Okuti Ove Wakembeluale?

TYIIHAMA unene okukembwa nomunthu wayumba onthumbi. Ukunda, nokunumana, nokulitehelela okuti walavisua. Omaunkhembi ahanya oupanga, novinepo, nokupeselesa onombongo ononyingi.

Nkhele soka, oñgeni molitehelela inkha wimbuka okuti wapopilua ounkhembi konthele ya Huku. Inkha ove wapamena unene mongeleya oyo, tyipondola okukuihama unene, ngetyi tyeihamesa ovanthu ava:

● “Nelitehelela okuti ongeleya yandavisa.”—DEANNE.

● “Nanumanene unene. Andyilitehelela ngoti nalaviswa, omakevelelo ange nomahando akala tyihena esilivilo.”—LUIS.

Ove tyafuile kutavela okuti ukahi nokukembelwapo konthele ya Huku. Hamwe etyi wii wetyipopilua nomunthu uyumba unene onthumbi, iya nalumwe usoka okuti mekukembe—hamwe ombunga, onkhalamutwe yongeleya ine epanga liove. Tyafuile, otyipuka utavela tunde kohale. Mahi, kutavela okuti alo umwe otyipuka tyeliyandyana pamwe ounkhembi? Franklin D. Roosevelt wali Omutumini wo Estados Unidos, waimbuka okuti: “Okupopia apeho otyipuka katyikalesa ounkhembi otyili.”

Oñgeni upondola okuimbuka okuti wakembua? Jesus wapopila Huku melikuambelo okuti: “Ondaka yove otyili.” (João 17:17) Tyotyili, Ondaka ya Huku, Ombimbiliya ina atyiho tuesukisa opo tupunge otyili nomatutu.

Oityi uhayekela Ombimbiliya ikulekese omatutu etano ehole okupopiwa konthele ya Huku? Motale oñgeni otyili matyikalesa vali nawa omuenyo wove.