Ndi Ẹkam Ẹbabian̄a Fi?

IWAKKE se isibiakde owo nte ndifiọk ke owo emi afo enen̄erede okpono abian̄a fi. Utọ n̄kpọ oro ekeme ndinen̄ede ndiọk owo esịt, nnam owo bụt, nnyụn̄ nnam enye oforo nditen̄. Abian̄a ababiat ufan ye ndọ. Mbon abian̄a ẹsinyụn̄ ẹda nneminua ẹbọ mme owo ata ediwak okụk.

Kere nte ekpetiede fi ke idem ndifiọk ke kpukpru se ẹkpepde fi ẹban̄a Abasi ẹdi nsu. Edieke edide owo emi esinen̄erede esịn idem ke n̄kpọ Abasi, ekeme nditie fi ke idem nte eketiede mme aka ufọkabasi emi:

● “Eketie nte ufọkabasi ẹdian mi n̄kpan̄ ke enyịn.”​—DEANNE.

● “Esịt ama ayat mi. Ẹma ẹbian̄a mi tutu etie mi nte ke ofụri se n̄kodoride enyịn nnyụn̄ nduakde ọkọwọrọ ikpîkpu.”​—LUIS.

Ekeme ndisọn̄ fi ndinịm ke kpukpru se ẹkpepde fi ẹban̄a Abasi ẹdi nsu. Ekeme ndidi owo emi afo enen̄erede okpono, nte ete ye eka fo, akpan ufan fo, oku m̀mê pastọ ufọkabasi mbufo—kpa mbon emi ekerede ke ikpekemeke-keme ndibian̄a fi—ẹkpep fi mme n̄kpọ emi. Ndien ekeme ndidi ẹkekpep fi mme n̄kpọ emi toto ke edet iba. Edi ndi ukereke ke n̄kpọ oro ata ediwak owo ẹnịmde ke akpanikọ ekeme ndidi nsu? Franklin D. Roosevelt, akani adaibuot ukara United States ọkọdọhọ ete: “Nsu ikemeke-keme ndikabade ndi akpanikọ idem ekpededi ofụri ererimbot ẹdọhọ ke edi akpanikọ.”

Akpasan̄a didie ọfiọk m̀mê ẹkam ẹbabian̄a fi? Jesus ọkọdọhọ Abasi ke akam ete: “Ikọ fo edi akpanikọ.” (John 17:17) Ih, Ikọ Abasi, kpa Bible ekeme ndinam owo ọfiọk se idide akpanikọ ye se idide nsu.

Nnyịn imesịn udọn̄ inọ fi ite ayak Bible ayarade ikpọ nsu ition oro ẹsude ẹdori Abasi. Edieke anamde oro, afo oyokụt nte akpanikọ edikpụhọrede uwem fo.