Bumin I Awm Em?

I MI rin tak tuemawin a bum che tluka thiltawn hrehawm zâwk a awm mang meuh lo vang. Hmuhsit nia inhriatna te, thinurna te, a nih loh leh phatsan nia inhriatna hialte i nei ngei ang. Dâwt thu chuan inṭhianna leh inneihna a tichhia a; mi tam takte hnên ata dollar maktaduai tam tak a bum chhuak a ni.

Pathian chungchânga inbumna i tawh huna i awm dân tûr chu han ngaihtuah chhin teh. Sakhaw mi tak i nih chuan heta târ lan mite ang bawkin i tuar na hle ngei ang:

● “Kohhranin min bum ṭhak niin ka hria.”—DEANNE-I.

● “Ka thin a ur hle a. Buma awm nia inhriatna ka nei a—ka beiseina leh thiltum zawng zawng engmah lovah a chang zo ta.”—LUIS-A.

Pathian chungchânga bumna chu tâwk thei tûrah i indah lo pawh a ni thei. A chungchâng i hriatte chu i mi rin tak leh nangmah tihnat tumna rêng nei lo i nu leh pate, puithiam te, pastor te, a nih loh leh i ṭhian hnai takte hnên aṭangin a ni thei si a. Zirtîrna engemaw chu i dam chhûnga i lo rin tawhte pawh a ni thei. Mahse, mi tam takte pawm ngaih dân pawh a kal sual ve thei a ni tih i pawm dâwn lâwm ni? U.S. President hlui Franklin D. Roosevelt chuan a kal sual thei tih a hria a, heti hian a sawi a ni: “Dâwt thu hi vawi eng zât pawh sawi nawn ṭhîn mah ila thutakah a chang thei chuang lo,” tiin.

Engtin nge bum i nih leh nih loh i hriat theih ang? Isua chuan ṭum khat chu Pathian hnêna a ṭawngṭainaah: “I thu chu thutak a ni,” tiin a sawi a. (Johana 17:17) Ni e, Pathian Thu, Bible-ah chuan dâwt thu leh thutak thliar hran nâna kan mamawh tak chu a chuang a ni.

Engvângin nge Pathian chungchânga inbumna pangate chu Bible kan laihlantîr loh vang? Chutianga tihna aṭangin thutakin i nun a ṭha lama a thlâkthleng theih dân i hmu ang. (w11-E 10/01)