Jehova i Save Long Yu?
Jehova i Save Long Yu?
“Jehova i save gut long ol manmeri bilong em yet.”—2 TIM. 2:19.
1, 2. (a) Wokabaut bilong Jisas i kamapim klia wanem samting? (b) Yumi mas tingim wanem ol askim?
LONG wanpela taim wanpela Farisi i askim Jisas: “Long Lo Bilong Moses, wanem lo i nambawan na i winim ol arapela lo?” Jisas i bekim olsem: “Yu mas laikim Jehova, God bilong yu. Yu mas laikim em long bel olgeta bilong yu, na long laip olgeta bilong yu, na long tingting olgeta bilong yu.” (Mat. 22:35-37) Jisas i laikim tru Jehova. Wokabaut bilong Jisas i soim olsem em i laik tru long Jehova i mas amamas long em. Olsem na paslain liklik long Jisas i dai em inap stori long pasin bilong em long bihainim tok bilong God, em i tok: “Mi bin bihainim ol lo bilong Papa na stap insait yet long pasin laikim bilong en.”—Jon 15:10.
2 Planti manmeri long nau i save tok olsem ol i laikim God. Na yumi tu save tok olsem. Tasol i gat sampela bikpela askim em yumi mas tingim: Jehova i gat wanem tingting long mi? Mi inap tok Jehova “i save” long mi, o Jehova i orait long mi? Jehova i tingim mi olsem wanpela man i bilong em yet? (2 Tim. 2:19) Yumi amamas tru olsem yumi inap pas gut wantaim King bilong heven na graun!
3. Bilong wanem sampela i hatwok long bilip olsem ol inap stap man o meri bilong Jehova? Wanem samting inap helpim ol long senisim dispela tingting bilong ol?
3 Tasol i hatwok long sampela husat i laikim Jehova long ting olsem ol inap i stap pren bilong God. Sampela i pilim olsem ol i samting nating. Long dispela as ol i ting Jehova i no inap tingim ol olsem man o meri i bilong em yet. Yumi amamas long save olsem Jehova i no gat wankain tingting olsem yumi long dispela samting. (1 Sml. 16:7) Tingim: Bilong wanem yu ritim dispela nius? Bilong wanem yu wok strong long lotuim Jehova long bel olgeta, laip olgeta, tingting olgeta, na strong olgeta? Sapos yu bin dediketim laip bilong yu long Jehova na yu kisim baptais, orait i gat wanem as na yu bin mekim olsem? Baibel i tok Jehova i save long bel bilong ol man na em i save kisim ol man husat em i tingim ol olsem “ol gutpela samting.” Em i save “kirapim” ol, o singautim ol bilong kamap pren bilong en. (Ritim Hagai 2:7; Jon 6:44.) So yu ken save tru olsem yu lotuim Jehova, long wanem, em i laik bai yu mekim olsem. Em bai i no inap lusim ol manmeri husat em i singautim ol i kamap pren bilong en sapos oltaim ol i stap gut long em. Ol i gutpela samting long ai bilong God, na em i laikim ol tumas.—Sng. 94:14.
4. Bilong wanem oltaim yumi mas tingim olsem pasin bilong stap pren bilong Jehova em samting i dia tumas?
4 Jehova i kirapim yumi pinis long kam long em, olsem na yumi mas mekim ol samting bilong i stap insait yet long pasin laikim bilong God. (Ritim Jut 20, 21.) Tingim, Baibel i tok sapos yumi no was gut isi isi yumi inap lusim bilip o bel bilong yumi inap kirap laikim pasin nogut na yumi lusim God, na yumi no stap moa olsem pren bilong em. (Hib. 2:1; 3:12, 13) Olsem, paslain long aposel Pol i kamapim tok bilong 2 Timoti 2:19, em i stori long Himeneus na Filetus. I luk olsem pastaim tupela i bin lotuim Jehova, tasol bihain ol i lusim tok i tru. (2 Tim. 2:16-18) Na tu, sampela long ol kongrigesen bilong Galesia i bin lusim tok i tru. (Gal. 4:9) Oltaim yumi mas ting olsem pasin bilong i stap pren bilong Jehova em i samting i dia tumas.
5. (a) Bilong God i ken save long yumi, yumi mas kamapim wanem ol pasin? (b) Bai yumi stori long wanem ol eksampel?
