¿Mi xojtikinun li Jeovae?
¿Mi xojtikinun li Jeovae?
«Li Cajvaltique xotquin li bochʼotic yuʼuntaque.» (2 TIM. 2:19)
1, 2. 1) ¿Kʼusi ti oy tajek ta yoʼonton li Jesuse? 2) ¿Kʼusi tsots skʼoplal ti skʼan jakʼbe jbatike?
JUN veltae nopaj ta stojolal Jesús jun fariseo xchiʼuk xi la sjakʼbee: «¿Cʼusi mantalil ti tsots scʼoplale?». Vaʼun xi la stakʼbee: «Cʼano me ta scotol avoʼnton li Dios avuʼune, xchiʼuc ta scotol achʼulel, xchiʼuc ta scotol ajol» (Mat. 22:35-37). Jamal xvinaj ti jech la spas li kʼusi laj yal stuk li Cristoe. Maʼuk noʼox ti skʼanoj tajek li Stot ta vinajele, moʼoj, yuʼun oy tajek ta yoʼonton ti lek chʼambil chkʼote xchiʼuk jech laj yakʼ ta ilel kʼalal tukʼ-o laj yakʼ sbae. Jaʼ yuʼun, kʼalal jutuk xaʼox skʼan xchame jamal laj yal ti snaʼoj lek Stot ti tukʼ laj yakʼ sbae xchiʼuk ti la xchʼunbe skotol smantaltake. Jech taje, te oy-o li ta xkʼuxul yoʼonton li Jeovae (Juan 15:10).
2 Li avie ep viniketik xchiʼuk antsetik ti chalik ti xojtikinik xchiʼuk ti skʼanojik li Diose, ti te kapal jkʼoplaltik eke. Pe mu baluk noʼox taje. Skʼan jnaʼtik mi xojtikinutik, jaʼ xkaltik, mi lek chilutik. Jaʼ yuʼun tsots skʼoplal ti xi jakʼbe jbatike: «¿Mi xuʼ xkal ta melel ti xojtikinun xchiʼuk yuʼunun chil li Jeovae?» (2 Tim. 2:19). Ta melel, jaʼ jun mukʼta matanal ti xuʼ lek xkil jbatik xchiʼuk li Mukʼul Jpasmantal ta vinajel balumile.
3. ¿Kʼu yuʼun oy jlom krixchanoetik ti tsots chaʼiik ta xchʼunel ti xuʼ xamigoinik li Diose, xchiʼuk kʼusi xuʼ xkoltaatik sventa xjel li kʼusi tsnopike?
3 Oy jlome, manchuk mi skʼanojik tajek li Jeovae, mu to xchʼunik ti xuʼ xamigoin sbaik xchiʼuke. Oy bakʼintike jaʼ ta skoj ti toj jutuk sbalil chaʼi sbaike, o ti mu staik-o ti xuʼ x-uʼuninatik chaʼi sbaike. ¡Toj lek tajek ti mu jechuk chilutik li Jeovae! (1 Sam. 16:7.) Jkʼeltik li kʼusi laj yal Pablo liʼe: «Li bochʼo scʼanoj Diose xʼotquinat lec yuʼun li Diose» (1 Cor. 8:3). Jech kʼuchaʼal chkiltike, sventa x-ojtikinat yuʼun Dios li jun krixchanoe skʼan ti akʼo skʼane. Jnoptik liʼe: «¿Kʼu yuʼun yakalun skʼelel li revista liʼe? ¿Kʼu yuʼun chkakʼ persa ti ta sjunul koʼonton, ta sjunul jkuxlejal, jnopben xchiʼuk kipal chitun li ta stojolal Jeovae? ¿Mi kakʼoj xa jkuxlejal ta stojolal xchiʼuk mi kichʼoj xa voʼ? Mi jeche, ¿kʼu yuʼun ti jech la jpase?». Jvules ta joltik ti xil kʼusi oy ta koʼontontik li Jtotik ta vinajele, xchiʼuk ti jaʼ noʼox chikʼ tal ta stojolal li kʼulejale, jaʼ xkaltik, krixchanoetik ti ep sbalilike (kʼelo Hageo 2:7 xchiʼuk Juan 6:44). Jaʼ yuʼun, mi chijtun ta stojolale jaʼ skoj ti stakojutik ta ikʼel sventa xijkʼot ta yamigoe. Muʼyuk me tskomtsanutik-o mi tukʼ chkakʼ jbatik ta stojolale. Ta xkʼuxul yoʼonton tskʼelutik-o, yuʼun toj ep jbalil chilutik (Sal. 94:14).
