika kapati yeelede kulangwa-langwa njeeyi: ‘Sena Leza ulindizyi mebo? Ino Jehova undibona buti mebo? Sena ndilizyibidwe kuti ndibalilwa kulinguwe?’ (2 Ti. 2:19) Eelo kaka ncoolwe cipati kuzinzibala kuyeeya cilongwe ciyumu cili boobu a Mweendelezi wabubumbo boonse!
3. Nkaambo nzi bantu bamwi ncobazumbauzya kuti balakonzya kubalilwa kuli Jehova, alimwi ino ncinzi cikonzya kubagwasya kuzunda kuyeeya kuliboobu?
3 Nokuba boobo, bamwi ibamuyanda kapati Jehova cilabakatazya kusyoma kuti Leza ulakonzya kubazyiba munzila mbotu. Bamwi balimvwa kuti banyina mpindu, aboobo balazumbauzya kuti naa cilakonzyeka kubalilwa kuli Jehova. Nokuba boobo, tulakonzya kukkomana kuzyiba kuti Leza utubona munzila iindene. (1 Sam. 16:7) Mwaapostolo Paulo wakaambila Banakristonyina kuti: “Ikuti umwi kamuyanda Leza, ooyu ulizyibidwe anguwe.” (1 Ko. 8:3) Luyando lwanu ndomujisi kuli Leza ncecintu ciyandika kapati kutegwa muzyibwe anguwe. Amuyeeye buyo: Ino nkaambo nzi ncomubalila magazini eeyi? Nkaambo nzi ncomusolekesya canguzu kubelekela Jehova amoyo wanu woonse, abuumi bwanu boonse, amizeezo yanu yoonse alimwi anguzu zyanu zyoonse? Ikuti mwakalyaaba kuli Jehova akubbapatizyigwa, ino ncinzi cakamupa kuti mubweze ntaamu eezyi? Ibbaibbele lyaamba kuti Jehova uulingula myoyo nguukwela bantu bayandisi. (Amubale Hagai 2:7; Johane 6:44.) Aboobo, mulakonzya kwaamba kuti mubelekela Jehova nkaambo nguwakamukwela. Kunyina nayoobasiya aabo mbakwela kufwumbwa kuti bazumanana kusyomeka. Leza ubabona kuti mbantu bayandisi alimwi ulabayanda kapati.—Int. 94:14.
4. Nkaambo nzi lyoonse ncotweelede kuyeeya bubotu bwa cilongwe cesu a Leza?
4 Kufwumbwa kuti Jehova watukwela kale kulinguwe, tweelede kubikkila maano kuzumanana kuba muluyando lwakwe. (Amubale Juda 20, 21.) Amuyeeye kuti, Ibbaibbele litondezya kuti cilakonzyeka kuleya akusweeka naa kulizandula kuli Leza. (Heb. 2:1; 3:12, 13) Mucikozyanyo, katanaamba kaambo kajanika mulugwalo lwa 2 Timoteyo 2:19, mwaapostolo Paulo wakaamba kujatikizya Humenayo a Fileto. Aaba baalumi bobilo cimwi ciindi bakali kubalilwa kuli Jehova, pele mukuya kwaciindi bakazooleya mukasimpe. (2 Ti. 2:16-18) Amuyeeye alimwi kuti, mumbungano yaku Galatiya, bamwi bakazyibidwe a Leza tiibakazumanana kuba mumumuni wakumuuya ngobakali kukkomanina kaindi. (Gal. 4:9) Tatweelede kucuubya-ubya cilongwe ciyandika kapati ncotujisi a Leza.
5. (a) Mbube nzi mbwayanda Leza? (b) Ino zikozyanyo nzi nzyotutiilange-lange?
