Ove hẽ wa Kũlĩhĩwa la Yehova?
Ove hẽ wa Kũlĩhĩwa la Yehova?
‘Yehova wa kũlĩha omanu vaye.’—2 TIM. 2:19.
1, 2. (a) Nye Yesu a pitisile kovaso? (b) Apulilo api tu sukila oku konomuisa?
ULUME umue u Fariseo, eteke limue wa endele ku Yesu kuenje, wo pulisa hati: ‘Olongisi, pokati kovihandeleko, ocihandeleko cipi ca velapo?’ Yesu wo tambulula hati: “Sola [Yehova] Suku yove lutima wove wosi lomuenyo wove wosi lolondunge viove viosi.” (Mat. 22:35-37) Yesu wa solele calua Isiaye wokilu, kuenda ekalo liomuenyo waye, lia li kuata lolondaka viaye. Kuenje, co vetiya oku pitisa kovaso oku linga ocipango ca Yehova. Osimbu Yesu ka file, wa popia lutõi hati, wa kũlĩhĩwa la Suku ndomunu wa pokola kolonumbi Viaye. Omo liaco, Yesu wa amamako oku kala vocisola ca Yehova.—Yoa. 15:10.
2 Koloneke vilo, omanu valua va siata oku popiavo vati, va sole Suku. Etu tua kongeliwavo pokati kavo. Pole, tu sukila oku lipula ndoco: Anga hẽ nda kũlĩhĩwa la Yehova Suku? Eye o ndi tenda ndati? Nda kũlĩhĩwa hẽ okuti nda tiamẽla kokuaye? (2 Tim. 2:19) Oku kuata ukamba Lombiali ya velapo voluali luosi, esumũlũho limue linene!
3. Momo lie omanu vamue va siatela oku sima okuti ka va pondola oku tiamẽla ku Yehova? Nye ci va kuatisa oku yuvula ovisimĩlo viaco?
3 Omanu vana va kuetele ocisola Yehova Suku, pamue va sima okuti ka va pondola oku kũlĩhĩwa laye. Vamue va sima okuti, Yehova ka va kapeleko. Omo liaco, va litenda okuti ka vatiamẽlele kokuaye. Pole, tu sanjuka calua poku limbuka okuti, Suku o tu tenda lonjila yimue ya sunguluka. (1 Sam. 16:7) Upostolo Paulu wa sapuila vamanjaye Akristão hati: ‘Umue nda o sole Suku, eye wa kũlĩhĩwa laye.’ (1 Va Kor. 8:3) Ocisola ove o kuetele Suku, oco ca velapo koku kũlĩhĩwa laye. Kũlĩhĩsa apulilo ava: Momo lie o kasilili oku tanga Utala ulo Wondavululi? Momo lie wa siatela oku likolisilako oku vumba Yehova lutima wove wosi, lolondunge viove viosi, kuenda ongusu yove yosi? Nda wa litumbika ku Suku, kuenda wa papatisiwa ale, nye ca ku vetiya oku ci linga? Embimbiliya li lombolola okuti, Yehova o kũlĩhĩsa ovitima viomanu kuenda o kokela kokuaye vakuavitima via sunguluka. (Tanga Hagai 2:7; Yoano 6:44.) Ove pamue o popia hati, o kasi oku vumba Yehova, momo wa ku kokela kokuaye. Eye lalimue eteke a ka yanduluka vana a kokela kokuaye, nda va amamako lekolelo. Yehova wa va kapako calua kuenda o va sole calua.—Osa. 94:14.
