Naa Ni A Ḓivhiwa Nga Yehova?
Naa Ni A Ḓivhiwa Nga Yehova?
“Murena [Yehova] u ḓivha vha re vhawe.”—2 TIM. 2:19.
1, 2. (a) Ndi mini zwe zwa vha zwi zwa ndeme kha Yesu? (b) Ndi mbudziso dzifhio dzine ra fanela u ḓivhudzisa dzone?
ḼIṄWE ḓuvha Mufarisei o ya kha Yesu a mu vhudzisa a ri: “Mulayo muhulu kha milayo ndi ufhio?” Yesu a fhindula a ri: “Funa Murena Mudzimu wau nga mbilu yau yoṱhe na nga muya wau woṱhe na nga u ṱalukanya hau hoṱhe!” (Mat. 22:35-37) Yesu o vha a tshi funa Khotsi awe wa ṱaḓulu vhukuma nahone o tshila u tendelana na eneo maipfi. Yesu o dovha a dzhia vhushaka hawe na Yehova vhu ha ndeme, nahone zwenezwo o zwi sumbedza nga u fulufhedzea vhutshiloni hawe. Nga zwenezwo, musi e tsini na u fa, o vha a tshi nga amba uri Mudzimu u mu ḓivha sa muthu we a thetshelesa milayo Yawe nga u fulufhedzea. Ngauralo, Yesu o dzula lufunoni lwa Yehova.—Yoh. 15:10.
2 Vhathu vhanzhi ṋamusi vha amba uri vha funa Mudzimu. A zwi timatimisi uri na riṋe ri a ḓivhala kha vhenevho vhathu. Naho zwo ralo, ndi zwa ndeme uri ri ṱolisise mbudziso dzi tevhelaho: ‘Naa ndi a ḓivhiwa nga Mudzimu? Yehova u ndzhia hani? Naa ndi ḓivhiwa sa muthu wa Mudzimu?’ (2 Tim. 2:19) Ndi ndugelo khulwane vhukuma u vha na vhushaka ha tsini-tsini na Muvhusahoṱhe!
3. Ndi ngani vhaṅwe vha tshi timatima uri Yehova a nga vha ṱanganedza, nahone ndi mini zwine zwa nga thusa uri vha lwisane na eneo mahumbulele?
3 Naho zwo ralo, vhaṅwe vhane vha funa Yehova nga maanḓa zwi a vha konḓela uri vha tende uri Mudzimu a nga vha ḓivha nga nḓila yavhuḓi. Vhaṅwe vha ḓipfa vhe si vha ndeme, nahone vha a timatima uri Yehova a nga vha ṱanganedza. Naho zwo ralo, zwi a ri takadza u ḓivha uri Mudzimu u ri dzhia nga nḓila yo fhambanaho na yeneyo! (1 Sam. 16:7) Muapostola Paulo o vhudza Vhakriste ngae a ri: “Arali muthu a tshi funa Mudzimu, uyo u ḓihwa nga ene Mudzimu.” (1 Vha-Kor. 8:3) U funa Mudzimu ndi zwa ndeme u itela uri a ni ḓivhe. Edzani u humbula: Ndi ngani ni tshi khou vhala ino khandiso? Ndi ngani ni tshi lwela u shumela Yehova nga mbilu, muya, muhumbulo na maanḓa aṋu oṱhe? Arali no ḓiṋekedza kha Mudzimu nahone no lovhedzwa, ndi mini zwe zwa ita uri ni dzhie honoho vhukando? Bivhili i ṱalutshedza uri Yehova, ene ane a ṱolisisa dzimbilu, u kokodza vhane vha vha madzanga. (Vhalani Hagai 2:7; Yohane 6:44.) Nga zwenezwo, ni nga amba uri ni shumela Yehova nga nṱhani ha uri ndi ene we a ni kokodza. A nga si vhuye a ṱutshela vhathu vhe a vha kokodza arali vha dzula vha tshi fulufhedzea. Mudzimu u vha dzhia vhe vha ndeme, nahone u a vha funa vhukuma.—Ps. 94:14.
