¿U kʼaj óolen wa Jéeoba?
¿U kʼaj óolen wa Jéeoba?
«Yuumtsileʼ u kʼaj óol le máaxoʼob u tiaʼaloʼ.» (2 TIM. 2:19)
1, 2. 1) ¿Baʼax maas ku tsʼíiboltik kaʼach Jesús? 2) ¿Tiʼ baʼax kʼáatchiʼi unaj k-tuukul?
JUNTÉENJEAKEʼ, tu natsʼuba juntúul fariseo yiknal Jesuseʼ ka tu kʼáatajtiʼ: «¿Máakalmáak u [maas] nojchil ichil le aʼalmajtʼaanoʼoboʼ?». Letiʼeʼ tu núukajtiʼ: «Yaabilt Yuumtsil a Dios yéetel tuláakal a puksiʼikʼal, yéetel tuláakal a wóol, yéetel tuláakal a naʼat» (Mat. 22:35-37). Cristoeʼ jach ku beetik kaʼach jeʼex úuchik u yaʼalikoʼ. Baʼaleʼ letiʼeʼ maʼ chéen u yaabiltmaj u Taataiʼ, baʼaxeʼ jach ku tsʼíiboltik u lúubul utsil tiʼ, le oʼolal tu yilaj u chúukpajal u yóol u meyajt mantatsʼ. Le oʼolal táanil tiʼ u kíimileʼ, páajchaj u yaʼalik u Taataeʼ jach u yojel letiʼeʼ chúukaʼan u yóol yéetel ku beetik mantatsʼ le baʼax ku yaʼalaʼaltiʼoʼ. Beyoʼ pʼáat mantatsʼ ichil u yaabilaj Jéeoba (Juan 15:10).
2 Bejlaʼeʼ yaʼab xiiboʼob yéetel koʼoleloʼob aʼalik u kʼaj óoloʼob yéetel u yaabiltmoʼob Dios. Baʼaleʼ maʼ chúukaʼan chéen yéetel leloʼ. Unaj k-ilik wa u kʼaj óoloʼon bey xan wa k-lúubul utsil tiʼ. Le oʼolal maʼalob ka k-tukle: «¿Jeʼel wa u páajtal in waʼalik u kʼaj óolen Jéeoba yéetel ku yilik bey u tiaʼaleneʼ?» (2 Tim. 2:19). U jaajileʼ jach jatsʼuts u biskuba máak yéetel u Reyil tuláakal baʼal.
3. ¿Baʼaxten yaan máakeʼ maʼ tu jach creertik wa jeʼel u páajtal u biskuba yéetel Dioseʼ, yéetel baʼax jeʼel u yáantkoʼob u kʼex bix u tuukuloʼobeʼ?
3 Yaan máaxoʼob u yaabiltmoʼob Jéeobaeʼ, maʼatech u jach creertikoʼob wa jeʼel u páajtal u biskubaʼob tu yéeteleʼ. Yaan kʼiineʼ tumen ku yuʼubikoʼob jach mix baʼaloʼob wa jach chichnoʼob tu tséel. Baʼaleʼ letiʼeʼ maʼ bey u yilkoʼoniʼ (1 Sam. 16:7). Tuukulnakoʼon tiʼ le baʼax tu yaʼalaj Pabloaʼ: «Wa yaan máax u yaabiltmaj Jajal Dioseʼ, letiʼeʼ kʼaj óoltaʼan tumen Jajal Dios» (1 Cor. 8:3). Jeʼex túun k-ilkoʼ utiaʼal ka kʼaj óoltaʼak wa máax tumen Dioseʼ, táanileʼ unaj u yaabiltik Dios. Maʼalob ka k-tukle: «¿Baʼaxten táan in xokik le revistaaʼ? ¿Baʼaxten kin wilik in meyajtik Jéeoba yéetel tuláakal in puksiʼikʼal, yéetel tuláakal in wóol, yéetel tuláakal in naʼat? ¿Tsʼoʼok wa in kʼubik in kuxtal tiʼ letiʼ yéetel tsʼoʼok wa in wokjaʼ? Wa tsʼoʼokeʼ, ¿baʼaxten tsʼoʼok in beetik?». Kʼaʼajaktoʼoneʼ k-Taata yaan teʼ kaʼanoʼ ku yilik jach baʼax yaan t-puksiʼikʼal, yéetel chéen letiʼ jeʼel u natsʼik tu yiknal le «ayikʼaliloʼob» wa le máaxoʼob koʼoj u tojoloʼob tu táanoʼ (xokaʼak Ageo 2:7 yéetel Juan 6:44). Le oʼolal toʼoneʼ k-meyajtik tumen letiʼ invitartoʼon utiaʼal k-bisikba tu yéetel. Wa ku chúukpajal k-óol k-meyajteʼ, letiʼeʼ mix bikʼin ken u pʼatoʼon. Yaan u kanáantkoʼon mantatsʼ yéetel yaabilaj, tumen utiaʼal letiʼeʼ koʼoj k-tojol (Sal. 94:14).