4. Momo lie tu sukilila oku velisapo esumũlũho lioku kũlĩhĩwa la Suku?
4 Omo okuti tua kokiwa la Yehova, tu sukila oku likolisilako oku kala vocisola caye. (Tanga Yuda 20, 21.) Embimbiliya li lekisa okuti, omunu o pondola oku tinduka ku Suku. (Va Hev. 2:1; 3:12, 13) Volondaka vi sangiwa konyima yocinimbu 19, kocipama 2 celivulu lia 2 Timoteo, upostolo Paulu wa tukula Humeneo la Filetu. Alume ava vavali, vatiamẽlele ku Yehova vokuenda kuotembo yimue, pole, noke va siapo efendelo liocili. (2 Tim. 2:16-18) Ivalukavo okuti, omanu vamue va kala vekongelo lio ko Galatia, okuti va kũlĩhĩwile la Suku, noke va siapo efendelo liocili. (Va Gal. 4:9) Omo liaco, ka tu ka ivaliko ukamba wetu la Suku.
5. (a) Ovituwa vipi Suku a velisapo? (b) Ovolandu api tu konomuisa vocipama cilo?
5 Kuli ovituwa vimue Yehova a velisapo calua. (Osa. 15:1-5; 1 Pet. 3:4) Ekolelo lumbombe ovio via kuatisa omanu valua oku kũlĩhĩwa la Suku. Tu konomuisi ovolandu alume vavali, oco tu limbuke ndomo ekolelo lumbombe via va kuatisa oku soliwa la Yehova. Tu ka konomuisavo ulandu wulume umue okuti, tete wa kũlĩhĩwile la Yehova Suku, pole, omo liepela ka taviwile vali laye. Ovolandu omanu vaco, a pondola oku tu longisa ovina vialua.
Isia ya Vakuekolelo
6. (a) Ekolelo lipi Avirahama a lekisa kolohuminyo via Yehova? (b) Ndamupi Avirahama a kũlĩhĩwile la Yehova?
6 Avirahama, wa kala ulume umue wa ‘lekisa ekolelo ku Yehova.’ Omo liaco, weya oku tukuiwa hati, ‘isia ya vosi va kuete ekolelo.’ (Efet. 15:6; Va Rom. 4:11) Omo liekolelo Avirahama a kuata, wa tunda vofeka yaye, wa siapo akamba vaye, lovokuasi, kuenje wa ilukila kofeka yimue ya kala ocipãla. (Efet. 12:1-4; Va Hev. 11:8-10) Avirahama wa lekisa ekolelo lia pama vokuenda kuanyamo alua. Uvangi waco, tu u limbukila kepokolo a lekisa ku Yehova poku seteka oku “lumba Isake.” (Va Hev. 11:17-19) Omo okuti Avirahama wa lekisa ekolelo kolohuminyo via Yehova Suku, Eye wo tendele ndomunu umue wa velapo. Ocili okuti, Yehova wa kũlĩhĩle ciwa Avirahama. (Tanga Efetikilo 18:19.) Eci ci lekisa okuti, Avirahama ka kalele lika omunu umue wa kũlĩhĩwa la Yehova pole, wa kala ekamba liaye.—Tia. 2:22, 23.
7. Ekolelo lipi Avirahama a lekisa koku tẽlisiwa kuolohuminyo via Yehova, kuenda wa vetiyiwa ndati?
7 Avirahama ka kaile komuenyo otembo yalua, oco a tambule ofeka yina vo likuminyile. Eye ka muile ndomo ombuto yaye ya fetika oku li vokiya ‘ndeseke li kasi kohulo yokalunga.’ (Efet. 22:17, 18) Ndaño Avirahama ka muile oku tẽlisiwa kuolohuminyo viaco, eye, wa amamako oku kolela ku Yehova. Momo wa kũlĩhĩle okuti ovina viosi Suku o sapuila, vi ka tẽlisiwa muẽle. Kuenje, Avirahama wa lekisa ekolelo liaco kekalo liomuenyo waye. (Tanga Va Heveru 11:13.) Anga hẽ Yehova wa tu kũlĩha okuti tu kuete ekolelo ndeli lia Avirahama?