4. ¿Kʼu yuʼun skʼan jnoptik lek ti ep sbalil ti xuʼ xkamigoin jbatik xchiʼuk li Diose?
4 ¿Kʼusi ti skʼan oyuk tajek ta koʼontontik spasel mi stakojutik xa ta ikʼel li Jeovae? Jaʼ ti te oyutikuk-o li ta xkʼuxul yoʼontone (kʼelo Judas 20, 21). Li Vivliae chal ti xuʼ «xijchʼay comel ta be» xchiʼuk ti xuʼ jkomtsantik-o li kuxul Dios li yajtsʼaklomutik Cristoe (Heb. 2:1; 3:12, 13). Taje jaʼ jech ikʼot ta stojolal li Himeneo xchiʼuk Filetoe, ti jaʼ laj yalbe skʼoplal Pablo kʼalal skʼan toʼox xalbe skʼoplal li 2 Timoteo 2:19, ti jaʼ li teksto ta Vivlia yichʼoj talel ta slikebal li xchanobil liʼe. Jech kʼuchaʼal chkiltike, li chaʼvoʼ viniketike jaʼik toʼox yuʼun Jeova, pe ta tsʼakale laj yiktaik li melele (2 Tim. 2:16-18). Jech ikʼot ta stojolalik jlom li ta tsobobbailetik ta Galacia eke. Akʼo mi laj yichʼik ojtikinel yuʼun li Diose, laj yiktaik li sakil osil ta mantale (Gál. 4:9). ¡Mu me xkakʼ jechuk xkʼot ta jtojolaltike ek! Muʼyuk me kʼusi xkoʼolaj-o ti xuʼ xijkʼot ta yamigo li Buchʼu toj toyol skʼoplale.
5. 1) ¿Kʼusi chaʼtos talelal ep sbalil chil li Diose? 2) ¿Kʼusi skʼelobil ta voʼne ta jkʼeltik batel?
5 Sventa xichʼ ojtikinel li jun krixchano ta stojolal Diose, skʼan xakʼ ta ilel jlom talelaletik ti lek chil li Jeovae (Sal. 15:1-5; 1 Ped. 3:4). Jlom taje jaʼ li xchʼunel oʼontonale xchiʼuk ti bikʼit skʼan xkakʼ jbatike. Kalbetik batel skʼoplal chaʼvoʼ yajtuneltak Dios ta voʼne ti jech laj yakʼ ta ilel stalelalike xchiʼuk ti kʼanatik-o yuʼun li Dios ta skoj taje. Mi laje kalbetik skʼoplal sloʼilal xkuxlejal jun vinik ti laj yichʼ pʼajel yuʼun Jeova ta skoj ti la stoy sbae, manchuk mi jaʼ toʼox yamigo yaloj. Li sloʼilalik taje ep kʼusitik xuʼ jchantik yuʼun.
«Jaʼ stotic chcʼot ec li jchʼunolajeleti[ke]»
6. 1) ¿Kʼuxi laj yakʼ ta ilel Abraham ti spatoj tajek yoʼonton ta sventa li kʼusi yaloj Jeovae? 2) ¿Kʼuxi ti laj yojtikin Abraham li Jeovae?