4. ¿Baʼaxten unaj k-tuukul tiʼ le jatsʼuts páajtalil yaantoʼon utiaʼal k-bisikba yéetel Diosoʼ?
4 Ken tsʼoʼokok u natsʼkoʼon Jéeoba tu yiknaleʼ, ¿baʼax unaj k-ilik k-tsʼáaik táanil ichil k-kuxtal? K-pʼáatal tiʼ u yaabilaj (xokaʼak Judas 20, 21). Le Bibliaoʼ ku yaʼalikeʼ toʼon táan k-meyajtik Dioseʼ jeʼel «k-saʼatal» yéetel jeʼel k-náachtal «tiʼ le kuxaʼan Jajal Dios[oʼ]» (Heb. 2:1; 3:12, 13). Lelaʼ letiʼe baʼax úuch tiʼ Himeneo yéetel Fileto, le máaxoʼob tu chʼaʼchiʼitaj apóstol Pablo tiʼ 2 Timoteo 2:19, táanil tiʼ u yaʼalik u tekstoil le xookaʼ. Le kaʼatúul máakoʼobaʼ u tiaʼaloʼob kaʼach Jéeoba, baʼaleʼ ka máan kʼiineʼ náachchajoʼob tiʼ letiʼ (2 Tim. 2:16-18). Lelaʼ bey xan úuchik tiʼ jujuntúul sukuʼunoʼob yanoʼob teʼ múuchʼuliloʼob yanoʼob Galaciaoʼ. Kex kʼaj óoltaʼaboʼob tumen Dioseʼ, maʼ pʼáatoʼob ichil le sáasil ku tsʼáaikoʼ (Gal. 4:9). Unaj k-kanáantik maʼ u yúuchultoʼon beyoʼ. Minaʼan uláakʼ baʼax maas maʼalob tiʼ u biskuba máak yéetel Jéeoba.
5. 1) ¿Baʼax kaʼapʼéel modosil u kʼáat Dios ka yanaktoʼon? 2) ¿Baʼaxoʼob ken k-il teʼ xookaʼ?
5 Utiaʼal ka kʼaj óoltaʼak juntúul máak tumen Dioseʼ unaj u yeʼesik jujunpʼéel modos uts tu tʼaan letiʼ (Sal. 15:1-5; 1 Ped. 3:4). Ichil le modosoʼobaʼ táakaʼan le fe yéetel le kabal óolaloʼ. Tuukulnakoʼon tiʼ kaʼatúul máaxoʼob tu yeʼesoʼob le modosoʼobaʼ, le oʼolal jach yaabiltaʼaboʼob tumen Dios. Ken tsʼoʼokokeʼ yaan k-ilik bix úuchik u pʼaʼatal tumen Jéeoba juntúul máak jach tu taasuba noj baʼalil kex ku tuklik táan kaʼach u biskuba tu yéetel. Le tsikbaloʼobaʼ jach yaʼab baʼaxoʼob ku kaʼansiktoʼon.
U taata «tuláakal le máaxoʼob yaan oksaj óolal tiʼoboʼ»
6. 1) ¿Bix úuchik u yeʼesik Abrahán jach ku creertik le baʼax ku yaʼalik u beetik Diosoʼ? 2) ¿Baʼaxten jeʼel u páajtal u yaʼalaʼaleʼ jach kʼaj óoltaʼab Abrahán tumen Jéeoba?