Oku Talamẽla Yehova, Oyo Ondimbukiso Yekolelo
8. Ovina vipi omanu valua va yongola okuti vi tẽlisiwa?
8 Citava okuti, tu yongola oku mola oku tẽlisiwa kuovina vimue komuenyo wetu, ndeci: Oku kuela, oku cita omãla, kuenda uhayele uwa. Oku kuata onjongole yaco, ca sunguluka. Valua pokati ketu, ka va pondola oku tẽlisa olonjongole viaco. Pole, onjila tu kuama poku liyaka locitangi caco, oyo yi lekisa nda tu kuete ekolelo lia pama ale sio.
9, 10. (a) Omanu vamue va siata oku sandiliya ndati oku tẽlisa olonjongole viavo? (b) O tenda ndati oku tẽlisiwa kuolohuminyo via Suku?
9 Oku tẽlisa olonjongole viaco lonjila ka yi li tava locipango ca Suku, uveke. Momo ovina viaco, vi pondola oku nyõla ekolelo lietu. Vamue, va siata oku nõlapo oku sakuiwa lonjila yimue yi pisiwa lolonumbi via Yehova. Vakuavo, va siata oku tava oku talavaya kupange umue okuti, va kala ocipãla lepata liavo, kuenda ka va kuata vali otembo yoku endaenda kolohongele. Oco hẽ, nye ci popiwa catiamẽla koku kuata onjongole yoku kuela omunu umue ka fendela Yehova? Ca sunguluka hẽ Ukristão oku popia hati wa kũlĩhĩwa la Yehova, nda o linga ovina viaco? Yehova nda wa kala ndati, nda Avirahama wa liwekelepo oku talamẽla oku tẽlisiwa kuolohuminyo viaye? Nye nda ca pita la Avirahama nda wa nõlelepo oku lisandela ekemãlo okuti ka talamẽla vali Yehova? (Ci sokisa Lefetikilo 11:4.) Nda Avirahama wa ci lingile, nda wa taviwa la Yehova?
10 Ovina vipi o yongola okuti vi tẽlisiwa? Ove hẽ, o kuete ekolelo lia pama lioku talamẽla ku Yehova, una wa likuminya oku tẽlisa olonjongole viove via sunguluka? (Osa. 145:16) Ndeci ca pita la Avirahama, citava okuti olohuminyo vimue via Suku, ka vi tẽlisiwa lonjanga ndomo tu yongola. Pole, nda tu linga ovina vi litava locipango ca Yehova, eye o tu ĩha ovina tu sukila ndeci a linga la Avirahama. Nda tua ci linga, tu kuatisiwa calua.—Va Hev. 11:6.
Etepiso li Kasi Pokati Kumbombe Lepela
11. Asumũlũho api Kora a kuata, kuenda o vetiyile oku lekisa ocituwa cipi kovaso a Suku?
11 Mose la Kora va litepele calua koku lekisa esumbilo keliangiliyo lia Yehova, lo kolonumbi viaye. Ovina va linga, ovio via lekisa ndomo Yehova a va tendele. Kora wa kala u Lewi, ukuepata lia Kohata, kuenda wa kuatele asumũlũho alua. Wa kuatele esumũlũho lioku mola oku yovuiwa kua va Isareli Vokalunga ka Kusuka, kuenda wa kuatisile kesombiso lia Yehova eci a yambula va Isareli vakuesino Komunda Sinai. Wa kuatisilevo oku ambata ocikasia covisila. (Etu. 32:26-29; Ate. 3:30, 31) Vokuenda kuanyamo alua, wa lekisa epokolo ku Yehova kuenda wa sumbiwile la va Isareli omo liepokolo liaye.
