¿Pi kawa akgskgawikanti?

LU NITLAN limakgkatsiyaw akxni katsiyaw pi tiku xlipawanaw kinkaʼakgskgawin. Max namakgkatsiyaw pi nitu kinkaliʼakxilhni, nasitsiyaw o asta namakgkatsiyaw pi kinkastawakan. Akxni wi tiku laʼakgskgawi nialh tlan latalalin, lakxtlawa tamakgaxtokgat, chu lhuwa tumin limakgatsankgakan.

Wa xlakata, ¿tuku xmakgkatsi akxni nakatsiya pi ni xlikana tuku wanikanita xlakata Dios? Komo wix lu kanajlaniya Dios max lu nitlan nalimakgkatsiya, chuna la kaʼakgspulalh umakgolh latamanin:

● «Kmakgkatsilh pi xkiʼakgskgawimikanit kkintakanajla.» (DEANNE.)

● «Lu ksitsilh. Akxni kkatsilh pi xkiʼakgskgawikanit, pi tuku xakkanajla nakmakglhtinan, chu tuku xaklakpuwanit naktlawa nitu xlilaka xwanit.» (LUIS.)

Max asta nila nakanajlaya pi tuku katsiya xlakata Dios ni xlikana. Max masiyanin tiku lu lipawana chu nikxni lakpuwanti natlawaniyan tuku nitlan, la mintse, mintlat, chatum sacerdote, tiku pulalin mintakanajla o chatum miʼamigo. Max akxni aktsinajku xwanita asta la uku watiya kanajlaya tuku masiyanikanita. Pero ¿ni xlikana pi maski lhuwa tiku, wi tuku kanajlakgokan alistalh takatsi pi ni xaxlikana? Chuna la wa Franklin D. Roosevelt tiku mapakgsinalh kʼEstados Unidos, «akgtum taʼakgsanin nikxni xaxlikana katiwa maski makglhuwa nalichuwinankan».

¿La nakatsiyaw komo kinkaʼakgaskgawikanitan o ni? Jesús tlawanilh Dios uma oración: «Mintachuwin, talulokgtat» o xaxlikana (Juan 17:17). Chuna, kxTachuwin Dios, Biblia kinkamakgtayayan nakatsiyaw tuku xaxlikana chu tuku kaj taʼakgsanin.

Kaʼakxilhwi tuku wan Biblia xlakata pulakkitsis taʼakgsanin xlakata Dios. Akxni nakatsiya tuku xaxlikana, namakgtayayan tlakg tlan nalipina milatamat.