5 Sapos yumi laik bai Jehova i save long yumi, orait i gat sampela pasin yumi mas kamapim. (Sng. 15:1-5; 1 Pita 3:4) Tupela bilong ol em bilip na pasin daun. Yumi bai stori long tupela man husat Jehova i laikim tumas, long wanem, ol i kamapim dispela tupela pasin. Na tu, bai yumi skelim stori bilong wanpela man i gat pasin antap na God i sakim em. Ol dispela eksampel inap skulim yumi long sampela bikpela samting.
Papa Bilong Olgeta Man i Bilip
6. (a) Abraham i bilip long ol promis bilong Jehova, olsem na em i mekim wanem? (b) Jehova i save olsem Abraham i stap na em tasol?
6 Abraham em wanpela husat i “bilipim tok bilong Bikpela.” Baibel i kolim em “papa bilong olgeta man . . . i bilip.” (Stt. 15:6; Rom 4:11) Abraham i bilip, olsem na em i orait long lusim ples, ol pren, wok, na ol samting em i gat bilong i go sindaun long wanpela longwe ples. (Stt. 12:1-4; Hib. 11:8-10) Abraham i holimpas strongpela bilip bilong en. Yumi save long dispela, long wanem, planti yia bihain em i redi long bihainim tok bilong Jehova na givim Aisak olsem ofa. (Hib. 11:17-19) Abraham i bilip long ol promis bilong Jehova, olsem na God i tingim em tru. Jehova i save gut tru long Abraham. (Ritim Stat 18:19.) I no olsem Jehova i save olsem Abraham i stap laip na em tasol, nogat. Em i laikim em olsem wanpela pren.—Jems 2:22, 23.
7. Abraham i gat wanem save long ol promis bilong Jehova? Em i mekim wanem bilong kamapim bilip bilong en?
7 Jehova i tok promis long Abraham olsem lain tumbuna bilong em bai “kisim ol taun” bilong ol birua bilong ol na “kamap planti tru . . . olsem wesan bilong nambis.” (Stt. 22:17, 18) Maski truim bilong ol dispela tok promis i no bin kamap taim Abraham i stap laip, em i bilip strong yet long Jehova. Em i save olsem olgeta tok promis bilong God i save kamap tru, na em i kamapim dispela bilip long wokabaut bilong em. (Ritim Hibru 11:13.) Olsem wanem? Jehova i tingim yumi olsem man o meri husat i gat wankain bilip olsem Abraham?
Kamapim Bilip Bilong Yu Long Rot Bilong Wetim Jehova
8. Planti man i gat wanem laik?
8 Ating i gat sampela samting yumi gat bikpela laik long en, olsem laik bilong marit, kamapim ol pikinini, na gutpela helt. I no gat rong long ol dispela samting. Tasol ating planti bilong yumi i no save kisim ol samting yumi laikim. Bai yumi mekim wanem sapos yumi no inap kisim samting long nau em yumi gat laik tru long en? Pasin yumi mekim long kain taim olsem bai kamapim ples klia olsem bilip bilong yumi i strong o nogat.
9, 10. (a) Sampela i bin mekim wanem bilong inapim laik bilong ol? (b) Yu gat wanem tingting long ol truim bilong ol tok promis bilong Jehova long nau?
9 Sapos yumi sakim tok bilong God long kisim samting yumi gat laik long kisim, dispela em longlong pasin na em inap bagarapim pasin bilong yumi long pas gut wantaim Jehova. Olsem, sampela i bin mekim ol samting bilong stretim sik we i sakim ol stiatok bilong Baibel. Sampela i orait long kisim wok mani we i no gat taim long stap wantaim famili bilong ol o go long ol miting bilong kongrigesen. Sampela i kirap prenim wanpela husat i no save lotuim Jehova. Sapos wanpela Kristen i mekim olsem, yu ting em i laik stap man em Jehova i save long em? Jehova bai gat wanem tingting long Abraham sapos em i les long wetim truim bilong ol promis bilong God? Olsem wanem sapos Abraham i bihainim tingting bilong em yet na mekim ol samting bilong i gat gutpela sindaun? Olsem wanem sapos em i wokim disisen long kisim biknem na em i no wetim Jehova long mekim samting? (Skelim Stat 11:4.) Bai Jehova i tingim yet Abraham olsem pren bilong em?
10 Yu gat laik tru long kisim wanem ol samting? Bilip bilong yu i strong inap long yu ken wetim Jehova long givim ol dispela samting long yu? Em i tok promis long “inapim laik bilong olgeta samting i gat laip.” (Sng. 145:16, NW ) Ating sampela tok promis bilong Jehova i no inap kamap hariap olsem yumi laikim. Tasol sapos yumi wokabaut yet long pasin i soim olsem yumi gat bilip olsem Abraham, Jehova bai no lusim tingting long yumi. Em bai givim gutpela pe long yumi.—Hib. 11:6.