6 Li Vivliae xi chalbe skʼoplal li Abrahame: «Lec iʼilat yuʼun Dios ta sventa xchʼunojel yoʼnton», xchiʼuk ti «jaʼ stotic chcʼot ec li jchʼunolajeleti[ke]» (Gén. 15:6; Rom. 4:11). Li mol totil taje laj yikta komel li snae, li yamigotake, li kʼusitik oy yuʼune xchiʼuk ibat ta naklej ta namal lum (Gén. 12:1-4; Heb. 11:8-10). Ta melel, toj mukʼ li xchʼunel yoʼonton ta stojolal Diose. Akʼo mi ep xaʼox jabil echʼem, muʼyuk ichʼay li xchʼunel yoʼontone. Ep ta velta laj yakʼ ta ilel, mas te ivinaj kʼalal jpʼel ta yoʼonton chakʼ ta matanal li xnichʼon, ti jaʼ li Isaac sventa tspas li kʼusi laj yal Diose (Heb. 11:17-19). Li Diose snaʼoj onoʼox ti spatoj yoʼonton li Abraham ta sventa li kʼusi yaloj tspase, jaʼ yuʼun laj yal ti jaʼ jun vinik ti stuk noʼox jeche xchiʼuk laj yal ti xojtikin ta melel li Abrahame (Gén. 18:19). Li Jeovae maʼuk noʼox snaʼoj ti kuxul li Abrahame, moʼoj, yuʼun skʼanoj kʼuchaʼal jun yamigo (kʼelo Santiago 2:22, 23).
7. ¿Kʼusi laj yaʼibe smelolal Abraham ta sventa li kʼusi yaloj tspas Jeovae, xchiʼuk kʼuxi laj yakʼ ta ilel ta xkuxlejal?
7 Li Abrahame i-albat yuʼun Dios ti jaʼ ta xrextoin Albil Balumil li snitilulale xchiʼuk ti ep tajek ta xkʼot «jech chac cʼu chaʼal yiʼtic ta tiʼnab» li snitilulaltake (Gén. 22:17, 18). Pe akʼo mi muʼyuk laj yil ikʼot ta pasel li kʼusi laj yichʼ albele, lek spatoj-o yoʼonton ta stojolal Jeova. Snaʼoj lek ti chkʼot ta pasel yuʼun li kʼusi chal Jpasvaneje. Ti kʼuyelan echʼ ta xkuxlejale jaʼ te laj yakʼ ta ilel ti jech spatoj yoʼontone (kʼelo Hebreos 11:13). ¿Kʼusi xuʼ xkaltik li ta jtojolaltike? ¿Mi snaʼoj ti jech xchʼunel koʼontontik li Dios eke?
Li smalael ta stojolal Jeovae jaʼ svinajeb ti oy xchʼunel oʼontonale
8. ¿Kʼusi ti stalel onoʼox jech tskʼan li krixchanoetike?
8 Li kʼusi stalel onoʼox tskʼan li jun krixchanoe jaʼ ti lekuk noʼox li sbekʼtal stakopale, ti tsta snup xchiʼile xchiʼuk ti oyuk yalab xnichʼnabike. Taje stalel onoʼox ti jech chichʼ kʼanele, pe oy van bakʼintik ti muʼyuk jech chkʼot ta pasele. ¿Kʼusi van ta jpastik mi jech chkʼot ta jtojolaltike? Ti kʼuyelan ta jpas jtalelaltike jaʼ me te chvinaj mi tsots ta melel li xchʼunel koʼontontike.
9, 10. 1) ¿Kʼusi tspasik junantik sventa xkʼot ta pasel li kʼusi tskʼan stukike? 2) ¿Kʼuxi apatoj avoʼonton ta sventa li kʼusi yaloj tspas Jeovae?