12. Ndomo ci lekisiwa vociluvialuvia kemẽla 28, epela lia Kora lia nyõla ndati ukamba waye la Suku?
12 Osimbu va Isareli va kala oku enda Kofeka Yohuminyo, Kora wa simĩle okuti onjila Yehova a kuama poku va songuila, ka ya sungulukile. Kuenje, wa vetiya eci ci soka 250 kalume vana va kuata ovikele vofeka, oku likongela kokuaye oco va linge usuanji. Kora kumue lalume vaco, va simĩle okuti, va kuete ukamba la Yehova. Omo liaco, va sapuila Mose vati: “Wa lipamisi enene, omo owiñi ulo wosi omunu omunu o kola, kuenje Yehova o kasi pokati kavo.” (Ate. 16:1-3) Olondaka evi, vi lekisa okuti va likolelele ovo muẽle, kuenda va lekisa epela! Omo liaco, Mose wa va sapuila hati: “Yehova o [ka] lekisa ava va tiamẽla kokuaye.” (Tanga Atendelo 16:5.) Eteke likuavo kekumbi, Kora kumue lalume va likongelele laye koku linga usuanji, va fa.—Ate. 16:31-35.
13, 14. Kovina vipi Mose a lekisa umbombe?
13 Mose wa kala ‘ulume umue womboka calua okuti, omanu vosi vo kilu lieve va sule.’ Omo liaco, wa ekisa ocituwa ca litepa. (Ate. 12:3) Eye wa lekisa epokolo lumbombe poku kuama lutate olonumbi via Yehova. (Etu. 7:6; 40:16) Ka kuli uvangi u lekisa okuti, onjanja yimue Mose wa tombele olonumbi via Yehova, ale wa sumuile omo ka yonguile oku kuama ovihandeleko viaye. Yehova wa ecele olonumbi viatiamẽla koku tunga o tavernakulu ndeci: Evala lionanga ya kapiwile vokati kaco, kuenda etendelo liolongovela via sukilile oku kapiwa konanga yaco. (Etu. 26:1-6) Nda omunu umue o kuete ovikele vocisoko ca Yehova eci a ku ĩha olonumbi vimue okuti ka ca lelukile oku vi pokola, pamue ove o sumua. Pole, Yehova eye mitavaso wa velapo, kuenda wa siata oku eca olonumbi viwa kafendeli vaye. Nda Yehova eca olonumbi vialua, o kuete esunga lieci a ci lingila. Ivaluka okuti, Mose ka temẽle omo lioku tambula olonumbi vimue ku Yehova kuenda ka simĩle okuti, Yehova ka kapeleko elianjo liaye. Pole, ‘wa kuama lutate’ olonumbi a tambuile ku Suku. (Etu. 39:32) Mose wa lekisa umbombe walua! Momo wa kũlĩhĩle okuti, Yehova eye wa tumĩle upange a kala oku linga.
14 Umbombe wa Mose wa limbukiwavo eci a liyaka lovitangi vina nda vio nenela esumuo. Ocili okuti, onjanja yimue Mose wa temẽle omo liomanu va kala oku lisiõsiõla, kuenje ka ecele vali esivayo ku Suku. Omo liaco, Yehova wa sapuila Mose hati, ka iñila lomanu vaco Vofeka Yohuminyo. (Ate. 20:2-12) Mose kumue la kota liaye Arone, va pandikisa kalisiõsiõlo a va Isareli vokuenda kuanyamo alua. Omo okuti Mose wa lueyele vepuluvi liaco, ka tambuile onima a lavokaile vokuenda kuotembo yalua! Nye Mose a linga? Ndaño okuti wa sumuile, pole, wa lekisa umbombe walua konjila Yehova a nõlapo. Mose wa kũlĩhĩle okuti, Yehova ukuesunga, kuenda olonjila viaye viosi via sunguluka. (Esin. 3:25-27; 32:4) Ove hẽ, ku tava okuti Mose wa kala omunu umue wa kũlĩhĩwile la Yehova?—Tanga Etundilo 33:12, 13.