5 Kuli bube mbwayandisya kapati Jehova. (Int. 15:1-5; 1 Pe. 3:4) Lusyomo alimwi akulicesya kwakagwasya bamwi kuti babalilwe kuli Leza. Atulange-lange zikozyanyo zyabaalumi bobilo akubona mbuli bube oobu mbobwakapa kuti bayandwe a Jehova. Alimwi tulalanga-langa mwaalumi umwi wakali kuyeeya kuti wakalizyibidwe a Leza, pele wakatalika kulisumpula alimwi wakajana kuti Jehova wakamukaka. Tulakonzya kwiiya ziiyo zibotu kuzwa kuzikozyanyo eezyi.
Usyi Wabaabo Bajisi Lusyomo
6. (a) Ino Abrahamu wakatondezya lusyomo luli buti muzisyomezyo zya Jehova? (b) Ino Jehova wakamuzyi buti Abrahamu?
6 Abrahamu wakali muntu “wakasyoma Jehova.” Wiitwa kuti ngu “usyi wabaabo boonse bajisi lusyomo.” (Matl. 15:6; Lom. 4:11) Akaambo kalusyomo Abrahamu wakasiya munzi wakwe, balongwe bakwe alimwi alubono lwakwe kutegwa aunke kucisi cakali kule. (Matl. 12:1-4; Heb. 11:8-10) Lusyomo lwa Abrahamu lwakacili luyumu nokuba kuti kwakainda myaka minji. Eeci cakalibonya ciindi ‘nokwakasyeede buyo asyoonto kuti amutuule Izaka’ mwanaakwe akaambo kakutobela mulawo wa Jehova. (Heb. 11:17-19) Abrahamu wakatondezya lusyomo muzisyomezyo zya Jehova, aboobo Leza wakamubona kuba muntu uulibedelede; masimpe Leza wakalimuzyi Abrahamu. (Amubale Matalikilo 18:19.) Jehova taakazyi buyo kuti Abrahamu ulapona, pele wakali kumuyanda kapati mbuli mweenzinyina.—Jak. 2:22, 23.
7. Ino ncinzi ncotuzyi kujatikizya kuzuzikizyigwa kwazisyomezyo zya Jehova, alimwi ino eeci cakamujatikizya buti Abrahamu?
7 Cilizyibidwe kuti ciindi naakacili kupona, Abrahamu kunyina naakakona cisi ncaakasyomezyegwa. Alimwi kunyina naakalubona lunyungu lwakwe kuba mbuli “musee wakunkomwe yalwizi.” (Matl. 22:17, 18) Nokuba kuti zisyomezyo eezyi taakwe nizyakazuzikizyigwa ciindi naakacili kupona Abrahamu, wakazumanana kuba alusyomo luyumu muli Jehova. Wakalizyi kuti, ikuti naa Leza waamba cintu, cili mbuli kuti wacicita kale. Masimpe, Abrahamu wakali kupona kweelana alusyomo lwakwe. (Amubale Bahebulayo 11:13.) Sena Jehova utuzyi kuba bantu bajisi lusyomo lukozyenye alwa Abrahamu?
Kulindila Jehova Ncitondezyo Calusyomo
8. Ino zyintu nzi bamwi nzyobalombozya kuti zizuzikizyigwe?
8 Tulakonzya kuti katujisi zyintu nzyotulombozya kuti zizuzikizyigwe. Cikwati, kuba abana alimwi akupona buumi bubotu nkulombozya kwakuzyalwa ankuko alimwi kuli kabotu. Nokuba boobo, kubantu banji zimwi inga tiizyazuzikizyigwa pe. Kuti kacili boobo kulindiswe, mbotweendelezya bukkale buli boobu inga catondezya lusyomo lwesu.
9, 10. (a) Ino bamwi ncinzi ncobasala kucita kutegwa bazuzikizye nzyobalombozya? (b) Ino mulimvwa buti kujatikizya kuzuzikizyigwa kwazisyomezyo zya Leza?