6 Le Bibliaoʼ ku yaʼalikeʼ Abrahaneʼ «tu yoksaj óoltaj u tʼaan Yuumtsil», le oʼolal «kʼuch u beetuba taata[il] tiʼ tuláakal le máaxoʼob yaan oksaj óolal tiʼoboʼ» (Gén. 15:6; Rom. 4:11). Abrahaneʼ tu pʼataj u yotoch, tuláakal le baʼaxoʼob yaantiʼ yéetel u amigoʼob utiaʼal u bin kajtal táanxel luʼumil (Gén. 12:1-4; Heb. 11:8-10). Letiʼeʼ jach nojoch u fe kaʼach tiʼ Dios. Yéetel kex máan yaʼab jaʼaboʼobeʼ maʼ xuʼul u yeʼesik u fejiʼ. Jejeláas bix úuchik u yeʼesik, maases le ka tu yóotaj u kʼub Isaak, u hijo, utiaʼal u beetik baʼax ku yaʼalik Dios (Heb. 11:17-19). Dioseʼ u yojel Abrahaneʼ jach yaan u fe, le oʼolal tu yilaj letiʼeʼ juntúul maʼalob máak yéetel tu yaʼaleʼ letiʼ yéeye, wa u kʼaj óol (Gén. 18:19). Jéeobaeʼ maʼ chéen u yojel kuxaʼan Abrahaniʼ, baʼaxeʼ jach tu yaabiltaj yéetel tu yilaj bey u amigoeʼ (xokaʼak Santiago 2:22, 23).
7. ¿Baʼax jach u yojel Abrahán yoʼolal le baʼaxoʼob ku yaʼalik u beetik Jéeobaoʼ, yéetel bix úuchik u yeʼesik?
7 Dioseʼ tu yaʼalaj tiʼ Abrahaneʼ, u chʼiʼibaloʼobeʼ yaan u kʼamkoʼob le Luʼum Aʼalaʼan u Tsʼaʼabaloʼ yéetel yaan u yaʼabtaloʼob «jeʼel bix xan yaʼabil u [arenail] u jáal kʼáaʼnáabeʼ» (Gén. 22:17, 18). Kex maʼ tu yilaj u béeytal le baʼax aʼalaʼabtiʼoʼ, maʼ xuʼul u kʼubik u yóol tiʼ Jéeobaiʼ. U yojel tuláakal le baʼax ku yaʼalik u beetkoʼ jach yaan u béeytal. Yéetel le bix úuchik u kuxtaloʼ tu yeʼesaj jach ku creertik (xokaʼak Hebreob 11:13). ¿Kux túun toʼon? ¿Ku yilik wa Dios yaantoʼon fe jeʼex le yanchaj tiʼ Abrahanoʼ?
Le máaxoʼob yaan u fejoʼoboʼ ku kʼubik u yóoloʼob tiʼ Jéeoba
8. ¿Baʼaxoʼob maas ku tsʼíiboltik máak?
8 Ichil le baʼaxoʼob maas ku tsʼíiboltik máakoʼ tiaʼan le maʼ u kʼojaʼantaloʼ, ka tsʼoʼokok u beel yéetel ka yanak u paalal. Kex maʼ kʼaas mix junpʼéel tiʼ le baʼaloʼobaʼ, yaan kʼiineʼ maʼ tu béeytaloʼob. ¿Baʼax jeʼel k-beetik wa tiʼ toʼon ka úuchuk beyoʼ? Le baʼax ken k-beetoʼ yaan u yeʼesik bukaʼaj muʼukʼaʼanil k-fe.
9, 10. 1) ¿Baʼax ku beetik jujuntúul máaxoʼob utiaʼal ka béeyak baʼax ku tsʼíiboltkoʼob? 2) ¿Ka kʼubik wa a wóol tiʼ le baʼaxoʼob ku yaʼalik Jéeobaoʼ?