4. Ndi ngani ri tshi fanela u dzula ri tshi elekanya nga ha u ḓivhiwa nga Mudzimu?
4 Arali Yehova o no ri kokodza, ndi zwa ndeme uri ri dzule ri lufunoni lwawe. (Vhalani Yuda 20, 21.) Humbulani uri Bivhili i sumbedza uri zwi a konadzea uri ri ṱutshele kule na Mudzimu kana ri mu laṱe. (Vha-Heb. 2:1; 3:12, 13) Sa tsumbo, musi a sa athu amba maipfi ane a wanala kha 2 Timotheo 2:19, muapostola Paulo o amba nga ha Himeneo na Fileto. Zwi tou vha khagala uri vhenevho vhathu vhavhili vho vhuya vha ṱanganedzwa nga Yehova, fhedzi nga murahu vha ṱutshela mafhungo-ngoho. (2 Tim. 2:16-18) Humbulani uri zwivhidzoni zwa Galatia, vhaṅwe vhe vha vha vha tshi ḓivhiwa nga Mudzimu a vho ngo dzula tshedzani tsha muya. (Vha-Gal. 4:9) Ri songo vhuya ra dzhiela fhasi vhuimo hashu ha ndeme phanḓa ha Mudzimu.
5. (a) Ndi dzifhio dziṅwe pfaneleo dzine Mudzimu a dzi dzhia dzi dza ndeme? (b) Ri ḓo haseledza nga ha tsumbo dzifhio?
5 Hu na dziṅwe pfaneleo dzine Yehova a dzi dzhiela nṱha. (Ps. 15:1-5; 1 Pet. 3:4) Lutendo na u ḓiṱukufhadza zwo vha zwi tshi ṱalula vhaṅwe vha ḓivhiwaho nga Mudzimu. Kha ri ṱolisise tsumbo dza vhathu vhavhili ri vhone uri u vha havho na dzenedzi pfaneleo zwo vha thusa hani uri Yehova a vha takalele. Ri ḓo dovha ra haseledza nga ha munna we a vha a tshi humbula uri u ḓivhiwa nga Mudzimu, fhedzi we a vha a tshi ḓikukumusa nahone a vho ṱhogomela uri ha tsha takalelwa nga Yehova. Ri nga guda zwithu zwa ndeme kha tsumbo dzenedzi.
Khotsi A Vha Tendaho
6. (a) Abrahamu o sumbedza hani uri u na lutendo kha mafulufhedziso a Yehova? (b) Yehova o vha a tshi ḓivha Abrahamu nga nḓila-ḓe?
6 Abrahamu o vha e munna we a vha e na “lutendo kha Yehova.” Zwi re zwone ndi uri u vhidzwa “khotsi-a vhoṱhe vha tendaho.” (Gen. 15:6; Vha-Roma 4:11) Nga lutendo, Abrahamu o ṱutshela haya hawe, khonani dzawe, na thundu dzawe a ya shangoni ḽa kule. (Gen. 12:1-4; Vha-Heb. 11:8-10) Na nga murahu ha miṅwaha minzhi Abrahamu o vha a tshi kha ḓi vha na lutendo lwo khwaṱhaho. Zwenezwi zwo vhonala musi a tshi thetshelesa ndaela ya Yehova ya u “ita Isaka [murwa wawe] tshidzimu.” (Vha-Heb. 11:17-19) Abrahamu o sumbedza uri u na lutendo kha mafulufhedziso a Yehova, nga zwenezwo Mudzimu o vha a tshi mu dzhia sa muthu o khetheaho; o vha a tshi mu ḓivha zwa vhukuma. (Vhalani Genesi 18:19.) Yehova o vha a sa sokou ḓivha uri hu na muthu ane a pfi Abrahamu; o vha a tshi mu takalela sa khonani.—Yak. 2:22, 23.