9 Mi ta jkʼan ti lek chilutik li Jeovae, maʼuk ta jpastik li kʼusi oy ta koʼontontik spasel ti jaʼ muʼyuk xa ta jtsaktik ta venta li kʼusi tskʼan yoʼonton Diose, yuʼun mi jech ta jpastike muʼyuk me chkakʼ ta ilel jpʼijiltik. Li jlome jaʼ muʼyuk tsnopik lek kʼusitik poxtael tskʼanik ti oy bakʼintik chal beiltaseletik ta Vivlia ti muʼyuk leke. Yantik xtoke jech ta spasik kʼalal ta xchʼamik abtel ti jaʼ muʼyuk xa yorail sventa chbatik ta tsobajele xchiʼuk muʼyuk xa mas tskʼel li yutsʼ yalalike. Oy jlom xtoke muʼyuk lek tsnopik kʼalal chlik yojtikin sbaik xchiʼuk li buchʼutik mu jmojuk kʼusi xchʼunojike. ¿Mi chakʼik van ta ilel ti lek xil sbaik xchiʼuk Jeova li yajtsʼaklom Cristo ti jech tspasik taje? Jnoptik ta sventa li Abrahame. Ti tavanuk xaʼi smalael li kʼusi yaloj onoʼox tspas li Diose xchiʼuk ti lajuk snop ti jaʼ mas lek ti chkuxi ti kʼuyelan tskʼan yoʼontone, ti oyuk lek sna yan veltae xchiʼuk ti xichʼ ojtikinel ta stojolal li krixchanoetike, ¿kʼusi van la snop Jeova ti jechuke? (Koʼoltaso xchiʼuk Génesis 11:4.) ¿Mi lek-o van chil?
10 ¿Kʼusitik ti oy ta avoʼonton chkʼot ta pasele? ¿Mi oy van xchʼunel avoʼonton sventa chamala ta stojolal Jeova, ti jaʼ li buchʼu xuʼ xkʼot ta pasel yuʼun li kʼusitik oy ta avoʼonton chatae? (Sal. 145:16.) Mu me xchʼay ta joltik ti xuʼ jal xjelav sventa xkʼot ta pasel li kʼusi yaloj Diose ti mu xkʼot ta pasel ta anil jech kʼuchaʼal ta jkʼantike, jech kʼuchaʼal ikʼot ta pasel ta stojolal li Abrahame. Pe mi chkakʼtik persa ti oyuk-o xchʼunel koʼontontik kʼuchaʼal li Abrahame, li Diose muʼyuk me chchʼayutik ta sjol xchiʼuk ta onoʼox me xakʼbutik bendision (Heb. 11:6).
Chaʼtos talelal ti jelel tajeke
11. ¿Kʼusi van matanaletik la sta li Coree xchiʼuk kʼu toʼox yelan itun ta stojolal Jeova?
11 Li Moisés xchiʼuk Coree mu jmojuk ch-ilatik yuʼun Jeova. ¿Kʼu yuʼun? Yuʼun mu koʼoluk laj yakʼik ta ilel stalelalik ta sventa li kʼusi xchapanoj Diose xchiʼuk ta sventa li mantaletik yakʼoje. Jkʼeltik kʼuyelan xkuxlejal i-echʼ li Coré ti jaʼ jun jleví ta yutsʼ yalal Coate. Ep matanaletik la sta, jech kʼuchaʼal liʼe, xuʼ van laj yilik ikol lokʼel li steklumal Israel ta Tsajal Nabe, jech xtok, kʼalal la slajes li buchʼutik la stoy sbaik ta Vits Sinaí li Jeovae, laj van skolta sba ek xchiʼuk la skolta sba ta yichʼel batel li xkaxail smantal Diose (Éxo. 32:26-29; Núm. 3:30, 31). Yaʼeluke jal tukʼ itun ta stojolal Jeova, jaʼ yuʼun ep j-israeletik laj yichʼik ta mukʼ.