9 Eelo kaka inga tiicaba camaano kuyanda kuzuzikizya zyintu nzyotulombozya eezyi munzila iiteendelani abusongo buzwa kuli Leza! Kucita boobo inga kwapa muntu kuyaansi kumuuya. Mucikozyanyo, bamwi basala nzila zyabusilisi ziteendelani amalailile aa Jehova. Bamwi basala milimo iipa kuti kabatakkali antoomwe amikwasyi yabo naa iipa kuti kabatajaniki kumiswaangano. Ino mbuti kujatikizya kuyandana amuntu uutasyomi? Ikuti Munakristo watobela bukkale buli boobo, sena masimpe inga uyanda kuzyibwa a Jehova? Ino Jehova naakalimvwa buti ikuti Abrahamu naatakakkazyika moyo kujatikizya kuzuzikizyigwa kwazisyomezyo nzyaakamusyomezya Leza? Ino mbuti kuti Abrahamu naakayanda kulicitila zyintu munzila njaakali kuyanda kutegwa akkalikane akuba ampuwo muciindi cakulindila Jehova? (Amweezyanisye Matalikilo 11:4.) Sena naakazumanana kuzyibwa a Jehova?
10 Ino zyintu nzi nzyomulombozya nzyomuyanda kubona kuti zyazuzikizyigwa? Sena lusyomo lwanu nduyumu cakuti inga mwamulindila Jehova uusyomezya kuti uyoozizuzikizya zyintu nzyomuyanda? (Int. 145:16) Mbuli mbocakabede kuli Abrahamu, kuzuzikizyigwa kwazisyomezyo zya Leza ndiza inga tiikwacitika kufwaambana kweelana ambuli mbotuyanda. Nokuba boobo, Jehova ulakukkomanina kuba alusyomo mbuli lwakajisi Abrahamu alimwi akupona kweendelana alusyomo oolu. Masimpe, kucita boobu kuyootugwasya kapati.—Heb. 11:6.
Kwiindana Kuliko Akati Kakulicesya Alimwi Akulisumpula
11. Ino nzyoolwe nzi nzyaakajisi Kora, alimwi ino mbube nzi mbwaakatondezya kuli Leza?
11 Musa a Kora baliindene kapati caboola kukutondezya bulemu kububambe bwa Jehova alimwi akuyanda kwakwe. Mbobakali kucita zyintu kujatikizya bubambe bwa Jehova alimwi akuyanda kwakwe kuli mbokwakaswaangene ambwaakali kubabona. Kora wakali mu Levi muna Kohati alimwi wakalijisi mikuli minji, yalo yakali kubikkilizya acoolwe cakubona lufwutuko lwabana Israyeli nibakazabuka Lwizi Lusalala, wakaba kulubazu lwa Jehova ciindi Jehova naakali kubeteka bana Israyeli a Cilundu ca Sinai ibatakali kutobela milawo alimwi wakatola lubazu mukubweza bbokesi lya cizuminano. (Kul. 32:26-29; My. 3:30, 31) Cilalibonya kuti wakali kusyomeka kuli Jehova kwamyaka minji alimwi bana Israyeli banji bakali kulanga kulinguwe.
12. Mbuli mbokutondezyedwe apeeji 28, ino kulisumpula kwa Kora kwakacijatikizya buti cilongwe cakwe a Leza?
12 Nokuba boobo, ciindi bana Israyeli nibakali mulweendo kuya ku Nyika Yakasyomezyegwa, Kora wakabona mbuli kuti kuli cakalubide mububambe bwa Leza. Mpoonya baalumi bamwi bakali kusololela ibakali 250 bakaba kulubazu lwa Kora kusoleka kuti bacince zyintu. Kulangilwa kuti Kora abamwi bakali kulimvwa kuti bakalikwabilidwe akaambo kacilongwe cabo a Jehova. Bakaambila Musa kuti: “Mwalisumpula, nkaambo bantu boonse buyo balasalala, alimwi Jehova mpali akati kabo.” (My. 16:1-3) Eelo kaka wakatondezya muuya wakulisumpula akulisyoma! Musa wakabaambila kuti: “Jehova ulamutondezya na ngwasalide nguni.” (Amubale Myeelwe 16:5.) Kumamanino aabuzuba bwakatobela, Kora alimwi abaabo bakazanga anguwe bakafwa.—My. 16:31-35.