7. Ndi mini zwi swayeaho nga u ḓadzea ha mafulufhedziso a Yehova, nahone zwenezwo zwo kwama hani Abrahamu?
7 Zwi swayeaho ndi uri Abrahamu o fa a songo wana ifa ḽawe ḽa shango ḽe a fulufhedziswa. Nahone ho ngo vhona mbeu yawe i tshi anda “vhunga muṱavha wa philiphilini ya lwanzhe.” (Gen. 22:17, 18) Naho enea mafulufhedziso a songo ḓadzea musi a tshi kha ḓi tshila, Abrahamu o dzula e na lutendo lwo khwaṱhaho kha Yehova. O vha a tshi zwi ḓivha uri zwine Mudzimu a zwi amba zwi ḓo ḓadzea. Abrahamu o tshila u tendelana na lwonolwo lutendo. (Vhalani Vha-Heberu 11:13.) Naa Yehova u ri ḓivha sa vhane vha vha na lutendo lu fanaho na lwa Abrahamu?
U Lindela Yehova Zwi Sumbedza Uri Ri Na Lutendo
8. Ndi zwifhio zwithu zwo teaho zwine vhaṅwe vhathu vha tama zwi tshi itea?
8 Hu nga kha ḓi vha hu na zwithu zwine ra zwi tama. Ndi zwa nzulele u ṱoḓa u vha mbinganoni, u vha na vhana na mutakalo wavhuḓi. Naho zwo ralo, kha vhathu vhanzhi, zwiṅwe zwazwo zwi nga kha ḓi sa itea. Arali ri kha honoho vhuimo, nḓila ine ra sedzana naho ngayo i ḓo sumbedza nḓila ine lutendo lwashu lwa vha ngayo.
9, 10. (a) Vhaṅwe vho ṱoḓa zwine vha zwi tama zwi tshi ḓadzea nga nḓila-ḓe? (b) Ni ḓipfa hani nga u ḓadzea ha mafulufhedziso a Mudzimu?
9 Zwi ḓo vha vhutsilu arali ra ṱoḓa uri zwine ra zwi tama zwi itee nga nḓila i sa tendelani na vhuṱali ha Mudzimu. Zwenezwo zwi nga fhelisa vhushaka haṋu na Mudzimu. Sa tsumbo, vhaṅwe vho khetha mifuda ya ngalafho ine ya lwisana na nyeletshedzo ya Yehova. Vhaṅwe vho khetha mishumo ya u ḓitshidza ine ya ita uri vha si tsha ṱwa na miṱa yavho kana uri vha si vhe hone miṱanganoni ya tshivhidzo. Vhaṅwe vha funana na muthu ane a si vhe mutendi. Arali Mukriste a ita zwithu zwo raloho, naa u vha a tshi khou ṱoḓa u ḓivhiwa nga Yehova? Yehova o vha a tshi ḓo ḓipfa hani arali Abrahamu a fhele mbilu, a si lindele mafulufhedziso a Mudzimu a tshi ḓadzea? Ho vha hu tshi ḓo itea mini arali Abrahamu a ṱoḓe u ḓigeḓa na u ḓiitela dzina nṱhani ha u lindela Yehova? (Vhambedzani Genesi 11:4.) Naa Yehova o vha a tshi ḓo bvela phanḓa a tshi mu takalela na u mu ḓivha?
10 Ndi mini zwine na tama zwi tshi itea? Naa lutendo lwaṋu lwo khwaṱha lune na nga lindela Yehova, we a fulufhedzisa u fusha zwine na zwi tama? (Ps. 145:16) Maṅwe mafulufhedziso a Mudzimu a nga si ḓadzee nga u ṱavhanya nga hune ra funa ngaho, samusi zwo vha zwo tou ralo na kha Abrahamu. Naho zwo ralo, Yehova u a takala musi ri tshi vha na lutendo lu fanaho na lwa Abrahamu nahone ri tshi ita zwithu u tendelana nalwo. U ita nga u ralo zwi ḓo ri vhuyedza vhukuma.—Vha-Heb. 11:6.
