Asalim Lay Atilaan?

NO SAY sakey a panmamatalkan mo et mantilad sika, seguradon nasakitan ka. Nayarin nabaingan tan onsyodot ka, odino liknaen mon atraidor ka ni ingen. Say panagtila et deralen toy pankakaaro tan panamaley. Lapud panagtila et nasasaol so totoo na minilyon a kuarta.

Kanian isip mo pa no antoy naliknam sano naamtaan mon tila manayay imbangat ed sika nipaakar ed Dios. No debotado ka, nayarin nasakitan kan maong, a singa sarayan mimimisa:

● “Liknaen kon trinaidor ak na relihyon ko.”​—DEANNE.

● “Mansyodot ak. Liknaen kon niloko da ak, kugkugip labat manaya iray iilaloan tan ambisyon ko.”​—LUIS.

Ompan agmo anggan labay ya isipen ya atilaan ka manaya nipaakar ed Dios, lalo la no say angibangat ed sika et panmamatalkan mo tan agton balot intension a sakitan ka. Singa bilang, saray ateng mo, sakey a pari, pastor, odino kaarom. Ompan manlapud intuboy kalakal mo et papanisiaan mo lay sakey a bangat. Balet agta mipakna ka ya anggan say ideyan papanisiaan na dakel et nayarin lingo manaya? Inamin itan na datin Presidente na U.S. a si Franklin D. Roosevelt, tan imbaga to: “Agnayarin magmaliw a tua so tila lapu labat ta nauulit-ulit itan.”

Panon mon amta no kasin atilaan ka? Oniay impikasi nen Jesus ed Dios: “Say salitam et katuaan.” (Juan 17:17) On, walad Salita na Dios, say Biblia, so nakaukolan tayo pian nibiig so tua ed tila.

Akin ta no amtaen mod Biblia no antoray limaran kaslakan a katilaan nipaakar ed Dios? Nanengneng mo no panon ya umanen na katuaan so bilay mo, a parad pankaabigan mo.