13, 14. Ino muunzila nzi Musa mwaakatondezya kulicesya?
13 Musa wakaliindene a Kora nkaambo wakali “mubombemoyo kwiinda bantu boonse baansi.” (My. 12:3) Wakatondezya kuba muntu mubombemoyo alimwi uulicesya kwiinda mukuzumanana kutobela busolozi bwa Jehova. (Kul. 7:6; 40:16) Kunyina citondezya kuti Musa wakali kukazya mbwaakali kucita zyintu Jehova naa kunyema akaambo kakucita zyintu munzila njaakali kuyanda Jehova. Mucikozyanyo, Jehova wakapa malailile kujatikizya kuyaka tempele mane kusikila kutuntu tusyoonto twakeelede kucitwa, tuli mbuli musyobo wantambo amweelwe wazyaanzikilo izyakeelede kubelesyegwa kutegwa apange moombe wacisitilizyo. (Kul. 26:1-6) Ikuti naa mulangizi mumbunga ya Leza wamupa malailile aakatazya kumvwa, mulakonzya kutyompwa zimwi ziindi. Nokuba boobo, Jehova mulangizi uulondokede, ulabapa mikuli babelesi bakwe alimwi ulabasyoma. Ciindi napa malailile manji, ulijisi twaambo tubotu ncacitila boobo. Pele amubone kuti Musa kunyina naakanyemena Jehova akaambo kakumupa malailile manji alimwi taakwe naakayeeya kuti Jehova taanakali kumulemeka naa kumupa kubula lwaanguluko lwakucita zyintu. Muciindi caboobo, Musa wakabikkila maano kubona kuti babelesi “bakacita mbubonya oobo.” (Kul. 39:32) Eelo kaka wakali kulicesya! Musa wakalizyi kuti wakali mulimo wa Jehova alimwi akuti wakali kubelesyegwa buyo kutegwa mulimo ooyo ucitwe.
14 Kulicesya kwa Musa kwakalibonya alimwi ciindi naakali mubukkale bukatazya bwakamujatikizya. Ciindi cimwi, Musa wakaalilwa kulijata alimwi akumulemeka Leza naakali kweendelezya bantu bakali kutongooka. Akaambo kaceeci, Jehova wakaambila Musa kuti takabanjizyi bantu Munyika Yakasyomezyegwa. (My. 20:2-12) Musa alimwi a Aroni mwanookwabo bakaliyumya kumatongoosi aabana Israyeli kwamyaka minji. Mpoonya, akaambo kakuti Musa wakalubizya aciindi eeco comwe, taakwe naakali kuyoozibona nzyaakali kulangila kwaciindi cilamfwu. Ino Musa wakalimvwa buti? Nokuba kuti wakatyompwa, cakulicesya Musa wakakuzumina kuyanda kwa Jehova. Wakalizyi kuti Jehova ngu Leza uululeme alimwi kunyina kutalulama mulinguwe. (Dt. 3:25-27; 32:4) Ciindi nomuyeeya kujatikizya Musa, sena mumubona kuti muntu wakazyibidwe a Jehova?—Amubale Kulonga 33:12, 13.