Eksampel Bilong Pasin Daun na Pasin Antap
11. Kora i bin mekim wanem inap planti yia?
11 Yumi bai skelim eksampel bilong tupela man husat i bin bihainim narapela narapela pasin, em Moses na Kora. Pasin tupela i mekim i helpim yumi long kliagut olsem pasin bilong yumi long rispektim ol disisen Jehova i wokim na wei bilong em long mekim ol samting, dispela i bikpela samting long em. Kora em i wanpela man Livai bilong lain Kohat. Ating em i bin lukim samting Jehova i bin mekim bilong kisim bek ol Israel long solwara Retsi. Na ating Kora i insait long lain i givim strafe long ol Israel i bikhet long maunten Sainai, olsem kot bilong Jehova i makim. Na tu, ating em i bin helpim wok bilong karim Bokis Kontrak. (Kis. 32:26-29; Nam. 3:30, 31) I luk olsem em i bin stap gut long Jehova inap planti yia, na long dispela as planti Israel i rispektim em.
12. Pasin antap bilong Kora i mekim wanem long pasin bilong em long stap pren bilong God?
12 Tasol taim ol Israel i wokabaut i go long Graun Bilong Promis, Kora i kisim tingting olsem wei bilong Jehova long stiaim lain Israel i no stret. Kora i laik senisim sampela samting. Na 250 man long lain Israel i bihainim em. Ol i tingting strong olsem Jehova i orait long ol. Ol i tokim Moses: “Yumi olgeta i bilong Bikpela. I no yutupela tasol. Na Bikpela i stap wantaim yumi olgeta.” (Nam. 16:1-3) Tingting na pasin bilong ol i soim olsem ol i gat pasin antap tru. Ol i bilip tumas long pasin bilong ol yet long mekim ol samting. Moses i tokim ol: “Bikpela bai i soim yumi husat ol man i bilong em.” (Ritim Namba 16:5.) Long neks de, Kora na ol man i bihainim em, ol i dai.—Nam. 16:31-35.
13, 14. Long wanem ol rot Moses i kamapim olsem em i gat pasin daun?
13 Moses i narapela kain olgeta long Kora. “No gat wanpela man long dispela graun i save daunim em yet inap olsem Moses.” (Nam. 12:3) Em i mekim olgeta samting Jehova i tokim em long mekim na dispela i soim olsem em i gat pasin daun. (Kis. 7:6; 40:16) Baibel i no stori olsem Moses i gat pasin bilong toktok planti long wei bilong Jehova long mekim ol samting, o long Moses i belhat long em i mas bihainim tok bilong Jehova. Olsem, Jehova i bin makim stret hau ol i mas wokim haus lotu sel. Em i makim kala bilong tret na hamas ring ol Israel i mas yusim bilong wokim laplap bilong sel. (Kis. 26:1-6) Sapos wanpela wasman long oganaisesen bilong God i save makim stret ol liklik liklik samting yu mas mekim, ating sampela taim yu inap bel hevi. Tasol Jehova em i wanpela wasman i gutpela olgeta. Em i givim wok long ol wokboi bilong em, na em i bilip olsem ol bai mekim gut dispela wok. Taim em i makim stret planti liklik liklik samting bilong wok, i gat gutpela as na em i mekim olsem. Moses i no bin belhat long Jehova o ting olsem Jehova i no rispektim em taim em i tokim em long planti liklik liklik samting long mekim. Moses i no ting olsem Jehova i kalabusim em tumas long pasin bilong mekim wok. Moses i bin tokim ol wokman long mekim stret olgeta samting Jehova i tokim ol long mekim. (Kis. 39:32) Tingting na pasin Moses i mekim i soim olsem em i gat pasin daun. Moses i save olsem em wok bilong Jehova, na Jehova i yusim em bilong mekim dispela wok.
14 Pasin daun bilong Moses i stap ples klia taim sampela samting i kamap na i givim bel hevi long em. Olsem, taim ol manmeri i komplein long ol i no gat wara, Moses i belhat tru long ol na em i no givim glori long Jehova. Long dispela as Jehova i tokim Moses olsem em i no inap kisim lain Israel i go insait long Graun Bilong Promis. (Nam. 20:2-12) Moses na Aron i harim komplein bilong lain Israel inap planti yia. Na nau, long dispela wanpela popaia tasol, Moses i no inap mekim samting em i bin wet long en inap longpela taim! Moses i mekim wanem? Tru, em i bel hevi. Tasol em i gat pasin daun na em i wanbel long disisen bilong Jehova. Em i save olsem Jehova em God i save bihainim stretpela pasin. (Lo 3:25-27; 32:4) Long nau, taim yumi tingim Moses, yumi tingim em olsem man em Jehova i save long em.—Ritim Kisim Bek 33:12, 13.
