?Wan Man i Bin Giaman Long Yu?

TAEM yu trastem wan man be biaen yu faenemaot se hem i giaman long yu, samting ya i save mekem yu yu harem nogud bigwan. Maet yu sem, yu kros, mo yu no moa trastem hem tu. Taem wan man i giaman, hem i spolem ol gudfala fren blong hem, mo hem i spolem mared blong hem tu. Mo taem ol man oli bilivim wan giaman tok, oli save lusum bigfala mane.

?Olsem wanem sipos yu faenemaot se save we yu gat long saed blong God, i giaman nomo? Maet yu yu strong long wan jos mo yu givim evri samting we yu gat long jos ya. Sipos yu faenemaot we jos ya i tijim samting we i giaman, ating bambae yu harem nogud bigwan. Sam man we samting ya i hapen long olgeta, oli talemaot tingting blong olgeta se:

● “Mi mi harem nogud, from we mi bin trastem gud jos, be hem i lidim mi mi gorong.”—DEANNE.

● “Mi harem se mi kros. Samting we mi putum tingting blong mi i stap strong long hem, mo ol samting we mi stap wok had from, be oli giaman nomo. Mi harem olsem se mi bin westem taem blong mi.”—LUIS.

Maet yu no glad blong harem man i talem long yu se tijing we yu kasem long saed blong God i giaman, mo yu no wantem tingbaot samting ya tu. Maet yu harem olsem, from we tijing ya we yu kasem i kam long wan man we yu trastem hem mo hem i no wan man we i wantem spolem yu. Maet hemia papa mama blong yu, wan pris, wan pasta, no wan gudfala fren blong yu. Maet yu bin bilif long tijing ya stat taem yu smol nomo kam kasem naoia. Be nating se plante man oli bilif long wan tijing, samting ya i no min se tijing ya i tru. Franklin D. Roosevelt, we hem i wan presiden blong Amerika bifo, i talem se: “Wan man i save talem wan giaman stori bakegen mo bakegen hamas taem, be samting ya bambae i no save jenisim giaman stori ya blong i kam wan tru stori.”

?Wanem bambae i givhan long yu blong save sipos wan man i bin giaman long yu? Wan dei, taem Jisas i prea long God hem i talem se: “Tok blong yu i tru olgeta.” (Jon 17:17) Yes, Tok blong God, Baebol, i gat olgeta save we yumi nidim, blong yumi luksave wanem tijing i tru mo wanem tijing i giaman.

Baebol i mekem faef giaman tingting long saed blong God oli kamaot long klia ples. I gud yu luk wanem we Baebol i talem. Olsem nao, bambae yu faenemaot ol gudgudfala samting we trutok i save mekem long laef blong yu.