Xana U Tshame U Byeriwa Mavunwa?

ATI talanga timhaka leti twisaka ku vava swinene ku tlula ku hemberiwa hi munhu loyi u n’wi tshembaka. U nga ha titwa u khomisiwe tingana, u hlundzukile hambi ku ri ku titwa u kanganyisiwile. Mavunwa ma herisa vunghana ni vukati; ma endle leswaku vanhu va lahlekeriwa hi timiliyoni ta tirhandi.

Kutani, anakanya ndlela leyi a wu ta titwa ha yona loko u twa leswaku u byeriwe mavunwa malunghana ni Xikwembu. Loko u ri munhu la tinyiketeleke, vuyelo bya kona byi nga fana ni bya vanhu lava, lava nghenaka kereke:

● “A ndzi vona onge kereke yi ndzi kanganyisile.”—DEANNE.

● “A ndzi hlundzukile. Ndzi titwe ndzi xisiwile—lerova ntshembo wa mina ni tipakani ta mina ti hundzuke nyuku wa mbyana.”—LUIS.

U nga ha va u nga swi ehleketi leswaku swi nga koteka leswaku u byeriwa tidyondzo ta mavunwa malunghana ni Xikwembu. Tidyondzo leti u ti tivaka swi nga ha endleka ti huma eka munhu loyi u n’wi tshembaka naswona loyi a nga taka a nga ku twisi ku vava ku nga ri na xivangelo—ku nga vatswari va wena, muprista, mufundhisi kumbe munghana wa wena lonkulu. Swi nga ha endleka leswaku u pfumela eka tidyondzo leti u dyondzisiweke tona ku sukela loko wa ha ri ntsongo. Kambe, xana a wu pfumeli leswaku hambi ku ri dyondzo leyi hangalakeke swinene yi nga va mavunwa? Khale ka Presidente Franklin D. Roosevelt wa le United States u xiye mhaka leyi, hiloko a ku: “Ku phindha-phindha marito a swi cinci mavunwa ma va ntiyiso.”

U nga swi vona njhani loko ku ri leswaku u byeriwe mavunwa? Siku rin’wana Yesu u khongele eka Xikwembu a ku: “Rito ra wena i ntiyiso.” (Yohane 17:17) I ntiyiso leswaku Rito ra Xikwembu, ku nga Bibele, ri tamele leswi hi swi lavaka leswaku hi ta kota ku hambanisa ntiyiso eka mavunwa.

Ha yini u nga pfumeleli Bibele yi paluxa mavunwa ya ntlhanu lama tolovelekeke malunghana ni Xikwembu? U ta vona ndlela leyi ntiyiso wu nga cincaka vutomi bya wena byi va byo antswa ha yona.