Duna na bay Namakak Nimo?

WALA nay mas sakit pa kay sa pagkasayod nga gibakakan ka diay sa imong gisaligan. Tingali maulawan ka, masuko, o mobati pa ganing giluiban. Ang pagpamakak makabungkag sa panaghigala ug kaminyoon; tungod niini ang mga tawo mawad-ag minilyong dolyares.

Busa handurawa ang imong bation kon imong masayran nga gibakakan ka bahin sa Diyos. Kon ikaw relihiyoso, dako kinig epekto, sama sa komento niini nga mga maninimba:

● “Gibati nakong giluiban ko sa simbahan.”—DEANNE.

● “Naglagot ko. Gibati nakong giilad ko ug kawang lang ang akong mga paglaom ug tumong.”—LUIS.

Tingali wala ka magtuong ikaw gibakakan bahin sa Diyos. Lagmit ang imong kahibalo naggikan sa mga tawong imong gisaligan ug dili gayod motuyo ug pasakit kanimo—ang imong ginikanan, pari, pastor, o suod nga higala. Tingali dugay ka nang nagtuo sa usa ka pagtulon-an. Apan mouyon ka ba nga bisan ang pagtulon-ang gidawat sa kadaghanan posibleng bakak diay? Ang kanhing presidente sa U.S. nga si Franklin D. Roosevelt uyon niini kay siya miingon: “Ang pagsublisubli sa bakak dili maghimo niining tinuod.”

Unsaon nimo pagkahibalo nga ikaw gibakakan? Kas-a, si Jesus nag-ampo sa Diyos: “Ang imong pulong maoy kamatuoran.” (Juan 17:17) Oo, ang Pulong sa Diyos, ang Bibliya, motabang kanato nga makita ang kalainan tali sa kamatuoran ug kabakakan.

Palihog susiha ang gibutyag sa Bibliya bahin sa lima ka komon nga bakak bahin sa Diyos. Imong makita kon sa unsang paagi ang kamatuoran makapabag-o sa imong kinabuhi.