9 Wa k-kʼáat ka kʼaj óoltaʼakoʼon tumen Jéeoba jeʼex le máaxoʼob chúukpaj u yóol u meyajtoʼoboʼ, maʼ maʼalob ka xiʼikoʼon tu paach chéen baʼaxoʼob k-tsʼíiboltik ku binoʼob tu contra le baʼaxoʼob ku yaʼalikoʼ. Yanoʼobeʼ ku binoʼob tu contra baʼaxoʼob ku yaʼalik le Biblia ken u kʼamoʼob wa baʼax tsʼaakiloʼ. Yanoʼob xaneʼ ku yúuchultiʼob bey ken u kʼamoʼob meyajoʼob ku luʼsik le tiempo unaj u máansik yéetel u familia wa ku beetik u pʼáatal maʼ u binoʼob teʼ muchʼtáambaloʼoboʼ. Yéetel yanoʼobeʼ ku yúuchultiʼob bey ken joʼopʼok u kaxtikoʼob máax yéetel kun tsʼoʼokol u beeloʼob yéetel máax maʼatech u meyajtik Dios. Le máaxoʼob beetik beyaʼ, ¿jach wa tu jaajil ku yilkoʼob jatsʼuts u biskubaʼob yéetel Jéeoba? Tuukulnakoʼon tiʼ le baʼax tu beetaj Abrahanoʼ. Wa ka náakak u yóol u páaʼt u béeytal le baʼaxoʼob u yaʼalmaj Dios yéetel ka u chʼaʼtukult u maʼalobkíintik le bix u kuxtal kaʼach, jeʼex ka u beet u yotoch wa tuʼux yéetel ka jach kʼaj óoltaʼakeʼ, ¿bix jeʼel u yilaʼal kaʼach tumen Jéeobaeʼ? (Ket yéetel Génesis 11:4.) ¿Jeʼel wa u seguer u yáantaʼal kaʼacheʼ?
10 ¿Baʼax maas ka tsʼíiboltik ka béeychajak? ¿Yaan wa tech le fe jeʼel u yáantkech utiaʼal u seguer a páaʼtik Jéeoba, le máax aʼalik u tsʼáaik tuláakal baʼax maʼalob ka tsʼíiboltikoʼ? (Sal. 145:16.) Maʼ u tuʼubultoʼoneʼ, jeʼex úuchik tiʼ Abrahaneʼ, yaan tiʼ le baʼaxoʼob ku yaʼalik u beetik Diosoʼ, ku xáantal ken béeychajkoʼob, maʼ jeʼex k-tuklikoʼ. Baʼaleʼ wa k-ilik k-eʼesik fe, jeʼex tu beetil Abrahanoʼ, Dioseʼ maʼ ken u tuʼubsoʼon, yaan u kʼuchul u kʼiinil k-kʼamik yaʼab utsiloʼob (Heb. 11:6).
Juntúul máax kabal u yóol yéetel juntúul máax kaʼanal u yich
11. Maʼ xaaneʼ, ¿baʼax meyajiloʼob tu beetaj Coré, yéetel bix úuchik u meyajtik Jéeoba ich yaʼab jaʼaboʼob?
11 Moisés yéetel Coré úuchjeakileʼ maʼ junpʼéeliliʼ u yilaʼaloʼob tumen Jéeobaiʼ. ¿Baʼaxten? Tumen maʼ junpʼéeliliʼ baʼax tu beetoʼob yoʼolal le baʼaxoʼob tu yaʼalaj Jéeoba ka beetaʼakoʼ. Koʼoneʼex ilik baʼaxoʼob tu beetaj Coré, juntúul levita ku taal tiʼ u chʼiʼibal Coat. Letiʼeʼ yanchaj u páajtalil u yilik bix úuchik u salvartaʼal le israelitaʼob teʼ Chak kʼáaʼnáaboʼ, maʼ xaaneʼ áantajnaj utiaʼal u xuʼulsaʼal tiʼ le máaxoʼob maʼ tu yuʼuboʼob tʼaan tu jáal u witsil Sinaíoʼ yéetel áantajnaj utiaʼal u bisaʼal u arcail le núuptʼaanoʼ (Éxo. 32:26-29; Núm. 3:30, 31). Chúukpaj u yóol u meyajt Jéeoba ich yaʼab jaʼaboʼob, le oʼolal jach ku yeʼesaʼal tsiikil tiʼ tumen yaʼab israelitaʼob.