Phambano Vhukati Ha U Ḓiṱukufhadza Na U Ḓihudza
11. Kora a nga vha o vha e na ndugelo dzifhio, nahone zwenezwo zwo sumbedza uri o vha e na mavhonele afhio nga ha Mudzimu?
11 Mushe na Kora ndi tsumbo dzi sa fani musi zwi tshi ḓa kha u ṱhonifha ndugiselelo ya Yehova na phetho dzawe. Nḓila ye vha aravha ngayo yo kwama nḓila ye Yehova a vha dzhia ngayo. Kora o vha e Mulevi wa Kehati, nahone o vha e na ndugelo nnzhi vhukuma dze dza vha dzi tshi katela u vhona lushaka lwa Isiraele lu tshi tshidzwa Lwanzheni Lutswuku, u tikedza khaṱhulo ya Yehova musi Vhaisiraele vha sa thetshelesi Thavhani ya Sinai na u hwala mbulungelo ya mulanga. (Ek. 32:26-29; Num. 3:30, 31) O fulufhela Yehova lwa miṅwaha minzhi nahone Vhaisiraele vhanzhi vho vha vha tshi mu fulufhela.
12. Samusi zwo sumbedzwa kha siaṱari 28, u ḓihudza zwo kwama hani nḓila ye Mudzimu a vha a tshi ḓivha ngayo Kora?
12 Naho zwo ralo, musi lushaka lwa Isiraele lu nḓilani ya u ya Shangoni ḽo Fulufhedziswaho, Kora o vhona zwithu zwe a humbula uri ndi thaidzo kha nḓila ye lushaka lwa Isiraele lwa vha lu tshi khou livhiswa ngayo. Nga murahu, vhanna vha 250 vha rangaho phanḓa lushaka vho ima na Kora vha tshi lingedza u ita tshanduko. Kora na vhanna vhenevho vha nga vha vho vhona u nga vha na vhushaka havhuḓi na Yehova. Vho vhudza Mushe vha ri: “Ni ḓi-itela’ni vhahulwane kha tshivhidzo tsha Yehova ngeno tshivhidzo tshoṱhe tshi tsha vhakhethwa vhoṱhe.” (Num. 16:1-3) Zwenezwo zwo vha zwi u ḓifulufhelesa na u ḓihudza vhukuma! Mushe o vha vhudza uri: “Yehova u ḓo ri ḓivhisa ane a vha wawe.” (Vhalani Numeri 16:5.) Nga matshelo ḽi tshi sala ḽi tshi kovhela, Kora na vhoṱhe vhe vha ima nae kha vhushandukwa honoho vho vha vho fa.—Num. 16:31-35.
13, 14. Mushe o sumbedza u ḓiṱukufhadza nga nḓila dzifhio?