Kulibombya Kuli Jehova Kuyandika Kulicesya
15. Ino ncinzi ncotukonzya kwiiya kuzwa kukulisumpula kwa Kora?
15 Mbotucita ciindi nikwaba kucinca mumbungano ya Bunakristo munyika yoonse alimwi azyakusala zicitwa abaabo basololela mulinjiyo cilakujatikizya kuzyibwa kwesu a Jehova. Kora abeenzinyina bakalizandula kuli Leza akaambo kakulisyoma, kulisumpula alimwi akubula lusyomo. Nokuba kuti Kora wakali kubona Musa iwakacembeede kuti nguwakali kusala zyakucita abuzuba, bwini mbwakuti Jehova nguwakali kweendelezya cisi. Kora wakakaluba kaambo aaka aboobo wakaalilwa kusyomeka kulibaabo Leza mbaakali kubelesya. Nicakamugwasya Kora kuti naakalindila Jehova kuti asalazye kaambo aaka naa acince zyintu ikuti nikwakali kuyandika ncobeni kucita boobo. Pele kumamanino, Kora wakabisya mpuwo yakwe yakubeleka cakusyomeka akaambo kakulisumpula kwakwe.
16. Ino kutobela cikozyanyo ca Musa cakulicesya inga kwatugwasya buti kuzyibwa a Jehova?
16 Cibalo eeci cipa kucenjezya kupati kubaalu alimwi abamwi boonse mumbungano mazuba aano. Kulindila Jehova alimwi akutobela malailile aazwa kuli baabo basalidwe kuti basololele kuyandika kulicesya. Sena tulatondezya kuti tuli bantu balicesya alimwi babombe myoyo mbuli mbwaakabede Musa? Sena tulabulemeka bweendelezi bwabaabo basololela akati kesu alimwi akulibombya kubusolozi mbobatupa? Sena tulakonzya kukuzunda kuyeeya kwesu kubi ciindi nitwatyompwa? Ikuti twacita oobo, andiswe tuyoozyibwa a Jehova. Kulicesya alimwi akulibombya kwesu kuyoopa kuti atukkomanine.
Jehova Ulibazyi Aabo Babalilwa Kulinguwe
17, 18. Ino ncinzi cikonzya kutugwasya kuzumanana kubalilwa kuli Jehova?
17 Cilakonzya kutugwasya kuzinzibala kuyeeya bantu aabo Jehova mbaakakwela alimwi mbaakakkomanina. Abrahamu a Musa tiibakalondokede alimwi bakalijisi tumpenda mbubwenya mbuli ndiswe. Nokuba boobo, Jehova wakalibazyi kuti bakali kubalilwa kulinguwe. Pele cikozyanyo ca Kora cituyiisya kuti cilakonzyeka kuti inga twazanduka kuli Jehova akuleka kukkomaninwa anguwe. Umwi aumwi wesu inga wacita kabotu kulibuzya kuti: ‘Ino Jehova undibona buti? Ino ncinzi ncindikonzya kwiiya kuzikozyanyo eezyi zyamu Bbaibbele?’
18 Mulakonzya kuumbulizyigwa kuzyiba kuti Jehova ulibazyi aabo babalilwa kulinguwe ibasyomeka alimwi mbaakakwela. Amuzumanane kuba alusyomo, kulicesya alimwi akuba abube bumbi bukonzya kupa kuti Leza amukkomanine. Kuzyibwa a Jehova ncoolwe cipati cipa kuti tukkutile mubuumi bwesu lino alimwi citupa bulangizi bwazilongezyo zibotu zyakumbele.—Int. 37:18.
Sena Muciyeeyede?
• Ino ncilongwe cili buti ncomukonzya kuba ancico a Jehova?
• Ino inga mwalwiiya buti lusyomo lwa Abrahamu?
• Ino ziiyo nzi nzyotukonzya kwiiya kuzwa kuli Kora a Musa?
[Mibuzyo yaciiyo]
[Cifwanikiso icili apeeji 26]
Sena tulijisi lusyomo mbuli ndwaakajisi Abrahamu lwakuti Jehova uyoozuzikizya cakumaninina zisyomezyo zyakwe?
[Cifwanikiso icili apeeji 28]
Kora taakwe naakali kuyanda kulibombya kubweendelezi
[Cifwanikiso icili apeeji 29]
Sena mulizyibidwe a Jehova kuba muntu uulibombya kubweendelezi?