12. Jech kʼuchaʼal chkiltik ta lokʼol ta pajina 28, ¿kʼuxi sok yuʼun ti lek xil sbaik xchiʼuk Dios li stoyobbail Coree?
12 Pe akʼo mi jech, kʼalal yakalik batel ta xanbal ta Albil Balumile, kʼot yorail ti oy kʼusi chopol laj yil ta sventa li kʼuyelan chichʼ beiltasel li steklumal Diose. Li Coré xchiʼuk 250 viniketik ti tsots skʼoplal yabtelike tskʼan ox tsjelik taje. Yikʼaluk van la snopik ta melel ti koltabilik yuʼun li Diose, jaʼ yuʼun la stoy sbaik ta stojolal li yabtel akʼbil Moisese. Xi laj yalbeik li Moisés xchiʼuk li sbankil Aarone: «Liʼ noʼox cʼalal avabtelic li voʼoxuque. Scotol jchiʼiltactic tʼujbilic yuʼun Dios xuʼ chtunic yuʼun, xchiʼuc jcotoltic liʼ oy ta jtojoltic li Mucʼul Diose» (Núm. 16:1-3). ¡Jaʼ svinajeb ti toj jtoybaike! Li Moisese xi noʼox la stakʼe: «Li Mucʼul Diose sob ocʼom chacʼ ta ilel li bochʼo jaʼ yuʼune» (kʼelo Números 16:5). Ta smaleb kʼakʼal ta yokʼomale li Coré xchiʼuk li xchiʼiltake chamemik xaʼox (Núm. 16:31-35).
13, 14. ¿Kʼuxi laj yakʼ ta ilel Moisés ti bikʼit laj yakʼ sbae?
13 «Li Moisese jaʼ jun vinic ti toj biqʼuit yacʼoj sba liʼ ta banamile», ti jaʼ mu jechuk li Coree (Núm. 12:3). ¿Kʼuxi laj yakʼ ta ilel ti bikʼit laj yakʼ sbae? Jaʼo kʼalal la xchʼun li kʼusi i-albat yuʼun Diose (Éxo. 7:6; 40:16). Li ta Vivliae muʼyuk chal ti la xchibal kʼopta li mantaletik laj yal li Jpasvaneje o ti och ta vulvunel ta sventa li kʼusi tsnop tspas Diose. Jnoptik ta sventa liʼe, kʼalal laj yal mantal Jeova ti skʼan xichʼ pasel li chʼulna pasbil ta nukule ti jaʼ te chichʼ ichʼel ta mukʼ li Jeovae. Li Moisese i-albat lek kʼuyelan chichʼ pasel skotol, kʼuyelan chichʼ tsʼisel li pokʼetike xchiʼuk kʼusitik skoloral li snaultake, ti jayib sganchoaltake xchiʼuk li yan kʼusitike (Éxo. 26:1-6). Ti kʼu sjalil talel li kuxlejale, li Jeovae stunesoj talel krixchanoetik ta s-organisasion sventa tsbeiltas li steklumale. Ta melel, xuʼ van xijchibaj kʼalal toj echʼem sabil smelolal li kʼusitik chalbutike. Pe li Jeovae jaʼ jun tukʼil jkʼelvanej, snaʼ spat yoʼonton ta stojolal li yajtuneltake xchiʼuk chakʼbe yabtelik. Jaʼ yuʼun kʼalal lek sabil smelolal li kʼusitik chal skʼan jpastike, oy onoʼox lek srasonal yuʼun ti jech tspase. Jech xtok, kʼalal i-albat lek kʼuyelan tspas li chʼulna pasbil ta nukul li Moisese muʼyuk kap ta stojolal Jeova xchiʼuk muʼyuk la snop ti muʼyuk tsots skʼoplal ch-ilate, o ti mu x-akʼbat spas ti kʼuyelan xtojob spasele. La xchʼun li mantale xchiʼuk la skʼel ti akʼo lek spas yabtelik li j-abteletik jech kʼuchaʼal yaloj Jeovae (Éxo. 39:32). ¡Toj bikʼit laj yakʼ ta ilel stalelal li Moisese! Ta melel, snaʼoj ti jaʼ yabtel li Jeovae xchiʼuk ti jaʼ noʼox tunesat sventa jech xkʼot ta pasele.