12. Jeʼex u yeʼesik le foto yaan teʼ táan juʼun 28, ¿baʼax tu beetaj Coré tumen kaʼanchaj u yich?
12 Baʼaleʼ le táan u binoʼob tu bejil le Luʼum Aʼalaʼan u Tsʼaʼabaloʼ, joʼopʼ u tuklik maʼ maʼalob le bix u nuʼuktaʼal u kaajal Diosoʼ. Letiʼ yéetel 250 máakoʼob jach kʼaj óolaʼanoʼob teʼ kaajoʼ, tu yóotoʼob u kʼexoʼob jujunpʼéel baʼaloʼob. Maʼ xaaneʼ tu tukloʼob táan u yáantaʼaloʼob tumen Dios, le oʼolal tu yaʼaloʼob maʼ maʼalob bix u nuʼuktaj Moisesiʼ. Tu yaʼaloʼobtiʼ yéetel Aarón, u sukuʼun: «¡Wayeʼ mix máakeʼex! Tuláakal le kaajoʼ tsʼoʼok u junpáaykuntaʼal tumen [Dios]» (Núm. 16:1-3). ¿Máasaʼ jach kaʼanchaj u yich? Moiseseʼ tu núukajtiʼ: «Yuumtsileʼ bíin u yeʼes máax u tiaʼal» (xokaʼak Números 16:5). Ka áakʼabchaj tuláakʼ kʼiineʼ Coré yéetel le máaxoʼob tu tsʼáajubaʼob tu tséeloʼ kíimoʼob (Núm. 16:31-35).
13, 14. ¿Bix úuchik u yeʼesik Moisés letiʼeʼ kabal u yóol?
13 Moiseseʼ maʼ tu beetaj jeʼex Coreiʼ, «tu jaajileʼ Moiseseʼ juntúul jach kabal óolal máak teʼ luʼumaʼ» (Núm. 12:3). ¿Bix úuchik u yeʼesik kabal óolal? Letiʼe úuchik u beetik le baʼax aʼalaʼabtiʼ tumen Diosoʼ (Éxo. 7:6; 40:16). Teʼ Bibliaoʼ mix juntéen ku chíikpajal tuʼux ku tʼaan tu contra le baʼax ku yaʼalik Diosoʼ bey xan wa maʼ maʼalob u yilik le baʼax ku tuklikoʼ. Tuukulnakoʼon le ka tu yaʼalaj Jéeoba ka beetaʼak junpʼéel tabernáculo tuʼux kun adorartbiloʼ. Aʼalaʼab tiʼ Moisés jach bix unaj u chuʼuyul le nookʼoʼoboʼ, baʼax color u tiichʼiloʼob, jaypʼéel jookʼoboʼob ken u bise yéetel uláakʼ baʼaloʼob (Éxo. 26:1-6). Ichil tuláakal le jaʼaboʼob tsʼoʼok u máanoʼ, Jéeobaeʼ tsʼoʼok u tsʼáaik jejeláas máaxoʼob nuʼuktik u kaajal. Maʼ xaaneʼ ku lúubul k-óol ken k-il bix u yaʼalikoʼob ka k-beet wa baʼax. Baʼaleʼ k-Taata yaan teʼ kaʼanoʼ juntúul superintendente jach maʼalob u nuʼuktaj, yéetel u yojel le máaxoʼob meyajtikoʼ yaan u beetkoʼob baʼax ku yaʼalik, le oʼolal ku tsʼáaik meyaj u beetoʼob. Yéetel ku yaʼalik jach bix unaj u beetaʼal wa baʼax. Le ka aʼalaʼab tiʼ Moisés jach bix unaj u beetik le tabernaculooʼ, maʼ kʼuuxilnajiʼ mix tu tuklaj wa táan u taasaʼal mix baʼaliliʼ wa maʼ tu chaʼabal u beetik mix baʼal jeʼex uts tu tʼaaneʼ. Baʼaxeʼ jach tu yuʼubaj tʼaan yéetel tu yilaj ka beetaʼak le meyaj jach jeʼex úuchik u yaʼalaʼaltiʼoʼ (Éxo. 39:32). ¿Máasaʼ jach tu yeʼesaj kabal óolal? Letiʼeʼ u yojleʼ le meyajoʼ utiaʼal Dios, yéetel letiʼeʼ chéen tsʼaʼan u nuʼukte.
