Sma fruteri yu lei fu Gado?

TE WAN sma di yu ben e frutrow lei gi yu, dan dati kan hati yu srefisrefi. Kande yu ben e firi syen, kande yu ben kisi atibron, noso kande yu ben e firi leki a sma kori yu. Lei e pori mati, a e pori trowlibi, èn a e meki sma lasi milyunmilyun dala.

We dan, prakseri fa yu ben o firi te yu ben o kon sabi taki sma fruteri yu lei fu Gado. Efu yu na wan fayafaya bribiman, dan a sani disi ben o hati yu trutru. Na so a ben de tu nanga den kerkisma disi, di ben taki:

● „Mi ben feni taki a kerki kori mi.”​—DEANNE.

● „Mi ben atibron. Mi ben feni taki sma bedrigi mi, taki den sani di mi ben howpu na tapu èn den marki di mi ben abi, ben de fu soso.”​—LUIS.

Kande yu no wani bribi taki sma fruteri yu lei fu Gado. Kande den sani di yu leri komoto fu wan sma di yu e frutrow èn di no ben o du yu ogri fu espresi. Iya, kande den sani dati komoto fu yu papa nanga mama, wan priester, wan domri, noso wan bun mati. Kande yu e bribi wan leri yu heri libi langa kaba. Ma yu no e agri taki srefi wan sani di furu sma e bribi kan de wan lei? Franklin D. Roosevelt, di ben de Presidenti fu Amerkankondre, ben agri nanga a sani disi. A ben taki: „Wan lei no e tron wan tru tori soso fu di sma e taki en ibri tron baka.”

Fa yu kan kon sabi efu sma fruteri yu lei? Wan leisi di Yesus ben e begi Gado, a taki: „Yu wortu e taki san tru” (Yohanes 17:17). Iya, nanga yepi fu Gado Wortu, Bijbel, wi kan kon sabi krin san tru èn san no tru.

Meki wi go luku fa Bijbel e tyari feifi lei kon na krin di sma gwenti fruteri fu Gado. Yu o si fa den tru tori fu Bijbel o meki yu libi kon moro bun.