13 Zwo fhambanaho na zwenezwo, “Mushe o vha e munna wa zwivhuya ngangoho; o vha a tshi fhira vhathu vha shango ḽoṱhe nga zwivhuya.” (Num. 12:3) O sumbedza zwivhuya zwawe na u ḓiṱukufhadza nga u ḓiimisela u tevhela vhulivhisi ha Yehova. (Ek. 7:6; 40:16) A hu na vhuṱanzi vhu sumbedzaho uri Mushe o vha a tshi timatima nḓila ye Yehova a vha a tshi ita ngayo zwithu kana uri o vha a tshi dinwa nga u tevhela maitele a Yehova. Sa tsumbo, Yehova o ṋea ndaela malugana na nḓila ine nnḓu ya mulanga ya fanela u fhaṱwa ngayo, u fana na muvhala wa miḓali na zwihuka zwe zwa vha zwi tshi ḓo shumiswa u ṱanganya malabi a dennde. (Ek. 26:1-6) Arali mulavhelesi a re ndanguloni ya Mudzimu a tshi dzulela u ni ṋea ndaela dzi sa fheli, nga zwiṅwe zwifhinga ni nga dinalea vhukuma. Naho zwo ralo, Yehova ndi mulavhelesi o fhelelaho, ane a ṋea vhashumeli vhawe vhuḓifhinduleli vhunzhi nahone u a vha fulufhela. Musi a tshi ṋea ndaela nnzhi, u vha e na zwiitisi zwi pfalaho. Ṱhogomelani uri Mushe ho ngo dinalea musi Yehova a tshi mu vhudza yeneyo ndaela, zwa vho tou nga Yehova o vha a tshi nyadza vhukoni hawe kana mbofholowo yawe ya u ita zwithu. Nṱhani hazwo, Mushe o ita vhungoho ha uri vhashumi vho “tevhedza” zwe Mudzimu a laya. (Ek. 39:32) Zwenezwo ho vha hu u ḓiṱukufhadza vhukuma! Mushe o ṱhogomela uri wo vha u mushumo wa Yehova nahone o vha a tshi tou vha tshishumiswa tsha uri mushumo wonoyo u itiwe.
14 U ḓiṱukufhadza ha Mushe ho vhonala musi o sedzana na zwiimo zwe zwa mu kwama nga nḓila i si yavhuḓi. Kha tshiṅwe tshiitea, Mushe o kundelwa u ḓilanga na u ita uri Mudzimu a vhe mukhethwa musi vhathu vha tshi khou mu gungulela. Nga mulandu wa zwenezwo, Yehova o vhudza Mushe uri ha nga ḓo isa vhathu Shangoni ḽo Fulufhedziswaho. (Num. 20:2-12) Mushe na mukomana wawe Aroni, vho konḓelela lugungulo lwa Vhaisiraele lwa miṅwaha minzhi. Nga nṱhani ha uri Mushe o khakha kha tshenetsho tshiitea tshithihi, o vha a sa ḓo wana zwe a vha o zwi lavhelela lwa tshifhinga tshilapfu! Mushe o aravha hani? Naho khamusi o vhaisala vhukuma, Mushe o ṱanganedza phetho ya Yehova. O vha a tshi zwi ḓivha uri Yehova ndi Mudzimu o lugaho nahone ha khakhi. (Doit. 3:25-27; 32:4) Musi ni tshi humbula nga ha Mushe, naa a ni mu dzhii sa we a vha a tshi ḓivhiwa nga Yehova?—Vhalani Ekisodo 33:12, 13.
U Thetshelesa Yehova Zwi Ṱoḓa Uri Ri Ḓiṱukufhadze
15. Ndi mini zwine ra nga zwi guda kha u ḓihudza ha Kora?
15 Nḓila ine ra aravha ngayo musi hu tshi itwa tshanduko tshivhidzoni tsha Vhukriste tsha shango ḽoṱhe na phetho dzine dza itwa nga vhane vha ri ranga phanḓa i a kwama nḓila ine Yehova a ri ḓivha ngayo. Kora na vhatevheli vhawe vho tshinya vhushaka havho na Mudzimu nga u ḓifulufhelesa, u ḓihudza na u sa vha na lutendo. Naho Kora o vhona Mushe wa mulala a tshi ita phetho ḓuvha ḽiṅwe na ḽiṅwe, zwi re zwone ndi uri ndi Yehova we a vha a tshi khou livhisa lwonolwo lushaka. Kora o hangwa yeneyo mbuno nahone nga nṱhani ha zwenezwo a kundwa u sumbedza uri u a fulufhedzea kha vhathu vhe Mudzimu a vha a tshi khou vha shumisa. Zwo vha zwi tshi ḓo vha vhuṱali vhukuma uri Kora a lindele Yehova u itela uri a kone u pfesesa mafhungo zwavhuḓi kana uri hu itwe tshanduko arali zwi tshi ṱoḓea. Ngauralo, Kora o fhedzisela o tshinya bvumo ḽawe ḽa u shumela Yehova nga u fulufhedzea nga nṱhani ha u ḓihudza!