14 Ka máan kʼiineʼ tu aktáantaj uláakʼ talamil, baʼaleʼ tu kaʼa eʼesaj kabal óolal. Letiʼe kʼiin ka joʼopʼ u tʼaan le israelitaʼob tu contraoʼ. Letiʼeʼ pʼuʼuji yéetel maʼ tu tsʼáaj nojbeʼenil tiʼ Jéeobaiʼ. Le oʼolal aʼalaʼabtiʼ maʼ ken u yoks le kaaj teʼ Luʼum Aʼalaʼan u Tsʼaʼabaloʼ (Núm. 20:2-12). Kʼaʼajaktoʼoneʼ letiʼ yéetel Aarón, u sukuʼuneʼ, úuch joʼopʼok u yuʼubikoʼob bix u sakach tʼaan le israelitaʼoboʼ. Baʼaleʼ úuchik u beetik chéen junpʼéel baʼax maʼ maʼalobeʼ, aʼalaʼabtiʼ maʼ ken u yil u béeytal le baʼax úuch joʼopʼok u páaʼtikoʼ. ¿Baʼax tu beetaj le ka aʼalaʼabtiʼoʼ? Kex lúub u yóoleʼ tu yeʼesaj kabal óolal, tumen tu kʼamaj le baʼax tu yaʼalaj Jéeobaoʼ. U yojel Dioseʼ mantatsʼ toj baʼax ku beetik (Deu. 3:25-27; 32:4). Jeʼex túun k-ilkoʼ, Moiseseʼ juntúul tiʼ le máaxoʼob kʼaj óoltaʼab tumen Jéeoba chúukpaj u yóol u meyajtoʼ (xokaʼak Éxodo 33:12, 13).
Kʼaʼabéet kabal k-óol utiaʼal k-beetik baʼax ku yaʼalik Jéeoba
15. ¿Baʼax k-kanik tiʼ le baʼaxoʼob tu beetaj Coreoʼ?
15 Bejlaʼeʼ le sukuʼunoʼob nuʼuktik le meyaj ku beetik u kaajal Diosoʼ, ku kʼaʼabéettal u chʼaʼtuklikoʼob yaʼab baʼaloʼob, le oʼolal yaan kʼiineʼ ku kʼaʼabéettal u kʼexkoʼob jujunpʼéel baʼaloʼob. ¿Bix k-uʼuyikba ken úuchuk lelaʼ? Kʼaʼajaktoʼoneʼ le bix ken k-uʼuyikbaoʼ yaan yil yéetel le bix k-bisikba yéetel Jéeobaoʼ. Maʼ unaj k-beetik le baʼax tu beetaj Coreoʼ. Letiʼ yéetel le máaxoʼob tu tsʼáajubaʼob tu tséeloʼ xuʼul u kʼaʼamloʼob tumen Dios, tumen tuukulnajoʼob chéen tiʼ letiʼobeʼ ka tu beetoʼob chéen baʼax u kʼáatoʼob, beyoʼ tu yeʼesoʼob kaʼanal u yichoʼob yéetel minaʼan u fejoʼob. Coreiʼ maʼ tu tsʼáaj cuenta kex Moisés chʼaʼtuklik baʼax kun beetbileʼ, u jaajileʼ Jéeoba nuʼuktik le kaajoʼ. Le oʼolal xuʼul u kʼubik u yóol tiʼ le máaxoʼob tsʼaʼan tumen Jéeoba utiaʼal u nuʼuktik u kaajaloʼ. ¿Máasaʼ maas maʼalob kaʼach ka u kʼub u yóol tiʼ Jéeoba? Letiʼeʼ jeʼel kaʼach u yáantik u yil tuláakal jeʼex unajeʼ wa u beetik wa baʼax kʼeexil wa ku yilik kʼaʼabéet. Baʼaleʼ Coreiʼ maʼ tu beetaj beyoʼ, tumen kaʼanchaj u yicheʼ tu kʼaskúuntaj tuláakal le baʼaxoʼob maʼalobtak tu beetaj tu táan Jéeoba ich yaʼab jaʼaboʼoboʼ.
16. ¿Baʼax k-kanik tiʼ le bix úuchik u yeʼesik kabal óolal Moisesoʼ?
