En dimoun in deza koz manti avek ou?

NAPA bokou keksoz ki pli fermal ki konnen ki en dimoun ki ou annan konfyans ladan in koz manti avek ou. Petet ou pou santi ou anbarase, e menm ankoler ki sa dimoun in trai ou. Mansonz i kas bann lanmitye ek maryaz; i’n fer dimoun perdi en kantite larzan.

Prezan, zis mazinen ki mannyer ou ti pou santi si ou ti dekouver ki en dimoun in koz manti avek ou lo Bondye. Si ou relizye, i kapab annan en gran lefe lo ou, parey i ti le ka pour sa bann dimoun ki ti al legliz:

● “Mon ti santi ki mon’n ganny trai par legliz.”​—DEANNE.

● “Mon ti ankoler. Mon ti santi konmsi mon’n ganny anbete, ou a krwar mon bann lespwar ek lobzektif pa ti vo lapenn.”​—LUIS.

Kekfwa ou pa oule mazinen ki en dimoun in koz manti avek ou lo Bondye. Petet ou paran, en pret, en paster ouswa en zanmi pros ki’n ansenny ou sa bann keksoz, zot bann dimoun ki ou annan konfyans ladan e ki pa pou anvi fer ou ditor par ekspre. I kapab ki ou krwar dan en lansennyman ki ou konnen depi ptipti. Me, eski pa ou pou dakor ki menm en keksoz ki bokou dimoun i krwar ladan i kapab fo? Ansyen Prezidan Leta-z-ini, Franklin Roosevelt ti rekonnet sa realite akoz i ti dir: “Repetisyon pa fer en mansonz vin en laverite.”

Ki mannyer ou pou konnen si en dimoun in koz manti avek ou? En fwa Zezi ti dir Bondye dan lapriyer: “Ou parol i laverite.” (Zan 17:17) Wi, dan Labib i annan sa ki nou bezwen pour disteng laverite ek mansonz.

Atraver Labib nou kapab aprann laverite lo senk mansonz lo Bondye. Ou pou vwar ki mannyer laverite i kapab sanz ou lavi pour enn pli meyer.