?Be kunnin amun kpo?

KƐ E wun i kɛ ndɛ nga sran kun mɔ e lafi i su’n kan kleli e’n, ɔ ti gblɛ’n, e awlɛn’n kpɛ e klun. E kwla fa ya ble annzɛ e kwla se e wun kɛ b’a sokpa e. Gblɛ’n saci janvuɛ, ɔ saci aja. Ɔ yo maan sran’m be sika kpanngban kpa fi be sa.

?Yɛ sɛ Ɲanmiɛn i su ndɛ nga be kan kleli amun’n, yɛ ɔ ti gblɛ’n nin? ?I sɔ’n yó amun sɛ? Sɛ amun faman Ɲanmiɛn sulɛ’n kanman ngowa’n, i sɔ’n kwla yo amun ya lele kpe nun kɛ nga ɔ fa yoli asɔnun kɔfuɛ nga mun sa.

● DIANI seli kɛ: “Ɔ yoli min kɛ asɔnun’n w’a sokpa min sa.”

● LUISI seli kɛ: “N fali ya kpa. Ɔ yoli min kɛ be lakali min be boli min ti mankun nzue nun sa. Naan ninnge ngbɛnngbɛn mun yɛ n fali min wla’n n guali su ɔ.”

Amun kwlá bumɛn i kaan sa kɛ be nga be kannin Ɲanmiɛn i su ndɛ kleli amun’n, be buali ato. Afin atrɛkpa’n amun lafi sran sɔ’m be su kpa yɛ kɛ amun niɛn i sa’n, be ɲinfu be kwlá yoman amun tɛ. Ɔ kwla yo kɛ amun si nin amun nin, annzɛ Ɲanmiɛn ɲrun jranfuɛ wie, annzɛ pastɛli wie annzɛ kusu amun janvuɛ kpa wie sa. Kɔlɛ’n, kɛ ɔ fɛ i amun kaan nun lele’n, amun lafi Ɲanmiɛn i su ndɛ wie mɔ be kan’n su. ?Sanngɛ yoo, amun bumɛn i kɛ ndɛ nga sran kpanngban kpa be lafi su bɔbɔ’n, ɔ kwla yo ato? Laa Amlɛnkɛn’m be Plezidan kun seli kɛ: “Nán kɛ bé kán gblɛ ndɛ kun bé flán nun leleele’n i ti yɛ maan ɔ́ káci nanwlɛ ɔ.”—Franklin Roosevelt.

?Sɛ be kpɛli amun gblɛ’n, wafa sɛ yɛ amun kwla wun i wlɛ ɔ? Le kun’n, kɛ Zezi srɛ́ Ɲanmiɛn’n, ɔ seli i kɛ: “Ɔ ndɛ’n ti nanwlɛ.” (Zan 17:17) Ɔ maan ndɛ ng’ɔ o Biblu’n m’ɔ ti Ɲanmiɛn Ndɛ’n i nun’n, ɔ kwla uka amun naan amun a si ndɛ ng’ɔ ti nanwlɛ’n.

I ti’n, Ɲanmiɛn i su gblɛ nnun mɔ sran’m be kpɛ’n, é srɛ́ amun kɛ amun man Biblu’n i atin naan ɔ di be su nanwlɛ kle amun. Sɛ amun yo i sɔ’n, amún wún wafa nga nanwlɛ’n kwla yo naan amun mɛn dilɛ wafa’n w’a yo kpa ekun’n.