Bilong Bihainim Tok Bilong Jehova Yumi Mas i Gat Pasin Daun
15. Pasin Kora i mekim i lainim yumi long wanem samting?
15 Jehova i save orait long yumi sapos yumi wanbel long ol senis oganaisesen i kamapim. Na yumi mas rispek long ol man em Jehova i yusim bilong stiaim kongrigesen. Yumi save mekim wanem taim ol dispela man i wokim ol disisen o senisim samting yumi save mekim insait long kongrigesen? Kora na lain i bihainim em i no inap stap moa olsem pren bilong God, long wanem, ol i bilip long pasin bilong ol yet long wokim ol samting. Ol i gat pasin antap na bilip bilong ol i no strong. Kora i ting Moses em wanpela lapun man nating husat i save bihainim tingting bilong em yet na i wokim ol disisen, na Kora i lusim tingting olsem Jehova yet i stiaim lain Israel. Olsem na Kora i no stap gut long ol man God i makim bilong mekim wok. Mobeta Kora i bin wetim Jehova. Jehova inap helpim em long kliagut long as na ol samting i stap olsem o Jehova inap senisim ol samting sapos i gat wok long mekim. Pasin bilong Kora i mekim na yumi no tingim ol yia we em i bin stap gut long Jehova na mekim wok. Yumi save tingim em olsem man husat i gat pasin antap na i sakim tok bilong Jehova.
16. Olsem wanem pasin daun bilong Moses inap helpim yumi?
16 Samting i kamap long Kora i olsem wanpela tok lukaut i go long ol elda na ol arapela insait long kongrigesen. Bilong wetim Jehova long mekim samting na long bihainim tok bilong ol man Jehova i yusim bilong stiaim kongrigesen, yumi mas i gat pasin daun. Olsem wanem? Yumi kamapim olsem yumi gat pasin daun olsem Moses? Yumi kliagut na wanbel olsem Jehova i save mekim wok long ol man husat i go pas long kongrigesen? Yumi save bihainim tok bilong ol? Yumi save bosim gut bel taim yumi bel hevi? Sapos yumi mekim olsem, Jehova bai orait long yumi. Sapos yumi gat pasin daun na pasin bilong bihainim tok, em bai tingim yumi olsem samting i dia tumas.
Jehova i Save Gut Long Ol Manmeri Bilong Em Yet
17, 18. Wanem samting inap helpim yumi long stap yet olsem man o meri em Jehova i orait long ol?
17 Em i gutpela long yumi tingim eksampel bilong ol man Jehova i laikim na em i singautim ol long i stap pren bilong em. Abraham na Moses i no gutpela olgeta na ol i gat ol hevi, ol i wankain olsem yumi. Tasol Jehova i tingim ol olsem pren bilong en, em ol man i bilong em yet. Tasol em i no ting olsem long Kora. Eksampel bilong en i soim olsem sampela samting inap kamap na yumi lusim Jehova na yumi no stap pren moa bilong em. Yumi wan wan i mas tingim ol kain askim olsem: Jehova i gat wanem tingting long mi? Mi inap kisim wanem skul long ol dispela eksampel i stap long Baibel?
18 Jehova i save tingim ol gutpela wokboi bilong en olsem ol manmeri i bilong em yet. Dispela i mekim gut tru bel bilong yumi. So wok yet long kamapim pasin bilong bilip na pasin daun. Taim yumi mekim olsem, God bai tingim yumi moa yet olsem samting i dia tumas. Em i gutpela samting tru long Jehova i save long yumi. Ol man em Jehova i orait long ol, ol bai stap amamas long nau na ol bai kisim ol gutpela blesing long bihain.—Sng. 37:18.
Yu Tingim Yet?
• Taim yumi tok Jehova i save long wanpela man, dispela i makim wanem samting?
• Olsem wanem yu inap bihainim bilip bilong Abraham?
• Yumi inap kisim wanem skul long eksampel bilong Kora na Moses?
[Askim Bilong Stadi]
[Piksa long pes 26]
Olsem Abraham, yumi bilip olsem Jehova bai inapim tru ol promis bilong em?
[Piksa long pes 28]
Kora i no laik stap daun na bihainim tok
[Piksa long pes 29]
Jehova i tingim yu olsem man i gat pasin daun na i save bihainim tok?