14 Ta mas tsʼakal xtoke laj yakʼ ta ilel ti bikʼit laj yakʼ sba kʼalal oy kʼusi ikʼot ta pasel ta stojolale. Jaʼo kʼalal likik ta vulvunel li j-israeletike. Li Moisese ilin tajek, pe maʼuk noʼox taje, yuʼun muʼyuk la skʼupil kʼopta li Jeovae. Jaʼ yuʼun li stojobil smule jaʼ ti muʼyuk laj yikʼ ochel ta Albil Balumil li steklumal Jeovae (Núm. 20:2-12). Jvules ta joltik ti kuchem xaʼox yuʼunik epal jabil ti te xvulajetik li j-israeletik ta stojolal li Moisés xchiʼuk Aarone. Vaʼun ta skoj ti jtos noʼox kʼusi chopol la spase, laj yichʼ albel ti muʼyuk chil chkʼot ta pasel li kʼusi jal xaʼox smalaoje. ¿Kʼusi van la spas kʼalal laj yichʼ albele? Akʼo mi chopol laj yaʼi sba, bikʼit laj yakʼ sba xchiʼuk la xchʼam li kʼusi ikʼot ta nopel yuʼun Jeovae. Snaʼoj lek ti jaʼ jun tukʼil Diose xchiʼuk ti «muʼyuc cʼusi chopol oy ta yoʼnton[e]» (Deu. 3:25-27; 32:4). Ta melel, li Moisese te kapal skʼoplal li ta krixchanoetik ti tukʼ yoʼonton laj yakʼ sbaik ta stojolal Jeovae (kʼelo Éxodo 33:12, 13).
Skʼan bikʼit xkakʼ jbatik yoʼ jchʼunbetik li smantal Jeovae
15. ¿Kʼusi xuʼ jchantik ta sventa li kʼusi chopol la spas li Coree?
15 Li ermanoetik ti jaʼ jbabeetik yuʼun li abtelal ta spʼejel Balumil avie, ep kʼusi skʼan snopbeik skʼoplal, jech oxal bakʼintike skʼan oy kʼusi skʼan sjelik. ¿Kʼuyelan chkaʼitik kʼalal jech chkʼot ta pasele? Skʼan me jvules ta joltik ti te tsakal skʼoplal ti lekuk xkil jbatik xchiʼuk li Jeovae. Mu me jechuk jpastik kʼuchaʼal la spas li Coree. Li Coré xchiʼuk li xchiʼiltake muʼyuk xa lek ilatik yuʼun Jeova ta skoj ti la spat yoʼonton ta stukike xchiʼuk ti jaʼ la spas li kʼusi tskʼanike, ti jaʼ te laj yakʼik ta ilel li toybaile xchiʼuk ti muʼyuk xchʼunel yoʼontonike. Li Coree muʼyuk laj yakʼ venta ti manchuk mi jaʼ Moisés yilel ti chal li kʼusi skʼan pasel jujun kʼakʼale, li buchʼu mero bankilal ta stojolal li jteklume jaʼ li Jeovae. Ti kʼalal muʼyuk la stsak ta venta taje, jaʼ te laj yakʼ ta ilel ti muʼyuk tukʼ laj yakʼ sba ta stojolal li buchʼutik tstunesan li Diose. ¡Mas to xuʼ jechuk ti lajuk spat yoʼonton ta stojolal Jeovae! Xuʼ ox xkoltaat sventa jechuk xil jech kʼuchaʼal chil Jeova li kʼusitike xchiʼuk ti xuʼ sjel li kʼusitik skʼan jelel jechuke. Pe mu jechuk la spas li Coree xchiʼuk ta skoj ti la stoy sbae sok ti kʼuyelan yichʼoj ojtikinel ti lek toʼox tukʼ tunem tal ta stojolal Jeovae.
16. ¿Kʼuxi tskoltautik li stalelal Moisés ti bikʼit laj yakʼ sbae?
