Nabiktimaka Kadin iti Kinaulbod?
Nabiktimaka Kadin iti Kinaulbod?
NAKASAKSAKIT no maammuam a nagulbod kenka ti tao a pagtaltalkam. Mabalin a maibabain, makapungtot, wenno mariknam a naliputanka. Gapu iti panagulbod, madadael ti relasion dagiti aggayyem ken agassawa, mapukawan met dagiti tattao iti minilion a kuarta.
Ngem ania ti riknam no maammuam nga ulbod ti naibaga kenka maipapan iti Dios? No napeklanka a manamati, mabalin a nasakit ti nakemmo, kas iti kinuna dagitoy a mannakimisa:
● “Makunak a liniputannak ti simbaan.”—DEANNE.
● “Makapungtotak ta naallilawak—awanen serserbi dagiti plano ken namnamak.”—LUIS.
Mabalin a dimo pagarupen nga ulbod ti naibaga kenka maipapan iti Dios. Mabalin nga imbaga dayta ti tao a pagtaltalkam a dina panggep a masaktanka—nalabit dagiti nagannakmo, maysa a padi, pastor, wenno nasinged a gayyemmo. Mabalin a nabangonam dayta a sursuro. Ngem mamatika kadi a mabalin nga ulbod ti patpatien ti kaaduan? Umanamong ti dati a presidente ti U.S. a ni Franklin D. Roosevelt, ta kinunana: “Ti ulbod saan nga agbalin a pudno uray no maulit-ulit a maibaga.”
Kasano a maammuam nga ulbod ti naisuro kenka? Kinuna ni Jesus iti kararagna iti Dios: “Ti saom ket kinapudno.” (Juan 17:17) Wen, naglaon ti Sao ti Dios, ti Biblia, iti kasapulantayo tapno mabigbigtayo ti pudno ken ulbod.
Kitaem no kasano nga ibutaktak ti Biblia ti kadawyan a lima a kinaulbod maipapan iti Dios, ket mabalbaliwan ti biagmo no maammuam ti kinapudno.