Oku Pokola ku Yehova ci Sukila Umbombe
15. Ocituwa ca Kora coku lekisa epela ci tu longisa nye?
15 Tu tenda ndati apongoloko a siata oku lingiwa vocisoko ca Yehova koluali luosi, okuti, a eciwa la vamanji va kuete ocikele coku songola? Kora kumue lomanu vaye, va liwekapo oku vumba Suku, omo lioku likolela ovo muẽle, oku lekisa epela, kuenda ekambo liekolelo. Ndaño Kora wa simĩle okuti Mose ka pondola vali oku eca olonumbi kokuavo omo lioku kuka, pole, Yehova eye wa kala oku songuila va Isareli. Kora wa ivaleleko okuti, oku tomba vana Suku a nõla oku kala asongui, ci nena ovitangi. Nda Kora wa kevelile toke eci Yehova a linga apongoloko a sukiliwa, nda wa kuatisiwa. Eye, ka ci lingile, kuenje wa nyõla upange waye wosi omo liepela kuenda ovilinga viaye vĩvi!
16. Oku kuama ongangu ya Mose yoku lekisa umbombe ci tu kuatisa ndati kukamba wetu la Yehova?
16 Ulandu tua konomuisa ndeti, weca elungulo kakulu vekongelo kuenda ku vamanji vosi koloneke vilo. Tu sukila oku talamẽla ku Yehova loku pokola kolonumbi viomanu a nõla oco va tu songuile. Tua siata hẽ oku lekisa umbombe lepokolo ndeci Mose a linga? Tu lekisa hẽ epokolo komanu vana va nõliwa oco va tu songuile kuenda tua siata oku tava kolonumbi viavo? Tua siata hẽ oku likandangiya konyeño eci va tu sumuisa? Nda tua ci linga, tu taviwa la Yehova. Umbombe, lepokolo lietu, vi soliwe calua laye.
Yehova wa Kũlĩha Vana Vatiamẽla Kokuaye
17, 18. Nye ci pondola oku tu kuatisa oku amamako oku tiamẽla ku Yehova loku taviwa laye?
17 Oku kuama ongangu yomanu vana va soliwile la Yehova haivo va kuatele ukamba laye, ci kuete esilivilo. Avirahama la Mose va kala omanu ka va lipuile kuenda va kuata ovitangi ndevi vietu. Ocili okuti, va kũlĩhĩwile ndomanu vatiamẽla kokuaye. Pole, ovituwa vĩvi via Kora, vi lekisa okuti tu pondola oku siapo ukamba wetu la Yehova kuenje ka tu taviwa vali laye. Omo liaco, tu sukila oku lipula ndoco: ‘Yehova o ndi tenda ndati? Ovolandu a sangiwa Vembimbiliya a tu longisa nye?’
18 Poku limbuka okuti Yehova wa kapako vana vo kolela kuenje o va kokela kokuaye, ci tu nenela esanju lialua. Omo liaco, amamako oku lekisa ekolelo, umbombe, kuenda ovituwa vikuavo vi soliwe la Yehova, Suku yetu. Ocili okuti, oku kũlĩhĩwa la Yehova, esumũlũho limue lia velapo li tu nenela esanju cilo, kuenda asumũlũho akuavo tu ka tambula kovaso yoloneke.—Osa. 37:18.
O ci Ivaluka?
• Nye ci lomboloka oku kũlĩhĩwa la Yehova? Wa sanjukila hẽ esumũlũho lioku kũlĩhĩwa laye?
• O kuama ndati ongangu ya Avirahama yoku lekisa ekolelo?
• Ulandu wa Kora la Mose u tu longisa nye?
[Apulilo Elilongiso]
[Elitalatu kemẽla 26]
Anga hẽ tua kolela okuti Yehova o ka tẽlisa olohuminyo viaye, ndeci Avirahama a linga?
[Elitalatu kemẽla 28]
Kora ka yonguile oku pokola kolonumbi via Yehova
[Elitalatu kemẽla 29]
Ove hẽ, wa kũlĩhĩwa la Yehova okuti, wa siata oku pokola kolonumbi viaye?