16 Le baʼax úuch tiʼ Coreoʼ jach yaʼab baʼax ku kaʼansiktoʼon, maases tiʼ le ancianoʼob teʼ múuchʼuliloʼ. Jach unaj k-eʼesik kabal óolal, tumen jeʼel u yáantkoʼon k-kʼub k-óol tiʼ Jéeoba yéetel ka seguernak k-beetik le baʼaxoʼob ku yaʼalik le máaxoʼob tsʼaʼan u nuʼuktoʼob u kaajal Diosoʼ. ¿K-ilik wa k-eʼesik kabal óolal jeʼex tu beetil Moiseseʼ? ¿K-eʼesik wa tsiikil tiʼ le sukuʼunoʼoboʼ yéetel k-beetik wa le baʼax ku yaʼalikoʼoboʼ? ¿K-ilik wa maʼ u lúubul k-óol ken beetaʼak baʼaxoʼob maʼ jach uts t-tʼaaniʼ? Wa k-beetkeʼ k-eʼesik yiijchajaʼan k-tuukul, kabal k-óol yéetel k-uʼuyik tʼaan; beyoʼ Jéeobaeʼ yaan u kʼaj óoltikoʼon, yéetel yaan u jach yaabiltkoʼon.
«Yuumtsileʼ u kʼaj óol le máaxoʼob u tiaʼaloʼ»
17, 18. ¿Baʼax jeʼel u yáantkoʼon utiaʼal maʼ u xuʼulul k-lúubul utsil tiʼ Jéeobaeʼ?
17 ¿Máasaʼ jach yaʼab baʼax k-kanik ken tuukulnakoʼon tiʼ le máaxoʼob tu natsʼaj Jéeoba ichil u kaajal yéetel tu bisubaʼob tu yéeteloʼ? Jeʼex tsʼoʼok k-ilkoʼ kex Abrahán yéetel Moisés, tu beetoʼob baʼaxoʼob maʼ jach maʼalob yéetel kʼebanoʼob jeʼex toʼoneʼ, páajchaj u tiaʼalintaʼaloʼob tumen Dios. Baʼaleʼ Coreiʼ náachchaj tiʼ Jéeoba yéetel xuʼul u lúubul utsil tiʼ. Tumen jeʼel u yúuchultoʼon xan beyoʼ, maʼalob ka k-tukle: «¿U kʼaj óolen wa Jéeoba bey juntúul máax chúukaʼan u yóol tiʼeʼ? ¿Baʼax kin kanik tiʼ le máakoʼob ku yaʼalik le Bibliaoʼ?».
18 ¿Máasaʼ ku kiʼimaktal k-óol k-ojéeltik Jéeoba natsʼoʼon tu yiknal yéetel ku yilkoʼon bey jach koʼoj k-tojoleʼ? Wa ku chúukpajal k-óol yéetel k-eʼesik fe yéetel kabal óolaleʼ, cada kʼiin ku máaneʼ maas yaan u yilkoʼon bey jach koʼoj k-tojoleʼ. ¿Máasaʼ jach nojoch baʼal ka u kʼaj óoltoʼon? Yoʼolal leloʼ jach yaantoʼon kiʼimak óolal bejlaʼeʼ yéetel jeʼel u páajtal k-kʼamik yaʼab bendicionoʼob teʼ kʼiinoʼob ku taaloʼ (Sal. 37:18).
Baʼaloʼob unaj k-kʼaʼajsik
• ¿Baʼax beetik k-bisikba tubeel yéetel Jéeoba?
• ¿Bix jeʼel k-eʼesik junpʼéel fe jeʼex le yanchaj tiʼ Abrahanoʼ?
• ¿Baʼax k-kanik tiʼ Coré yéetel tiʼ Moisés?
[U kʼáatchiʼiloʼob le xookoʼ]
[Foto yaan teʼ táan juʼun 26]
¿K-creertik wa yaan u béeykuntik Jéeoba baʼax ku yaʼalik, jeʼex tu beetil Abrahaneʼ?
[Foto yaan teʼ táan juʼun 28]
Coreiʼ maʼ tu kʼamaj yéetel kabal óolal le bix úuchik u nuʼuktik Jéeoba u kaajaloʼ
[Foto yaan teʼ táan juʼun 29]
¿U kʼaj óoloʼon wa Jéeoba bey máaxoʼob ku yuʼubikoʼob tʼaan yéetel yaantiʼob kabal óolaleʼ?