16. U tevhela tsumbo ya Mushe ya u ḓiṱukufhadza zwi kwama hani nḓila ine Yehova a ri ḓivha ngayo?
16 Eneo mafhungo a ṋea vhahulwane na vhaṅwe vha re tshivhidzoni tsevho i re na maanḓa. U lindela Yehova na u tevhela vhulivhisi vhu bvaho kha vhe vha vhewa uri vha range phanḓa ṋamusi zwi ṱoḓa u ḓiṱukufhadza. Naa ri a sumbedza uri ri a ḓiṱukufhadza nahone ri na vhulenda u fana na Mushe? Naa ri a ṱanganedza vhuimo ha vhane vha ri ranga phanḓa nahone ra ḓiṱukufhadzela vhulivhisi havho? Musi ro kulea nungo naa ri a kona u sa livhisa ṱhogomelo kha maḓipfele ashu fhedzi? Arali ra kona u ita nga u ralo, na riṋe Yehova u ḓo ri ḓivha nga nḓila yavhuḓi. U ḓiṱukufhadza na u thetshelesa hashu zwi ḓo ita uri a ri fune.
Yehova U Ḓivha Vhathu Vhawe
17, 18. Ndi mini zwine zwa nga ri thusa u bvela phanḓa ri tshi ḓivhiwa sa vhathu vha Yehova?
17 Zwi a thusa u elekanya nga ha vhathu vhe Yehova a vha kokodza na vhe a vha a tshi vha ḓivha nga nḓila yavhuḓi. Abrahamu na Mushe vho vha vha songo fhelela nahone vho vha vhe na vhukhakhi u fana na riṋe. Naho zwo ralo, Yehova o vha a tshi vha ḓivha sa vhathu vhawe. Tsumbo ya Kora i sumbedza uri zwi a konadzea uri ri ṱutshele kule na Yehova nahone a si tsha ri ḓivha nga nḓila yavhuḓi. Zwi nga vha zwavhuḓi arali muṅwe na muṅwe washu a ḓivhudzisa uri: ‘Yehova u ndzhia hani? Ndi mini zwine nda nga zwi guda kha dzenedzi tsumbo dzi re Bivhilini?’
18 Ni nga khuthadzwa nga u ḓivha uri Yehova u dzhia vhathu vhane vha fulufhedzea khae sa vhathu vhawe. Bvelani phanḓa ni tshi vha na lutendo, u ḓiṱukufhadza, na dziṅwe pfaneleo dzine dza ita uri Mudzimu washu a bvele phanḓa a tshi ni funa. U ḓivhiwa nga Yehova ndi ndugelo khulwane vhukuma ine ya ita uri vhutshilo vhu fushe zwino, nahone zwi ḓo ri ḓisela phaṱhutshedzo tshifhingani tshi ḓaho.—Ps. 37:18.
Naa Ni A Zwi Elelwa?
• Ndi vhuimo vhufhio ha ndeme vhune na nga vha naho na Yehova?
• Ni nga edzisa hani lutendo lwa Abrahamu?
• Ndi ngudo dzifhio dzine ra nga dzi guda kha Kora na Mushe?
[Mbudziso dza Pfunzo]
[Tshifanyiso kha siaṱari 26]
Naa ri na lutendo lu fanaho na lwa Abrahamu lwa uri Yehova u ḓo ḓadzisa tshoṱhe mafulufhedziso awe?
[Tshifanyiso kha siaṱari 28]
Kora o vha a sa ṱoḓi u ḓiṱukufhadzela vhulivhisi
[Tshifanyiso kha siaṱari 29]
Naa Yehova u ni ḓivha sa ane a ḓiṱukufhadzela vhulivhisi?