16 Li loʼil taje chakʼbutik jkotoltik jun pʼijubtasel ti toj tsots skʼoplale, ti te kapal skʼoplal li moletik ta tsobobbail eke. Tsots skʼoplal ti bikʼit xkakʼ jbatike, yuʼun jaʼ tskoltautik ti jmalatik ta stojolal Jeova xchiʼuk ti jchʼuntik li kʼusi chalik li ermanoetik ti vaʼanbilik sventa tskʼelik li abtelale. ¿Mi chkakʼtik persa ti bikʼit chkakʼ jbatik xchiʼuk ti manxoutik jech kʼuchaʼal li Moisese? ¿Mi chkichʼtik ta mukʼ li ermanoetik ti yichʼoj yabtelik ta skʼelel li tsobobbaile xchiʼuk mi ta jpastik li kʼusi chalbutike? ¿Mi lek tsotsutik ta mantal sventa jtsaltik komel li chibajel oʼontonale? Kʼalal jchʼunej mantal chilutik Jeova xchiʼuk ti bikʼit chkakʼ jbatike, ta xojtikinutik ta melel, pe maʼuk noʼox taje, li kʼusi mas tsots skʼoplale jaʼ ti tskʼanutik ta jyalele.
«Li Cajvaltique xotquin li bochʼotic yuʼuntaque»
17, 18. ¿Kʼusi tskoltautik sventa jechuk-o jkʼupintik ti lek xilutik li Jeovae?
17 ¡Tskoltautik tajek ti jnoptik ta sventa sloʼil xkuxlejal li krixchanoetik ti laj yikʼ talel ta stojolal xchiʼuk ti lek laj yil sbaik xchiʼuk li Jeovae! Jech kʼuchaʼal laj kiltik xa tale, manchuk mi oy kʼusi chopol la spasik xchiʼuk ti jpasmuliletik kʼuchaʼal voʼotik li Abraham xchiʼuk Moisese, la skʼupinik li matanal ti uʼuninatik yuʼun li Diose. Yan li Coree mu jechuk la spas, yuʼun namaj ta stojolal Jeova, jech oxal muʼyuk xa lek ilat. Ta sventa ti xuʼ jech jnuptantik eke, skʼan xi jakʼbe jbatike: «¿Mi jaʼ jun tukʼil yajtunelun chiyil li Jeovae? ¿Kʼusi xuʼ jchan li ta skʼelobiltak ta Vivlia liʼe?».
18 ¿Mi mu jechuk ti tspat koʼontontik snaʼel ti laj yikʼutik Jeova xchiʼuk ti ep jbalil chilutike? Mi tukʼ-o chkakʼ jbatik xchiʼuk ti ta jchʼiestik talelaletik jech kʼuchaʼal li xchʼunel koʼontontik xchiʼuk ti bikʼit chkakʼ jbatike, mas to me ep jbalil chilutik. Ta melel, jaʼ jun mukʼta matanal ti ta xiyojtikinutike. Koliyal taje, xuʼ jkʼupintik avi ti xijmuyubaj noʼox xchiʼuk ti xuʼ jtatik epal bendisionetik li ta mas jelavele (Sal. 37:18).
Li kʼusi skʼan jvules ta joltike
• ¿Kʼusi xuʼ xakʼupin xchiʼuk Jeova ti yan sba yutsile?
• ¿Kʼuxi xuʼ jchanbetik li xchʼunel yoʼonton Abrahame?
• ¿Kʼusi xuʼ jchantik ta sventa li stalelal laj yakʼik ta ilel Coré xchiʼuk Moisese?
[Sjakʼobiltak sventa xchanobil]
[Lokʼol ta pajina 26]
Jech kʼuchaʼal Abrahame, ¿mi jpatoj koʼontontik ti chkʼot ta pasel li kʼusi yaloj Jeovae?
[Lokʼol ta pajina 28]
Muʼyuk bikʼit laj yakʼ sba Coré kʼalal muʼyuk laj yichʼ ta muk li kʼusi xchapanoj Jeovae
[Lokʼol ta pajina 29]
¿Mi jchʼunej mantal chilutik Jeova xchiʼuk mi bikʼit chkakʼ jbatik chil?
