Ginbutigan Ka Na Bala?

MASAKIT gid kon ang isa nga imo ginasaligan nagbutig sa imo. Mahimo nga mahuy-an ka, maakig, kag magbatyag nga gintonto. Ginaguba sang pagbutig ang pag-abyanay kag pag-asawahay. Sa sini man nga paagi nakapanguarta ang iban sing minilyon ka dolyar.

Ano ayhan ang batyagon mo kon nahibaluan mo nga ginbutigan ka parte sa Dios? Kon relihioso ka, mahimo nga maugot ka pareho sa ginsiling sang mga masunod:

● “Daw gintonto lang ako sang akon relihion.”—DEANNE.

● “Naakig ako kay daw naisahan ako. Ano pa ang pulos sang akon mga handum!”—LUIS.

Mahimo nga para sa imo, imposible gid nga butigan ka parte sa Dios. Ang imo mga ginapatihan mahimo naghalin sa isa nga imo ginasaligan kag wala sing tuyo nga tontohon ka—imo ginikanan, pari, pastor, ukon suod nga abyan. Mahimo nga may namat-an ka na nga pagpati. Pero indi bala nga bisan pa madamo ang nagapati sa isa ka panudlo, posible gihapon nga sala ini? Nagaugyon sa sini ang presidente anay sang Estados Unidos nga si Franklin D. Roosevelt. Nagsiling sia: “Ang butig, bisan sulitsuliton, butig gihapon.”

Paano mo mahibaluan nga ginbutigan ka? Sa pangamuyo ni Jesus, nagsiling sia sa Dios: “Ang imo pulong kamatuoran.” (Juan 17:17) Huo, paagi sa Pulong sang Dios, ang Biblia, mahibaluan naton kon ano ang matuod kag kon ano ang butig.

Basaha ang pagbuyagyag sang Biblia sa lima ka kinaandan nga kabutigan parte sa Dios. Ang paghibalo sang kamatuoran parte sini makapabag-o sang imo kabuhi.